Жаратылыу 35

Якъуп Бейт-Элге къайтады

1Аллах Якъупха былай айтханды:

– Мындан кетип, Бейт-Элге бар да, анда жерлеш. Сен къарындашынг Эсауну аллындан къачып баргъан заманда, санга кёрюннген Аллахха анда къурман этилиучю жер къура.

2Якъуп юйюрюне да, биргесине болгъан адамлагъа да былай айтханды:

– Сизде болгъан мажюсю тейрилени атыгъыз, тазаланып, кийимлеригизни алышындырыгъыз. 3Биз Бейт-Элге барабыз. Къыйынлыкъ кюнюмде тилегими къабыл этген эм къайры баргъан эсем да мени бла болгъан Аллахха анда къурман этилиучю жер къурарыкъма.

4Алай бла аладагъы битеу мажюсю тейрилени да, къулакъларындагъы сыргъаланы да Якъупха бергендиле. Якъуп аланы, Шекем шахарны къатында ёсген эмен терекни тюбюнде басдырып къойгъанды. 5Сора ала тебирегендиле. Тёгерекдеги шахарлагъа Аллах къоркъуу салгъаны ючюн, Якъупну жашларыны ызларындан къуумагъандыла.

6Якъуп битеу адамлары бла бирге Кенанны жериндеги Лузгъа – Бейт-Элге – келгенди. 7Анда къурман этилиучю жер къурап, ол жерге Эл-Бейт-Эл#35:7 Эл-Бейт-Эл атны магъанасы – «Бейт-Элни Аллахы». атагъанды. Якъуп къарындашындан къачып баргъан заманында Аллах анга былайда кёрюннген эди.

8Сора Рабийгъатны эмчек анасы Дебора ёлгенди. Аны Бейт-Элни къыбыла жанындагъы эмен терекни тюбюнде асырагъандыла. Аны ючюн ол терекге Аллон-Бакут#35:8 Аллон-Бакут атны магъанасы – «жиляу эмен терек». аталгъанды.

9Якъуп Паддан-Арамдан къайтхандан сора, Аллах анга кёрюнюп, алгъыш бергенди. 10Аллах анга:

– Сени атынг Якъупду, алай а бюгюнден арысында сен Якъуп атлы боллукъ тюйюлсе, атынг «Исраил» боллукъду, – дегенди.

Аны бла Аллах Якъупха Исраил атны атагъанды.

11Дагъыда Аллах анга былай айтханды:

– Мен Къудуретли Аллахма! Жайыл эмда кёп болуп бар! Сенден миллет, кёп миллетле окъуна боллукъдула, сенден патчахла да жаратыллыкъдыла. 12Мен Ибрахимге бла Исхакъгъа берген жерни санга берликме, сенден сора боллукъ туудукъларынга да берликме.

13Сора Аллах аны бла сёлешген жеринден кётюрюлюп кетгенди. 14Якъубʼа Аллах аны бла сёлешген жерде таш эсгертме салгъанды. Аны юсюне, къуюлгъан саугъагъа, чагъыр бла зейтун жау къуйгъанды. 15Якъуп, Аллах аны бла сёлешген жерни атына Бейт-Эл#35:15 Бейт-Эл атны магъанасы – «Аллахны Юйю». атагъанды.

Рахелни ёлюмю

16Бейт-Элден чыгъып кетип, Эфрата шахаргъа жетерге бир кесек жол къалгъан заманда уа Рахел сабий тапханды. Аны къозлауу къыйын болгъанды. 17Ол къозлаудан къыйналгъан заманда уа аначы къатын анга:

– Къоркъма! – дегенди. – Энди сени дагъыда бир уланынг барды.

18Рахел а ёле тура эди. Жан бере тургъан заманында, уланына Бенони атагъанды. Атасы уа анга Бенямин#35:18 Бенони атны магъанасы – «азап уланым». Бенямин атны магъанасы – «онг къолуму уланы». атагъанды.

19Рахел ёлгенди. Аны Эфрата шахаргъа – Бейтлехемге – баргъан жолда асырагъандыла. 20Якъуп аны къабырыны башына сын таш салгъанды. Ол таш бюгюннге дери да Рахелни къабырын кёргюзтюп турады.

21Сора Исраил алайдан атланып, чатырын Эдер къаланы ары жанында къургъанды. 22Исраил ол къыралда тургъан заманда, Рубен атасыны тос къатыны Билха бла жатханды. Исраил да муну эшитип ачыуланнганды.

Якъупну уланлары

Якъупну онеки уланы бар эди.

23Леяны уланлары: Якъупну тюнгючю Рубен, аны ызындан Шимон, Лебий, Яхуда, Иссахар эм Зебулун.

24Рахелни уланлары: Юсюп бла Бенямин.

25Рахелни къарауашы Билханы уланлары: Дан бла Нафталий.

26Леяны къарауашы Зилпаны уланлары: Гад бла Ашер.

Была Якъупну Паддан-Арамда туугъан уланларыдыла.

Якъуп атасына къайтады. Исхакъны ауушады

27Якъуп Ибрахим бла Исхакъ кёчюп айланнган, бюгюн Хеброн деп аталгъан Кирият-Арбагъа жууукъ болгъан Мамреге, атасы Исхакъны къатына келгенди. 28Исхакъны ёмюрю 180 жыл эди. 29Исхакъ къарт болуп эм жашаудан тоюп, жан бергенди, ёлюп ата-бабаларына къошулгъанды. Аны уланлары Эсау бла Якъуп асырагъандыла.

Currently Selected:

Жаратылыу 35: МалкъСК

Highlight

Copy