Жаратылыу 36
36
Эсауну тукъум тарыхы
1Эдом деп да аталгъан Эсауну тукъум тарыхы буду.
2Эсау кесине къатынла Кенан къызларындан алгъанды: хитли Элонну къызы Аданы эм хивли Сибонну жашы Гананы къызы Охолибаманы, 3Сора Исмаилны къызы, Небайотну эгечи Басематны да алгъанды.
4Ада Эсаугъа Элифазны тапханды, Басемат Регуелни тапханды. 5Охолибама – Егушну, Яламны эм Корахны тапханды.
Была Эсауну уланларыдыла, ала Кенанны жеринде туугъандыла.
6Эсау къатынларын, уланларын, къызларын, битеу юйюндеги адамларын, сюрюулерин, бар малын, Кенанны жеринде жыйгъан мюлкюн да алып, къарындашы Якъупну къатындан башха жерге кетгенди. 7Аланы мюлклери асыры кёпден, ала бирге жашау эталмагъандыла. Малларыны кёплюгюнден, ала кёчюп айланнган жерге сыйынып болалмай эдиле.
8Алай бла Эдом деп да аталгъан Эсау Сеир атлы тау жерде жерлешгенди.
9Сеир атлы тау жерде эдомлуланы атасы Эсауну тукъум тарыхы буду.
10Ма Эсауну уланларыны атлары: Эсауну къатыны Аданы жашы Элифаз, Эсауну къатыны Басематны жашы Регуел.
11Элифазны уланлары: Теман, Омар, Сефо, Гатам эм Кеназ.
12Тимна – Эсауну жашы Элифазны тос къатыны эди, ол Элифазгъа Амалекни тапханды. Эсауну къатыны Аданы уланлары быладыла.
13Ма Регуелни уланлары: Нахат бла Зерах, Шамма бла Мизза. Была Эсауну къатыны Басематны уланларыдыла.
14Сибонну жашы Гананы къызы, Эсауну къатыны Охолибаманы Эсаугъа тапхан жашлары да была эдиле: Егуш, Ялам эм Корах.
15Ма Эсау улуланы бийлери. Эсауну тюнгючю Элифазны уланлары: Теман бий, Омар бий, Сефо бий, Кеназ бий, 16Къорах бий, Гатам бий, Амалек бий. Была Эдомну жеринде Элифазгъа туугъан бийледиле, Аданы туудукъларыдыла.
17Эсауну жашы Регуелни жашлары: Нахат бий, Зерах бий, Шамма бий, Мизза бий. Была Эдомну жеринде Регуелге туугъан бийледиле, Эсауну къатыны Басематны туудукъларыдыла.
18Эсауну къатыны Охолибаманы уланлары: Егуш бий, Ялам бий, Корах бий. Была Гананы къызы, Эсауну къатыны Охолибамадан туугъан бийледиле.
19Быланы барысы да Эдом деп да аталгъан Эсауну уланларыдыла эм аладан туугъан бийледиле.
Сеирни туудукълары
20Хорлу Сеирни ол жерде жашагъан уланлары: Лотан, Шобал, Сибон, Ана, 21Дишон, Эсер эм Дишан. Эдомну жеринде Сеирни уланлары, хорлуланы бийлери быладыла.
22Лотанны уланлары Хорий бла Хемам эдиле. Тимна уа Лотанны эгечи эди.
23Шобалны уланлары: Алван, Манахат, Гибал, Шефо эм Онам.
24Сибонну уланлары: Айя бла Ана. Атасы Сибонну эшеклерин кютген заманда, къуу жерде жылы суула тапхан Гана олду.
25Гананы сабийлери: Дишон бла Ананы къызы Охолибама.
26Дишонну уланлары: Хемдан, Эшбан, Итран эм Керан.
27Эсерни уланлары: Билхан, Загаван эм Акан.
28Дишанны уланлары: Уц бла Аран.
29Хорлуланы бийлери: Лотан бий, Шобал бий, Сибон бий, Ана бий, 30Дишон бий, Эсер бий, Дишан бий. Ма, Сеирни жериндеги хорлу тукъумланы бийлери быладыла.
Эдомну патчахлары
31Исраилде патчахла болурдан алгъа Эдомну жеринде башчылыкъ этген патчахла быладыла:
32Беорну жашы Бела Эдомну патчахы болгъанды. Аны шахарыны аты Динхаба эди. 33Бела ёлгенде, орунуна босралы Зерахны жашы Ёвав патчах болгъанды. 34Ёвав ёлгенде, орунуна теманлыланы жеринден Хушам патчах болгъанды. 35Хушам ёлгенде, орунуна Моаб аулагъында мидиянлыланы хорлагъан Бедадны жашы Хадад патчах болгъанды. Аны шахарыны аты Абит эди. 36Хадад ёлгенде, орунуна масрекалы Самла патчах болгъанды. 37Самла ёлгенде, орунуна суу бойнундагъы Рехоботдан болгъан Шауул патчах болгъанды. 38Шауул ёлгенде, орунуна Ахборну жашы Баал-Ханан патчах болгъанды. 39Ахборну жашы Баал-Ханан ёлгенде, орунуна Хадар патчах болгъанды. Аны шахарыны аты Пау эди, къатыныны аты уа Мезахабны жашы Матредни къызы Мехетабел эди.
40Тукъумларына эм жерлерине кёре Эсауну тукъумундан бийлени атлары быладыла: Тимна бий, Алба бий, Этет бий, 41Охолибама бий, Эла бий, Пинон бий, 42Кеназ бий, Теман бий, Мибсар бий, 43Магдиел бий, Ирам бий.
Эдомну ие болгъан жерлеринде жашагъан эллерине атларын берген бийлери быладыла.
Бу – эдомлуланы аталары Эсауду.
Currently Selected:
Жаратылыу 36: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
