Жаратылыу 30

1Рахел Якъупха сабий табаргъа болалмагъанын кёрюп, эгечине сукъланып башлагъанды эмда Якъупха:

– Манга сабийле бер; бермесенг а, мен ёлюрме, – дегенди.

2Якъуп Рахелге ачыуланып:

– Санга сабий бермеген Аллах Кесиди. Мен Аллах тюйюлме да! – дегенди.

3– Ма къарауашым Билха, – дегенди Рахел, – анга бар. Ол манга сабий табсын да, мени андан сабийлерим болсунла.

4Сора Рахел къарауашы Билханы Якъупха къатыннга бергенди, Якъуп да анга баргъанды. 5Билха бууаз болуп, Якъупха улан тапханды. 6Рахел: «Аллах манга тюз сюд этгенди. Мени ауазымы эшитип, манга улан бергенди», – деп, анга Дан#30:6 Дан атны магъанасы – «сюд». атагъанды.

7Рахелни къарауашы Билха дагъыда бууаз болуп, Якъупха экинчи улан тапханды. 8Рахел: «Мен эгечим бла уллу кюреш этип, хорладым», – деп, анга Нафталий#30:8 Нафталий атны магъанасы – «кюрешиуюм». атагъанды.

9Лея, къозламай тохтагъанын кёрюп, къарауашы Зилпаны Якъупха къатыннга бергенди. 10Леяны къарауашы Зилпа да Якъупха улан тапханды. 11Лея: «Къалай огъурлу болдум!» – деп, анга Гад#30:11 Гад атны магъанасы – «огъурлу». атагъанды.

12Сора Леяны къарауашы Зилпа Якъупха экинчи улан тапханды. 13Лея: «Насыбыма туугъанды! Тиширыула манга насыплы дерикдиле», – деп, анга Ашер#30:13 Ашер атны магъанасы – «насыплы». атагъанды.

14Будай орула тургъан заманда, Рубен аулакъгъа барып, мандрагор#30:14 Мандрагор ёсюмлюкню кёгетлерине «сюймеклик алмала» дей эдиле. Ала къозлаугъа болушханларына ийнаннгандыла эрттегиле. кёгетле тапханды да аланы анасы Леягъа келтиргенди. Рахел Леягъа:

– Тилейме, уланынгы мандрагор алмаларындан манга бер, – дегенди.

15– Эрими къолгъа алгъанынг жетмеймиди санга, – дегенди Лея, – жашымы мандрагор алмаларын да алыргъамы умут этесе?

– Охо, – дегенди Рахел, – жашынгы мандрагорлары ючюн эрим бюгече сени бла къалсын.

16Ингирде Якъуп аулакъдан къайтханда, Лея аны аллына чыгъып:

– Бюгече мени бла къалыргъа керексе, мен сени ючюн жашымы мандрагор алмаларын берип тёлегенме, – дегенди.

Ол кече Якъуп аны бла къалгъанды. 17Аллах Леяны эшитгенди да, Лея бууаз болуп, Якъупха бешинчи улан тапханды. 18«Мен къарауашымы эриме бергеним ючюн Аллах мени саугъалагъанды», – деп, Лея анга Иссахар#30:18 Иссахар атны магъанасы – «саугъа». атагъанды.

19Лея дагъыда бууаз болуп, Якъупха алтынчы улан тапханды. 20«Аллах манга аламат саугъа бергенди. Мен эриме алты улан тапханма да, энди ол манга хурмет этерикди», – деп, Лея анга Зебулун#30:20 Зебулун атны магъанасы – «хурмет». атагъанды.

21Андан сора Лея къыз тапханды эм анга Дина атагъанды.

22Сора Аллах Рахелге эс бёлгенди, аны тилегин къабыл этип, къарынын ачханды. 23Рахел бууаз болуп, улан тапханды да: «Аллах бедишими юсюмден алды», – дегенди 24эмда: «Раббий манга экинчи улан да къошсун», – деп, анга Юсюп#30:24 Юсюп атны магъанасы – (Аллах) «къошсун». атагъанды.

Якъупну сюрюулери кёп боладыла

25Рахел Юсюпню тапхандан сора, Якъуп Лабаннга:

– Манга кеси жериме кетерге ыразылыкъ бер, – дегенди. – 26Къатынларыма бла сабийлериме да мени бла барыргъа ыразылыкъ бер да, мен барайым. Мен ала ючюн санга къуллукъ этгенме. Санга къалай къуллукъ этгеними сен билесе, – дегенди.

27– Сени кёзлерингде мен ыразылыкъ тапха эдим! – дегенди анга Лабан. – Таш салып билгениме кёре, сени хатерингден Раббий манга берекет бергенди. – 28Сора дагъыда: – Менден жетерик хакъынгы белгиле, берейим, – деп къошханды.

29Якъубʼа жууапха:

– Мен санга къалай къуллукъ этгеними, мен кютгенли малынг къалай болгъанын да, сен билесе, – дегенди. – 30Мен келгинчи, малынг аз эди, энди уа бек кёп болгъанды. Мени келгеним бла Раббий санга берекет бергенди. Мен кеси юйюме уа къачан ишлерикме?

31– Не берейим санга? – деп соргъанды Лабан.

– Манга сенден бир зат да керекмейди, – дегенди Якъуп. – Мен айтханны этсенг, энтта къой-эчкилеринги кютюп, сакълап турлукъма. 32Бюгюн битеу сюрюулеринги ичлери бла ётейим. Аладан хар тамгъалы эм къолан къойну, хар къара къозуну, эчкиледен да тамгъалысын эм къоланын айырайым. Аллай мал мени иш хакъым болсун. 33Келлик заманда иш хакъыма къараргъа келгенингде тюз болгъанымы, болмагъанымы мындан ангыларса: тамгъалы эм къолан болмагъан эчкилерим эм къара болмагъан къозуларым болса, ала урланнган малгъа саналлыкъдыла.

34– Бек ахшы, сен айтханча болсун, – дегенди Лабан.

35Алай а ол кюн Лабан сызлыкълы эм къолан текелени, юслеринде акъ жерлери болгъан битеу тамгъалы эм къолан эчкилени эм битеу къара къозуланы айырып, уланларыны къолларына бергенди. 36Сора кесини бла Якъупну арасында юч кюнлюк жол узакълыкъ белгилегенди. Якъубʼа Лабанны къалгъан къой-эчкилерин кюте эди.

37Сора Якъуп стиракс, миндал эм чынар терекледен чий чыбыкъла кесип, аланы кертип акъ ызлыкъла этгенди, чыбыкъланы къабукъларын агъына дери артханды. 38Малла суу ичерге келиучю жерде, кертилген чыбыкъланы ол суу ичириучю гуллалагъа, малны аллына салгъанды. Малла къошулгъан кезиуде, ала суу ичерге келген заманда 39къой-эчкиле чыбыкъланы аллында къошула эдиле. Сора сызлыкълы, тамгъалы эм къолан балала тууа эдиле. 40Якъуп къозуланы айырып, Лабанны сызлыкълы эм къара малыны туурасында тутханды. Кесини сюрюулерин энчи тутханды, Лабанны малы бла къатышдырмагъанды.

41Хар заманда, къарыулу мал къошулгъан кезиуде, ала чыбыкъланы аллында къошулсунла деп, Якъуп гуллада малланы кёзлерини аллына чыбыкъла сала эди. 42Къарыусуз мал къошулгъан заманда уа, салмай эди. Алай бла къарыусуз мал Лабаннга, къарыулусу уа Якъупха жетип тургъанды.

43Алай бла Якъуп бек бай болгъанды, аны бек кёп къой-эчкилери, къарауашлары бла къуллары, тюелери бла эшеклери да бар эди.

Currently Selected:

Жаратылыу 30: МалкъСК

Highlight

Copy