Жаратылыу 29

Якъуп Рахел бла тюбешеди

1Якъуп жолуна бара туруп, кюн чыкъгъан жаныны халкъларыны жерлерине жетгенди. 2Аулакъда къую кёргенди. Къуюну къатында юч къой-эчки сюрюу жатып тура эди, нек дегенде, ол къуюдан сюрюулеге суу ичириучю эдиле. Къуюну башы уллу таш бла жабылып эди. 3Битеу сюрюуле ары жыйылгъандан сора, къуюну башындан ташны кетерип, маллагъа суу ичириучю эдиле. Андан сора, дагъыда, ташны жерине, къуюну башына салыучу эдиле.

4Якъуп сюрюучюледен:

– Къарындашларым, сиз къайдансыз? – деп соргъанды.

– Харанданбыз, – деп жууап бергендиле ала.

5Якъуп:

– Нахорну жашы Лабанны таныймысыз? – деп соргъанды.

– Таныйбыз, – дегендиле ала.

6– Ол сау-саламат турамыды? – деп соргъанды Якъуп.

– Сау-саламат турады, дегендиле ала. – Ма, аны къызы Рахел къой-эчкиле бла келе турады.

7Якъуп алагъа:

– Ма, кюн алыкъа бийикдеди, малланы жыяр заман болмагъанды. Къой-эчкилеге суу ичиригиз да, барып, кютюгюз, – дегенди.

8Ала уа:

– Битеу сюрюуле жыйылып, къуюну башындан ташны кетергинчи эталлыкъ тюйюлбюз; къойлагъа суу ол заманда ичирликбиз, – дегендиле.

9Ол ала бла сёлеше тургъанда, Рахел атасыны къой-эчкилери бла келди; ол сюрюу кюте эди. 10Анасыны къарындашы Лабанны къызы Рахелни бла къой-эчкилерин кёргенлей, Якъуп къуюгъа барып, ташны аны башындан кетергенди, Лабанны къой-эчкилерине суу ичиргенди. 11Сора Якъуп Рахелни уппа этгенди да, ауазын кётюрюп жилягъанды. 12Якъуп Рахелге, аны атасыны жууугъу болгъанын, Рабийгъатны жашы болгъанын айтханды. Рахел а чабып барып, атасына билдиргенди.

13Лабан, эгечини жашы Якъупну хапарын эшитгенлей, аны аллына чапханды да, аны къучакълап, уппа этгенди эмда юйюне келтиргенди. Сора Якъуп Лабаннга болуннганланы барын да айтханды. 14Лабан анга:

– Сен кертиси да мени сюегимсе, мени этимсе! – дегенди.

Якъуп Леяны эм Рахелни къатыннга алады

Якъуп Лабанны юйюнде сау ай тургъандан сора, 15Лабан Якъупха:

– Къарындашым болгъанынг ючюн манга хакъсызмы ишлериксе? – дегенди. – Санга не хакъ берейим? Айт манга.

16Лабанны уа эки къызы бар эди: абаданыны аты Лея, кичисини аты Рахел эди. 17Леяны кёзлери назик эди, Рахел а субай санлы эм чырайлы эди. 18Якъуп Рахелни сюйюп къалгъанды эмда Лабаннга:

– Сени кичи къызынг Рахел ючюн мен санга жети жыл ишлерикме, – дегенди.

19– Ахшы, – дегенди Лабан. – Аны башха адамгъа бергенден эсе санга бергеним игиди. Мени бла жаша.

20Якъуп Рахел ючюн жети жыл ишлегенди. Алай а, Рахелни сюйгени себепли, жети жыл анга бир-эки кюн кибик кёрюннгенди.

21Сора Якъуп Лабаннга:

– Къуллукъ этер заманым бошалды. Къатынымы бер, аны бла юйленирге сюеме, – дегенди.

22Лабан ол жерни битеу адамларын чакъырып жыйгъанды да, той этгенди. 23Ингирде уа къызы Леяны алып, Якъупха келтиргенди, Якъуп да аны бла кече къалгъанды. 24Лабан къарауашы Зилпаны да къызы Леягъа къарауашха бергенди.

25Эрттенликде Якъуп къараса, ма, аллында Лея! Сора ол Лабаннга:

– Манга бу этгенинг неди? Санга ишлеп тургъаным Рахел ючюн тюйюлмю эди да? Мени нек алдап къойдунг? – дегенди.

26– Бизни жерде алай этмейдиле, кичисин таматасындан алгъа бермейдиле, – дегенди Лабан. – 27Муну той ыйыгъы бошалсын да, сора сен манга дагъыда жети жыл ишлерик ишинг ючюн, санга башхасын да берирбиз.

28Якъуп алай этгенди да, муну той ыйыгъы бошалгъанды. Сора Лабан къызы Рахелни да Якъупха къатыннга бергенди. 29Лабан къарауашы Билханы да къызы Рахелге къарауашха бергенди. 30Алай бла, Якъуп Рахелни да алгъанды эм Рахелни Леядан эсе бек сюйгенди. Лабаннга дагъыда жети жыл ишлегенди.

Якъупну сабийлери

31Якъуп Леяны аз сюйгенин Раббий эслегенде, аны къарынын ачханды, Рахел а къаратон эди. 32Лея бууаз болуп, улан тапханды да: «Раббий къыйынлыгъымы эслегенди. Энди эрим мени сюерикди», – деп, анга Рубен#29:32 Рубен атны магъанасы – «Ма, улан!» атагъанды.

33Дагъыда бууаз болуп, улан тапханды да: «Раббий сюйюлмегеними эшитип, манга бу сабийни да бергенди», – деп, анга Шимон#29:33 Шимон атны магъанасы – «Эшитир». атагъанды.

34Дагъыда бууаз болуп, улан тапханды да: «Энди уа эрим манга байланырыкъды, мен анга юч улан тапханма», – деп, анга Лебий#29:34 Лебий атны магъанасы – «Байланыу». атагъанды.

35Дагъыда бууаз болуп, улан тапханды да: «Энди уа Раббийге уллу махтау салырма», – деп, анга Яхуда#29:35 Яхуда атны магъанасы – «Махтау». атагъанды. Сора къозламай тохтагъанды.

Currently Selected:

Жаратылыу 29: МалкъСК

Highlight

Copy