Мисирден чыгъыу Ал сёз
Ал сёз
«Мисирден Чыгъыу» – Тауратны экинчи китабыды. Ол Исраил халкъны туугъаныны – Якъупну туудукъларыны Мисирде къул болумдан азатланнганларыны, алагъа Тауратны жорукълары берилгенини – юсюнден айтады. Бу ишле бизни замандан юч минг жылдан артыкъ алгъа болгъандыла.
Китапны биринчи кесегинде (1–19 башла) Мусса файхамбарны юсюнден айтылады. Муссаны Раббий, Кесини халкъын Мисирден чыгъарыр ючюн, сайлагъанды. Экинчи кесегинде уа (20–40 башла) Аллах Кесини халкъы бла Сыйлы Кесамат этеди, анга Тауратны жорукъларын береди. Тауратны баш магъанасы Аллахны Он фарызында жазылыпды (20:2-17). Бу сыйлы фарызла бюгюннгю халкъланы да намыс жорукъларыны мурдору болуп турадыла.
Аллах Муссагъа бла Кесини халкъына аз-аздан Кесини бегимлерин бла жорукъларын билдиргенди, Кесини халисин бла керти атын ачыкълагъанды. Ол Муссагъа, Сыйлы Мекямны къалай къураргъа керек болгъаныны юсюнден, толу буйрукъла бергенди (25–30 башла). Ол Мекям Исраил халкъгъа жолоучулукъларында табыныучу юй болгъанды, Раббий аны ичинде, Кеси халкъыны арасында туруп болгъанды. Аллах адамлагъа узакъдан къараучу болуп къалмай, дунияда болуннган ишлеге къатышады. Ол Ибрахимни, Исхакъны эм Якъупну туудукъларын, алагъа айтхан ант сёзюне кертичи болуп, азат этеди.
Бу китап адамланы Муссагъа къажау женгил-женгил чыкъгъанларыны юсюнден да айтады. Ала Мисирде къул болумларына юйренчек болуп, азатлыкъда жашаудан къоркъгъан эте эдиле. «Жаратылыу» китапда кибик, мында да адамланы халилери керти суратланадыла, аланы кемчиликлери ачыкъ кёргюзтюледиле.
Магъанасы
Исраил халкъы Мисирде къуллукъдан азат этиледи (1:1–15:21).
Къуу жерледе терилтиуле. Халкъны суу эм манна бла жалчытыу. Итрону оноуу (15:22–18:27).
Синай тауда Кесамат этиледи. Он фарыз. Муссаны къолу бла берилген Таурат. (19:1–24:18).
Сыйлы Мекямны къурар ючюн этилген буйрукъла (25:1–31:18).
Алтын тана сурат; Аллахны чамланыуу эм кечиую (32:1–34:35).
Сыйлы Мекямны къурау эм жарашдырыу. Раббийни аламатлыгъы кёрюнеди (35:1–40:38).
Currently Selected:
Мисирден чыгъыу Ал сёз: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024