Жаратылыу 50
50
Якъупну асыралыуу
1Юсюп, атасыны бетине къапланып, анга жиляй эди эмда аны уппа эте эди. 2Сора Юсюп кесине къуллукъ этиучю дохтурлагъа, атасын мумияларгъа буйрукъ бергенди. Дохтурла Исраилни мумиялагъандыла. 3Бу иш къыркъ кюн баргъанды. Мумияламакъ ючюн анча кюн керек эди. Сора мисирлиле Исраилге жетмиш кюн жиляу этгендиле. 4Аны жиляуун этиу кюнле озгъандан сора уа, Юсюп фыргъауунну ёзюрлерине сёлешип:
– Сиз манга ыразы эсегиз, фыргъаууннга мени ючюн тилеп, былай айтыгъыз: 5«Атам манга: „Ма, мен ёлеме. Мен кесиме Кенанны жеринде къазгъан къабырымда асырарса“, – деп осуят этгенди. Энди уа эркинлик бер, мен барып, атамы асырап къайтайым».
6Фыргъауун:
– Ол санга осуят этгени кибик, барып атангы асыра, – дегенди.
7Алай бла Юсюп атасын асыраргъа кетгенди. Аны биргесине, фыргъауунну битеу къуллукъчулары да, тукъум таматалары да эм Мисирни битеу таматалары да, 8Юсюпню битеу юйюрю да, къарындашлары да, атасыны юйюрю да кетгендиле. Гошенни жеринде жаланда сабийлерин бла къой-эчкилерин эм тууар малларын къойгъандыла. 9Аны биргесине файтонла бла атлыла да тебирегендиле, алай бла бек уллу жыйын болгъанды.
10Ала Иордан сууну кюн чыкъгъан жанында Атад ындырына жетип, анда бек уллу сыйыт этип жилягъандыла. Юсюп анда атасына жети кюн жиляу этгенди. 11Ол жерни адамлары кенанлыла, Атад ындырында бу жиляуну кёрюп: «Мисирлилени бу жиляулары уллуду!» – дегендиле. Ол себепден Иордан сууну кюн чыкъгъан жанында болгъан ол жерни атына Абел-Мисрайим#50:11 Абел-Мисрайим атны магъанасы – «Мисирлилени жиляулары». деп аталгъанды.
12Сора Якъупну уланлары анга, ол алагъа осуят этгенича этгендиле. 13Уланлары аны Кенанны жерине элтип, аны Мамреге жууукъ Махпела сабанда болгъан дорбунда асырагъандыла. Ибрахим, ол дорбунну, сабан бла бирге, хитли Эфрондан кесине энчи къабыр оруннга сатып алгъан эди. 14Юсюп атасын асыргъандан сора, кеси да, къарындашлары да, атасын асыраргъа кеси бла келгенлени барысы да Мисирге къайтхандыла.
Юсюп къарындашларына кечгинлик бергенин айтады
15Юсюпню къарындашлары, аталары ёлгенден сора: «Юсюп бизни кёрюп болмай къалып, биз анга этген битеу аманлыкъла ючюн бизге дерт жетдиреме десе уа, не этербиз?» – дегендиле. 16Алай бла ала Юсюпге адамла ийип:
– Атанг ёлюрюню аллында быллай насийхат этгенди: 17«Сиз къарындашыгъыз Юсюпге былай айтыгъыз: „Къарындашларынг санга уллу аманлыкъ этгендиле, энди уа, тилейме, сен аланы терсликлерин бла гюняхларын кеч“. Алай бла, жалбарабыз, атангы Аллахыны къулларыны терсликлерин кеч», – деп айтдыргъандыла.
Юсюп, анга муну айтханда, жиляп башлагъанды. 18Аны къарындашлары кеслери да келип, аны аллында жерге къапланып:
– Ма, биз сени къулларынгбыз, – дегендиле.
19– Къоркъмагъыз, – дегенди Юсюп. – Мен Аллахмамы да? 20Ма, сиз манга аманлыкъ этерге ниет этген эдигиз. Алай болгъанлыкъгъа, энди бу болгъан затны этер ючюн, кёп адамланы жанларын сакълар ючюн, Аллах муну ахшылыкъгъа бургъанды. 21Ол себепден, къоркъмагъыз, мен сизни да, сабийлеригизни да кечиндирип турлукъма.
Алай бла аланы кёллерин ырахат этип, жюреклерин жапсаргъанды.
Юсюп ауушады
22Юсюп кеси да, атасыны юйюрю да Мисирде жашап тургъандыда. Юсюп 110 жыл жашагъанды. 23Ол Эфрайимни сабийлерин ючюнчю туудукъгъа дери кёргенди, Юсюпню тобукъларына Манашени уланы Макирден туугъан сабийле да салыннгандыла.
24Юсюп жууукъларына:
– Мен ёлеме, – дегенди, – алай болгъанлыкъгъа, Аллах сизге болушурукъду, сизни бу жерден чыгъарып, аны юсюнден Ибрахимге, Исхакъгъа эм Якъупха ант этген жерине къайтарып элтирикди.
25Сора Юсюп Исраил улуларына:
– Аллах сизге болушурукъду, сора мени сюеклерими мындан чыгъарып элтигиз, – деп ант этдиргенди.
26Юсюп 110 жыллыгъында ёлгенди. Сора аны мумиялап, Мисирде гуллагъа салгъандыла.
Currently Selected:
Жаратылыу 50: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
