Мисирден чыгъыу 1
1
Исраиллиле Мисирде къыйналадыла
1Якъупну биргесине юйюрлери бла Мисирге келген Исраилни жашларыны атлары быладыла: 2Рубен, Шимон, Лебий эм Яхуда; 3Иссахар, Зебулун эм Бенямин; 4Дан эм Нафталий; Гад эм Ашер. 5Якъупну туудукълары барысы да жетмиш жан эдиле. Юсюбʼа Мисирде эди.
6Бир талай замандан, Юсюп да, къарындашлары да, битеу ол тёлю да ёлгендиле. 7Исраил улулары уа жайылып, кёбейгендиле эмда ёсюп, бек кючлю болгъандыла. Алай бла ол жер аладан толгъанды.
8Сора Мисирде, Юсюпню билмеген, жангы патчах чыкъгъанды. 9Ол халкъына:
– Ма, Исраил улуларыны халкъы бизден кёп эм кючлю болуп барады, – дегенди. – 10Ала кёбеймез ючюн акъыл этейик. Алайсыз, уруш болгъан заманда, ала да душманларыбызгъа къошулуп, бизге къажау сюелирле да, къыралыбыздан чыгъып кетерле.
11Сора, ауур ишле бла аланы къарыуларын алыр ючюн, алагъа иш таматала салгъандыла. Ала да фыргъаууннга, ашарыкъ сакъланыр ючюн, Питом бла Рамсес атлы шахарла ишлегендиле. 12Алай болгъанлыкъгъа, аланы не къадар къыйнасала да, ала ол къадар кёбейе эдиле эм ол къадар ёсе эдиле. Ол себепден мисирлиле Исраил улуларындан къоркъуп башлагъандыла. 13Аны ючюн мисирлиле Исраил улуларына къатылыкъ этип, зор бла ишлете эдиле. 14Топуракъ бла кирпич этген ауур ишден эм хар тюрлю сабан ишден, алагъа къатылыкъ бла зор этип ишлетген хар тюрлю ишден аланы жашауларын къыйын этген эдиле.
15Чюйютлю тиширыуланы Шифра бла Пуа атлы аначы къатынлары болгъанды. Мисирни патчахы алагъа:
16– Сиз чюйютлю къатынлагъа аначылыкъ этген заманыгъызда, ала ауурлукъларындан къутула туруп, къарагъыз: улан болса, аны ёлтюрюп къоюгъуз; къыз болса уа, жашама къоюгъуз, – дегенди.
17Аначы къатынла уа, Аллахдан къоркъгъанлары себепли, Мисирни патчахы айтханча этмей эдиле, улан сабийлени сау къалдыра эдиле. 18Мисирни патчахы, аначы къатынланы чакъырып, алагъа:
– Сиз улан сабийлени сау къалдырып, аллай иш нек этесиз? – дегенди.
19Аначы къатынла уа фыргъаууннга:
– Чюйютлю къатынла мисирлилеча тюйюлдюле. Ала къарыулудула, аначы къатын келгинчи, къутулуп турадыла, – дегендиле.
20Аллах аначы къатынлагъа ахшылыкъ этгенди. Халкъ а кёбейип, андан да бек кючлю болуп баргъанды. 21Аначы къатынла Аллахдан къоркъгъанлары себепли уа, Ол аланы юйюрлерин къурагъанды. 22Ол заманда фыргъауун битеу халкъына:
– Чюйютлюледе хар жангы туугъан улан сабийни Нил суугъа атыгъыз, хар къыз сабийни уа сау къалдырыгъыз, – деп буйрукъ этгенди.
Currently Selected:
Мисирден чыгъыу 1: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
