Мисирден чыгъыу 24

Халкъ кесаматны къабыл этеди

1Сора Раббий Муссагъа былай айтды:

– Сен, Харун, Надаб, Абиху эмда Исраилни тукъум таматаларындан жетмиш адам Раббийге ёрлегиз да, узакъдан сежда этигиз. 2Раббийни къатына жангыз Мусса жанласын, ала уа жууукълашмасынла, халкъ да аны бла ёрлемесин.

3Мусса келип, Раббийни битеу сёзлерин эм хукмуларын халкъгъа айтды. Битеу халкъ бир ауаздан жууаплай:

– Раббий айтхан затланы барын да этербиз, – дедиле.

4Мусса Раббийни битеу сёзлерин жазып къойгъанды.

Эрттенликде эртте туруп, Мусса тауну тюбюнде къурман жер къурагъанды эмда, Исраилни онеки тайпасына кёре, онеки эсгертме таш сюеп салгъанды.

5Сора исраилли жашланы ийгенди да, ала толусунлай кюйдюрюллюк къурманла келтиргендиле эмда Раббийге саламатлыкъ къурманнга бугъала кесгендиле. 6Мусса, къанны бир жартысын алып, тазлагъа къуйгъанды, къалгъан жартысын а къурман этилиучю жерге бюркгенди. 7Сора, Кесамат Китапны алып, халкъгъа эшитдирип, окъугъанды. Ала да:

– Раббий айтхан затлагъа бой салып, барын да этербиз, – дедиле.

8Сора Мусса къанны алып, халкъгъа бюркгенди эмда:

– Бу къан – битеу бу сёзлени юсюнден Раббий сизни бла этген кесаматны бегитген къанды, – деди.

9Андан сора Мусса, Харун, Надаб, Абиху эмда Исраилни тукъум таматаларындан жетмиш адам ёрге чыгъып, 10Исраилни Аллахын кёргендиле. Аны аякъларыны тюбюнде кёкню кесича жарыкъ, таза накъутдан ишленнгеннге ушаш кётюртме бар эди. 11Аллах Исраил улуладан сайланнганлагъа заран этмегенди. Ала Аллахны кёргендиле, сора ашагъандыла эм ичгендиле.

12Раббий Муссагъа:

– Манга, таугъа ёрле да анда тур. Мен санга Тауратны фарызлары жазылгъан гыйы ташланы берирме. Аланы Мен халкъгъа юйретир ючюн жазгъанма, – деди.

13Мусса, кесине жумуш этиучю Ешуа бла тебиреп, Аллахны таууна чыкъды. 14Тукъум таматалагъа уа:

– Биз сизге къайтып келгинчи, былайда туругъуз. Ма Харун бла Хур сизни бла къаладыла. Сюдлюк иши болгъан адам алагъа келсин, – деген эди.

15Мусса таугъа чыкъгъанда, тауну булут жапханды. 16Раббийни аламатлыгъы Синай тауну юсюне энип, тюшгенди. Алты кюн тауну булут жапханлай тургъанды, жетинчи кюн а Раббий булут ичинден Муссаны чакъырып сёлешгенди.

17Тауну башында Раббийни аламатлыгъыны кёрюмдюсю Исраил улулагъа жаннган от кибик кёрюне эди. 18Мусса булут ичине кирип, таугъа чыкъгъанды. Тау башында Мусса къыркъ кюн бла къыркъ кече тургъанды.

Currently Selected:

Мисирден чыгъыу 24: МалкъСК

Highlight

Copy