Мисирден чыгъыу 2

Мусса файхамбарны туугъаны

1Лебийни тукъумундан биреу барып, кесине къатыннга бир лебийли къызны алгъанды. 2Къатыны бууаз болуп улан тапды. Аны бек ариу сабий болгъанын кёрюп, юч ай букъдуруп турду. 3Алай а, аны андан ары букъдуруп турургъа болалмай, къамишден этилген четен алып, анга битум бла къара чайыр жакъды, сора сабийчикни аны ичине салып, Нил сууну жагъасында къамиш ичинде къойду. 4Сабийни эгечи уа арлакъда тохтап, анга не боллугъуна къарап турду.

5Бир замандан фыргъауунну къызы жууунургъа Нил сууну боюнуна тюшеди. Аны къарауашлары да суу жагъада жюрюй эдиле. Фыргъауунну къызы къамиш ичинде четенни кёрюп, къарауашын ийип, аны келтиртеди. 6Четенни ачып къараса, анда уа сабийчик жиляй турады. Ол анга жазыкъсынып:

– Бу чюйютлю сабийледенди, – деди.

7Сабийчикни эгечи фыргъауунну къызына:

– Мен барып, чюйютлю къатынладан санга эмчек ана чакъырайыммы? Ол санга сабийчикни ёсдюрюр, – деди.

8– Бар, – деди анга фыргъауунну къызы.

Къызчыкъ барып, сабийчикни анасын чакъырды. 9Фыргъауунну къызы тиширыугъа:

– Бу сабийчикни алып, манга ёсдюр. Мен санга хакъынгы берирме, – деди.

Тиширыу сабийчикни алып, эмчек асырагъанды. 10Сабийчик ёсюп уллу болгъанында, тиширыу аны фыргъауунну къызына келтиргенди. Фыргъауунну къызы да аны кесине жаш этгенди эмда анга Мусса#2:10 Мусса ат чюйют тилде «(суудан) чыгъарылгъан» деген сёзге ушайды. атагъанды, нек дегенде, «мен аны суудан чыгъаргъанма» – дей эди.

Мусса файхамбар Мидияннга къачады

11Кёп заман озгъандан сора, Мусса ёсюп, уллу болгъанында, анга ёз къарындашлары, Исраил улулары болгъан жерге чыгъаргъа тюшгенди. Аланы ауур ишлерине карагъанында, бир чюйютлюню, ёз къарындашларындан биреуню, мисирли тюе тургъанын кёреди. 12Тёгерегине къарап, алайда бир киши да болмагъанын кёргенинде, мисирлини ёлтюрюп, аны юзмезде букъдуруп къояды.

13Ол экинчи кюн да чыкъгъанында, эки чюйютлю бир-бирлери бла тюйюше тургъанларын кёрдю эм зулму этгеннге:

– Къарындашынгы нек тюесе? – деп сорду.

14Ол а:

– Сени бизге таматагъа бла сюдюге ким салгъанды? Мисирлини ёлтюргенингча мени да ёлтюрюргеми умут этесе? – деди.

Мусса къоркъуп: «Эшта, бу ишни билген болурла!» – деди.

15Сора фыргъауун, бу ишни юсюнден эшитип, Муссаны ёлтюртюр мурат этгенди. Мусса уа фыргъауундан къачып кетип, Мидиянны жеринде тохтайды. Анда ол бир къуюну къатында олтургъан заманда, 16бир мидиянлы дин къуллукъчуну жети къызы келип, аталарыны къой-эчкилерине суу ичирир ючюн, къуюдан суу алып, гулланы толтурадыла. 17Сора башха сюрюучюле келдиле да, аланы къыстап башладыла. Ол заманда Мусса туруп, къызланы къоруулады, аланы къой-эчкилерине да суу ичирди.

18Къызла аталары Реуелге келгенлеринде, ол:

– Сиз бюгюн былай терк къалай къайтдыгъыз? – деп сорду.

19– Бир мисирли бизни сюрюучюледен къоруулады эм бизге суу да алып, къой-эчкилеге суу ичирди, – дедиле ала.

20Ол а къызларына:

– Къайдады да ол? Сиз аны нек къоюп келдигиз? Чакъырыгъыз аны, ол бизни бла ашасын! – деди.

21Мусса бу адамда жашаргъа ыразы болгъанды. Сора ол, къызы Сиппораны Муссагъа къатыннга бергенди. 22Сиппора улан тапханды. Мусса: «Мен киши жеринде киргинчи болдум», – деп, анга Гершом#2:22 Гершом атны магъанасы – «Анда киргинчи́». атагъанды.

23Кёп заман озгъандан сора, Мисирни патчахы ёледи. Исраил улулары къыйын ишден ынчхап, къычырыкъ эте эдиле, аланы ауур ишден жалбарыулары Аллахха жетгенди. 24Аллах аланы термилгенлерин эшитгенди эмда Ибрахим бла, Исхакъ бла, Якъуп бла этген кесаматын эсине келтиргенди. 25Аллах Исраил улуларына эс буруп, алагъа жазыкъсыннганды.

Currently Selected:

Мисирден чыгъыу 2: МалкъСК

Highlight

Copy