MATTHAI 2
2
Ningchiyluo Taata Mingsing Tie
1Herod siepahruo a cuo nguoluo ning, Judea pe Bethlehem khy lie Zingsuv a puv khutaa khata ningchiyluo taata mingsing tie#2.1 aasiy a mang thepa tie kha Jerusalem luo vya chiy yi te, 2“Judah siepahruo, zaa puv thaapa haatiyta ca khaapaliema a aw? Tahematapakieca a aasiy aa luopa#2.2 ningchiyluo taata kha hmung pate na ama kha abie riypata ma vya chiy,” ama ta.
3Siepahruo Herod ca capa bie a thyi tiyta a thlaa zang laalaw te Jerusalem khy ming bangkhuo zaw ama thlaa a zangsa ra. 4Ama ta tluobyi lepa tie hne phungbie saya tie zaw kha pakiy yi te, “Messiah ca khaapaliema a puv aa?” ta pata a hiehriy yi.
5Iema ta, “Judea pe Bethlehem khy liena a puv aa; Profet ta a cape siypa ca:
6 #
Mik 5.2
‘Judah ruo chunglie a awpa Bethlehem,
nama ca Judah pe khypuv zaw hrawlie hing
a caw cepa ta cuo changchiy vaciy,
tahematapakieca na chung taa tana
i cawsaa Israel ming luochiytuv pakha a pya aa,’” a ta.
7Cakhutaata Herod ta mingsing tie kha a paruvta tah ku yi te khaapa cuo lie kha tama aasiy aa luo tapa kha a hiehriy yi. 8Cakhutaata Bethlehem luo kha pathlie yi te, “Si ung la haatiy kha a phasa pata va huv tie ung, ama kha nama hmung tiyta, vaa'a angte i bie ra khu riypata, kama kha ina pachang sa'a ung ciy,” ta pata bie a taa yi.
9Siepahruo bie kha ama naathlie khutaata amaa thu ca aa kya luo ningta ama hmungpa aasiy ca haatiy awna hmang a dadaw lie aa daana te ta ama hmielie kha a sile. 10Aasiy aa daapa ama hmung tiyta ama palung a tluo hringhruo. 11Ingchung luo kha amaa ngie ca haatiy kha a nung Mary hne ama hmung; ama pakhuv pane yi te ama kha amaa bie. Cakhutaata, ama suethiy thingkaw kha pahaw yi te, ama lasaw: siy, frankinsens ziyhmyi, hne mura ziyhmyi kha ama pihluo.
12Herod'a luo kaa li riypata ama muo lie a raaringna pipa ama cuo nakawta, luo hrang ziy yi te ama ruo luo kha ama kaa.
Izipt Ruo Luo Amaa Ruo
13Iema ama si khutaata Abyipa avuoming pakha ca Josef muo lie kha a luo te, “Thu la, haatiy hne a nung kha la yi la Izipt ruo luo a ruokhyi tie yi, tahematapakieca Herod na haatiypa hing thie riypata a huv aa, kama ta kaa riypata ica chang hluo li capa lie ca nama aw caw aa,” a ta.
14Cakhutaata Josef ca thu te haatiy hne a nung kha zuo ta la yi te Izipt ruo luo a ruokhyi yi te, 15#Hos 11.1 capa lie ca Herod a thiyna te ama aw. Hingpa hing Abyipa ta profet pakaa taata, “I sacapaa ca Izipt taata pya riypa tana i u,” a tapa bie a tlingna riypa tana a cuo.
Herod Ta Haatiy A Thie Yi
16Herod ta mingsing tie na naa dung yi tapa kha a pachang tiyta a hi haa suesaa te, mingsing tie'a taata a pachangpa cuo hne tuepuo pata Bethlehem hne a cahriylie a awpa khy zaw lieta haatiy kung hning raw bangkhuo kha thie riypata naw a pi yi.
17Cahaacata profet Jeremiah ta a za ripa bie ca a vya tling:
18 #
Jer 31.15
“Ramah khy chunglie ueryi aa thyi.
Caana hne muochiesana ueryi ta a cuo.
Rachel ta a saata zaw kha a caa yi;
ama thiy diy nakawta,
panguo khu pata cuo vyi,” ta pata a cuo.
Izipt Ruo Taata Kaanapa
19Herod a thiy khutaata Izipt ruo lie ca Abyipa avuoming pakha ca Josef muo lie kha a luo te, 20“Thu la, haatiy hne a nung kha la yi la Israel ruo luo si tie ung, tahematapakieca haatiy a thie khingpa tie kha ama thiy tli,” a ta. 21Caacuonakawta Josef ca thu te, haatiy hne a nung kha la yi te Israel ruo luo ama si. 22Cuorasala Arkhelaus na a paa Herod kha a thle te Judea ruo lie siepahruo a cuo tapa kha Josef ta a thyi tiyta, capa luo ca si nguo vyi. A muo lie a raaringna bie ama changpa haata Galilee pe luo kha a si. 23#Mar 1.24; Luk 2.39; Jhn 1.45 Profet tie ta ama za ri ciepa, “Ama ca Nazarethpa ta pata a cuo aa,” tapa bie a tling thena riypata Nazareth khy lie kha khy a sa.
Lutuv Holy Bible © Bible Society of Myanmar, 2023.