ရောမ 7
7
တဲက်တွိုင်ꩻအီတွမ်ႏတောႏလမ်းမင်္ဂလာႏ
1ခွေသွꩻဖုံႏ၊ ကွပ်ပွိုး သီအဝ်ႏသေလဲဉ်း ပညတ်ဥပဒေႏခရာႏ နဝ်ꩻမꩻ နုဲင်းခွေကဒေါ့ꩻဖေႏဒါႏ ခရာႏနဝ်ꩻ သီအီႏသေနာႏစဲင်းဒျာႏသွူ။ ဥပဒေႏနဝ်ꩻ အုပ်စိုꩻလꩻဒျာႏကွို့ꩻ လိုꩻဖုံႏ နုဲင်းဝွေꩻသီး သက်ကအဝ်ႏမွန်တွင်ꩻ လွုမ်ꩻနဝ်ꩻသွူ။ 2တဲက်တွိုင်ꩻအီတွမ်ႏ ကတောႏလမ်းလဲဉ်းဒါႏ ပါꩻမူႏတဖြာꩻ၊ နုဲင်းဝွေꩻမူႏ အဝါꩻ သက်အဝ်ႏမွန်နေက အချိန်ႏနဝ်ꩻ ဝွေꩻမူႏ အုံအဝ်ႏဗာႏဒျာႏ ကဆဲင်ႏဒါႏစွဉ်ႏ ကတောႏလမ်းဒါႏ တရာꩻဥပဒေႏ ဆꩻလနဝ်ꩻသွူ။ ကွဲႏတွော့ꩻ ဝွေꩻမဉ်ႏသီထိုꩻလဲဉ်းနဝ်ꩻ ဥပဒေႏ ဝွေꩻမူႏ ကအွဉ်ႏတီႏခါꩻ စွဉ်ႏဝွေꩻနဝ်ꩻ ဝွေꩻမူႏ လွစ်ထန်ႏလꩻထိုꩻလဲဉ်းသွူ။ 3နဝ်ꩻမꩻ ဝွေꩻမူႏဝါꩻ သက်ကအဝ်ႏမွန် နေကကျာꩻ ဝွေꩻမူႏ မဉ်ႏအုံငီꩻထိုꩻတွမ်ႏ လိုꩻခိုလင်နဝ်ꩻ ဝွေꩻမူႏယို အီႏခံႏဗာႏအဟဲ့ꩻ ပဲစ်မာႏ ဝင်ꩻပိုဝါꩻ တဖြာꩻသွူ။ ကွဲႏတွော့ꩻ ဝွေꩻမူႏဝါꩻ မဉ်ႏသီထိုꩻလဲဉ်းနဝ်ꩻ၊ ပါꩻမူႏနဝ်ꩻ တရာꩻဝင်ႏ ထွာလိုꩻမူႏလွစ်တဖြာꩻ နဝ်ꩻမꩻ ဝွေꩻမူႏ မဉ်ႏတောႏလမ်းထိုꩻ လိုꩻခိုလင်တဖြာꩻနဝ်ꩻ တပဲစ်မာႏတဝ်း ဝင်ꩻပိုဝါꩻနဝ်ꩻသွူ။ 4ခွေသွꩻဖုံႏ၊ ယိုနဝ်ꩻ ဆဲင်ႏဒျာႏသီသွူ။ ကွပ်ပွိုး သီနဝ်ꩻ အဝ်ႏထွာဒျာႏ ဗွေႏခရစ်တောႏ ရုပ်ခန္ဓာႏ အကွို့ꩻအခဝ်ဖုံႏ အတွက်၊ သီနဝ်ꩻတဲ့ သီထိုꩻလဲဉ်း အဝ်ႏညာꩻ ထိုꩻလဲဉ်း ပွိုင်းဝွို့တွမ်ႏ ပညတ်တရာꩻ ထာꩻအုပ်စိုꩻ ဆꩻလနဝ်ꩻသွူ။ တဲင်ဖေႏနေးနီ ကထွာ အသွုံꩻကျငါႏ ဗွေႏဘုရာꩻ အမုတောႏ ထာꩻမာꩻဖုံႏကိုနဝ်ꩻ ယိုခါ သီနဝ်ꩻ ဆဲင်ႏလဲဉ်းတွမ်ႏ ဗွေႏဘုရာꩻ အဝ်ႏထာꩻသီကို ကမာꩻထွိုင်ႏမွန် ဖေႏလဲဉ်းဒါႏ အဗွေႏနဝ်ꩻသွူ။ 5ပွိုးနီ သက်မွန်အုံအဝ်ႏ လွောက်ꩻလွဉ်ꩻဒျာႏ နီလိုꩻဇာႏတိ သꩻအလိုႏချိန်ႏ စွဉ်ႏပညတ်တရာꩻ တမာဖေႏအာႏတွော့ꩻ အဝ်ႏဗွေဒါႏ အပဲစ်သꩻ ထာꩻမဉ်လꩻနဝ်ꩻ ကအဝ်ႏမာꩻသော့ꩻထာꩻ နီနမ်းခန္ဓာႏကိုတဲင် နီကမာꩻလဲဉ်းဒါႏ ထာꩻကားကအဝ်ႏနဝ်ꩻ သွတ်ꩻသော့ꩻထိုꩻဒျာႏ ထာꩻသီသွူ။ 6ကွပ်ပွိုး တလဲင်ႏခါ ပညတ်တရာꩻနဝ်ꩻ အွဉ်ႏခံလဲဉ်းနီ၊ နီသီထိုꩻလဲဉ်းစွဉ်ႏတဲ့ ယိုခါနီ ကအဝ်ႏပညတ်တရာꩻ ဆꩻလနဝ်ꩻ လွစ်ထန်ႏထိုꩻလဲဉ်း အတွက်သွူ။ နီတမာꩻလွဉ်ꩻတဝ်းဒွုမ် အနယ်ꩻလီꩻ ကတဲမ်းခါꩻနေး ပညတ်ကျမ်ꩻဖုံႏကို၊ ကွဲႏတွော့ꩻ မာꩻလွဉ်ꩻဒျာႏ ဝိညာဉ်ႏတောႏ အနယ်ꩻတသာနဝ်ꩻသွူ။
ပညတ်တရာꩻတွမ်ႏအပဲစ်တရာꩻ
7 #
ထလ ၂၀:၁၇၊ ဟော်ꩻ ၅:၂၁။ နဝ်ꩻထွူ နီအီႏရိုꩻဖေႏဗာႏ နုဲင်းမုဲင်ꩻဟောင်း။ ပညတ်တရာꩻနဝ်ꩻ အဝ်ႏဗွေစွဉ်ႏ အပဲစ်တွော့ꩻဟောင်း။ နုဲင်းနဝ်ꩻ မွေးတဝ်း၊ ကွဲႏတွော့ꩻ အပဲစ်ကရိုꩻနဝ်ꩻ တမုဲင်ꩻကျောင်ꩻ စွဉ်ႏပညတ်တရာꩻ အွဉ်ႏသေဖေႏခွေသွူ။ ပညတ်တရာꩻ မဉ်ႏတဒေါ့ꩻတဝ်း၊ “လောဘ မဉ်လꩻမွိုန်းတဝ်း ပါꩻလင်တဖြာꩻဖြာꩻ အထာꩻခြိုꩻဟုဲင်း” နုဲင်းနဝ်ꩻနဝ်ꩻ ထာꩻမဉ်လꩻ လောဘ အစားနဝ်ꩻငါတဲ့ ခွေတသေတဝ်းသွူ။ 8ကွဲႏတွော့ꩻ စွဉ်ႏပညတ်တရာꩻ အပဲစ်နဝ်ꩻ ထီႏဗာႏ အဝ်ႏတမာ ဖေႏအာႏဒျာႏ ဟဝ်နမ်းတာႏ လောဘတန် သော့ꩻထာꩻ ခွေအကောင်းကို အမျိုꩻမျိုꩻသွူ။ ပညတ်တရာꩻ မဉ်ႏအဲဉ်ထဝ်းနဝ်ꩻ အပဲစ်တရာꩻယို ထွာဒျာႏအသီသွူ။ 9ခွေနမ်းနဝ်ꩻ တလဲင်ႏခါ သက်အဝ်ႏမွန်ဒျာႏတွမ်ႏ ပညတ်တရာꩻ တအဲဉ်ထဝ်းသွူ။ ကွဲႏတွော့ꩻ ပညတ်ချက် ထွိုင်ႏဖျော်လွဉ်ချိန်ႏ အပဲစ်တရာꩻနဝ်ꩻ မွန်လွဉ်စွဉ်ႏတဲင်၊ 10ခွေနဝ်ꩻ သီထိုꩻစွဉ်ႏသွူ။ ပညတ်ချက် ကမဉ်ရိုꩻ အီလွဉ်ဖေႏခွေတာႏ အသက်နဝ်ꩻ ထွာအီလွဉ်ဖေႏဒျာႏ ထာꩻသီသွူ။ 11#ကမ္ဘာႏ ၃:၁၃။ အပဲစ်တရာꩻနဝ်ꩻ လꩻထိုꩻအခွင်ꩻတဲင် စွဉ်ႏပညတ်ချက်နဝ်ꩻ အလဲဉ်ထိုꩻ ခွေတွော့ꩻ မာꩻသီထိုꩻစွဉ်ႏခွေသွူ။
12နဝ်ꩻမꩻ ပညတ်တရာꩻ အနမ်းနမ်းနဝ်ꩻ ကြောင်းစင်ဒျာႏတဲင် ပညတ်ချက်နဝ်ꩻ ကြောင်းစင်ဒျာႏ၊ မဲဉ်ႏဒျာႏတဲင် ဟဝ်ဒျာႏသွူ။ 13ပွိုးနုဲင်းနဝ်ꩻတဲင် ထာꩻဟဝ်နဝ်ꩻ မာꩻသီထိုꩻတွိုႏ ခွေဟောင်း၊ နုဲင်းနဝ်ꩻတမွေးတဝ်း၊ ကမာꩻသီထိုꩻ ခွေနဝ်ꩻ ထွာအပဲစ်တရာꩻဒျာႏသွူ။ အပဲစ်တရာꩻ သꩻဖော်ꩻ ဖေႏကထင်ႏသျာꩻနဝ်ꩻ သွုံꩻအီစွဉ်ႏ ထာꩻဟဝ်တဲင် အပဲစ်တရာꩻ မာꩻသီထိုꩻ ခွေကျောင်ꩻ ထင်ႏသျာꩻလွဉ်နဝ်ꩻသွူ။ ဗွိုန်နုဲင်းနဝ်ꩻ စွဉ်ႏပညတ်ချက်တွော့ꩻ အပဲစ်တရာꩻနဝ်ꩻ ဟဝ်ငမ်းသꩻငါႏ ခွိုင်းကားမုဲင်ꩻကျောင်ꩻ ကယိန်းအွဉ်ႏနယ် လွိုဖေႏနဝ်ꩻသွူ။
နီအကိုကတွိုက်ꩻဆန်ဒါႏဝင်ꩻသꩻဖော်ꩻနီစား
14ပညတ်တရာꩻနဝ်ꩻ ထွာဒျာႏ ဝိညာဉ်ႏရေꩻရာႏကျောင်ꩻ နီအဝ်ႏသေနဝ်ꩻသွူ။ ကွဲႏတွော့ꩻ ခွေနဝ်ꩻထွာဒျာႏ လိုꩻဇာႏတိတဖြာꩻ နဝ်ꩻမꩻ ထွာဒျာႏ အပဲစ်သွဉ်းတဖြာꩻ နဝ်ꩻသွူ။ 15#ဂလာ ၅:၁၇။ ခွေမာꩻတမုဲင်ꩻတဲ့ ခွေတသေနာႏတဝ်း၊ ခွေကမဉ်မာꩻဒါႏနဝ်ꩻ ခွေတမာꩻတဝ်း၊ ကွဲႏတွော့ꩻ ခွေမာꩻတောဒျာႏ နုဲင်းခွေကလွꩻထီႏဒါႏ နဝ်ꩻသွူ။ 16တယ်ႏစွဉ်ႏ နုဲင်းခွေ တမဉ်ꩻမာꩻတဝ်းတွော့ꩻ ကအဝ်ႏမာꩻဗာႏယိုနဝ်ꩻ အွဉ်ႏနယ်ဒျာႏ ပညတ်တောႏ မဲဉ်ႏဒျာႏကျောင်ꩻ ခွေအဝ်ႏသဘော်ꩻတူႏ နဝ်ꩻသွူ။ 17နဝ်ꩻမꩻ ပါꩻအဖြာꩻ ကအဝ်ႏမာꩻဒါႏ ထာꩻယိုဖုံႏနဝ်ꩻ ခွေတမွေးတဝ်း၊ နဝ်ꩻနဝ်ꩻထွာဒျာႏ ကအဝ်ႏသော့ꩻ ခွေအကို အပဲစ်နဝ်ꩻမာꩻဒျာႏသွူ။ 18ခွေလိုꩻဇာႏတိ အကိုနဝ်ꩻ ထာꩻဟဝ် တအုံသော့ꩻတဝ်းကျောင်ꩻ ခွေသေသွူ။ ပွိုးတွော့ꩻ ခွေသꩻကို မဉ်မာꩻနေး ထာꩻဟဝ်စွဉ်ႏတဲ့ ခွေတမာꩻနွောင်ꩻတဝ်း နဝ်ꩻသွူ။ 19ခွေကမဉ်မာꩻဒါႏ ထာꩻဟဝ်နဝ်ꩻ ခွေတမာꩻတဝ်းသွူ။ ခွေတမဉ်မာꩻတဝ်းဒါႏ ထာꩻကုဲင်နဝ်ꩻ ခွေအဝ်ႏမာꩻထိုꩻတောဒျာႏသွူ။ 20ခွေတမဥ်မာꩻတဝ်းတဲင် ခွေမဉ်ႏမာꩻဒျာႏ ယိုအဓိပ္ပါယ်ႏနဝ်ꩻ ကအဝ်ႏမာꩻဒါႏယို ခွေတမွေးတဝ်း အပဲစ်ကအဝ်ႏဒါႏ ခွေအကိုနဝ်ꩻ မာꩻဒျာႏသွူ။
21နဝ်ꩻမꩻ ပညတ်တရာꩻယို အထာꩻမာꩻနဝ်ꩻ ခွေထီႏဗာႏသွူ။ ခွေကမဉ်မာꩻဒါႏ ထာꩻဟဝ်ချိန်ႏ ခွေအဝ်ႏလွိုက်မာꩻထိုꩻဒျာႏ ထာꩻကုဲင်လွုမ်ꩻ နဝ်ꩻသွူ။ 22ခွေသꩻအကိုနဝ်ꩻ အဝ်ႏကျွိုက်နစ်သက်ဒျာႏ ဗွေႏဘုရာꩻ ပညတ်တရာꩻနဝ်ꩻသွူ။ 23ကွဲႏတွော့ꩻ ပညတ်တရာꩻ တဗွိုန်လို့တဝ်းဝင်ꩻနဝ်ꩻ အဝ်ႏမာꩻသော့ꩻထာꩻ ခွေနမ်းကို ပညတ်တစားနဝ်ꩻ အဝ်ႏတွိုက်ꩻဆန်ထိုꩻ ခွေကကျွိုက်နစ်သက်ဒါႏ ပညတ်နဝ်ꩻ ခွေထီႏဗာႏသွူ။ ပညတ်တရာꩻနဝ်ꩻနဝ်ꩻ ဖေႏနေး ခွေကထဲ့ အဝ်ႏခံသော့ꩻထိုꩻ အပဲစ်တရာꩻစူကိုနဝ်ꩻ အဝ်ႏမာꩻသော့ꩻထာꩻမာꩻ ခွေနမ်းခန္ဓာႏကိုနဝ်ꩻသွူ။ 24ခွေသꩻမွော့ꩻ ဒုက္ခငါႏနုဲင်းယို၊ အဝ်ႏရုပ်ခန္ဓာႏ ကအီႏအီလွေꩻခွေ ထာꩻသီကိုယိုနဝ်ꩻ ပါꩻမုဲင်ꩻ အီႏကယ်ႏထန်ႏထိုꩻ ခွေဟောင်း။ 25စွဉ်ႏနီဗွေႏ ယေသျုခရစ်တောႏတဲင် ကကယ်ႏထန်ႏဖေႏဒါႏနီ ဗွေႏဘုရာꩻ ကေꩻဇူꩻတောႏနဝ်ꩻ အုပ်ꩻထင်ႏဗာႏသွူ။
ထွူတဲင် ယိုနဝ်ꩻထွာ ခွေအခေႏနေႏဒျာႏ။ စွဉ်ႏသꩻလွုမ်ꩻ ခွေနမ်းနဝ်ꩻ ခွေမာꩻနွောင်ꩻ ဗွေႏဘုရာꩻ အပညတ်တရာꩻ အမုထာꩻမာꩻကျာꩻ ခွေလိုꩻဇာႏတိနဝ်ꩻ အဝ်ႏမာꩻဒျာႏ အပဲစ်တရာꩻ အမုထာꩻမာꩻသွူ။
Currently Selected:
ရောမ 7: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
