မတဲ 18
18
ပါꩻမုဲင်ꩻထွာအတန်မျတ်သွတ်ꩻဟောင်း
(မာကု ၉:၃၃–၃၇။ လုကာ ၉:၄၆–၄၈)
1 #
လု ၂၂:၂၄။ အချိန်ႏနဝ်ꩻ တပဲ့တောႏဖုံႏလွဉ် ဗွေႏယေသျုထျꩻ တဲင်ရီ၊ “ခမ်းထီမို့ꩻလောင်းကိုနဝ်ꩻ ပါꩻမုဲင်ꩻထွာ အတန်သွတ်ꩻဟောင်း” နုဲင်းနဝ်ꩻသွူ။
2နဝ်ꩻမꩻ ဗွေႏယေသျု ဟဲ့ꩻလွဉ် လိုꩻပေႏတဖြာꩻ အွဉ်ႏအုံထွိုင်ႏ ဝွေꩻသီး ဆꩻငါတဲင်ဒေါ့ꩻ၊ 3#မာ ၁၀:၁၅၊ လု ၁၈:၁၇။ “ခွေဒေါ့ꩻဖေႏသီ အမွေးအမဲဉ်ႏ၊ သီသꩻပြောင်ꩻကြုဲင်ꩻ တဝ်းတွော့ꩻ ပေါႏဗွိုန်လွဉ်တဝ်း နုဲင်းလိုꩻပေႏနဝ်ꩻ မုဲင်ꩻခါတဲ့ သီအီႏတနွို့သော့ꩻ ဗာႏတဝ်း ခမ်းထီမို့ꩻလောင်းကို နဝ်ꩻသွူ။ 4ပါꩻအဖြာꩻ ချꩻဖွိုႏအသꩻတွော့ꩻ ဗွိုန်လွဉ် နုဲင်းလိုꩻပေႏယိုနဝ်ꩻ ခမ်းထီမို့ꩻလောင်းကို ထွာအတန်သွတ်ꩻသွူ။ 5ပါꩻမုဲင်ꩻတရိုꩻတဝ်း ထောက်ခွေအမဉ်ꩻ နာႏမတွော့ꩻ ရပ်ကျိုႏဆွုမ်ႏ လိုꩻပေႏစားယို တဖြာꩻနဝ်ꩻ ရပ်ကျိုႏဆွုမ်ႏလဲဉ်း ခွေနဝ်ꩻသွူ။
အပဲစ်ထာꩻသွေꩻကုဲင်ဖုံႏ
(မာကု ၉:၄၂–၄၈။ လုကာ ၁၇:၁–၂)
6“ပါꩻတဖြာꩻဖြာꩻ မဉ်ႏယားကုဲင်ထိုꩻ လိုꩻပေႏစားယို ကအဝ်ႏယွုမ်းအံႏဒါႏ ခွေနဝ်ꩻ ပါꩻအဖြာꩻယိုနဝ်ꩻ စွိုင်အငွဥ်ꩻ တွမ်ႏလွေလုံးတန် တဖြုံႏတွော့ꩻ အွဉ်ႏဗဉ်လင်ꩻသော့ꩻ ပင်ႏလယ်ႏ ထီယော့ကိုနဝ်ꩻ ကယိန်းဟဝ်ထဲင်းသွူ။ 7ပွိုးဟံႏတန်လောင်း ထာꩻကမာꩻကုဲင်ထိုꩻဒါႏ လိုꩻဖုံႏ အထာꩻယွုမ်းနဝ်ꩻ ဟဝ်ငမ်းငါႏ ခွိုင်းကားမုဲင်ꩻ၊ ထာꩻစားနဝ်ꩻဖုံႏနဝ်ꩻ အီႏထွာ သေႏသေႏ ဒျာႏရင်ꩻနဝ်ꩻသွူ။ ကွဲႏတွော့ꩻ ပါꩻအဖြာꩻ ကမာꩻထွာလွဉ်ဒါႏ ထာꩻနဝ်ꩻဖုံႏနဝ်ꩻ ဟဝ်ငမ်းသꩻငါႏ ခွိုင်းကားမုဲင်ꩻ။
8 #
မ ၅:၃၀။ “နာꩻစူတဲ့နဝ်ꩻ ခင်ႏတဲ့နဝ်ꩻ မဉ်ႏမာꩻကုဲင်ထိုꩻ နာꩻထာꩻယွုမ်းနဝ်ꩻ ဓွေါ့ꩻတပွတ်ꩻထိုꩻတွော့ꩻ နုဲင်ႏညာꩻထိုꩻခန်းဟုဲင်း။ စူခင်ႏပါတဝ်းတွော့ꩻ နွို့သော့ꩻ သက်မွန်ခင်ႏလမ်းနဝ်ꩻ နာꩻအတာႏ ယိန်းဟဝ်ကယ်ꩻက စူခင်ႏစွုံႏလင်ႏတွော့ꩻ နုဲင်ႏသော့ꩻထိုꩻ ထာဝရ မေႏငါးရုဲင်ꩻကိုနဝ်ꩻသွူ။ 9#မ ၅:၂၉။နဝ်ꩻမꩻ နာꩻမဲ့ မဉ်ႏယားကုဲင်ထိုꩻ နာꩻထာꩻယွုမ်းနဝ်ꩻ အောင်ထန်ႏထိုꩻတွော့ꩻ နုဲင်ႏညာꩻထိုꩻခန်းဟုဲင်း။ နာꩻမဲ့အဝ်ႏ တပင်ဒျာႏတွော့ꩻ နွို့သော့ꩻဗာႏ သက်မွန် ခင်ႏလမ်းနဝ်ꩻ နာꩻအတာႏ ကယိန်းဟဝ်ကယ်ꩻက မဲ့အဝ်ႏနီပင်တွော့ꩻ ထဲ့သော့ꩻ မေႏငါးရုဲင်ꩻကို နဝ်ꩻသွူ။
သွိုꩻထိုꩻမားဥပမာႏ
(လုကာ ၁၅:၃–၇)
10“ခွေဒေါ့ꩻဖေႏသီ သီတွမ်ႏသွင်ꩻဖွီ ထီႏပေႏမွိုန်း လိုꩻပေႏနုဲင်းယို တဖြာꩻဖြာꩻဟုဲင်း။ ဝွေꩻသီး မို့ꩻလောင်းတမန်ႏဖုံႏ ခမ်းထီမို့ꩻလောင်းကီနဝ်ꩻ အဝ်ႏသေႏသေႏ ခွေဖါဆꩻငါ ခမ်းထီမို့ꩻလောင်းကို နဝ်ꩻသွူ။ 11ပွိုးလိုꩻပိုခို ကကျွꩻလွဉ်နဝ်ꩻ အီႏကယ်ႏဒျာႏ လိုꩻထိုꩻမားနဝ်ꩻသွူ။
12“သီယူႏ နုဲင်းမုဲင်ꩻဟောင်း၊ ပါꩻတဖြာꩻ အသွိုꩻအဝ်ႏ အဗာႏတရျာꩻတွော့ꩻ အသွိုꩻဖုံႏကိုနဝ်ꩻ ထိုꩻမားထိုꩻ တဗာႏသွူ။ ဝွေꩻအီႏအွဉ်ႏကုဲင် အသွိုꩻ ကွတ်ꩻဆီကွတ်ꩻဗာႏ ထာꩻအီႏဆားခြာ ကောင်ဖုဲင်းလောင်းတွော့ꩻ အီႏလွေꩻထုမ်ႏ သွိုꩻထိုꩻမားနဝ်ꩻသွူ။ 13ဝွေꩻထွိုင်ႏမော့ꩻ သွိုꩻချိန်ႏ ခွေဒေါ့ꩻဖေႏသီ ဝွေꩻထာꩻပျောႏသွင်ႏ သွိုꩻယိုအလောင်းနဝ်ꩻ လွိုကယ်ꩻလဲဉ်းက သွိုꩻတထိုꩻမားတဝ်း ကွတ်ꩻဆီကွတ်ꩻဗာႏ နဝ်ꩻသွူ။ 14ဗွိုန်နုဲင်းနဝ်ꩻနေနေ လိုꩻပေႏယို တဖြာꩻဖြာꩻ ကအီႏထိုꩻမားထိုꩻနဝ်ꩻ သီဖါကအဝ်ႏ ခမ်းထီမို့ꩻလောင်းကို တမဉ်လꩻတဝ်း နဝ်ꩻသွူ။
ပါꩻတဖြာꩻကမာꩻအပဲစ်ဖုံႏချိန်ႏ
15 #
လု ၁၇:၃။ “နာꩻဖူးနာꩻဝေး မဉ်ႏပဲစ်မာႏ ဆန်နာꩻနဝ်ꩻ လွေꩻဝွေꩻထျꩻတွော့ꩻ ဖေါႏနယ်သွော့ ဝွေꩻအမာႏဟုဲင်း။ ကွဲႏတွော့ꩻ ဖေါႏနယ် တေ့ꩻတေ့ꩻနေးသွော့၊ အဝ်ႏငါနာꩻတွမ်ႏ ဝွေꩻငါဟုဲင်း။ ဝွေꩻမဉ်ႏနာႏ နာꩻငဝ်းနဝ်ꩻ နာꩻလꩻချာလဲဉ်း နာꩻဖူးဝေး တဖြာꩻနဝ်ꩻသွူ။ 16#ဟော်ꩻ ၁၉:၁၅။ ကွဲႏတွော့ꩻ ဝွေꩻမဉ်ႏ တနာႏတဝ်း နာꩻငဝ်းနဝ်ꩻ ဟဲ့ꩻလွေꩻပါꩻတဖြာꩻ မဉ်ႏတမွေးတဝ်း အလင်ဝင်ꩻနီတွော့ꩻ တွမ်ႏနာꩻ၊ ‘ကစွဲꩻတရာꩻဒါႏ ထာꩻစွုမ်ႏစွိုး ဖေႏနေးကထွာ သက်သေႏဖုံႏနဝ်ꩻ သက်သေႏဖုံႏ အဝ်ႏဗာႏဝင်ꩻနီ၊ မဉ်ႏတမွေးတဝ်း လွိုကယ်ꩻဗာႏ ဝင်ꩻနီꩻမꩻ စွဲꩻတရာꩻလꩻ’ နုဲင်းလိတ်ကျမ်ꩻ ကရိုꩻနဝ်ꩻသွူ။ 17တွိုႏနဝ်ꩻ ဝွေꩻမဉ်ႏတနာႏတဝ်း ဝွေꩻသီးငဝ်းနဝ်ꩻ ဒေါ့ꩻနယ်ဖေႏသွော့ အသေန်းတောႏ တသေန်းလွုမ်းဟုဲင်း။ အဆုဲင်ꩻသွတ်ꩻ ဝွေꩻမဉ်ႏတနာႏတဝ်း အသေန်းစွိုꩻငဝ်းနဝ်ꩻ မတ်သွော့ဝွေꩻ နုဲင်းဘုရာꩻတရာꩻအဲဉ်ထဝ်းသား တဖြာꩻ မဉ်ႏမွေးတဝ်း နုဲင်းအခွဉ်ႏကောက်သား တဖြာꩻဟုဲင်း။
ထာꩻရဲဆီꩻတွမ်ႏဖေႏအခွင်ꩻ
18 #
မ ၁၆:၁၉၊ ယော ၂၀:၂၃။ “နဝ်ꩻမꩻ ခွေဒေါ့ꩻဖေႏသီ ကားကအဝ်ႏ၊ ဟံႏတန်လောင်းယို နုဲင်းသီ ကရဲဆီꩻခါꩻဒါႏဖုံႏနဝ်ꩻ ခမ်းထီမို့ꩻလောင်းကိုတဲ့ အီႏရဲဆီꩻခါꩻတဲင် ဟံႏတန်လောင်းယို နုဲင်းသီကဖေႏဒါႏ အခွင်ꩻဖုံႏနဝ်ꩻ ခမ်းထီမို့ꩻလောင်းကိုတဲ့ အီႏဖေႏအခွင်ꩻသွူ။
19“နဝ်ꩻမꩻ ခွေဒေါ့ꩻနယ်ဖေႏထဲင်း ယင်းသီ။ ဟံႏတန်လောင်း သီဝင်ꩻနီ သဘော်ꩻတူႏလို့ဝင်ꩻတွော့ꩻ ကဆုတောင်ꩻဒါႏ ချိန်ႏမုဲင်ꩻတယဝ်း သီအတာႏ ခွေဖါ အဝ်ႏခမ်းထီမို့ꩻလောင်းကိုနဝ်ꩻ အီႏမာꩻဗွေ စွုံႏလင်ႏဖေႏနဝ်ꩻသွူ။ 20စွဉ်ႏခွေအမဉ်ꩻ နာႏမတွော့ꩻ လိုꩻဝင်ꩻနီ ဝင်ꩻသွံ ကစုဗူႏလို့ဝင်ꩻ ခင်ႏလမ်းကိုနဝ်ꩻ ခွေအီႏအဝ်ႏငီꩻ စွဉ်ႏဝွေꩻသီးနဝ်ꩻကို” နုဲင်းနဝ်ꩻသွူ။
သွဉ်းတအွဉ်ႏစွꩻတဝ်းဒါႏဝင်ꩻအပဲစ်ဥပမာႏ
21 #
လု ၁၇:၃၊ ၄။ နဝ်ꩻထွူ ပေတရု လွဉ်ထေ့ ဗွေႏယေသျုထျꩻ တဲင်ရီ၊ “ဗွေႏ၊ ခွေဖူးခွေဝေးဖုံႏ မဉ်ႏပဲစ်မာႏ ဆန်ချာခွေနဝ်ꩻ ခွေအွဉ်ႏစွꩻဖေႏဗာႏ ဝွေꩻအပဲစ် ခွိုင်းမုဲင်ꩻလဲင်ႏဟောင်း။ နွတ်ꩻလဲင်ႏနဲ့ဟောင်း” နုဲင်းနဝ်ꩻသွူ။
22 #
ကမ္ဘာႏ ၄:၂၄။ ဗွေႏယေသျု လဝ်းချာ။ “မွေးတဝ်း၊ နွတ်ꩻလဲင်ႏ တမွေးတဝ်း၊ နွတ်ꩻလဲင်ႏ အလဲင်ႏနွတ်ꩻဆီဒျာႏသွူ။ 23ကွပ်ပွိုး ခမ်းထီမို့ꩻလောင်းနဝ်ꩻ ဗွိုန်နုဲင်းယိုသွူ။ တလဲင်ႏသား ခွန်တန်တပါꩻနဝ်ꩻ ဆွုံꩻဖျတ် အီႏစဲစ်ဆေꩻတွက်ထွား ဝွေꩻရွဉ်စရင်ꩻ ဝွေꩻအသွဉ်းဖုံႏထျꩻ နဝ်ꩻသွူ။ 24ဝွေꩻကအဝ်ႏတွက်ထွားစ ရွဉ်စရင်ꩻကျာꩻနဝ်ꩻ ဝွေꩻသီးကို ပါꩻတဖြာꩻနဝ်ꩻ မော့ꩻနီးဝွေꩻရွဉ် သန်းပေါင်ꩻအာငါႏ နဝ်ꩻသွူ။ 25သွဉ်းနဝ်ꩻ ဖြော်ချာ ဝွေꩻနီး တလုမ်းနွောင်ꩻတဝ်းသွူ။ နဝ်ꩻမꩻ ခွန်တန် ဖေႏအမိန်း ဖေႏနေး ဝွေꩻကဖြော်ချာ အနီးဖုံႏနဝ်ꩻ ဝွေꩻ တွမ်ႏဝွေꩻမာ၊ ဝွေꩻပိုဖုံႏတွမ်ႏ ဝွေꩻထာꩻခြိုꩻဖုံႏ ကားကအဝ်ႏနဝ်ꩻ စာလို့တွော့ꩻ ဖျော်ချာဗာႏ နုဲင်းသွဉ်းအနေႏသွူ။ 26သွဉ်းနဝ်ꩻ အွပ်ꩻလင်ꩻ ခွန်တန်ဆꩻငါတွော့ꩻ တောင်ꩻပြန်ႏ၊ ‘ ခွေကမော့ꩻနီးဒါႏ နီဗွေႏနဝ်ꩻ ခွေသွဉ်းအီႏဖေႏချာလို့ဒျာႏ နီဗွေႏ ကားကအဝ်ႏနဝ်ꩻမꩻ သꩻညင်ꩻဗဲင်းခွေသွဉ်း၊ သယ်ꩻခံႏဗဲင်း ခွေသွဉ်း’ နုဲင်းနဝ်ꩻသွူ။ 27ခွန်တန်နဝ်ꩻ သညင်ꩻဝွေꩻ နဝ်ꩻမꩻ ခွန်တန် အွဉ်ႏပြေႏဖေႏဝွေꩻ နီးတဲင် အွဉ်ႏစွꩻလွေꩻစွဉ်ႏဝွေꩻ နဝ်ꩻသွူ။
28“နဝ်ꩻထွူ ပါꩻခိုနဝ်ꩻ ထန်ႏလွေꩻတွော့ꩻ မော့ꩻစွဉ်ႏသွဉ်း ဝွေꩻသွꩻ၊ အဖြာꩻ ကမော့ꩻနီးဒါႏဝွေꩻ တစိꩻနဝ်ꩻသွူ။ ဝွေꩻစက်ꩻ ဆွမ်ꩻစွော့ꩻထိုꩻစွဉ်ႏ သွဉ်းနဝ်ꩻတွော့ꩻ စိမ်ႏစွဉ်ႏ အငွဥ်ꩻတဲင် ဝွေꩻဒေါ့ꩻ၊ ‘နာꩻကမော့ꩻနီးဒါႏ ခွေနဝ်ꩻ ဖြော်ချာခန်းဟုဲင်း’ နုဲင်းနဝ်ꩻသွူ။ 29သွဉ်းဝွေꩻသွꩻနဝ်ꩻ အွပ်ꩻလင်ꩻတဲင် တောင်ꩻပြန်ႏဝွေꩻ၊ ‘သယ်ꩻခံႏဗဲင်း ခွေသွဉ်းတွော့ꩻ ခွေသွဉ်းအီႏ ဖေႏချာလို့ဒျာႏ နာꩻထာꩻခြိုꩻဖုံႏ’ နုဲင်းနဝ်ꩻသွူ။ 30ကွဲႏတွော့ꩻ ဝွေꩻတနာႏတဝ်းသွူ။ ကွပ်စွဉ်ႏ ဝွေꩻနာႏနဝ်ꩻ အွဉ်ႏခံသော့ꩻထိုꩻစွဉ်ႏ အချုပ်ကို ဗꩻတွိုႏ ဝွေꩻကဖြော်ချာလꩻ နီးနဝ်ꩻသွူ။ 31ထာꩻကထွာနုဲင်းနဝ်ꩻ သွဉ်းအလင်ဖုံႏ ထွိုင်ႏထီႏချိန်ႏ ဝွေꩻသီး သꩻတဟဝ်တဝ်းတဲင် လွေꩻထေ့ ခွန်တန်ထျꩻတွော့ꩻ ဒေါ့ꩻနယ်ဖေႏလို့စွဉ်ႏ ခွန်တန်နဝ်ꩻသွူ။ 32နဝ်ꩻမꩻ ခွန်တန် ဟဲ့ꩻလွဉ်သော့ꩻ သွဉ်း ကောင်းကိုနဝ်ꩻသွူ။ ခွန်တန်ဒေါ့ꩻ၊ ‘နာꩻယိုထွာဒျာႏ သွဉ်းတန်ꩻဖိုꩻ တအဲဉ်ထဝ်း၊ နာꩻကမော့ꩻနီးဒါႏခွေ ကားကအဝ်ႏနဝ်ꩻ နုဲင်းနာꩻကကွီခွေအတွိုင်ꩻ ခွေအွဉ်ႏစွꩻလွစ် ဖေႏလို့လဲဉ်းနာꩻနဝ်ꩻသွူ။ 33ဗွိုန်နုဲင်း ခွေကသꩻညင်ꩻ နာꩻအလောင်း အတွိုင်ꩻနဝ်ꩻ နာꩻအဝ်ႏလိုႏ ဟဝ်သညင်ꩻဒျာႏ နာꩻသွꩻချင်ꩻ သွဉ်းဖုံႏလောင်း၊’ နုဲင်းနဝ်ꩻသွူ။ 34ခွန်တန်နဝ်ꩻ သꩻလျားငါႏနဝ်ꩻမꩻ ဗꩻတွိုႏစွဉ်ႏ ဖြော်ချာလꩻလို့နီး သွဉ်းနဝ်ꩻ ဝွေꩻပသာသော့ꩻစွဉ်ႏ ထောင်ႏတွော့ꩻ ဖေႏစွဉ်ႏအပဲစ်တံႏ” နုဲင်းနဝ်ꩻသွူ။
35တွိုႏနဝ်ꩻမꩻ ဗွေႏယေသျု အွဉ်ႏသွတ်ꩻငဝ်း၊ “လိုꩻစွုမ်ႏဖြာꩻ သီသꩻကို ပေါႏတအွဉ်ႏစွꩻလွစ် ဖေႏတဝ်း သီဖူးဝေးချင်ꩻ အပဲစ်ဖုံႏနဝ်ꩻ ခွေဖါ အဝ်ႏခမ်းထီမို့ꩻလောင်းကို အီႏတအွဉ်ႏစွꩻတဝ်း သီအပဲစ်” နုဲင်းနဝ်ꩻသွူ။
Currently Selected:
မတဲ 18: PBCL
Highlight
Share
Copy
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
