ဧဇရ 1
1
ကုရုဖေႏအမိန်းယုဒလိုꩻဖုံႏဖေႏကသဲင်ꩻလွဉ်ချာအခမ်းထီ
1 #
ယေ ၂၅:၁၁၊ ၂၉:၁၀။ ပါးသျား ဧကရာဇ်ခွန်တန်ကုရု အုပ်စိုꩻ ပထမနေင်ႏကိုနဝ်ꩻ ဝွေꩻဗွေႏအွဉ်ႏကုရု ထေအမိန်း တဲမ်းပသာလွေꩻ ဝွေꩻအဲမ်ပါယာ ခင်ႏလမ်းစွုမ်ႏထွောင်းတွော့ꩻ ဖေႏနေး ကဖတ်သန်သန် နယ်ဖေႏနဝ်ꩻ ထာဝရဘုရာꩻ မာꩻဗွေမဲဉ်ႏလွဉ်ꩻစွဉ်ႏ နုဲင်းဝွေꩻဗွေႏ ကဒေါ့ꩻဖေႏစွဉ်ႏ ပရောဖဲစ် ယေရမိအတွိုင်ꩻ နဝ်ꩻသွူ။
2 #
ဟေသျာ ၄၄:၂၈။ “ယိုနဝ်ꩻထွာဒျာႏ ပါႏသျား ဧကရာဇ်ခွန်တန် ကုရု အမိန်းနဝ်ꩻသွူ။ ထာဝရဘုရာꩻ ခမ်းထီမို့ꩻလောင်း အဗွေႏဘုရာꩻနဝ်ꩻ မာꩻဖေႏလဲဉ်းခွေ ဖေႏကအုပ်စိုꩻ တဟံႏတန်လွုမ်းတွော့ꩻ ဝေင်ꩻယေရုသလမ်ႏကို ဝွေꩻဗွေႏအတာႏ ဖေႏနေး ကတယ်ႏဖေႏဗာႏ ဗိမာန်ႏတောႏကျောင်ꩻ တဖြုံႏနဝ်ꩻ ဖေႏလဲဉ်းသွူခွေ တာႏဝွန်ႏနဝ်ꩻသွူ။ 3သီကထွာ ဗွေႏဘုရာꩻ အလိုꩻမျိုꩻဖုံႏ ကားကအဝ်ႏနဝ်ꩻ ယံဖေႏ ဝွေꩻဗွေႏ ကအဝ်ႏငီꩻသွော့သီ။ သီနဝ်ꩻ လွေꩻဝေင်ꩻ ယေရုသလမ်ႏ သူꩻတွော့ꩻ ဖေႏကဝုဲင်ႏ ကိုꩻကွယ်ႏသော့ꩻဗာႏ ဝေင်ꩻယေရုသလမ်ႏကိုနဝ်ꩻ တယ်ႏဖေႏဖျင်ယင်းသွေ့ာ ထာဝရဘုရာꩻ ဣသရေး ဗွေႏဘုရာꩻ ဗိမာန်ႏတောႏကျောင်ꩻ။ 4ပါꩻမုဲင်ꩻတယဝ်း ကခံႏဗာႏဒါႏ ဝါးထန်ႏထိုꩻ အခမ်းထီတွော့ꩻ ကမဉ်သဲင်ꩻလွဉ်ချာဒါႏ ဝွေꩻဗွေႏ အလိုꩻမျိုꩻဖုံႏတာႏ မဉ်ႏအဝ်ႏလိုႏ အစွဲကိုသားနဝ်ꩻ လိုꩻကအဝ်ႏ ဝွေꩻသီး အသောင်အထျꩻ သားဖုံႏနဝ်ꩻ စွဲကိုဖေႏဗာႏ ဝွေꩻသီး နုဲင်းယိုဖုံႏသွူ။ ဝွေꩻသီးနဝ်ꩻ ထောက်ဖေႏဗာႏ လိုꩻစားယို ရွဉ်၊ ခံꩻ၊ တိရစ္ဆာန်ႏ ဒင်ႏအီ ထာꩻအံႏစရိပ်ဖုံႏ၊ ဖေႏပါဗာႏထာꩻလူႏ အီႏလူႏပူႏဇောႏသော့ꩻ ဗွေႏဘုရာꩻ ဗိမာန်ႏတောႏကျောင်ꩻ ဝေင်ꩻယေရုသလမ်ႏကို နဝ်ꩻသွူ။
5နဝ်ꩻထွူ ယုဒစွဉ်ႏ ဗေင်ယာမိန်စွိုးခွိုꩻ၊ အခွိုꩻနွယ်ႏ ခေါင်းဆောင် ယဇ်ပရောဟိတ်တွမ်ႏ လေဝိစွိုးခွိုꩻဖုံႏတွမ်ႏ ဗွေႏဘုရာꩻ ကတမာ ဖေႏအာႏဒါႏအသꩻ လိုꩻလင် စွုမ်ႏဖြာꩻဖြာꩻနဝ်ꩻ ဖျင်ရဲဉ်ꩻသေꩻမꩻ အီႏလွေꩻတယ်ႏ ဖျင်ဟဝ်ချာယင်း ထာဝရဘုရာꩻ ဗိမာန်ႏတောႏကျောင်ꩻ ဝေင်ꩻယေရုသလမ်ႏကို နဝ်ꩻသွူ။ 6ဝွေꩻသီး အသောင်အထျꩻသားဖုံႏ ကားကအဝ်ႏနဝ်ꩻ စွဲကိုဝွေꩻသီး၊ ဖေႏဝွေꩻသီး ရွဉ်ခြွိုင်းခြိုꩻဖုံႏ၊ ခံꩻဖုံႏ၊ ထာꩻအံႏစရိပ်ဖုံႏ၊ တိရစ္ဆာန်ႏ ဒင်ႏအီထာꩻခြိုꩻဖုံႏ၊ ထာꩻခြိုꩻအငိုꩻတန်ႏ အလင်ဖုံႏစွဉ်ႏ ဗိမာန်ႏတောႏကျောင်ꩻတာႏ အလူႏဖုံႏနဝ်ꩻ အာငါႏသွူ။
7ခွန်တန် နေဗုခဒ်နေဇာ ကသိမ်ꩻသဲင်ꩻထိုꩻဒါႏ ဝေင်ꩻယေရုသလမ်ႏ ဗိမာန်ႏတောႏ ကျောင်ꩻကို တကောက်ꩻဖလားဖုံႏတွမ်ႏ ဝန်ႏဖုံႏ၊ ဝွေꩻကသဲင်ꩻအွဉ်ႏသော့ꩻဒါႏ ဝွေꩻအဘုရာꩻဖုံႏ ဗိမာန်ႏတောႏ ကျောင်ꩻကိုနဝ်ꩻ ဧကရာဇ်ခွန်တန် ကုရု အီထန်ႏလွဉ်ဖေႏချာယင်း ဝွေꩻသီးနဝ်ꩻသွူ။ 8တကောက်ꩻဖလားဖုံႏ နဝ်ꩻနဝ်ꩻ ခွန်တန်အပ်ဖေႏစွဉ်ႏ ဘဏ္ဍာႏထိန်ꩻချုပ် မိသရေဒတ် စူကိုတဲင် ထာꩻခြိုꩻနဝ်ꩻဖုံႏနဝ်ꩻ မိသရေဒတ် စဲစ်ဆေꩻတွော့ꩻ၊ အပ်ဖေႏယုဒခွန်ခံႏ သျေသျဗာဇာ စူကိုနဝ်ꩻ၊ 9-10နုဲင်းဆလယိုဖုံႏသွူ။
| ကအီႏသော့ꩻအီထာꩻလူႏ ဝန်ႏတောင်ꩻတန်ခံꩻဖုံႏနဝ်ꩻ | ၃၀ |
| ကအီႏသော့ꩻအီထာꩻလူႏ တကောက်ꩻရွဉ်ဖုံႏနဝ်ꩻ | ၁၀၀၀ |
| တကောက်ꩻအလင်ဖုံႏနဝ်ꩻ | ၂၉ |
| ဝန်ႏတောင်ꩻခံꩻပေႏဖုံႏနဝ်ꩻ | ၃၀ |
| ဝန်ႏတောင်ꩻရွဉ်ပေႏဖုံႏနဝ်ꩻ | ၄၁၀ |
| ခြွိုင်းခြိုꩻအလင်ဖုံႏနဝ်ꩻ | ၁၀၀၀ |
11သျေသျဗာဇာတွမ်ႏ လိုꩻကခံႏဗာႏဒါႏ ဝါးထန်ႏထိုꩻ ခမ်းထီသားဖုံႏနဝ်ꩻ အဝ်ႏဗာဗုလုန်ခမ်း သဲင်ꩻလွဉ်ချာ ဝေင်ꩻယေရုသလမ်ႏတွော့ꩻ ကအီသဲင်ꩻလွဉ်ပါဒါႏ တကောက်ꩻခံꩻဖုံႏ၊ တကောက်ꩻရွဉ်ဖုံႏစွဉ်ႏ ထာꩻခြိုꩻဖုံႏ ကားကအဝ်ႏနဝ်ꩻ ၅၄၀၀ နဝ်ꩻသွူ။
Currently Selected:
ဧဇရ 1: PBCL
Highlight
Copy
Compare
Share
Want to have your highlights saved across all your devices? Sign up or sign in
Pao Bible Common Language© Bible Society of Myanmar, 2019.
