တမန်ႏတောႏ 13

လွိုက်အွဉ်ႏစွꩻလွေꩻဗာနာဗတွမ်ႏသျောလု

1ဝေင်ꩻအန္တိအုတ် အသေန်းတောႏကိုနဝ်ꩻ ပရောဖဲစ်ဖုံႏ ယင်ဟန်ႏတွမ်ႏ ဆရာႏဖုံႏ ကထွာဒါႏ ဗာနာဗ၊ သိမောင်(ကဟဲ့ꩻဒါႏပါꩻဖြိန်း)၊ လုကိ (ကုရေနေခမ်းသား)၊ မာနေင် (ပါꩻကထွာ ခွန်ဟေရုဒ်အသွꩻ)တွမ်ႏ သျောလုနဝ်ꩻသွူ။ 2ဝွေꩻသီးနဝ်ꩻ အဝ်ႏမာꩻ ဗွေႏဘုရာꩻ အမုတောႏ ထာꩻမာꩻတဲင် အဝ်ႏသျောင်ႏကံ ထာꩻအံႏကျာꩻနဝ်ꩻ ကြောင်းစင် ဝိညာဉ်ႏတောႏ ဒေါ့ꩻဖေႏဝွေꩻသီး၊ “ဖေႏကမာꩻ ခွေထာꩻမာꩻနဝ်ꩻ ခွေဟဲ့ꩻလဲဉ်း ဝွေꩻသီးနဝ်ꩻမꩻ၊ ခွေတာႏ လွိုက်ထန်ႏခေါ်သွော့ ဗာနာဗတွမ်ႏ သျောလု” နုဲင်းနဝ်ꩻသွူ။

3ဝွေꩻသီးသျောင်ႏကံ ထာꩻအံႏတွော့ꩻ ဝွေꩻသီးစူဖုံႏနဝ်ꩻ အွဉ်ႏဒင်ႏဖေႏ သျောလုစွဉ်ႏ ဗာနာဗ ကတူႏလောင်းတဲင် ဆုတောင်ꩻဖေႏတွော့ꩻ အွဉ်ႏစွꩻလွေꩻ ဝွေꩻသီးသွူ။

အဝ်ႏသော့ꩻသုဲင်းပရတ်ကြွန်လောင်း

4ကြောင်းစင် ဝိညာဉ်ႏတောႏ အွဉ်ႏစွꩻလွေꩻတွော့ꩻ ဗာနာဗတွမ်ႏ သျောလုနဝ်ꩻ လွေꩻထိုꩻ ဝေင်ꩻသေလုကိတဲင် ထုမ်းသင်္ဘောꩻ နဝ်ꩻကို၊ တွိုႏလွေꩻစွဉ်ႏ သုဲင်းပရတ်ကြွန်နဝ်ꩻသွူ။ 5ဝွေꩻသီး ထွိုင်ႏဖျော်လွေꩻ ဝေင်ꩻသာလမိနဝ်ꩻ ဝွေꩻသီး ဟော်ꩻစွဉ်ႏ ဗွေႏဘုရာꩻ တရာꩻ၊ တရာꩻစရွပ်ကိုနဝ်ꩻသွူ။ ဖေႏကစွဲကို ထာꩻမာꩻနဝ်ꩻ ယောဟန်မာကု အဝ်ႏလွေꩻငီꩻစွဉ်ႏ ဝွေꩻသီးသွူ။

6ဝွေꩻသီး ဖျတ်ကာႏလွေꩻ ကြွန်တွော့ꩻ တွိုႏလွေꩻစွဉ်ႏ ဝေင်ꩻပါဖုတဲင်၊ နဝ်ꩻကိုနဝ်ꩻ ဝွေꩻသီး မော့ꩻခွဲစွဉ်ႏ တတ်ဆရာႏ ၊ မဉ်ꩻကဟဲ့ꩻဒါႏ ဗာယေသျုနဝ်ꩻသွူ၊ ဝွေꩻနဝ်ꩻထွာ ဂျူးလိုꩻမျိုꩻ တဖြာꩻ၊ အဝ်ႏကေႏညာႏချာ အနမ်း ထွာပရောဖဲစ်တပါꩻ နဝ်ꩻသွူ။ 7ဝွေꩻနဝ်ꩻ အဝ်ႏထွာ ကြွန်ခွန်ခံႏ သေလဂိပေါလဒ် သွꩻတဖြာꩻ သေလဂိပေါလဒ်နဝ်ꩻထွာ လိုꩻဉာဏ်ႏအဝ်ႏသား တဖြာꩻနဝ်ꩻသွူ။ ပွိုးတွော့ꩻ ခွန်ခံႏနဝ်ꩻ မဉ်ဟွိုန် ဗွေႏဘုရာꩻ တရာꩻငဝ်းအတွက် ဝွေꩻဟဲ့ꩻလွဉ် ဗာနာဗတွမ်ႏ သျောလု ဝွေꩻဆꩻငါသွူ။ 8ကွဲႏတွော့ꩻ တတ်ဆရာႏ ဧလုမ (ယိုနဝ်ꩻထွာ ဝွေꩻဂရိမဉ်ꩻ) ဖေႏနေးခွန်ခံႏ ကယွုမ်းဗာႏမွိုန်းနဝ်ꩻ ဝွေꩻဆန်ချာ သျောလုစွဉ်ႏ ဗာနာဗသွူ။ 9တွိုႏနဝ်ꩻ သျောလု ကဟဲ့ꩻဒါႏ ပေါလုနဝ်ꩻ အဝ်ႏဗွေတွမ်ႏ ကြောင်းစင် ဝိညာဉ်ႏတောႏသွူ။ ဝွေꩻထွားစဲင်းလွေꩻစွဉ်ႏ တတ်ဆရာႏတဲင်၊ 10ဒေါ့ꩻ “နာꩻ စာႏတန်ႏပိုခိုဟွေး၊ နာꩻနဝ်ꩻ အဝ်ႏထွာ ထာꩻဟဝ်ဖုံႏ ကားကအဝ်ႏ အရန်ႏသူႏ။ နာꩻနဝ်ꩻ အဝ်ႏဗွေသော့ꩻဒျာႏ ထာꩻကုဲင်မျိုꩻ ကားကအဝ်ႏ အကျံႏဖုံႏတဲင် ဗွေႏဘုရာꩻ သစ္စာႏတရာꩻ မဲဉ်ႏနဝ်ꩻ နာꩻအဝ်ႏကျံႏမာꩻခွိုန်ꩻ ထိုꩻတော သေႏသေႏဒျာႏ ထာꩻလိန်ႏလဲဉ်ကို။ 11ဗွေႏဘုရာꩻ အစူတောႏ အီႏလင်ꩻလွဉ်လူး နာꩻလောင်းယိုခါသွူ။ နာꩻမဲ့အီႏခေ့ꩻတဲင် အီႏတထီႏဗာႏတဝ်း မွူးနီꩻထာꩻလေနဝ်ꩻ အချိန်ႏညတန်” နုဲင်းနဝ်ꩻသွူ။

တလဲင်ႏချင်ႏ ဧလုမနဝ်ꩻ ထာꩻခေ့ꩻတစွိုး လင်ႏအဝ်ႏဒို့ꩻထိုꩻ ဝွေꩻမဲ့ခူꩻဖုံႏတဲင် ဝွေꩻကျိုꩻစာꩻထုမ်ႏ ပါꩻတဖြာꩻဖြာꩻ ဖေႏကအွဉ် စွီႏလွေꩻဝွေꩻနဝ်ꩻသွူ။ 12ထာꩻကထွာလွဉ်နုဲင်းယို ခွန်ခံႏထွိုင်ႏထီႏနဝ်ꩻ ဝွေꩻယွုမ်းစွဉ်ႏ ဗွေႏယေသျုသွူ။ ပွိုးဝွေꩻဟွိုန်ဗာႏ ထာꩻသွဉ်သင် ပွိုင်းဝွို့တွမ်ႏ ဗွေႏဘုရာꩻခရာႏနဝ်ꩻမꩻ အံႏဖြာႏမွေးစွဉ်ႏနဝ်ꩻသွူ။။

အဝ်ႏသော့ꩻပိသိဒိခမ်းဝေင်ꩻအန္တိအုတ်ကို

13ပေါလုစွဉ်ႏ ဝွေꩻလိုꩻစွိုꩻဖုံႏ အဝ်ႏဝေင်ꩻပါဖု ထုမ်းသင်္ဘောꩻတွော့ꩻ ဖျော်လွဉ် ဝေင်ꩻပေရဂေ ပံဖုလိခမ်းကို၊ နဝ်ꩻကိုနဝ်ꩻ ယောဟန်မာကု အွဉ်ႏကုဲင်ထိုꩻ ဝွေꩻသီးတွော့ꩻ သဲင်ꩻချာထိုꩻ ဝေင်ꩻယေရုသလမ်ႏကိုသွူ။ 14အဝ်ႏဝေင်ꩻပေရဂေနဝ်ꩻ ဝွေꩻသီးထန်ႏလွေꩻတဲင် ဖျော်လွေꩻစွဉ်ႏ ပိသိဒိခမ်း၊ ဝေင်ꩻအန္တိအုတ်တဲင် ဥပုသ်မွူးနီꩻကို ဝွေꩻသီး လွေꩻနွို့သော့ꩻ တရာꩻစရွပ်ကိုတဲင် အုံလင်ꩻစွဉ်ႏနဝ်ꩻသွူ။ 15မောသျေ ပညတ်ကျမ်ꩻတွမ်ႏ ပရောဖဲစ်ဖုံႏ ကအဝ်ႏတဲမ်းခါꩻဒါႏ ကျမ်ꩻဖုံႏ ထွိုင်ႏဖတ်ထွူနဝ်ꩻ တရာꩻစရွပ်လိုꩻတန်ဖုံႏ အွဉ်ႏစွꩻလွဉ် သတင်ꩻဖေႏသား တဖြာꩻ ဝွေꩻသီးထျꩻ၊ “သွꩻဖုံႏ၊ သီတရာꩻဖေႏအာႏ လိုꩻဖုံႏမဉ်ႏအဝ်ႏနဝ်ꩻ ဝွေꩻသီးတာႏ နီမဉ်အွဉ်ႏကသီ ဒေါ့ꩻဟော်ꩻဖေႏ လိုꩻဖုံႏ” နုဲင်းနဝ်ꩻသွူ။ 16ပေါလု အုံထွိုင်ႏယွိုင်ႏနယ် စွဉ်ႏဝွေꩻစူတွော့ꩻ ဒေါ့ꩻဖေႏစစွဉ်ႏ၊

“သွꩻဣသရေး လိုꩻမျိုꩻဖုံႏစွဉ်ႏ လိုꩻမျိုꩻလင်ဖုံႏ၊ ကဝုဲင်ႏကိုꩻကွယ်ႏဒါႏ ဗွေႏဘုရာꩻ ယိုကိုသားဖုံႏ ကားကအဝ်ႏနဝ်ꩻ၊ နာႏသွော့ ခွေငဝ်းဟုဲင်း။ 17#ထလ ၁:၇၊ ထလ ၁၂:၅၁။ ဣသရေး လိုꩻမျိုꩻအဗွေႏဘုရာꩻ ကလွိုက်ဒါႏ နီမွိုးဖြား ဖါဖြားသီးတွော့ꩻ မာꩻဖေႏလိုꩻဖုံႏ ဖေႏကထွာ လိုꩻမျိုꩻတန်တမျိုꩻ၊ ဝွေꩻသီးကအုံဒါႏ နုဲင်းထဉ်ႏ ခမ်းလင်သား အီဂျစ်ခမ်းကိုချိန်ႏ၊ စွဉ်ႏကတန်မျတ်ငါႏ ဝွေꩻဗွေႏတန်ꩻခိုꩻနဝ်ꩻ ဗွေႏဘုရာꩻ ဟဲ့ꩻထန်ႏလွဉ် ဝွေꩻသီး အီဂျစ်ခမ်းတဲင်။ 18#ကွ ၁၄:၃၄၊ ဟော်ꩻ ၁:၃၁။ နေင်ႏပေါင်ꩻ လစ်ꩻဆီလွုမ်း ဝွေꩻဗွေႏ သယ်ꩻခံႏဝွေꩻသီး ကန္တာရတခြာကိုနဝ်ꩻသွူ။ 19#ဟော်ꩻ ၇:၁၊ ယောသျု ၁၄:၁။ ခါနန်ခမ်းကို လိုꩻမျိုꩻဖုံႏနွတ်ꩻမျိုꩻနဝ်ꩻ ဝွေꩻဗွေႏ ယားကုဲင်ထိုꩻတဲင် ဝွေꩻဗွေႏလိုꩻမျိုꩻဖုံႏ ဖေႏကပဲင်ႏဗာႏ ဟံႏယာႏနဝ်ꩻ မာꩻဖေႏစွဉ်ႏသွူ။ 20#တရာꩻ ၂:၁၆၊ ၁သျာ ၃:၂၀။ ထွာထာꩻနုဲင်းယိုနဝ်ꩻ ညလဲဉ်း နေင်ႏပေါင်ꩻ ၄၅၀ရပ် နဝ်ꩻသွူ။

ယိုထွူ ဝွေꩻဗွေႏဖေႏ ဝွေꩻသီး တရာꩻလိုꩻတန်ဖုံႏ ဗꩻတွိုႏလွေꩻ ပရောဖဲစ် သျာမွေလစိုးနဝ်ꩻသွူ။ 21#၁သျာ ၈:၅၊ ၁သျာ ၁၀:၂၁။ ဝွေꩻသီး ထွိုင်ႏကွီ ခွန်တန်တပါꩻချိန်ႏ နေင်ႏပေါင်ꩻ လစ်ꩻဆီတာႏ ဖေႏကထွာ ဝွေꩻသီး ခွန်တန်နဝ်ꩻ ဗွေႏဘုရာꩻဖေႏ ဝွေꩻသီး ဗေင်ယာမိန်စွိုးခွိုꩻကို ကိသျပိုခို သျောလုနဝ်ꩻသွူ။ 22#၁သျာ ၁၃:၁၄၊ ၁သျာ ၁၆:၁၂၊ သာ ၈၉:၂၀။ ပုဲင်းထိုꩻဝွေꩻ ခွန်တန်အရာႏထွူ ဒါဝိဒ် ဖေႏကထွာ ဝွေꩻသီးခွန်တန်နဝ်ꩻ ဗွေႏဘုရာꩻ ခန်ꩻဖေႏနဝ်ꩻသွူ။ ဗွေႏဘုရာꩻ ကဒေါ့ꩻဒါႏ ဝွေꩻခရာႏနဝ်ꩻ နုဲင်းယို၊ ‘ခွေမော့ꩻလဲဉ်း ယေသျဲပိုခို ဒါဝိဒ်နဝ်ꩻ ထွာလိုꩻဟဝ်၊ ခွေကျွိုက်နစ်သက် ခွေကမဉ် အွဉ်ႏဝွေꩻမာꩻ ကားကအဝ်ႏနဝ်ꩻ အီႏမာꩻဖေႏ’နုဲင်းနဝ်ꩻသွူ။ 23နုဲင်းဝွေꩻဗွေႏ ကအွဉ်ႏဂတိ သစ္စာႏခါꩻလဲဉ်း အတွိုင်ꩻ ဣသရေး လိုꩻမျိုꩻဖုံႏအတာႏ ထာꩻကယ်ႏတင်ႏ အဗွေႏနဝ်ꩻ ဗွေႏဘုရာꩻခန်ꩻဖေႏ ဒါဝိဒ်ပိုလီꩻ စွိုးခွိုꩻကို တဖြာꩻ ထွာဗွေႏယေသျုသွူ။ 24#မာ ၁:၄၊ လုကာ ၃:၃။ ခလားဗွေႏယေသျု ကမာꩻစ ဝွေꩻဗွေႏ အမုတောႏ ထာꩻမာꩻနဝ်ꩻ ဣသရေး လိုꩻမျိုꩻဖုံႏ ကားကအဝ်ႏနဝ်ꩻ အဝ်ႏဝွေꩻသီး အပဲစ်ကို ဖေႏကလꩻ ထာꩻကော့ꩻမာႏတဲင် ဖေႏကခံႏဗာႏ ဗတ္တိဇံႏ ထီမင်္ဂလာႏနဝ်ꩻ ယောဟန် ဟော်ꩻဖေႏနဝ်ꩻသွူ။ 25#ယော ၁:၂၀၊ မ ၃:၁၁၊ မာ ၁:၇၊ လု ၃:၁၆၊ ယော ၁:၂၇။ နုဲင်းယောဟန် ကအီႏအွဉ်ႏထွူ ဝွေꩻသာႏသနာႏ ထာꩻမာꩻနဝ်ꩻ ဝွေꩻဒေါ့ꩻဖေႏလိုꩻဖုံႏ၊ ‘ခွေနဝ်ꩻသီထင်း ထွာပါꩻမုဲင်ꩻဟောင်း။ ခွေနဝ်ꩻထွာ ပါꩻအဖြာꩻ သီကအဝ်ႏမောင်ꩻနဝ်ꩻ တမွေးတဝ်း။ ကွဲႏတွော့ꩻ နာႏသွော့၊ ဝွေꩻဗွေႏနဝ်ꩻ အဝ်ႏကျွꩻလွဉ် ခွေဆꩻချာတဲင် ဝွေꩻဗွေႏ ခင်ႏဖါႏဖြွီꩻငါတဲ့ ခွေအီႏစေနဝ်ꩻ တထွိုက်တဝ်း၊’ နုဲင်းနဝ်ꩻသွူ။

26ခွေသွꩻ ဣသရေး လိုꩻမျိုꩻဖုံႏ၊ အဗြာဟံ ပိုလီꩻစွိုးခွိုꩻဖုံႏတွမ်ႏ လိုꩻမျိုꩻလင် ကဝုဲင်ႏကိုꩻကွယ်ႏဒါႏ ဗွေႏဘုရာꩻ ယိုကိုသားဖုံႏ၊ 27ဝွေꩻဗွေႏထွာ ထာꩻကယ်ႏတင်ႏဗွေႏနဝ်ꩻ လိုꩻကအဝ်ႏအုံသော့ꩻဒါႏ ဝေင်ꩻယေရုသလမ်ႏ ကိုသားဖုံႏတွမ်ႏ ဝွေꩻသီး ခေါင်းဆောင် လိုꩻတန်ဖုံႏနဝ်ꩻ တသေတဝ်း၊ ဥပုသ်မွူးနီꩻ စွုမ်ႏနီꩻ ကဖတ်ဒါႏ ပရောဖဲစ် ကျမ်ꩻငဝ်းဖုံႏနဝ်ꩻ ဝွေꩻသီး တသေနာႏတဝ်းသွူ။ ကွဲႏတွော့ꩻ ဝွေꩻသီးနဝ်ꩻ စွဉ်ႏကစီႏရင်ႏသီထိုꩻ ဗွေႏယေသျုယိုနဝ်ꩻ ဝွေꩻသီး မာꩻဗွေမဲဉ်ႏလွဉ်ꩻစွဉ်ႏ ပရောဖဲစ်ဖုံႏငဝ်းနဝ်ꩻသွူ။ 28#မ ၂၇:၂၂၊ ၂၃၊ မာ ၁၅:၁၃၊ ၁၄၊ လု ၂၃:၂၁–၂၃၊ ယော ၁၉:၁၅။ ကအီႏဖေႏ ဝွေꩻဗွေႏထာꩻသီတံႏနဝ်ꩻ ဝွေꩻသီးထုမ်ႏ အကျောင်ꩻခရာႏ လဲင်ꩻတမော့ꩻနေးတဝ်း စွဉ်ႏတဲ့ ဖေႏနေးကဖေႏ ဝွေꩻဗွေႏ ထာꩻသီတံႏနဝ်ꩻ ဝွေꩻသီး ကွီခွန်ပိလတ်သွူ။ 29#မ ၂၇:၅၇–၆၁၊ မာ ၁၅:၄၂–၄၇၊ လု ၂၃:၅၀–၅၆၊ ယော ၁၉:၃၈–၄၂။ ပွိုင်းဝွို့တွမ်ႏ ဝွေꩻဗွေႏခရာႏ နုဲင်းလိတ်ကျမ်ꩻကိုကရိုꩻ ဝွေꩻသီး ထွိုင်ႏမာꩻထွူလို့နဝ်ꩻ၊ အဝ်ႏ ကင်းထွန်ႏလောင်း ဝွေꩻသီးထူႏလင်ꩻ ဝွေꩻဗွေႏတဲင် အွဉ်ႏသော့ꩻစွဉ်ႏ သဲင်ႏခဲင်ꩻအောင်ကိုသွူ။ 30ကွဲႏတွော့ꩻ အဝ်ႏထာꩻသီကို ဗွေႏဘုရာꩻ မာꩻထွိုင်ႏမွန်ဖေႏ ဝွေꩻဗွေႏတဲင်၊ 31#တ ၁:၃။ လိုꩻကအဝ်ႏလွေꩻငီꩻဒါႏ စွဉ်ႏဝွေꩻဗွေႏ အဝ်ႏကာလိလဲခမ်း ဗꩻတွိုႏလွေꩻ ဝေင်ꩻယေရုသလမ်ႏနဝ်ꩻ ဝွေꩻဗွေႏ ပေါႏနယ်အနမ်း မွူးနီꩻပေါင်ꩻ အာငါႏသွူ။ ယိုခါ ဝွေꩻဗွေႏတာႏနဝ်ꩻ ဝွေꩻသီးခံႏနယ်ဖေႏ ဣသရေး လိုꩻမျိုꩻဖုံႏ သက်သေႏနဝ်ꩻသွူ။ 32-33#သာ ၂:၇။ နုဲင်းကတဲမ်းခါꩻဒါႏ သာလံကျမ်ꩻ ဒုတိယအခန်ꩻကို အတွိုင်ꩻ၊

‘နာꩻနဝ်ꩻ ထွာခွေပိုခိုတောႏ၊

ဟန်ႏနီꩻယို ခွေနဝ်ꩻထွာလွဉ်လဲဉ်း နာꩻအဖါတောႏ’ နုဲင်းဗွေႏဘုရာꩻ ကအွဉ်ႏဂတိ သစ္စာႏခါꩻဒါႏ နီမွိုးဖြား ဖါဖြားသီးဖုံႏ ဝွေꩻဗွေႏ ကအီႏမာꩻနဝ်ꩻ စွဉ်ႏကမာꩻ ထွိုင်ႏမွန်ဖေႏဒါႏ ဗွေႏယေသျု အသက်နဝ်ꩻ ယိုခါ ဝွေꩻဗွေႏ မာꩻဖေႏလဲဉ်း ဝွေꩻသီး အပိုလီꩻစွိုးခွိုꩻ နီအတာႏတဲင် နီကလွဉ် ယိုကိုနဝ်ꩻ အီလွဉ်ဖေႏဒျာႏသီ သတင်ꩻဟဝ်ဖုံႏ၊ နုဲင်းနဝ်ꩻသွူ။

34 # ဟေသျာ ၅၅:၃ (LXX)။ ယိုနဝ်ꩻထွာ မုဲင်ꩻခါတဲ့ အီႏတသေင်သော့ꩻဗာႏတဝ်း သဲင်ႏခဲင်ꩻအောင်ကို ပွိုင်းဝွို့တွမ်ႏ ဝွေꩻဗွေႏ အဝ်ႏထာꩻသီကို ထွိုင်ႏမွန်လွဉ် ခရာႏ နုဲင်းဗွေႏဘုရာꩻ ကဒေါ့ꩻဒါႏနဝ်ꩻ

‘ ခွေကအွဉ်ႏ ဂတိခါꩻဒါႏ ဒါဝိဒ်အတွိုင်ꩻ၊

ကြောင်းစင်မျတ်တွမ်ႏ မင်္ဂလာႏ အစဲစ်အမဲဉ်ႏမွေးနဝ်ꩻ ခွေအီႏဖေႏသီ၊’ နုဲင်းနဝ်ꩻသွူ။

35 # သာ ၁၆:၁၀။ နုဲင်းဝွေꩻဗွေႏ ကရိုꩻဖေႏဒါႏ ကျမ်ꩻပိုဒ် အလင်တထွောင်းကိုနဝ်ꩻ၊

‘ သစ္စာႏကအဝ်ႏဗွေဒါႏ နီဗွေႏအသွဉ်း ကအီႏသေင်သော့ꩻဗာႏ သဲင်ႏခဲင်ꩻအောင်ကိုနဝ်ꩻ နီဗွေႏ အီႏတဖေႏတဝ်းအခွင်ꩻ’ နုဲင်းနဝ်ꩻသွူ။

36ဒါဝိဒ်စိုးနဝ်ꩻ ဝွေꩻမာꩻ ဗွေႏဘုရာꩻ အမုတောႏ ထာꩻမာꩻ ထွူတဲင် ဝွေꩻသီထိုꩻဒျာႏ၊ ဝွေꩻနဝ်ꩻ သင်္ဂြိုဟ်ႏငီꩻစွဉ်ႏ ဝွေꩻအမွိုးဖြား ဖါဖြားသီးဖုံႏတဲင် ဝွေꩻအရုပ်ခန္ဓာႏနဝ်ꩻ သေင်သော့ꩻဒျာႏ သဲင်ႏခဲင်ꩻအောင်ကိုနဝ်ꩻသွူ။ 37ကွဲႏတွော့ꩻ အဝ်ႏထာꩻသီကို ဗွေႏဘုရာꩻ ကမာꩻထွိုင်ႏမွန်ဖေႏဒါႏ အဖြာꩻနဝ်ꩻ တထွာတဝ်းနုဲင်းယိုသွူ။ 38-39ခွေသွꩻ ဣသရေး လိုꩻမျိုꩻဖုံႏ သီကားကအဝ်ႏ စွဉ်ႏဗွေႏယေသျု အတရာꩻ ပွိုင်းဝွို့တွမ်ႏ အွဉ်ႏစွꩻလွစ်ဖေႏ အပဲစ်ခရာႏ ကဟော်ꩻဖေႏသီနဝ်ꩻ ဖေႏကသေစဲင်းဗာႏ၊ စွဉ်ႏမောသျေ ပညတ်ကျမ်ꩻ တအွဉ်ႏစွꩻလွစ် နွောင်ꩻတဝ်းဒါႏ သီအပဲစ်ဖုံႏ ကားကအဝ်ႏနဝ်ꩻ လိုꩻ ကယွုမ်းဒါႏ ဝွေꩻဗွေႏသား စွုမ်ႏဖြာꩻနဝ်ꩻ လွစ်နွောင်ꩻကျောင်ꩻ ဖေႏသီကသေဗာႏနဝ်ꩻသွူ။ 40နဝ်ꩻထွူ ဖေႏနေး သီကထွာဗာႏမွိုန်းနုဲင်း ပရောဖဲစ်ကဒေါ့ꩻနဝ်ꩻ အွဉ်ႏသတိꩻသွော့ ၊

41 # ဟဗ ၁:၅ (LXX)။ ‘ထွားဟုဲင်း၊ သီလိုꩻ ကသွင်ꩻဖွီဒါႏ ဝင်ꩻဖုံႏဟွေး၊ အီႏအံႏဖြာႏတဲင် သီထိုꩻဒျာႏကွေး။

နုဲင်းခွေကအဝ်ႏမာꩻဒါႏထာꩻ ဟန်ႏနီꩻယို၊

ပါꩻတဖြာꩻဖြာꩻ လဲင်ꩻသျင်ꩻနယ်ဖေႏသီ စွဉ်ႏတဲ့

သီအီႏတယွုမ်းတဝ်း၊’ နုဲင်းနဝ်ꩻသွူ။

42နုဲင်းပေါလုတွမ်ႏ ဗာနာဗ အဝ်ႏတရာꩻစရွပ်ကို ထန်ႏလွေꩻချိန်ႏ၊ ဆုဲင်ꩻဥပုသ်မွူးနီꩻ ဖေႏကသဲင်ꩻလွဉ်ချာတွော့ꩻ ကဒေါ့ꩻနယ်ထဲင်းယင်း ဝွေꩻသီး ထာꩻယိုဖုံႏ ခရာႏနဝ်ꩻ လိုꩻဖုံႏဖစ်ဟဲ့ꩻယင်း ဝွေꩻသီးသွူ။ 43လိုꩻဖုံႏအုံကွံဝင်ꩻထွူ ထွိုင်ႏထန်ႏလွဉ်နဝ်ꩻ ဂျူးလိုꩻမျိုꩻဖုံႏစွဉ်ႏ လိုꩻမျိုꩻလင် ကပြောင်ꩻကြုဲင်ꩻ လွဉ်သော့ꩻ ဂျူးဘာႏသာႏကိုသားဖုံႏနဝ်ꩻ လွေꩻလွဉ်ꩻ ပေါလုတွမ်ႏ ဗာနဗဆꩻချာနဝ်ꩻ အာငါႏသွူ။ ဖေႏနေး ကအုံအဝ်ႏ သက်မွန်သော့ꩻဒျာႏ ဗွေႏဘုရာꩻ ကေꩻဇူꩻတောႏကိုနဝ်ꩻ တမန်ႏတောႏဖုံႏ ဒေါ့ꩻဖေႏဝွေꩻသီးတဲင် တမာဖေႏအာႏ ဝွေꩻသီးသွူ။

44ဆုဲင်ꩻဥပုသ်မွူးနီꩻ ထွိုင်ႏဗော့ꩻနဝ်ꩻ ဖေႏနေးကလွဉ်နာႏဗာႏ ဗွေႏဘုရာꩻ တရာꩻငဝ်းနဝ်ꩻ လိုꩻဝေင်ꩻကို လဲင်ꩻအီႏဗော့ꩻလို့စွဉ်ႏ စွုမ်ႏဖြာꩻသွူ။ 45ဂျူးလိုꩻမျိုꩻဖုံႏ ထွိုင်ႏထီႏ လိုꩻစွိုꩻအာငါႏချိန်ႏနဝ်ꩻ ဝွေꩻသီးအဝ်ႏဗွေစွဉ်ႏ ထာꩻတကေးသꩻဖုံႏတဲင် နုဲင်းပေါလု ကဒေါ့ꩻနဝ်ꩻ ဝွေꩻသီး ထေင်ဆန်ချာ မွေးနေးစွဉ်ႏတဲင် ကဲ့ꩻရဲ့ꩻစွဉ်ႏ ဝွေꩻနဝ်ꩻသွူ။ 46ကွဲႏတွော့ꩻ ပေါလုတွမ်ႏ ဗာနာဗသီးဖုံႏနဝ်ꩻ ကယိန်းဒေါ့ꩻဟော်ꩻ ရုဲင်းထဲင်းစွဉ်ႏဖုံႏသွူ။ “ဗွေႏဘုရာꩻ တရာꩻငဝ်းနဝ်ꩻ အဝ်ႏလိုႏဟော်ꩻရီး ဖေႏဒျာႏသီသွူ။ ကွဲႏတွော့ꩻ သီပယ်ႏထိုꩻတရာꩻငဝ်းတဲင် ထင်းဒျာႏသီနဝ်ꩻ တထွိုက်တန်ႏတဝ်း ထာဝရ အသက်အတွက် အဝ်ႏသီထျꩻနဝ်ꩻ နီထန်ႏလွေꩻထိုꩻတော လိုꩻမျိုꩻလင်ဖုံႏထျꩻနဝ်ꩻသွူ။ 47#ဟေသျာ ၄၂:၆၊ ၄၉:၆။ ဗွေႏဘုရာꩻ ကဖေႏလဲဉ်းဒါႏ နီပညတ်ကျမ်ꩻ အချက်နဝ်ꩻ နုဲင်းယို၊

‘ ဖေႏနေး ဟံႏတန်လောကသားဖုံႏ ကားကအဝ်ႏ ကလꩻထာꩻကယ်ႏတင်ႏနဝ်ꩻ

လိုꩻမျိုꩻလင်တာႏ ခွေမာꩻဖေႏသီ ကထွာထာꩻလေ’” နုဲင်းနဝ်ꩻသွူ။

48လိုꩻမျိုꩻလင်ဖုံႏ ထွိုင်ႏဟွိုန် နုဲင်းယိုချိန်ႏ ဝွေꩻသီး သꩻဟဝ်သꩻရေꩻငါႏတဲင် အုပ်ꩻထင်ႏစွဉ်ႏ ဗွေႏဘုရာꩻ တရာꩻတောႏတဲင် လိုꩻကခံႏဗာႏ လွိုက်ဟဲ့ꩻ ဖေႏကလꩻ ထာဝရ အသက်သားဖုံႏနဝ်ꩻ ထွာလွဉ်စွဉ်ႏ လိုꩻယွုမ်းသားဖုံႏသွူ။

49ဗွေႏဘုရာꩻ တရာꩻငဝ်းနဝ်ꩻ စွစ်ꩻလီစွဉ်ႏ နယ်ႏနဝ်ꩻကို ခင်ႏလမ်း စွုမ်ႏထွောင်းနဝ်ꩻသွူ။ 50ကွဲႏတွော့ꩻ ဂျူးလိုꩻမျိုꩻဖုံႏနဝ်ꩻ တမာဖေႏအာႏ ဝေင်ꩻတောႏ ခေါင်းဆောင် လိုꩻတန်ဖုံႏတွမ်ႏ လိုꩻမျိုꩻလင် လိုꩻမူႏ အုံအဝ်ႏ ဆင်ႏရန်းထိုသားဖုံႏ ကဝုဲင်ႏကိုꩻကွယ်ႏဒါႏ ဗွေႏဘုရာꩻသားဖုံႏတွော့ꩻ ဝွေꩻသီးနဝ်ꩻ နစ်စက် ဆန်ချာစွဉ်ႏတဲင် အဝ်ႏဝွေꩻသီး အဟံႏနယ်ႏကိုနဝ်ꩻ ဝါးထန်ႏထိုꩻစွဉ်ႏ ပေါလုတွမ်ႏ ဗာနာဗနဝ်ꩻသွူ။ 51#မ ၁၀:၁၄၊ မာ ၆:၁၁၊ လု ၉:၅၊ ၁၀:၁၁။ နုဲင်းကဆန်ချာထိုꩻ ဝွေꩻသီးအနေး တမန်ႏတောႏဖုံႏနဝ်ꩻ တဒေါက်ꩻထန်ႏထိုꩻ ဟံႏဖွန်ႏ ဝွေꩻသီး ခင်ႏလောင်းဖုံႏတဲင် လွေꩻထိုꩻစွဉ်ႏ ဝေင်ꩻဣကောနိသွူ။ 52လိုꩻယွုမ်းသားဖုံႏ ကအဝ်ႏသော့ꩻ ဝေင်ꩻအန္တိအုတ်ကိုနဝ်ꩻ အဝ်ႏဗွေစွဉ်ႏ ထာꩻသꩻဟဝ် သꩻရေꩻတွမ်ႏ ကြောင်းစင် ဝိညာဉ်ႏတောႏဖုံႏ နဝ်ꩻသွူ။

Currently Selected:

တမန်ႏတောႏ 13: PBCL

Highlight

Copy