نامَه رومی کلیسا را 14

یَندی قضاوت مَکَرَه

1کسی که چَیی ایمان ضَعیفَه، شِمَه دیلَه کا راه بِدییَه، ولی نِه اِمی واسی که چَیی عقیدَه اون درباره اَیی نَه جروبحث بِکَرَه. 2ایی نفری ایمان بَیی اِجازه بَدای که هَر غذایی بَرِه، امّا ایی نفر دییَر که ضَعیفَه، فقط سبزیجات بَردی. 3اَ کسی که همه چی بَردی، نَبی اَ کسی که نییَره روک آکَرِه؛ و اَ کسی که همه چی نییَره، نَبی اَ کسی که همه چیی بَردی، قضاوت بِکَرِه. چوم که خِدا اَیی قَبول کَردَشه. 4تِه کییش که ایی نفر دییَری نوکَری قضاوت بَکَردیش؟ اَ چِه اِشتَن ایمانی سَری کا بومونِه یا مَمونه چَیی اَربابی مربوطَه. و اَ نی اِشتَن پا سَری کا بَمَندی چوم که خِداوند بَشای اَیی سرپا غَم بَرِه.

5ایی نفر ایی روزی، دییَر روزون کا چاکتَر بَزنی؛ ولی ایی نفر دییَر، گِردِ روزون ایی جور بَزنی. هَر کسی بَسی اِشتَن فیکری کا اِشتَن عقیدَه اون درباره خاطِر جمع بِبو. 6اَ کسی که ایلَه مخصوصَه روزی اِحترامی غَم بَردی، خِداوَندی اِحترامی را اَ کاری بَکَردی. اَ کسی که بَردی، خِداوَندی اِحترامی را بَردی، چوم خِدا شُکر بَکَردی. ولی اَ کسی نی که نییَرِه، اَ نی خِداوَندی اِحترامی را اِم کاری بَکَردی و خِدا شُکر بَکَردی. 7چوم که هیچ گِله اَمَه کا چَمَه را زندگی نِکَرَم و هیچ گِله اَمَه کا چَمَه را نِمِرَم. 8چیرا که اَگم زندگی بَکَردیمون، خِداوندی را زندگی بَکَردیمون، و اَگم بَمَردیمون، خِداوندی را بَمَردیمون. بَس چِه زندگی بِکَرَم، چِه بِمِرَم، خِداوندی شِنیمونه. 9مسیح نی اِمی واسی مَردَه و زِنده آبَه تا زِنده اون و مَردَه اون خِداوند بِبو.

10بَس تِه چیرا اِشتِه بِرا داوری بَکَردیش؟ یا تِه چیرا اِشتِه بِرا پَست بَزنیش؟ چوم اَمَه گِرد، خِدا داوری یَه تختی پیشی کا بَمَندیمون. 11چیرا که اِشعَیای پِیغمبری کیتابی کا نیویشته بییَه که:

«خِداوند بَواتی: چِمِن زندگی سَر قَسَّم که

هَر زِنگی چِمِن پیشی کا قات بَبی

و هَر زَوونی خِدا اِقرار بَکَردی.»

12بَس هَر کَمیله اَمَه کا اِشتَن حِسابی پَس آدَه بِه خِدا.

13بَس، بایَه چِمی پَش یَندی قضاوت مَکَرَم. بَلکم تَصمیم بِگِرَه که شِمَه بِرا راه سَری کا هیچ سِنگی لغزش هَردَه را یا مانعی مَنییَه. 14اَز، عیسایِ خِداوندی کا بَزنیم و قانع ایمَه که هیچ چیی اِشتَن- اِشتَن نِجس نییَه. امّا اَگم ایی نفر ایی چیی نِجس بَزنی، اَییرا نِجسَه. 15اَگم اِشتِه غذا هَردِه نَه اِشتِه بِرا اَذیت بَکَردیش، دِ محبتی نَه رفتار نِکَری. اِشتِه غذا نَه، اِشتِه بِرایی که مسیح چَیی واسی مَردَه، هَلاک مَکَه. 16بَس مَرزَه درباره اَ چیی که شِمَه چاک بَزنیرون، بَد واتَه بِبو. 17چوم که خِدا پاُتشایی هَردِه و هِنتِه نییَه، بَلکَم صالِحی، صُلح و سلامتی و شادی روح القدسی کایَه. 18هَر کسی که اِنتَه مَسیح خدمت بِکَرِه، خِدا اَیی قبول دارِه و مردم نی اَیی تصدیق بَکَردین.

19بَس بایَه اَ چیی دومله بِبییَم که صُلح و سلامتی باعیث بَبی و یَندی ایمانی تقویتی باعیث بَبی. 20خِدا کاری غذا هَردِه واسی خَراو مَکَه! حقیقتَن گِردِ غذا اِن پاکی نَه، امّا هَر غذایی که ایی نفری لغزشی باعیث بِبو،کار دُرستی نییَه. 21چاکتَرَه که گوشت مَری یا شَراو مِنجی یا کاری مَکَری که اِشتِه بِرا لغزشی باعیث بِبو.

22اِشتِه ایمانی درباره اِم چیون، اِشتِه و خِدا میانه کا غَم بَه. خَسَه بِبو اَ کسی که اَ چیی واسی که اِشتَن درباره تصدیق بَکَردی، اِشتَن داوری نِکَرِه. 23امّا کسی که ایلَه غذا هَردِه را شَک هِستِشه، اَگم اَیی بَرِه مَحکوم بَبی، چوم که ایمانی نَه نییَرِه و هَر چیی که ایمانی کا مَبو، گناهَه.

Currently Selected:

نامَه رومی کلیسا را 14: ITB

Highlight

Copy