دوّمین نامَه قرنتیانی کلیسا را 4

اِنجیلی نور

1بَس چوم اَ، رَحتمی واسی که اَمَه را بَه اِنتَه رَه خِدمتی بَکَردیمون، نا اُمید آنِبییَم. 2بَلکَم نِینَکی راه اون کا و شرم آوَرَه راه اون کا دوری کَردَمونه و کلاهبرداری نَه ناری را نِشییَم و خِدا کلامی دَستکاری نِکَرَم بَلکَم حَقیقَتی واضِح بَواتیمون، تقّلا بَکَردیمون خِدا حضوری کا گِردی وجدانی کا تصدیق بِبییَم. 3حتی اَگم چَمَه اِنجیل نامفهومَه، کسونی را نامفهومَه که هَلاکتی راه کااینه. 4اِم دورَه خِدا، بی ایمانون فیکری کور کَردَشه تا مسیح اِنجیلی جلالی نوری که خِدا دیمَه، مَوینِن. 5چوم که اَمَه چَمَه را موعظه نِکَرَم، بَلکَم اِعلام بَکَردیمون که عیسایِ مسیح خِداوندَه، و اِشتَن کا فقط عیسی واسی، و اَ نی فقط شِمَه خِدمتکارون شیوار گَف ژَنَم. 6چوم هَ خِدایی که واتِشَه: «نور تاریکی دیلَه کا دَتاوِه،» اِشتَن نوری چَمَه دیلون کا دَتاوِستِشه تا خِدا جلالی آزونِستِه نَه مسیح دیمی کا، اَمَه نورانی آکَرِه.

7امّا اِم گنجینه، سُفالی یَه خُمرَه دیلَه کا هستِمونَه، تا معلوم بِبو که اِم بَرکَ قدرت خِدا کایَه نِه اَمَه کا. 8اَمَه هَر طَرفی نَه سختی کا ایمونه، امّا خورد آبَه نیمونه؛ سَرگردونیمونه، امّا نا اُمید نیمونَه؛ 9اَذیت آزار بَبیمون، امّا اَمَه وِل آکَردَه نیشَه؛ زمینی سَر بَلَکَه ایمونَه، امّا کَم وَردَه نیمونه. 10هَمَش عیسی مَرگی چَمَه بَدنی کا بَبَردیمون تا عیسی زِندگی نی چَمَه بَدنی کا آشکار آبو. 11چوم اَمَه که زِندَه ایمونه، هَمَش عیسی واسی دَسپَردَه بَبیمون مرگی، تا چَیی زِندگی چَمَه فانی یَه بَدنی کا آشکار آبو. 12بَس مرگ چَمَه دیلَه کا کار بَکَردی، امّا زِندگی شِمَه دیلَه کا.

13مزموری کیتابی کا نیویشته بییَه که: «ایمان وَردِمَه، بَس گَف ژَندِمَه.» هِم ایمانی روح نَه، اَمَه نی ایمان هِستِمونه و گَف ژَنَم. 14چوم بَزنیمون اَ کسی که عیسایِ خِداوندی مَردَه اون دیلَه کا زِنده آکَردِشه، اَمَه نی عیسی نَه زِنده آکَردَشَه، و شِمَه نَه بواَردی چَیی حضور. 15اِمِن گِرد شِمَه واسی اِستینَه، تا هَر چَدَه که خِدا فیض مردمی سَری کا وِرتَر و وِرتَر آبو، شُکرکَردِه نی خِدا جلالی را وِرتَر آبو.

16بَس نا اُمید نِبییَم. هَر چَن چَمَه ظاهر کارا از بِین بَشی، چَمَه باطن روز‌ بَه‌ روز تازَه تَر آبو. 17چوم که چَمَه اِم روک و زو دَوییَرِن رَنجِن، اَمَه را اَبَدی یَه جلال بواَردی که اَ رَنجون نَه بَرابری نِکَرِه. 18بَس اَ چی که بَبی ویندِه نِدییَسَم، بَلکَم اَ چیی که نییَب ویندِه ذول ژَنَم، چوم ویندَنییَه چیین زو دَوییَرِن، امّا چیی اِنی که نییَب ویندِه اَبَدی اینه.

Currently Selected:

دوّمین نامَه قرنتیانی کلیسا را 4: ITB

Highlight

Copy