اوّل 4

رسولون خِدمت

1هَر کسی بَسی بَمون، مسیح خادِمون و مباشِرونی دیدی نَه دَیِسِن که خِدا سِرِن، امّانت دَسپَرده بَیینه بِه اَوون. 2چِمون غِیراز مباشِری کا اِنتظار دارِن که وفادار بِبو. 3امّا بَه مِرا، شِمَه قِضاوت یا هَر اِنسانی یَه محکمَه قِضاوت، مهم نییَه. بَلکَم حتی از اِشتَن نی، اِشتَن قِضاوت نِکَرِم. 4چوم که خَوَر نِدارِم چیی چِمِن ضِد بِبو ولی اِم مِن تبرئَه نِکَرِه. بَلکَم خِداوندَه که مِن قِضاوت بَکَردی. 5بَس هیچی درباره، پیش از موعود قِضاوت مَکَرَه، تا اِم که خِداوند با. هَ خِداوندی که اَ چیی که حِسَه تاریکی کا نِینَه، روشونایی کا نمایان بَکَردی و دیلون نیّتون بَرمَلا بَکَردی. دومله هَر کسی اِشتَن تعریف تَمجیدی، خِدا کا ویگِرِه.

6اِی بِرااِن، از گِردِ اِم گفون، چِمِن و آپولُسی درباره شِمَه خیر و صلاح را واتِمَه، تا شِمَه اَمَه کا اِم گفون معنی باموجَه که: «اَ چیی کا که نیویشته بییَه، پیشتَر مَشَه.» تا هیچ گِلَه شِمَه کا، اَ ایلَه پیشی کا پوز مَدَه. 7چوم کی تِه ایی جور دییَر بَویندی؟ چِه چی هِستِره که بَه تِن آدوعَه بَه نییَه؟ بَس اَگم بَه تِن آدوعَه بییَه، چیرا جوری اِفتخار بَکَردیش که اِنگاری اِنتَه نییَه؟

8اِنگاری که شِمَه هَر چِه که پیستِرونه، آرَستَه ایرونه! اِنگاری که حِسَه شِمَه پولدار بَیرونه! بیدون اَمَه، شِمَه پاُتشا بَییرونه! و کَشکی پاُتشایی بِکَریرون تا اَمَه نی شِمَه نَه پاُتشایی بَکَردیمون! 9چوم که از فیکر بَکَردیم خِدا، اَمَه، رسولون گِردی آخِری کا بِه تماشا نوعَشه. کسونی شیوار که مرگی را محکوم بَیینه؛ چوم که اَمَه دنیا، آدَمون و ملائیکه اون را تماشاخانه بَییمونه. 10اَمَه مسیح واسی نادونیمونه، امّا شِمَه مسیح کا حَکمیرونه! اَمَه ضَعیفیمونه، امّا شِمَه قوی ایرونه! اَمَه بی حُرمتیمونه امّا شِمَه اَرج و قُرب دارَه! 11اَمَه تا حِسَه وِشی و تِشی ایمونه، اَمَه کَنَه خَلا دَکَردَمونه، لِس هَردَه و آوارَه ایمونه. 12چَمَه اِشتَن دَسی نَه کار بَکَردیمون و زحمت کَشَم. وختی اَمَه نیفرین بِکَرِن، چَوون را خیر دعا بَکَردیمون؛ و وختی اَمَه اَذیت آزار بِکَرِن، تاو بواَردیمون. 13وختی بَمون بُختون ژَنِن، چاکی نَه جَواو بَدایمون. تا هِم الان، اَمَه دنیا تُفاله و گِردِ چییون آشغال بَییمونه.

14اِمی نِنیویسِم تا شِمَه شَرمنده بِکَرِم، بَلکَم نیویسِم تا شِمَه، چِمِن عزیزگِرامی یَه خِردَنون شیوار نصیحت بِکَرِم. 15چوم که حتی اَگم مسیح کا، هَزارون گِلَه معلّم بِدارَه، امّا وِرَه دَده نیرونه.چوم که از اِنجیلی واسطه نَه مسیحْ عیسی کا شِمَه دَده بیمَه. 16بَس از، شِمَه کا خواهیشت بَکَردیم بَه مِن کا سَرمشق بِگِرَه. 17اِمی واسی تیموتائوسی که چِمِن عزیزگِرامی یَه خِردَنَه و خِداوندی کا وفادارَه ویسا آکَردِمَه شِمَه وَر، تا چِمِن زِندگی راه مسیحْ عیسی کا شِمَه ویر بوعَرِه، هَتَه که اَ راه گِردِ جِگا کا و تمون کلیسااون کا تعلیم بَدایم.

18بعضی اِن مغرور بَیینه. اَوِن گمون بَکَردین که از دِ نیمام شِمَه وَر. 19ولی اَگم خِدا بِپی، هِم زودیون بومَیم شِمَه وَر تا بِوینِم اِم مغرورِن فقط گف ژَنِن یا اِمکه چَیی قدرتی نی هِستِشونه. 20چوم خِدا پاُتشایی، گفی نَه، نییَه بَلکَم قدرتی کایَه. 21کَمیلَه پیستِرونه؟ لِسی نَه بام شَمَه وَر یا ایلَه آروم روح و محبتی نَه؟

Currently Selected:

اوّل 4: ITB

Highlight

Copy