نامَه رومِه کلیسا را 8
8
خدا روح نه زندگی کردن
1پس اِسا کسانی را که مسیح عیسیک اِسنده، دَ هیچ محکومیتی نییِه، 2چون شریعتی که روح زندگی اِسه، مسیح عیسیک، شاما، گناه شریعت و مرگک آزاد بکرده؛ 3چون اَ چی که شریعت، چِمه واسنه که آدمه جسم ضعیفه، نتانسشه اَوه انجام بِدیه، خدا انجامش بِدا. اَو، اِشتن زاش، ایگله گناهکاره جسمه شوار بِخِرسانس تا ’گناه قربانی‘ بیبی، و ایزه، جِسمه دلک، گناهش محکوم بکه 4تا اَ درسته چیانی که شریعت گشه، چاما دلِک انجام بیبی، چاما دلِک که مطابق خدا روح زندگی کرام نه مطابق جسم.
5کسانی که جسمانینده، اِشتن فکره نَیِنده اَ چیی را که جسمکه، امّا کسانی که خدا روحه دارنده، اِشتن فکره نَیِنده اَ چیی را که روحک اِسه. 6چون اَ آدمی عاقبت که اِشتن فکره اَ چیانی را نَیه که جسمانینده، مرگه، ولی اَ فکری که خدا روحه پشه اِسه، زندگی و سلامتیه. 7چون اَ آدمی که اِشتن فکره جسمه را بنیه خدا نه دشمنی کره، چون که خدا شریعتک اطاعت نکره و نِتانه نی بکره، 8کسانی که جسم چوان را حکم کره، نتاننده خدا راضی بکرنده.
9امّا شاما را جسم حکم نکره، بلکم خدا روحه که حکم کره، البته اگم خدا روح شاما دلَک بیبی. کسی که مسیحه روحه مَداره، اَ مسیح کین نییِه. 10امّا اگم مسیح شاما دِلکه، هر چند شاما بدن گناه واسنه مَرده، امّا چون صالح حساب بییِران، خدا روح شاما را زندگی اسه. 11اگم روحی که عیسیش مَردان دلَک زنده بکه، شاما دلک بِندره، ا که مسیح عیسش مردان دِلک زنده بکه اِشتن روحه واسطنه که شاما دلَک اِسه، شاما مرده بدنان زندگی آدیه.
12پس ای براران، آما مدیونمان، امّا نه جسمه مدیون، تا مطابق جسم زندگی بکرام. 13چون اَگم مطابق جسم زندگی بِکَرا، مَرا؛ امّا اگم خدا روحه واسطه نه، کارانی که بدن بکره بوکوشا، زندگی کَرا. 14چون کسانی که خدا روح چوان راهنما اِسه، خدا زاران اِسنده. 15چون که شاما نوکری روحِران به دس آورده نییه تا هنی بترسا، بلکم شاما زاران مقامک اویگه خوردنه روحه به دس آورا، که چَوه واسطنه داد زنام: «په، اقا جان.» 16خدا روح اِشتن، چاما روحه را شهادت دَیه که آما خدا خوردنان اِسمان. 17اگم خدا خوردنان اِسِمان، پس وارثان نی اِسِمان، یانی خدا وارثان و مسیح نه ارثک شریکمان. به شرطی که آما نی اَونه عذاب بکشام، تا آما نی اَونه جلال بیگیرام.
آینده جلال
18چِمن نظر اِمه که، اِم دنیا عذابه، اَ جلالی نه که چاما دلک دیار آبی، نیبی مقایسه کردن. 19چون که خلقت، تمام ذوقنه منتظر اِسه که خدا زاران دیار آبینده. 20چون خلقت اِشتنش باطل آکرده، نه اِشتَن گوسَنه، بلکم کسی گوسنه نه که اَوش تسلیم بکه، اِم امید نه که 21خلقت اِشتن نی نوکری فسادک آزاد بی و خدا خُوردنان شکوه جلاله آزادیک سهم برنده.
22چون آما زانام که تمام خِلقت تا اِسا دَسَنِک نالنده که زندَنِه دَسَنه آشی. 23و نه فقط خلقت، بلکم آما اِشتن که خدا روحه نوبری دارام، چاما دلَک ناله کرام، اَجوره زه که ذوقنه زاران مقامک اُگَخوردن بییَنه منتظرمان، یانی چاما بدنان رهایی. 24چون اِم امید نه نجاتمان بیند. اِسا امیدی که وینده بی، دَ امید نییه. چونکه چُنجوره کسی تانه چیزی که وینه امید دونده؟ 25اما اگم چی ای که هلا ویندمان نییه امیدمان دوسته، صبرنه چَه منتظر وِندرام.
26ایزه د خدا روح چاما ضعفک چاما کمکه را آیه، چون نِزانام چُنجوره گه دعا بکرام. امّا خدا روح، اَ ناله هانی که عمیق و نیبی واتن، چاما را شفاعت کَره. 27و اَ که دِلان دله گرده، روحه فکره زانه، چون روح، مطابق خدا گوسه، مقدّسان را شفاعت کره.
28زانام کسانی حقک که خدانه خَشنده و مطابق چوه گوسه دعوت بیینده، همهی چییه هندیگرنه چوان خیریته را کار کرنده. 29چون کسانی که خدا پرانتر آزانسَشِنده، پرانتر، اَوانش معیین بِکردنده تا چوه زا شوار بیبینده، تا ایزه مسیح پِره براران دلَک، اَرشده خُردَن بیبی. 30و کسانی که پَرانتر تعیینش بکه نی، دادِش بکه؛ و کسانی که دادش بکردنده، صالح به حساب بوعَردشنده؛ و کسانی که صالح به حساب بوعردشنده، جلالش بدا.
31پس اِم همهي چیان درباره چِه تانام واتن؟ اگم خدا آمانه اِسه، کیه که بتانه چاما ضِد بیبی؟ 32اَ که اِشتن زاش دریغ نِکه، بلکم اَوش چاما همان راکش فدا بکه، چنجوره چَه همراه همه چی دس و دل فرایینه آما آندیه؟ 33کیه که خدا انتخاب بییه هان بهتان بزنه؟ خدایه که اَوان صالح حساب کَره! 34کیه که اَوان محکوم بکره؟ مسیح عیسی که بِمرده- اَوک پرتر، مردهان دلک زنده آبه- و خدا راسَه دس وَر بنشت، اَوه که راس راسینه چاما را شفاعت کره! 35کیه که آما مسیح محبتک جدا بکره؟ مصیبت یا پریشانی، جفا، قَحطی، لختی، خطر یا قمه؟ 36اَجوره که مزموره کتابک نویشته بییَه:
«آما، تمام روج، اِشته واسنه شام مرگِه را؛
و پَسانی شوار که سر آبریینه را حاضر بینده، حساب بام.»
37نه، همهی اِم چییانک آما کسانی که افجورنده نی سرترمان، چَه واسطنه که آماش محبت بکه. 38چون مطمينم که نه مرگ و نه زندگی، نه فرشته هان و نه پیله تران، نه اِسایین چییِه و نه آینده چییِه، نه هیچ قدرتی، 39و نه پستی بلندی، و دَ نه عَلوده هیچ چی ای تمام خلقتک، نتانه آما خدا محبتک که چاما خداوند مسیح عیسیک اِسته، جدا آکره.
Currently Selected:
نامَه رومِه کلیسا را 8: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company