نامَه رومِه کلیسا را 12
12
زنده قربانی یان
1پس ای براران، خدا رحمتان واسنه، شاماک خواهش کَرم که شاما بدنان زنده قربانی شوار، مقدّس و خدا باب دل، تقدیم بِکَراه که اِم شاما روحانیه عبادته. 2و دَ اِم دنیا شوار مَبا، بلکم شاما فکره تازه آبییننه عوض آبا. اَدمی تانا خدا اراده بفهما؛ خدا باب دل و کامله اراده.
3چون فیضه واسطه نه که من آدییه بییَه، شاما هر کامیننه واجم که اِشتن اَ چیانی که گه بِبا، پرتر مَزانا، بلکم هر کامین اَ ایمانی اندازه که خدا، شاما بَخشِسشه، درست قضاوت بِکَراه. 4چون اَجوره زَه که آما همه ایگله بدن دارام که پر اعضا نه رچ آبیه و اِم اعضاهان کار ای جور نییه، 5پس آما نی که پِرمان، مسیحک ایگله بدنمان و گِلَه به گِلَه، هندیگره اعضا اِسمان. 6طبق اَ فیضی که چاما را بییه، جور وا جوره عطایا دارام. بایا اَوان به کار بیگیرام: اگم نبوت کردنه، اَوه چاما ایمانه قدر به کار بیگیرام. 7اگم خِدمَت کردنه، چاما خِدمَته دلک. اَ کسی که تعلیم دیه، تعلیم بِدیه. 8اَ کسی که تشویق کره، تشویق بِکَره. اَ کسی که کمک کره، دس و دل فرایی نه کمک بِکَره. اَ کسی که رهبری کره، اِم کاره غیرتنه بکره. و کسی به خلک رحم کره و مهربانی کره، شادینه اِم کاره بکره.
واقعیه مسحیان نشانه
9محبت گه خالص بیبی. بدی دوری بکرا و اَ چه که چاکه محکم آچکا. 10بِرا شوار هندیگرنه خش ببا. هندیگره احترام نیَنک، پَران دِگنا. 11هرگز شاما غیرت خدا را سست مَبی؛ روحک پر حرارت ببا و خداونده خِدمَت بِکَراه. 12امیدنه شاد ببا، مصیبتانک صبور بِبا و همیشه دعا بکرا. 13مقدّسان نیازان برطرف کردنک شریک ببا و میهماننواز ببا.
14کسانی را که شاما اذیت کرِنده، برکت آخازا؛ برکت آخازا و لعنت مَکَرا! 15کسانی نه که شاد اِسنده، شادی بِکَرا و کسانی نه که برمنده، ببرما. 16هندیگرنه مدارا بکرا! مغرور مَبا، بلکم کسانی نه که ساده و ضعیفندنه بشا و بایا. هرگز شاما دانا مزانا.
17هیچکس نه بدی عوض، بدی مَکَرا. بلکم کاری بکرا که همان دیدک محترمه. 18اگم بی، تا اَگا که شاما مربوط بی، همان نه صلح و صفاک زندگی بِکَراه. 19ای عزیزان، شاما اِشتن انتقام اَمرگیرا، بلکم اَوه خدا غضبه واگزار بکرا. چون توراتک نویشته بییه که «خداوند واجه: ”تقاص چِمن کینه؛ ازِم که سِزا دَیم.“» 20برعکس، «اگم اِشته دشمن وَشیر بیبی، اَوه غذا بِده، و اگم تشیر بیبی، اَوه اُو آده آخره. اگم اِنجوره بکری، اَوه شرمنده آکری که چشی چوه سرک داغه ذغال نیعرانه.» 21بدی ته حریف مبی، بلکم چاکی کردننه، ته بدی حریف ببش.
Currently Selected:
نامَه رومِه کلیسا را 12: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company