انجیل متی 28

عیسی زنده آبیین

1ای روج یهودیان مقدسه شنبه روجه پَش،که هفته اولین روج به، هوا روشن آبیینه موقع، مریم مجدلیّه و اَدَریین مریمه بشنده مقبره ویندنه را. 2ایرادَن شدیده دیمه لرزه ای بامه، چون ایگله خداونده فرشته آسمان نه نازل آبییا و بیشییا مقبره طرفه را و سِگشه چَوه پرانک کنار بیزیا و چَوه سرک بنشتا. 3اَ فرشته دیم آسمانه برقه شوار سو زییَردشه و خلوش وَهَره شوار، سیبی به. 4نگهبانان چَوه ویندنک ترسک لرزسردِنده، و مَردَان شوار آبنده! 5اَدمی فرشته زلّییان نه باته: «مترسا! چون که زانسَرم عیسی پَشدننه گرسَرا که صلیبه سرک کوشته بییَه. 6اَ اِنگارک نی، چون اَجوره زَ که واتَش به، زنده آبییه! بایا و یاگایی که چَوه جنازشان نیه به، بینا، 7هانده اَلَبحل بِشا و چَوه شاگردان نه باجا که ”اَو زنده آبییه و شاما پَرانتَر شی جلیله منطقه، شاما اَگاک اَوه وینا.“ دیسا شامانه باتِمه!» 8پس زَلی ترس و پر شادی نه، البَحل مقبَره نه بشنده و بیرویتنده تا عیسی شاگردان را اِم اتفاقه خبره آدینده. 9ایرادَن عیسی اَوان نه دیمادیم آبه و باتشه: «سلام بر شاما!» زَلی پَران بامنده و عیسی پا دگسنده، اَوشان پرستش بکه. 10اَ موقع عیسی اَوان نه باته: «مترسا! بِشا و چِمن براران نه باجا که بیشینده جلیل. اَگارک من ویننده.»

نگهبانان گزارش

11اَدمی که زَلی راک بنده، چند گله نگهبانانک بشنده شهر، همه‌ی اتفاقشان سران کاهنان را باته. 12اَوان نی شیخان ویندنه پَش و مشورت کردن پَش، سربازانشان پِره پولی آدا، 13و باتشانه: «مردم نه گه باجا، که ”چَوه شاگرده شَوانه بامنده و اَ زمانی که آما خُته بمان، چَوه جنازشان بدزی.“ 14و اگم اِم خبر والی گوش آرَسه، آما اِشتن اَوه راضی کرام تا شاما را مشکلی پیش ماییَه.» 15پس اَوه پولشان اَرَکته و هه کاری که اَوان نه واتشان به بکردشانه. تا اِسا نی اِم داستان یهودیان میانک اِسه.

پیله وظیفه

16اَموقع اَ یازده شاگرد جلیله منطقک بشنده، به اَ کوهی که عیسی اَوان نه واته به. 17وختی اَگارک عیسی شان بینده، اَوشان پرستش بِکَه. امّا بعضی شک بِکَردشانه. 18اَ موقع عیسی پران بامه و اَوان نه باتشه: «همه‌ی قدرت آسمانک و گله سَرک من درَسمارده بیه. 19پس بِشا و همه‌ی قومان چِمن شاگرد بکرا و اَوان، پییر نام نه و زار نام نه و مقدس روحه نام نه غسل تمعید بدَیا؛ 20و اَوان تعلیم بدَیا که هر چی شامام فرمان دییه، انجام بدینده. اِسا از تا آخر زمان، هر روج شاما نه اِسم!»

Currently Selected:

انجیل متی 28: TIT

Highlight

Copy