اعمال رسولان 26
26
1آگْریپاسه پادشاه، پولُس نه باتشه: «اجازه داری اِشتنک دفاع بکری و لاوَه بکری.»
اَدمی پولُس اِشتن دَسش دراز آکه و ایزه شروعش بکه اِشتنک دفاع کردن، باتشه: 2«ای آگْریپاس پادشا، از اِشتن پر خسته بخت زانم که اُوری اِشته پرانک وندرسم، تا همهی یهودیان شکایتان پرانک، اِشتنک دفاع بکرم. 3اللخصوص که زانم شاما، یهودیان رسم و رسوماته و اختلافاتی که دارندنه کاملاً آشنایش. اِسا، خواهش کرم صبرنه چِمن لاوان گوش آدَه.
4«یهودییِه همبلنه، چِمن زندگی جوانی صفتنه زاننده، هَ اَولنه که چِمن قومه دلَک و اورشلیمک زندگیم کرده. 5اَوه قَدیمِنه زاننده و اگم بگشانه، تاننده شهادت بدَینده که از ایگله فَریسی بِم، و چاما دینه سختگیرترین فرقک پیرویم کرده. 6و اُوری اَ، امیدی واسنه محاکمه بییرم که خدا چاما اجدادش وعده دیه. 7اِم هَ وعدهای اِسه که چاما دونزده گله قبیله امیدشان داشته که اَوه به دست بوعرنده. چِمه واسنه اِشتن صدق دلِنه شبانه روج پرستش شان کرده تا اَوه آرسنده. ای پادشاه، هم امید واسنَیه که یهودییِه من متهم کرنده. 8چیه را شاما را که اِنگا وِندرسران، عجیب غریبه که خدا مردهان زنده آکره؟
9«از نی اعتقاد داشتمه که گه عیسای ناصری ضد هر کاری چِمن دسک برایه، انجام بِدَیم. 10و اِم هَ کاری بِه که اورشلیمک کردردمه. سران کاهنانک، حق و اختیار اَرکتنِنه، پِره مقدسانی درندمنده زندانک، و وختی محکوم بِسنده مردنه را، چَوان ضد رای آدسِمه. 11چند را چَوان مجازات کردنه را، عبادتگاهی نه شِسِم علوده عبادتگاه و تقلام کرده اَوان وادار بکرم کفر باجنده. ایینده اَوانکم بد آمسِه که حتی تا دوره شهران را نی چوان پَشه شِسِم.
12«ایگله اِم سفرانک، اَ حق و اختیار کاملی نه که سران کاهنانک اَرکتم به، شییَردم دمشق. 13ای پادشاه، روجه نیمک، راه دلَک ایرادن ایگله نوری که اُفتوعه نورک درخشان تر به، آسمان نه چِمن و چِمن همراهان دویرنه دِگس. 14همبلنه گِل بگسمان، و از صصی بشنوسمه که عبرانیان زواننه منه واتردشه: ”شائول، شائول، چیه را مَن اذیت و آزار کردری؟ اِشته را چتینه که مِخان پاسر بزنی، فقط اِشتن اذیت کردری!“
15«آپرسسمه: ”خداوندا، ته کییش؟“
«خداونده باته: ”از هَ عیسی اِسم که ته اَوه اذیت و آزار کری. 16بیض و اِشته پا سر بنده. از چِمه واسنه اِشته را ظاهر بیِیم تا ته چِمن خادم و چِمن شاهد بکرم، تا بر اَ چیی که اَوک من ویندره و بر اَ چیی که اَوک اِشته را دیار بِبم، شهادت بدیی. 17از ته اِشته قوم دسک و غیر یهودیان دسک که ته خرسانم چوان وَر، نجات دَیِم 18تا چوان چشمان آکری، جوری که تاریکی نه آگردنده به نور، و شیطان قدرتک آگردنده خدا طرف، تا چوان گناهان بخشسه بیبینده، و اَ ایمانی واسنه که من ایمان دارنده، کسانی دلَک که مقدس بیَنده، یاگا بدارنده.“
19«پس، ای آگْریپاس پادشاه، اَدمی اَز، اَ آسمانیه رؤیایی که ویندمه سرپیچیم نکرده. 20بلکم اول دمشقیان دلَک، چاوش اورشلیمک و تمان یهودیه سرزمین، و ایزه نی غیریهودیان دلَک نی اِم پیغامم اعلام بکه که گه توبه بکرنده و آگردنده خدا طرف و اِشتن رفتارنه آماننده که توبشان کرده. 21چِمه واسنه به که یهودیان، منشان معبدک دستگیر بکردم و رایشان به من بوکوشنده. 22تا اُوریجین روج، خدا منش کمک کردم و اِسا یا وندرسم و همان، ویلی نه کته تا پیله را، شهادت دَیِم. اَ چی ای که واجم چی ای نییه جز اَ چیانی که پیغَمبران و موسی باتشانه که گه اتفاق دگنه: 23مسیح گه رنج بکشه و اولین کسی بیبی که گه مردهان دلَک زنده آبی، تا هَم اِم قومه را و هم عَلوده قومان را، نوره اعلام بِکَره.»
24وختی پولُس اِم لاوَانه اِشتنکش دفاع کَردرده، فِستوسه جره بکه: «پولُس، اِشته عقلر از دس دیه! پره زانسَن، تش دَلو کردش.»
25پولُسه جواو بدا: «دلو نییِم، عالیجناب فِستوس، بلکم عقلنه عین حقیقته واجِم. 26پادشاه اِشتن اِم چییانک خبر داره و از نی جراتنه اَونه لاوَه کردرم، چون مطمئنم اِمه هیچ کامین اَوک نُیین نینده، چون هیچی بیه نییه که خلوتکی اتفاق دِگسه بیبی. 27ای آگْریپاس پادشاه، پیغَمبران اعتقاد داری؟ زانسرم که داری.»
28آگْریپاس، پولُس نه باتشه: «هم زودی نه گَره من قانع بکری مسیحی بیبیم؟»
29پولُس جواوک باتشه: «خداک گَمه که اَرع یا زو، نه فقط شاما، بلکم همهی کسانی که اُوری چِمن لاوان گوش آدیرنده، چِمن شوار بیبینده، البته نه قول و زنجیره دلَک!»
30اَدمی پادشاه بِهِشت و چَوه پش والی و بِرنیکی و علوده مجلسییه نی بِهشتنده، 31و لاوَه کردن کردن بَر شنده، هندیگرنه واتردشانه: «اِم مردکه کاری کرده نییه که بِمره یا زندانی بیبی.»
32آگْریپاس فِستوس نه باتشه: «اگم اِم مردک، رایش نبه که اِم مسئله امپراطوری محکمه دلِک رسیدگی بیبی، بِسه که اَوه اِسا آزاد کردن.»
Currently Selected:
اعمال رسولان 26: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company