اعمال رسولان 13
13
برنابا و شائوله سفر انجیله پیغامه واسِنه
1کلیسا ای که انطاکیک اِس به، پیغمبران و معلّمانی بِنده: بَرنابا، شَمعون معروف به نیجِر، لوکیوسِ قیرَوانی، و مَنائن که هیرودیسه حاکمه ناتنیه برا بِه و شائول. 2وقتی که اِمه روجَه بنده و خداوندشان پرستش کَردرده، خدا مقدسه روح باتشه: «برنابا و شائول چِمن را جدا بِکرا، اَ کاری واسنه که از اَوان دادِم کردنده.» 3اَدمی، روجَه و دعا پَش، اَ دو نفر سَرک دسِشان اَناه، اَوشان بخرسانسنده سفر.
برنابا و پولوس قپرسک
4ایزه، اَ دو نفر که خدا مقدسه روح طرفنه خرسانسه بییَه بنده، بشنده سِلوکیه بندر و دریا راه نه آرسسنده قپرس. 5وختی بِشنده سلامیسِه شهره دله، یهودیان عبادتگاهانک خدا کلام شان اعلام بکرده. اَوان یوحنایی که معروف به مرقس به نی اِشتن نه ببردشانه تا اَوان کمک بکره.
6اَوان اَ جزیره تمان یاگا، بِگردسنده تا آرسسنده پافوسه شهره را. اَگارک ایگله یهودیه مردکی بیندشانه که چَه نام بارْیَشوع به و جادوگر و دوریه پیغمبر بِه. 7اَ رومه والی ’سِرگیوس پولُسِ‘ رفقانک بِه. والی که عاقله مردکی به، برنابا و شائولش داد بکه اِشتن ور، چون رایش به خدا کلامه بشنوه. 8امّا اَ جادوگر که چَه نامه معنی عالِم به، اَوانش مخالفت بکرده و تقلاش بکه که مَنَیه والی ایمان بوعره. 9ولی شائول، که اَونه پولُس نی واتشانه، خدا مقدسه روحنه فت آبه، اَ مردکه چشمان دلَک دییَشته و باتشه: 10«ای ابلیسه خُردن، ای تمام چاکیان دشمن! ای که مکر و حیلک فِتش! چیه را خداونده دوزَه راهان شَت کردنک دس اَنکَتری؟ 11بزان که خداونده دسَه اِشته ضدا. اِسا کور بی و تا چند وقت نتانی اُفتوعه بینی.»
البحل، تمان یاگا چوه را تیره و تار ببه، اِشتن دویره چرخسرده و ای نفره پَشه گرسرده که چَه دسه بیگیره و راه اَوه آمانه. 12چاوش والی اِم ماجراش بینده، ایمانش بوعرده، چون اَ، تعلیمی که خداونده دربارشان دیَرده حیران بییه بِه.
پولُس و برنابا اَنطاکیک
13پولُس و چَه همراهه دریا راه نه، پافوسه شهر نه بِشنده پِرجۀ را که پامفیلیه منطقک به. امّا اَگارک یوحنایی که معروف به مرقس به اَوانک جِدا آبه و آگردس اورشلیمه شهره را. 14ولی اَوه پِرجه نه اِوردنده و آرسسنده اَنطاکیۀ شهر که پیسیدیه منطقه ک به. مقدسه شنبه روجک، بشنده عبادتگاه و بِنِشتنده. 15تورات و پیغمبران کتابان خواندنه پَش، عبادتگاه رییسه، چوان را پیغامشان بِخِرسانسه و باتشانه: «براران، اگم لاوَه ای دارا که مردمه تشویق بکره، باجا.»
16پولُس بِندَرس و اِشتن دسه نه ایشارش بکه، باتشه: «ای خدا قومه مردکان و شاما ای خدا ترسه غیریهودیان، گوش آدَیا! 17اِم یهوده قومه خدا، چاما اجدادش انتخاب بکردنده و چاما قومش، اَدمی که مصره سرزمینک غریب بنده سربلند بکردنده و بَرکه قدرتینه اَوش اَ سرزمینک برآوردنده بر، 18و حدود به چهل سال چَوان رفتارش بیابانک توع بوعرده. 19اَو، بعد از اِم که هفت گله قومی که کَنعانک بنده، نابود بکردشه، چوان سرزمینش ارث آدا اِشتن قومه. 20اِم ماجرا همه حدوده چهارصد و پنجاه سال طول بکشس.
«چَوه پش، تا سموئیله پیغمبر دوران، خدا آوانش، داوَران آدا. 21چاوش اَوان ایگله پادشاهی آخاشتشانه و خدا شائولش اَوان آدا که قِیسه زابه و بِنیامین قبیلک به و چهل سال حکومتش بکه. 22شائوله برکنار کردنه پَش، داوودش انتخاب بکه تا چوان پادشاه بیبی، و چَوه درباره شهادت بداشه، باتشه: ” از داوودی که یَسا زا اِسه، چِمن دِل گَوسم بینده؛ اَ چِمن گوسه کامل انجام دَیه.“
23«خدا طبق اِشتن وعده، هم مردکه نسلک، اِشتن قومه را ایگله نجاتدهندای یانی عیسیش، بِخِرسانس. 24عیسی آمییَنِه پرانتر، یحیی همهی یهوده مردمه را غسل تعمیده توبش اعلام کرده. 25وختی یحیی اِشتن خدمته دورش اُوجردرده، باتشه: ” شاما خیال کردرا از کییم؟ از، اَو نییم؛ بلکم اَو چِمنه پَش آییِه و از حتی لیاقت ندارم چوه پاقابان بنده آکرم.“
26«ای براران، ای ابراهیم پیغمبره خوردنان نسل، و ای کسانی که شاما دلَک خدا ترس اِسه! اِم پیغام نجات بخش چاما را خرسانسه بییه. 27چون اورشلیمه مردم و چَوان پیله تره عیسی شان آنزانسه، پیغَمبران واته که هر مقدسه شنبه روجک چوان را خوانده بییر نفهمسشانه. و اَوان عیسی محکوم کردننه، پیغمبران لاوشان انجام بدا. 28با اِم که اَوان هیچ تقصیری شان نیوینده چوه کوشتنه را، پیلاتُسک آخاشتشانه اَوه بوکوشه. 29و وختی تمام چیانی که چوه درباره نویشته شان به، انجامشان بدا، اَوشان صلیب سرنه جیر بوعرده، مقبره دلَک دخشارده. 30ولی خدا، عیسیش مردان دلَک زنده آکرده. 31پر روجان عیسی اِشتن، کسانی را که اَونه جلیل نه آمییه بنده اورشلیم، دیار کردشه و اِسا نی اَوه چاما قومه را چَه شاهدنده.
32«اِسا آما اِم شاده خبره شاما آدَیام که خدا اَ چیای که چاما اجدادش وعده دییه به، 33عیسی زنده آکردننه، چاما را که چَوان خُردنان اِسمان وفاش بکه. ایزه که زَه دوّمین مزمورک نویشته بیه:
”ته چِمن زا اِسِش؛
اُوری، از تِم مولود کَردش.“
34«و خدا مَردان دلَک اَوش زنده آکرده تا هرگز مپیسِه، ایزه که خدا واتشه:
«” از مقدّس و مطمئن برکاتی
که داوود پادشا وعده دییه بییَه،
بخشسَمه شاما.“
35و ایزه نی ایگله علوده مزموری کی واتَشانه نیویشته بییه که:
«” ته نرزی اَ کسی که اِشته مقدسه
بیپیسه.“
36«داوود پادشا بعد از اِم که خدا ارادۀ نه اِشتن دوره مَردمش خِدمَت بکه، بِمرده و اِشتن اجداده ملحق ببه و بیپیسس. 37ولی اَ کسی که خدا اَوش زنده آکرده، نیپیسس.
38«پس، ای براران، بزانا که اِم عیسی واسطنه، گناهان بخشسن شاما را اعلام بییَر. 39هر چی ای دِلَک که نتانسرانه موسی شریعته واسطه نه آزاد ببا، اِسا هر کسی که عیسی ایمان بوعره، چَوه واسطنه آزاد بی. 40پس ویراجین ببا پیغَمبران اِم نیویشته مایه شاما سر که واجنده:
41«”دیسا، ای مسخره کراره،
تعجب بِکَراه و نابود ببا،
چون شاما دورانک کاری کَرِم،
که هر چند اَوه شاما را تعریف بکرنده
هرگز باور نکراه.“
42وختی پولُس و برنابا عبادتگانه بَر شییَردنده، مردم اَوانک آخاشتشانه که گَلَن هفته نی مقدس شنبه روجک، اِم چیان درباره اَوان نه لاوَه بکرنده. 43بعد از اِم که جماعتْ عبادتگانه بِشنده، پر کسه از یهودیان و خداپرست مردم که یهودی بییه بنده نی، پولُس و برنابا پَشه را دِگِسِنده. پولس و برنابا اَواننه لاوشان بکه و اَوشان تشویق برکردنده که خدا فیضک ادامه بدینده.
44گَلَن مقدسه شنبه روجک، تقریبا شهره همهی مردم بیدا آبنده تا خداونده کلامه بَشنونده. 45امّا وقتی یهودیان جماعتشان بینده، پخیلتیشان بکه و بی حرمتی نه پولس لاواننه مخالفتشان بکه.
46پولُس و برنابا جراتنه باتشانه: «لازم بِه خداوند کلام همان پرانتر شاما را واته بیبی. امّا چون اَوران رد بکه و اِشتن ران ابدیه زندگی را لایق نزانس، پس اِسا آما شام غیریهودیان طرفه را. 47چون خداوند چاما را اِنجوره دستورش دیه که:
”اَز، تِم غیر یهودیان را نور رچ آکردش،
تا نجاته خبره زمینه چهار گوشه را آرسانی.“
48وختی غیریهودیه اِمشان بشنوس، شاد ببنده و خداوند کلامشان حرمت بناه؛ و کسانی که ابدیه زندگی را مقدر بییه بنده، ایمان بوعردشانه.
49اِنجوره خداونده کلام تمانِه اَ ناحیک پخش آبه. 50امّا یهودیان، متعصب و سرشناس زلیان و شهره مردکانی که رهبر بنده، جوکو شان بداه. اَوه نی پولُس و برنابا شان اذیت آزار بکردنده و اَ ناحیک برکردشانه. 51پولس و برنابا نی اَ شهره خاکشان اِشتن پاچه هانک چوان ضد اَرفشاند و بشنده قونیه شهره را. 52شاگرده شادیک و خدا مقدسه روحک فِت بِنده.
Currently Selected:
اعمال رسولان 13: TIT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company