نامه، مسیحیانِ عبرانی نـژادِ ره 3
3
عیسی موسی جا سرتره
1پس اَی مقدّسِ براران، اَی شُمان کی آسمانی دعوتِ درون شریکید، شیمی چوم عیسیَ بِبه کی رسول و پیله کاهن ایسه، کی اونَ ایمان داریم و اونَ اعتراف کونیم. 2کی نسبت به اونکی اونَ معین بُکود وفادار بو، هُطوکی موسی ئم تمانِ خُدا خانه درون وفادار بو. 3چونکی عیسی ویشتر جه موسی جلالِ لایق بو- هُطوکی، اونی کی خانه یَ چاکونه ویشتر جه اُ خانه حرمت دَره. 4چونکی هرتا خانه اینفرِ دسِ مرا چاکوده به، ولی اونکی تمانِ چیانَ چاکونه خُدایِ. 5هسّا، موسی ایتا خادمِ مانستن تمانِ خُدا خانه درون وفادار بو، تا اُ چیانِ درون کی بایستی دُمبال تر بگفته بِبه، گواهی بدِه. 6ولی مسیح، ایتا پسرِ مانستن خُدا خانه سر وفادار ایسه و امان اونِ خانه ایم، اگه راس راسی اَمی اطمینان و افتخارَ، اَمی اُمید درون قایم بداریم.
7پس هُطوکی روح القدّس گِه:
«ایمروج، اَگه اونِ صدایَ ایشتاویدی،
8شیمی دیلانَ سنگ نُکونید،
هُطوکی نافرمانی دورانِ درون بُکودید،
امتحانِ روجِ درون، بیابانِ میان،
9اویا، کی شیمی پئران، مَره امتحان بُکودید،
و چهل سال می کارانَ بیده بید.
10هنه واسی اُ نسلِ سر غیظ بکودم
و بگفتم: ”اَشان همیشک خوشانِ دیلِ درون گُمراه ایسید، و می رائانَ نشناختیدی.“
11پس می غیظِ درون قسم بُخوردم،
اوشان می آسایش درون، راه نیابیدی.»
12براران، واخُب بیبید نَبه کی، ایکَس جه شیمی میان شرور و بی ایمانِ دیل بدَره کی شمرأ خُدای زنده جا دور بُکونه، 13بلکی هر روج، تا وقتی کی اونَ گیدی ’ایمروج‘ همدیگرَ نصیحت بُکونید تا هیکّس جه شُمان گناهِ فریبِ واسی اونِ دیل سنگ نَبه. 14چونکی اَمان مسیحِ درون شریک بُبوستیم، اگر راس راسی اِطمینانیَ کی جه اول داشتیم تا به آخر قایم بداریم. 15هُطوکی مزمور کتابِ درون بگفته بُبوسته:
«ایمروج، اگه اونِ صدای ایشتاویدی،
شیمی دیلَ سنگ نُکونید،
هُطوکی نافرمانی دورانِ درون بُکودید.»
16چون اوشانی کی بیشتاوستید ولی با اَ حال نافرمانی بُکودیدی، چی کسانی بید؟ مگه همه تان اوشانی نیبید کی موسی رائنمایی مرا مصرِ جا بیرون باموئید؟ 17و کوشانِ سر چهل سال غیظ بُکود؟ مگه هوشانی نیبید کی گُناه بُکودید، و اوشانِ جنازه ئان بیابان درون بکفت؟ 18و کوشانِ واسی قسم بُخورده کی اونِ آسایشِ درون راه نیابیدی؟ مگه اوشانِ واسی نُبو کی نافرمانی بُکودید؟ 19پس دینیمی کی اوشانِ بی ایمانی واسی بو کی نتاستیدی راه بیابید.
Currently Selected:
نامه، مسیحیانِ عبرانی نـژادِ ره 3: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
