نامه، مسیحیانِ عبرانی نـژادِ ره 2
2
هُشدار دَئن غافل بوستن، نجاتِ جا
1پس اَمی حواس بایستی اونچی کی بیشتاوستیمِ سَر، ویشتر بمانه، نَبه کی اونِ جا منحرف بیبیم. 2چون، جه اویا کی اُ پیغامی کی بواسطه فیریشته ئان اعلام بُبوسته، ثابت بُبوست کی قابیل اطمینانِ، و هر تقصیر و نا اطاعتی، به حَق جزا گیفتی، 3پس اگر اَمان اَجور پیله نجاتِ جا غافل بیبیم، چطو اونِ جزا جا جیویزیم؟ اَ نجات اول بواسطه خُداوند اعلام بُبوست و بازون بواسطه اوشانی کی اونَ بیشتاوستید، اَمرا ثابت بُبوست، 4هُطوکی خُدا ئَم، جور واجور نیشانه و عجایب غرایب مُعجزات و روحِ القُدّسِ عطائانِ امرا کی عینِ خو اراده دِئه، اُ نجاتَ شهادت بدَه. 5چون خُدا، اُ دُنیایی کی آیه، و اَمان اونِ جا گب زنیم، فیریشته ئانَ فرمانبر نُکود. 6ایتا جا، مزمور کتابِ درون، شهادت بدَه بُبوسته کی:
«انسان چیسه کی تو اونِ فکر بیبی،
یا انسانِ پسر، کی اونَ اهمیت بِدی؟
7تو اونَ ایپچه زمات، فیریشته ئانِ جا پَست تر بُکودی،
جلال و حرمتِ تاجَ اونِ سر بنَئی،
8تمانِ چیانَ اونِ پا جیر، اونِ فرمانبر بکودی.»
هسّا کی خُدا تمانِ چیانَ اونِ فرمانبر بُکوده، هیچیَ باقی نَنه کی اونِ فرمانبر نَبه. هسّا، هنو نیدینیم کی همه چی اونِ فرمانبر بِبه. 9ولی اَمان اونَ کی ایپچه زمات فیریشته ئانِ جا پَست تر بو، دینیم، یعنی عیسیَ، کی مرگِ عذابِ واسی، جلال و حرمتِ تاج، اونِ سر بَنه بُبوست، تا بواسطه خُدا فیض، همتانِ واسی مرگِ مزه یَ بیچیشه.
10چون اَن دُرُست و بجا بو خُدا، کی تمانِ چیان اونِ ره و بواسطه اون وجود دَریدی، اَنه واسی کی خَیلی پسرانَ به جلال فارسانِه، بایستی اوشانِ نجاتِ بانیَ، عذابِ راهِ درون کامِلَ کونه. 11چون اونکی تقدیس کونه و اوشانی کی تقدیس بیدی، همه تان ایتا سرچشمه داریدی. جه اَ رو عیسیَ عار نایه کی اوشانَ برار دوخوانه، 12هُطوکی مزمور کتاب گه:
«تی نامَ می برارانِ ره اعلام خوائم کودن؛
و جماعتِ میان تی ستایشَ خوائم خواندَن.»
13و بازم اِشعیایِ پیغمبر کتابِ درون گه:
من اونَ توکل کونم.»
و بازم گه:
بیدین، من و زاکانی کی خُدا مَره فدَه.»
14پس جه اویا کی زاکان جسم و خونِ درون شَریکید، اون، خودِشَم اَ چیانِ درون شریک بُبوست، تا مرگِ راهِ درون، اونیَ کی مرگِ قوتَ دَره یعنی ابلیسَ، نابود بُکونه، 15و تمانِ اوشانیَ کی مرگِ ترسِ واسی، تمانِ خوشانِ عمرَ اسیری بکشه اید، آزاد بُکونه. 16چون راس راسی اون، فیریشته ئانَ یاری نُکونه، بلکی اون، ابراهیمِ نسلَ یاری دِئه. 17پس، لازم بو کی اون جه هر بابت خو برارانِ مانستن بِبه، تا اَطو خُدا خیدمتِ درون ایتا بخشنده و ایتا وَفادارِ پیله کاهن بِبه تا مردومِ گُنائانِ ببخشه بوستن ره کفاره فَده. 18چونکی اون خودش وقتی کی امتحان بُبوست، عذاب بکشه و تانه اوشانیَ کی امتحان بیدی، یاری بدِه.
Currently Selected:
نامه، مسیحیانِ عبرانی نـژادِ ره 2: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
