رسولانِ اعمال 17
17
پولُس و سیلاس تِسالونیکی درون
1پولُس و سیلاس آمْفیپولیس و آپولونیا شاران جا بُگُذشتید و تِسالونیکی شار فارسه ئید، کی اویا یهودیان، عبادتگا دَشتیدی. 2پولُس عَین خو عادت، عبادتگا بُشو، اون سه تا مُقدّس شنبه درون، مُقّدس بینیویشته ئان جا اَشان اَمرا بحث کودی 3و اَشان ره توضیح دَئی و دلیل اَوردی کی مسیح لازمه رنج بکشه و مُرده ئان جا زنده ببه. اون گفتی: «اَ عیسی کی اونَ شمرأ اعلام کودن درم، هو مسیح موعود.» 4بعضی جه اَشان قانع بُبوستید، کی پولُس و سیلاسَ اَمرا همرا بیبید و هَطوئم پیله جماعتی جه خُداپرستِ یونانیان و سرشناس زناکانَم ایسابید.
5ولی یهودیان حسودی بُکودید و چن تا قالتاق آدم، بازار جا جمَ کودید و ایتا دَسته راه تَوَدَه ئید و شار درون وَلوا بپا بُکودید. یهودیان پولُس و سیلاسِ گیفتن ره یاسون خانه سو حمله بُکودید تا اوشانَ جمعیت میان بیرون باورید. 6وقتی اوشانَ نیافتید، یاسون و بعضی جه براران دیگر ئم فاکشانه ئید شارِ حاکمانِ ورجه و داد بزه ئید کی: «اَ مرداکان کی تمان دُنیایَ بهَم بزه ئید، هسّا اَیا بامودَرید، 7و یاسون اَشانَ خو خانه ببرده. اَشان همتان، روم امپراطور، قیصر دستوراتِ جا سرپیچی کونیدی و ادعا کونید کی ایتا دیگه پادشاه ایسَا کی عیسی نام دَره.» 8وقتی مردوم و شارِ حاکمان اَنه بیشتاوستید، پریشانَ بوستید. 9بازون یاسون و الباقی جا ضِمانت فیگیفتید و اوشانَ آزادَ کودید.
پولُس و سیلاس بیریه شار درون
10براران درجا هو شب، پولُس و سیلاسَ بیریه شار سمت روانه کودید. وقتی اوشان اُ شار فارسه ئید، یهودیانِ عبادتگا بدُرون بُشوئید. 11اَ یهودیان اُ یهودیان جا کی تِسالونیکی درون زیندگی کودید نجیبتر بید. اوشان ذوق اَمرا پیغامَ قُبیل بُکودید و هر روج مُقّدس بینیویشته ئانَ خواندید تا بیدینید پولُس و سیلاسِ گب، خُدا کلام مانستن ایسه یا نه؟ 12اَطویی، خَیلی جه یهودیان ایمان باوردید و تعدادِ یونانی زناکانی کی ایمان باورده بیدَم کم نُبو، و خَیلی جه یونانی مرداکانَم کی سرشناس بید ایمان باوردید.
13ولی وقتی تِسالونیکی یهودیان، بفهمستید کی پولُس بیریه شار دُرونم خُدا کلامَ اعلام کودن دَره اویا بُشوئید و مردومَ تیرا کودید و شار درون وَلوا بِه پا بُکودید. 14براران درجا پولُسَ دریا کنار سمت اوسه کودید، ولی سیلاس و تیموتائوس بیریه شار درون بأسائید. 15اوشانی کی پولُسَ همرایی کودن دیبید، اونَ تا آتن شار باوردید و بازون پولُس اوشانَ دستور بِدَه کی بیریه شار واگردید و هرچی زوتر سیلاس و تیموتائوسِ اون ورجه روانه کونید.
پولُس آتن درون
16اُ موقع کی پولُس آتن درون اُ دونفر رافا ایسأ بو، وقتی کی دِئی شار، بُتانِ جا پُرِ، روح درون ناراحتَ بوست. 17جه اَرو، عبادتگا درون یهودیان و یونانیانی کی خُداپرست بید و اُ رادَواران اَمرا کی هر روج بازار درون شئون و آمون کودید، بحث کودی. 18چن تا جه اپیکوری و رواقی فیلسوفانَم اونِ مرا بنا بُکودید بحث کودن. بعضی جه اوشان گفتیدی: «اَن کی هَپَرا گه، چی خوائه بگه؟» بقیه گفتیدی: «اِنگاری بیگانه خُدایانَ تبلیغ کودن دَره.» چونکی پولُس، عیسی و مُرده ئان زنده بوستن باره اَشان ره گب زئی. 19هو موقع پولُسَ بیگیفتید و آریوپاگوس، اُ جائی کی مردوم اویا جمَ بوستیدی، ببردید. اویا اونَ بگفتید: «تانیم بدانیم اَ تازه تعلیمی کی تو دیئی چیسه؟ 20چونکی تی گَبان اَمی گوش ره عجایب غرایبه. پس خوائیم بدانیم اونِ معنی چیسه.» 21تمانِ آتِنیان و غریبه ئانی کی اویا زیندگی کودید، دِه هی کاری ناشتید جغیر اَنکی خوشان وقتَ بنید و تازه عقایدِ باره گب بزنید و بیشتاوید.
22پس پولُس "آریوپاگوسِ" جَم میان ویریشت و بگفت: «ای آتنِ مرداکان، من شمرأ جه هر نظر خَیلی دیندار دینَم. 23چون وقتی کی شار درون گردستیم و اونچیَ کی شُمان پرستش کودیدَ فندرستیم، ایتا قربانگاه بیدم کی اونِ سر بینیویشته بُبوسته بو: ”تقدیم، خُدائیَ کی ناشناسِ“. هسّا، اونچیَ کی شُمان اونَ نَشناختیدی و پرستش کونیدی، شمرأ اعلام کونم.
24«اُ خُدایی کی دُنیا و هر اونچی کی اون درون نَئه خلق بُکود، اونکی آسمان و زمینِ صاحابِ و معبدان درون کی آدمی دَس مرا بَساخته بُبوسته زیندگی نُکونه. 25و اونچیَ کی آدمی خو دَسان مرا بخوائه خُدا ره چاکونه ایحتیاجی ناره، چون اون خودشه کی تمان آدمیانَ، زیندگی، نَفَس و هر چیزِ دیگرَ، ببخشه. 26اون تمان دُنیا ملتّانَ ایتا آدم جا بوجود باورد کی سرتاسرِ زمین بیشید و زیندگی بُکونید؛ و اوشان ره وقتانی تعیین بُکود و اُ جایی کی زیندگی کودیدِ ره حدمرز مُعیَن بُکود. 27تا مردومان خُدایَ واموجید، بلکی اون دُمبال بیشید و اونَ بیاوید، هرچن کی خُدا هیتّا جه اَمان دور نیه. 28چونکی،
”اونِ درونِ کی اَمان زیندگی کونیم، حرکت کونیم و وجود دَریم؛“
هُطوکی بعضی جه شیمی شاعرانم بگفته ئید کی:
”حئیقتن، اَمان اونِ نسل شینیم.“
29«هسّا کی خُدا نسل شینیم، دُرُست نیه اَطو فیکر بُکونیم کی خُدا، نقره و زر و یا ایتا سنگ مانستنِ کی آدمی هنر و خیالات مرا ایتا مجسمه مانستن بِتراشته ببه. 30قدیم ایام، خُدا اَ جور نادانیَ نیده بو گیفتی. ولی الان تمان مردومانَ کی هر جا ایسائید دستور بده کی توبه بُکونید. 31چونکی اون، ایتا روجَ تعیین بُکوده کی اونِ درون بواسطه ایتا مَردای کی مُعین بُکوده دَره دُنیایَ عدالت اَمرا داوری خوائه کودن، و اونِ زنده کودن مرا مُرده ئان جا، همه کَسَ جه اَ کار خاطر جَم بساخته.»
32وقتی اوشان مُرده ئان زنده بوستن باره بیشتاوستید، بعضیان رخشن بزه ئید، ولی بَقیه بگفتید: «خوائیم بازم اَنِ باره تی جا بیشتاویم.» 33پس پولُس اوشانِ جمَ ترکا کود. 34ولی چن نفر ایمان باوردید و اون اَمرا همرا بُبوستید. اوشان میان دیونیسیوس، ایتا جه ’آریوپاگوسِ‘ اعضا، ایتا زنای داماریس نام و چن نفر دیگرَم اوشان اَمرا بید.
Currently Selected:
رسولانِ اعمال 17: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
