رسولانِ اعمال 16
16
تیموتائوس پولُس و سیلاسَ همراهی کونه
1پولُس دِربِه و لِستره شاران بُشو. اویا ایتا شاگرد تیموتائوس نام زیندگی کودی کی اونِ مار یهودی و ایتا ایماندار بو، ولی اونِ پئر یونانی بو. 2براران لِستره و قونیه درون اونِ باره خُبی اَمرا گب زئیدی. 3پولُس، چونکی خواستی تیموتائوس، سفر درون اونَ همرائی بُکونه، یهودیانِ واسی کی اُ منطقه درون زیندگی کودیدی اونَ ختنه بُکود، چونکی همتان دانستیدی کی تیموتائوس پئر یونانیه. 4اوشان وقتی جه اَ شار به اُ شار شوئیدی، اُ قانونانی کی رسولان و ریش سیفیدان اورشلیم درون بگفته بید، مردومَ گفتیدی تا اوشانَ رعایت بُکونید. 5پس کلیسائان، ایمان درون قوّت گیفتیدی و هر روج اَشان تعداد زیادَ بوستی.
پولُسِ رویا، مقدونی مرداک باره
6بازون، اوشان سراسر فریجیه و غَلاطیه منطقه بُشوئید، چونکی روح القدّس اَشان اجازه ندَه بو کی خُدا کلامَ آسیا ولایت فارسانید. 7وقتی کی میسیه منطقه درون فارسه ئید، تقّلا بُکودید بیطینیه ولایت بیشید، ولی عیسی روح اَشانَ اجازه ندَه. 8اَنه واسی، میسیه جا ردّا بوستید و تروآس شار بُشوئید. 9بازین پولُس شب درون، رویا بیدِه کی، ایتا مقدونی مردای اون چومان جُلُو ایسا و اونَ منّت کونه کی: «بیا مقدونیه و اَمرا یاری بُکون.» 10وقتی پولُس اَ رویایَ بیده، درجا مقدونیه سمت بُشوئیم، چون حتم دَشتیم کی خُدا اَمرا دوخواده تا انجیل خُب خبرَ اَشانَ فارسانیم.
لیدیه ایمان اَوردن
11پس، تْروآس جا کشتی اَمرا یسره ساموتراکی جزیره بُشوئیم، و فردایی نیاپولیس شار فارسه ئیم. 12جه اویا فیلیپی سمت رادکفتیم کی ایتا جه شارانی بو، کی رومیان اویا زیندگی کودید و مقدونیه خاک درون بو. چن روج اُ شار درون بأسائیم.
13مُقدّسِ شنبه روج، اُ شار جا بیرون باموئیم و روخان کنار بُشوئیم، گُمان بُکودیم کی اویا ایتا جیگا دُعا واسی نَئه. بینیشتیم و اُ زناکان اَمرا کی جم بُبوسته بید، بنا به گب زئن بُکودیم. 14اوشانِ میان ایتا خُداپرست زنای تیاتیرا شارِ جا ایسأ بو کی اَمی گَبانَ گوش دَئی. اُ زنای لیدیه نام دَشتی و پارچه فروش بو و گران ارغوانی پارچه فروختی. خُداوند اون دیلَ وازَ کود تا پولُس پیغامَ گوش بده. 15وقتی لیدیه خو خانواده اَمرا غسل تعمید بیگیفتید، خَیلی اصرار بُکود و اَمرا بگفت: «اَگه واور کونید کی، خُداوندَ ایمان باوردم، بائید و می خانه درون بأسید.» آخربسر تسلیم اون خواسته بُبوستیم.
پولُس و سیلاس زندان درون
16ایوار اَمان اُ جیگائی کی اویا دُعا کودیم شئون دیبیم، ایتا کولفتَ بیده ئیم کی ایتا روح دَشتی کی تانستی اون اَمرا غیبگوئی بُکونه. اون فالگیری اَمرا خو اربابانَ خَیلی سود فارسانه ئی. 17اون، پولُس دُمبال و اَمی دُمبال آمویی و داد اَمرا گفتی: «اَ مرداکان، خُدای متعال خیدمت گُذارانید و شمرأ نیجات راهَ اعلام کونیدی.» 18اُ کولفت خَیلی روجان اَ کارَ کودی. آخر بسر پولُسِ صبر تمانَ بوست و واگَردَسته و روحی کی اُ کولفت درون ایسابویَ بگفت: «عیسی مسیح نام اَمرا تره دستور دَئم کی اَ کُر جا بیرون بائی!» هو دَم، روح، اُ کُرِ جا بیرون بامو.
19ولی اُ کولفتِ اربابان، وقتی بیده ئید اونچی اون اَمرا کاسبی کودن دیبید برباد بُشو و خوشان امیدَ جه دَس بده ئید، پولُس و سیلاسَ بیگیفتید و اوشانَ فکش فکش اَمرا شار میدان درون، رئیسان ورجه ببردید. 20وقتی اَشانَ قاضیان ورجه باوردید، بگفتید: «اَ مرداکان یهودی ئید و اَمی شارَ به آشوب فاکشه ئید. 21اوشان رسم و رسومیَ تبلیغ کونیدی کی اون قُبیل کودن و انجام دئن اَمان رومیان ره جایز نیه.»
22جماعت پولُس و سیلاس سر فُتورکستید و اوشان اَمرا همدس بُبوستید. قاضیانم دستور بدَه ئید کی اَشانَ لُختَ کونید و چوب بِزَنید. 23وقتی کی اَشانَ خَیلی چوب بزِه ئید، زندان درون تَوَدَه ئید و زندانبانَ دستور بدَه ئید کی حیسابی اَشان بپائه. 24وقتی زندانبان، اَ دستورَ فیگیفت اوشانَ خولتانک درون تَوَده و اوشان پائانَ به ایتا کُنده دَوَست.
فیلیپیه زندانبان ایمان آوره
25نصف شب، پولُس و سیلاس دُعا کودن دیبید و سرود اَمرا خُدایَ پرستش کودیدی و بقیه زندانیانَم اَشانَ گوش دَئیدی 26کی ناخبر ایتا پیله زلزله بامو، اُجور کی کل زندانِ پی بِلرزست و درجا تمانِ زندان دَران وازا بوست و زندانیانِ زنجیلان همتان بُورسُفتید. 27زندانبان خوابِ جا ویریشت، و وقتی کی زندان درانَ وازَ بوسته بیدِه، شمشیرَ فاکشه تا خوره بُکوشه، چونکی خیال کودی زندانیان فرار بُکودید. 28ولی پولُس بُلند صدا مرا داد بزه و بگفت: «تره صدمه نَوا زئن، چونکی اَمان همه اَیا ایسائیم!» 29زندانبان فانوس بخواست و تأدی مرا زندانِ بدُرون بُشو و هُطوکی ترس جا پرکستن دُبو پولُس و سیلاسِ پا جیر بکفت. 30بازون، اَشانَ بیرون باورد و واورسه: «آقایان، چی بُکونم تا نیجات بیگیرم؟»
31اوشان جواب بدَه ئید: «عیسی مسیح خُداوندَ ایمان باور کی تو و تی خانواده نیجات خوائید یافتن.» 32پولُس و سیلاس خُداوند کلام جا، اون ره و تمان کَسانیَ کی اونِ خانه درون ایسابید، گب بزئید. 33هو موقعِ شب، زندانبان اوشانَ بیرون باورده، اوشانِ زخمانَ بُشوست، و درجا اون و تمانِ اونِ خانواده غُسل تعمید بیگیفتید. 34زندانبان اوشانَ خو خانه درون ببرد و اَشان ره ایتا سفره واشاد. زندانبان و تمان اونِ خانواده، جه اَنکی خُدایَ ایمان باورده بید خَیلی خوشحال بید.
35ولی وقتی روج بُبوست، قاضیان مأمورانی زندانبان وَر، روانه کودید و بگفتید: «اُ مَرداکانَ آزادَ کون!» 36زندانبان اَ پیغامَ پولُس ره خَبر ببَرد و بگفت: «قاضیان دستور بدَه ئید کی شمرأ آزادَ کونم. پس هسّا بیرون بائید و بیشید به سلامت.»
37ولی پولُس اوشانَ جواب بدَه: «اَمرا کی روم شاروند ایسیم بدون اَنکی محاکمه بُکونید همتان جُلُو چوب بزِه ئید و زندان درون تَوَدَئید. هسّا خوائیدی خلوتی اَمرا آزادَ کونید؟ نه، نیبه! وَئل خودشان بائید و اَمرا جه اَیا بیرون باورید.»
38مأموران اَ خبرَ قاضیان ره ببردید و وقتی اوشان، بیشتاوستید کی پولُس و سیلاس روم شاروند ایسید خَیلی بترسه ئید 39پس باموئید و اَشان جا معذرت خوائی بُکودید و اَشانَ تا زندانِ بیرون راهی بُکودید، و خواهش بُکودید کی اَ شارَ تَرکا کونید. 40بعد اَنکی پولُس و سیلاس زندان جا بیرون باموئید، لیدیه خانه بُشوئید. اویا برارانَ بیده ئید و اَشانَ تشویق بُکودید. بازین اویا تَرکا کودید.
Currently Selected:
رسولانِ اعمال 16: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
