اوّلتا نامه قُرنتیانِ ره 16
16
پیشکشان مُقدسین ره
1هسّا پیشکشانِ جَما کودن باره مُقدّسینِ ره: شُمانَم اوچیَ کی غلاطیه کلیسائانَ بُگفتم، انجام بَدید. 2هر هفته اولتّا روج، هر تا جه شُمان بایستی خو درآمد جا ایچی کنار بنه و خوره بدَره، تا اُ زمات کی من اَیم، دِه احتیاج نَبه کی پیشکشان جَما کونید. 3وقتی فارسَم، اوشانیَ کی اطمینان دَریدی معرفی نامه ئانی خوائم فَدَن و اوشانَ شیمی پیشکشانِ اَمرا اورشلیم شار سو اوسه کونم. 4اَگه صلاح بِبه کی منم بَشم، اَطویی اوشانِ مَرا خوائم شوئن.
نقشه ئان سفر واسی
5بعد اَنکی مقدونیه ولایت جا بُگُذشتم شیمی ورجه خوائم آمون، چونکی مقدونیه ولایت جا رّدَ بَم. 6شاید ایپچه زمات شیمی ورجه بئسم، و یا حتی زمستانَ شیمی اَمرا بُگُذرانم، تا هرجا کی شَم می سفر واسی مَره کمک بُکونید. 7چونکی نخوائم هسّا راه درون شمرأ بیدینم؛ بلکی اُمید دَرم، اَگه خُداوند بخوائه، چند وقت شیمی اَمرا بمانم. 8ولی تا پِنتیکاستِ عید اَفِسُس شار درون خوائم ایسان.
9چونکی ایتا پیله دَروازه، خیدمت واسی مَره وازا بوسته کی خَیلی فایده دَره، و دُشمندانَم زیادید.
10وقتی تیموتائوس بامو، جوری اونِ اَمرا رفتار بُکونید کی شیمی میان هی نیگرانی ندَره. چونکی اونَم مَرا مانستن خُداوند کارَ انجام دَئن دَره؛ 11پس هیکّس اونَ کوچک بحساب ناوره. اونَ سلامتی اَمرا رائیِ سفر بُکونید تا می ورجه وَگرده؛ چونکی من و براران اونِ رافا ایسائیم.
آخرتا نصیحتان
12هسّا اَمی برار آپولسِ باره، اونِ جا خَیلی بخواستم تا دیگر براران مرا شیمی ورجه بایه، ولی اصلا راضی نُبوست کی الان بایه. هر زمات کی فرصت بُکونه، اَیه.
13واخُب بیبید؛ ایمانِ درون پایدار بمانید؛ مَرد بیبید و قوی بیبید. 14شیمی کاران همه ذره محبت اَمرا بِبه.
15دَنیدی کی اِستِفاناس خانواده اولتّا کسانی بید کی اَخائیه ولایت درون ایمان باوردید، و اوشان خوشانَ، مُقدسّینِ خیدمت ره وقف بُکودید. براران، شیمی جا خواهش کونم 16اَجور کسانِ فرمانبر بیبید، و هطوئَم هرکسِ دیگر کی اَخیدمت درون همکاری کونه و زحمت کشه. 17اِستِفاناس، فورتوناتوس و اَخائیکوسِ آمونِ جا ذوق دَرم، چونکی شیمی جایِ خالیَ پُرَ کودید. 18چونکی اوشان می روح و شیمی روحَ تازه بُکودید. اَجور کسانِ حُرمتَ بدَرید.
سلام ئان
19آسیا کلیسائان شمرأ سلام فارسانه اید. آکیلا و پْریسکیلا و کلیسایی ئَم کی اوشانِ خانه درون برپا به، شمرأ خُداوند درون گرمی مَرا سلام فارسانیدی. 20تمانِ برارانی کی اَیا ایسائید شمرأ سلام فارسانید. مُقدّسِ ماچی اَمرا همدیگره سلام بیگید.
21من، پولُس، می دَس اَمرا اَ سلامَ شمرأ نیویسم.
22لعنت به اُ کَس کی خُداوندَ دوست نَدَره. اَمی خُداوند، بیا!
23خُداوندْ عیسیِ فیض شیمی اَمرا بِبه.
24می محبت شُمان همتان اَمرا مسیحْ عیسی درون بِبه. آمين.
Currently Selected:
اوّلتا نامه قُرنتیانِ ره 16: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
