اوّلتا نامه قُرنتیانِ ره 15
15
مسيح زنده بوستن
1ای براران، هسّا خوائم انجیلیَ کی شمرأ موعظه بُکودم شیمی یاد باورم، هو انجیلی کی اونَ قُبیل بُکودید و اونِ درون پابرجائید. 2و بواسطه اون نجات یابیدی، البته اَگه اُ کلامیَ کی شمرأ موعظه بُکودم، قائم بدَرید. اَگه اَطو نَبه هچین ایمان باوَردید.
3چونکی من مهترین چیزیَ کی مرا فارسه، شمرأ اعلام بُکودم: اَنکی مسیح، اَمی گُنائانِ واسی بمرد هُطوکی مُقدّسِ بینیویشته ئان درون بامو، 4و اَنکی دفنَ بوست و اَنکی سیومین روج درون مُرده ئانِ جا زینده بُبوست هُطوکی مُقدس بینیویشته ئان درون بامو، 5و اَنكی خودشَ كيفا معروف به پِطرُس ره آشكار بُكود و دُمبالتر اُ دوازده شاگرد ره. 6بازون، ایوار ویشتر جه پونصد نفر جه برارانِ ره اَشکارَ بوست. خَیلی جه اوشان هنو زینده اید، هرچن کی بعضی جه اوشان بَمردیدی. 7بازون یعقوبِ ره آشکار بُبوست و بعد اون تمانِ رسولانِ ره. 8آخر بسر، مَرَئَم کی ایتا کوج زاک مانستن کی بی موقع بزا بُبوسته بِبه، آشکارَ بوست.
9چونکی من رسولانِ میان کوجی ترینَم، هی ذره قابیل نیئَم کی خُدا رسول دوخواده ببَم، چره کی خُدا کلیسایَ آزار فارسانه ئیم. 10ولی اونیَ کی الان دینیدی ایسَم، خُدا فیض واسیه، و اونِ فیض، مِره بی فایده نُبو. برعکس من تمان اوشانِ جا سخت تر کار بُکودَم، ولی نه خودَم، بلکی خُدا فیض واسیه کی می اَمرایه. 11پس چی من، چی اوشان، امان اَطو موعظه کونیمی و شُمانم اَطو ایمان آوریدی.
مُرده ئان زنده بیدی
12هسّا اَگه اعلامَ به کی مسیح مُرده ئانِ جا زنده بُبوسته، چُطو ایسه کی بعضی جه شُمان گیدی مُرده ئان زنده نیبیدی؟ 13ولی اَگه مُرده ئان زنده نیبیدی، پس حتی مسیح هم مُرده ئان جا زنده نُبوسته. 14و اَگه مسيح مُرده ئان جا زنده نُبوسته، پس هم اَمی موعظه هیچِ، هم شیمی ايمان هیچ. 15امان حتی خُدا ره دوروغِ گُوائان بحساب آئیم، چونکی خُدا باره گُوائی بدَه ایم کی مسیحَ مُرده ئانِ جا زنده بُکود، کی اَگه مُرده ئان زنده نیبید، پس خُدا اونَ زنده نُکوده. 16چونکی اَگه مُرده ئان زنده نیبید، پس حتی مسیحَم زنده نُبوسته. 17و اَگه مسيح زنده نُبوسته، شیمی ايمان هیچِ و شُمان هنو شیمی گُنائان درون ایسائیدی. 18پس اوشانی ئَم کی مسيحَ ایمان داشتیدی، بَمردید و هلاکَ بوستید. 19اَگه فقط اَ زیندگی درون مسیحَ اميد دَریمی، اَمان تمانِ ديگر آدمان جا بَدبخت تریم.
20ولی حئیقتن مسيح مُرده ئانِ جا زنده بُبوست و اولتّا کسی ایسه کی مُرده ئانِ جا زنده بُبوستِ. 21چون هُطوکی مَردن بواسطه ایتا آدم بامو، زنده بوستن مُرده ئان جا هم بواسطه ایتا آدم اَیه. 22چون هُطوکی همتان آدمِ درون میریدی، همتان مسیح درونَم زنده خوائید بوستن. 23ولی هرکی به خو نوبه: اول مسیح کی نوبر بو؛ و بازین، اوشانی کی اونِ آمونِ وقت مسیحِ شین ایسید. 24بازون، آخرالزمات فارسه. هوموقع کی پادشاییَ خُدای پئرِ دَس واسپاره یعنی اُ زمات کی هر حکومت و هر اقتدار و هر قُدرتیَ نابودَ کونه. 25چونکی اون بایستی تا اُ زمات کی تمان خو دُشمندانَ خو پا جیر بنه سلطنت بُکونه. 26آخرتا دُشمند کی بایستی ازبین بشه، مرگِ.
27چونکی خُدا «همه چیَ اونِ فرمانبر بُکوده و اونِ پا جیر بنه.» ولی وقتی گه «کی همه چیَ اونِ فرمانبر بُکوده و اونِ پا جیر بنه»، معلومه کی خود خُدا اونکی همه چیَ مسیح فرمانبر و اونِ پا جیر بنا دَره، در بر نیگیره. 28اُ زمات کی همه اونِ فرمانبر بیبید، اُ موقع خودِ پسرم اُ کسِ فرمانبر خوائه بوستن کی همه چیَ اونِ فرمانبر بُکوده و اونِ پا جیر بنه دَره، تا خُدا کُل در کُل بِبه.
29وگرنه مردوم منظور، غسل تعمید جا به نیابت جه مُرده ئان چیسه؟ اَگه مُرده ئان اصلا زنده نیبیدی، چره مردوم به نیابت جه اوشان غسل تعمید گیریدی؟ 30امان چره هر ساعت اَمی جانَ خطر درون تَودیم؟ 31براران ایفتخاری کی اَمی خُداوند درون مسیحْ عیسی، شیمی باره دَرَم قَسَم، کی من هر روج مَردَن دَرَم. 32اگه من اَفِسُس شار آدمان مرا کی واشی جانورانَ مانیدی جنگ بُکودم، مِره چی فایده داشتی؟ آدمی دید جا گب زنم، اَگه مُرده ئان زنده نیبیدی،
« بائید بُخوریم و بُنوشيم
چونکی فردا میریمی.»
33گول نُخورید: «بدِ همنشین، خُبِ اخلاقَ خرابَ کونه.» 34اَ بیخودِ گبان جا کی اونِ مَست بُبوستید به خودتان بائید و دِه گُناه کودنِ دُمبال نیبید؛ چون بعضی ئان ایسائید کی خُدایَ نیشناسیدی. اَنَه گَم تا شرمنده بیبید.
تَنی کی زنده به
35ولی ایکس واورسه: «مُرده ئان چُطو زنده بیدی و چجور تَنِ اَمرا اَئیدی؟» 36اَی نادان آدم! اونچیَ کی کاری، تا نيميره زنده نيبه. 37و اونچیَ کی تو کاری، اُ تنی کی بایستی بِبه نیه، بلکی فقط ایتا دانه یَ، چی گندم بِبه چی دیگر دانه ئان. 38ولی خُدا اُ دانه ره تنیَ کی خودش انتخاب بُکوده فَدِه و هر جور دانه یَ ایتا تَن، مُختَص به خودش فَدِه.
39چونکی تمانِ تَن ئان ایجور نیئه. آدمان ایجور تن دَریدی، جانورانم ایجور دیگر، و پرندئان ایجور دیگر؛ و ماهی ئانَم ایجور دیگر تن دَریدی. 40آسمانی تَنان و زمینی تَنان نَئه. ولی آسمانی تَنانِ جلال یک جور ایسه و زمینی تَنانِ جلال ایجور دیگه. 41آفتاو خودشِ جلالِ دَره، ماه خو جلالَ، و ستاره ئانم خوشانِ جلالَ دَریدی، چونکی هر ستاره جلال، اویتا ستاره جلال اَمرا فرق کونه.
42مُرده ئانِ زنده بوستنَم هَطویه. اونچی کی بکاشته به از بین شه؛ اونچی کی زنده به، از بین نیشه. 43ذلّتِ درون بکاشه به، عزتِ درون ویریزه. ضعف درون بکاشته به، قوّتِ درون ویریزه. 44جسمانی تن بکاشته به، روحانی تن ویریزه. اَگه جسمانی تن نَئه، روحانی تنَم نَئه. 45هُطوکی تورات درون بینیویشته بُبوسته:«اولتّا انسان، يعنی آدم، موجود زنده بُبوسته»؛ آخرتا آدم، روحی بُبوست کی زیندگی فَدِه. 46ولی روحانی، اول نامو بلکی جسمانی بامو و بازون روحانی بامو. 47اولتّا انسان زمینِ جا بو و خاک جا، دوّمتا انسان آسمانِ جا ایسه. 48هُطوکی، خاکی انسان ایسه، اوشانیم کی خاک جا ایسید هُطوئید؛ و هُطوکی آسمانی انسان ایسه، اوشانیم کی آسمان جا ایسید هُطوئید. 49و هُطوکی خاکی انسانِ شکل بُبوستیم، آسمانی انسانِ شکل هم خوائیم بوستن.
50اَی براران، اَنه شمرأ گَم کی: جسم و خون نتانه خُدا پادشائیَ به ارث بَبره و اونچی کی از بین شه، نتانه اونچیَ کی از بین نشه به ارث بَبره. 51گوش بُکونید! ایتا راز شمرأ گَم: اَمان همه نیمیریم، بلکی همه تبدیل خوائیم بوستن. 52ایی دَم و ایتا چوم پیله زِئن اَندر، هو موقع کی آخرتا شیپور بِزِه بِبه. چونکی شیپور بِزِه به و مُرده ئان زنده بیدی و دِه از بین شوئن شین نیئید و امان تبدیل خوائیم بوستن. 53چون اَ تن کی از بین شه بایستی اُ تنیَ کی از بین نشه دُکونه و اَ تنی کی فانیه بایستی اُ تنیَ کی فانی نیه دُکونه. 54وقتی اَ تن کی از بین شه اُ تنیَ کی از بین نِشه دُکونه و اَ تن کی فانی ایسه اُ تنیَ کی فانی نیه دُکونه، هو موقع اشعیای پیغمبر اُ بینیویشته به حئیقت فارسه کی گه: «پیروزی، مرگَ فَوَره.»
55«اَی مرگ، تی پیروزی کویا نَئه؟
و اَی مرگ، تی نیش کویا نَئه؟»
56مرگِ نیش گُناه ایسه و گُناهِ قوت شریعت. 57ولی خُدایَ شُکر کی بواسطه یِ اَمی خُداوند عیسی مسیح، اَمرا پیروزی فَدِه.
58پس می عزیز براران، پابرجا و برقرار بیبید، همیشک خُداوندِ کارَ ویشتر و ویشتر انجام بَدید، چونکی دَنیدی شیمی زحمت کِشئن خُداوند درون الکی نیه.
Currently Selected:
اوّلتا نامه قُرنتیانِ ره 15: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
