نامَه رومِ کلیسا را 7
7
شریعتَ دَ آزاد بیین
1ای برارون، مگم نِزونا - چون کسانی ییم لاوه کرم که شریعت دَ خَوَر دارِنده - که شریعت فقط تا وختی انسانه را حکم کره که انسان زنده عه؟ 2مثلا، طبق شریعت، شِو داره زَنَک تا وختی که چو شِو زنده عه، اِشتن شِوِ را اسه. امّا اگم چو شِو بِمَرییه، زَنَکِ شرعاً چو دَ جِدا آبییه. 3پس اگم وختی که چو شِو زندَه عه، علایده مردکی ییم بیبیه، اَجو زناکار وانده. امّا اگم چو شِو بِمَره، اَم شریعتَ دَ آزاداسه، و اگم علایده مردکییم وصلت بکرییه، زِناکار حساب نِبییَه.
4چِمه خونین، ای چِمن برارون، شَما نی مسیحه بدنه واسطییم شریعت دَ مردَیا تا علایده کسی ییم وصلت بِکَرا، ینی چوعییم که مردَعون دلَ زنده آبه، تا خدا را ثمره بایروم. 5چون وختی که حلا اَما جسمه دلَ زندگی کردِمونَی، چَما هوا هوس که گناهییم مَشت به و شریعت خونین آشکار آبییَی، چَما اعضاعه دَ کار کردَی تا مرگه را ثمر بایروم. 6امّا هننه اَ چی ای خونین که چو قید و بندَ دَ بَیوم بِمردَیوم، شریعتَ دَ آزاد بِبَیوم تا خدا مقدسَ روحییم ای تازَه راه دَ خِدمَت بِکَروم، نه اَ کوینه راه ییم که فقط ای نیویشتَه ای اِسه.
گناه ییم درگیر بیین
7پس چِه بوام؟ مگم شریعت گناه اِسه؟ اصلا! با اَم حال اگم شریعت نِبه، هرگز نِزونِسَیوم گناه چیه. چون اگم شریعت نِواتش به «طمع مَکه»، نِزونِسَیوم طمع کردن چیه. 8امّا گناه، اَم شریعته واسطییم ای فرصتیش پیدا بکه تا هر جور طمعی چِمن وجودَ دَ بوجود بایره. چون جِدا از شریعت، گناه مَرده. 9ای زمونی از شریعتَ دَ جِدا زنده بَیم؛ امّا وختی شریعته حکم بومه، گناه زنده آبه و از بِمَردِم. 10هَه حکمی که زندگی وعدِش داعه به، چِمن مرگه باعث بِبه. 11چون گناه، شریعت حکمه واسطییم فرصتش پیدا بکه، اَمِنش وازی بدا و چو واسطه ییم اَمِنش بکوشت. 12پس، شریعتْ مقدّس اِسه و شریعته حکم نی مقدّس، دِرِست و چاکه.
13پس مگم اَ چی ای که چاک بِه، چِمن مرگه باعث ببه؟ هرگز! بلکم گناه اَ چی خونین که چاک به، مرگش چمنا به وجود بایردشه تا همنه آشکار بیبی که گناه اسه و شریعته حکمه واسطییم آشکار بیبی که گناه پلیدی چَنده بی حد و اندازَعه.
14اَما زونوم که شریعت روحانی اِسته، امّا از جسمانیه آدمی اِسِم و اَمِنِشون ای نوکر شارین به گناهشون بخروت. 15از نزونم چِه کَرِم، چون نَه اَ چی ای که گَوِم، بلکم اَ چی ای که چو کودَ نفرت دارم، انجام دیم. 16امّا اَگم اَ چی ای که نگوم، انجام دیم، پس قبول کرم که شریعت چاکه. 17پس همنه، دِ از نییم که اَ کار کرم، بلکم گناهیه که چِمن دلَ اِسه. 18زونم که چِمِن وجودَ دَ، ینی چِمن جسم دله، هیچ چاکه چی ای نییه. چون با اَم که گَوِم اَ چی ای که دِرِسته انجام بدیم، امّا نِتونم اَجو انجام بِدیم. 19چون اَ چاکه کاری که گَوم، نِکَرِم، بلکم بده کاری که نگَوِم، هی انجام دَیم. 20هننه اگم کاری بکرم که نِگَوم انجام بدیم، پس دِ از نییم که اَ کار کرم، بلکم گناهیه که چِمن وجودَ دَ اسه.
21پس اَم قانونه زونم که وختی گَوِم چاکی بکرم، بدی چِمن وَر اسه. 22از باطنَ دَ خدا شریعته دَکیف کرم، 23امّا علایده قانونی چِمن اعضاعه دَ وینم که اَ شریعتی ییم که چِمن ذهن اَجو قبول کره، جنگه و اَمِن گناه قانونه اسیر کَره که چِمن اعضاعه دَ اِسه. 24آخ که چِه قره بختَه آدمی اِسم! کیه که اَمِن اِم مرده بدنَ دَ آزاد بکره؟ 25خدا شکر کرم - چَما خداوند عیسی مسیح واسطییم!
آها، از چِمن عقلییم خدا شریعته را نوکری کَرِم، امّا چِمن جسمییم گناه شریعته را نوکری کَرم.
Currently Selected:
نامَه رومِ کلیسا را 7: KTT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company