نامَه رومِ کلیسا را 2
2
خدا عادلانۀ داوری
1پس تَه ای آدمی که علایده نفرِ داوری کری، هر کسی که بیبی هیچی بهونَه ای نِداری. چون وختی که علایده نفری داوری کری، اِشتنر محکوم کرده؛ چون ته که داوری کری، اِشتن نی اَ کاره انجام دیی. 2اَما زونوم که خدا داوری کسانی را که همنه کارون انجام دینده، حق اِسه. 3پس تَه اِی آدمی که علایده نفری داوری کری و اِشتن نی اَ کاره انجام دیی، خیال کری که خدا داوریَ دَ تونی دِوَشتَن؟ 4یا اَم که خدا مهربانی، چو صبر و پیله تحمله ولگ زونی و نزونی که خدا مهربانی چِمه خونینِ که اَتَه راهنمایی بکره تا توبه بکری؟
5امّا تَه اِشته سرسخت بین خونین و اِشته دلِه خونین که نگَوِه توبَه بکره، غضبه روزه را، غضبه اِشرا جمع آکری، روزی که خدا عادلانۀ داوری آشکار بی. 6خدا «هر که مطابق چو اعمال سزا آدییه.» 7خدا ابدییه زندگی کسانی آدییه که صبر و تحمل ییم چاکه کاران انجام دینده، و جلال و حرمت و ابدیه زندگی پَشَ اسِندِه؛ 8امّا کسونی را که اشتن منفعت پَشنده و کسانی که حقیقتَ دَ اطاعت نکرنده و کسانی را که نادِرِستییه دَ اطاعت کرنده، اِشتن خشم و غضبه ایکره. 9هر که بده کاران انجام بدییه، رنج و عذابه نصیب چو بی، اوّل یهودیان و اُخُری غیریهودییه. 10امّا هر که چاکی بکره، خدا جلال و حرمت سلامتی نصیب چو بی، اوّل یهودیان و اُخُری یونانیان. 11چون خدا فرق نِنییَه.
12همهی کسانی که بدون شریعت گناه کَرِنده، بدون شریعت نی هلاک بینده؛ و همهی کسانی که شریعت بِن گناه کرنده، شریعته قانونانییم داوری بینده. 13چون کسونی که شریعته اَشنَوِنده خدا نظر دَ صالح نیننده، بلکم کسانی صالح حساب بینده که شریعته انجام دینده. 14واقعا، وختی غیریهودیان که شریعت ندارنده، طبق غریزَه شریعته اصوله به جا آیرنده، هر چند اَوه شریعته ندارنده، امّا اِشتن، اِشنا شریعتی اِسنده. 15چون نشون دینده که شریعته اعمال چون دِلونَ دَ نیویشته بیاسه، همنه که چون وجدان گواهی دی و چون فکره، یا اَجون محکوم کره یا تبرئه کره. 16اَم، روزی اتفاق دگنه که خدا بنابر انجیلی که اَز اعلام کَرِم، آدمان سِر عیسی مسیح واسطه ییم داوری کره.
17هننه، تَه ای که اِشتن یهودی زونی و شریعته تکیه آدی و چمه خونین که خدا آزونی، پوز دی، 18تَه ای که چو خواسته زونی و چون شریعتَ دَ تعلیمِر گَتِه، چاکترینون انتخاب کری، 19و مطمئنیش که کورون راهنمایش و کسانی را که ظلمتَ دَ اِسنده نوریش، 20تَه ای که شریعته دردَنِ خونین که معرفت و حقیقت نشون دی، نادانَ آدمان مربی و خوردگون معلمیش، 21تَه ای که دیگرون یاد دی، اِشتن یاد نیگیری؟ تَه که اِشتن دِزی ضد پند دی، اِشتن دِزی کری؟ 22تَه که وای گَوَن زِنا مَکرا، اِشتن زنا کری؟ تَه که بتونَ دَ نفرت داری، اِشتن معبدون غارت کَری؟ 23تَه ای که شریعته دردَن خونین پوز دی، چو پا بِن ناینییم، خدا بیحرمتی کری؟ 24همنه که اشعیا پیغمبره کتابَ دَ نویشتشونه: «شَما خونین، غیر یهویان میون، خدا نومه کفر واینده.»
25خَتنه کردن وختی ارزش داره که شریعته به جا بایرا، امّا اگم اجو پا بِن بنییا، چِمه شارینه که ختنه نِبَیا. 26و اگم کسانی که ختنه نِبَینده، شریعته احکامه به جا بایرنده، مگم چون خَتنَه نِبییَن ختنه بیین حساب نبییَه؟ 27پس اوی که جسمَ دَ ختنه نبییه، امّا شریعته احکامه به جا آیره، اَتَه محکوم کره، اَتَه که هم شریعته نیویشته شونه احکام داری و هم ختنه بِبَیش، ولی خدا شریعته پا بِن نی.
28چون واقعیه یهودی اَ کسی نییه که ظاهرَ دَ یهودی بیبی، و واقعیه ختنه نی کاری نییه که جسم و ظاهرَ دَ بیبی. 29بلکم یهودی اَ کسی اِسه که باطنَ دَ یهودی بیبی و ختنه نی دلییه کاری اِسه که خدا روح واسطه ییم انجام بی، نه ای نیوشته واسطه ییم. همنه آدمه خدا تحسین کره، نه آدم.
Currently Selected:
نامَه رومِ کلیسا را 2: KTT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company