نامَه رومِ کلیسا را 1
1
1پولُسه طرفَ، عیسی مسیحْ نوکر،
که رسالته را دعوت بییا و خدا انجیله را وقف بیاسه؛ 2هَه انجیل که خدا پیش تر، اِشتن پیغَمبرون واسطَه ییم، چو وعدِش مقدّسه نیوشته هانَ دَ آدایِش به، 3و دربارَه چو زا اِسه، که خاکیه انسانی شارین داوود پاتشاه نسلَ دَ دِنیا بومه، 4طبق روح قدوسیت، مَردهون دلَ زنده آبیینییم، خدا قدرتمنده زا مقامه را انتخاب بِبه، ینی چَما خداوند عیسی مسیح. 5خدا مسح واسطَه ییم اَجَماش فیض آدا تا چو رسولون ببوم و همه ی قومون راهنمایی بکروم که مسیح نومه ایمان بایرنده و چو کودَ اطاعت بکرنده. 6و اَم شَما را نی اِسه، که دعوت بِبَیا تا عیسی مسیح را بِبا؛
7به همهی کسونی که رومِ شهرَ دَ اسِنده، و خدا چونییَم خوشه و دعوت بییِنده تا مقدّسانَ دَ بیبینده:
فیض و سلامتی خدا طرفَ، چَما په، خدا و عیسی مسیح خداوند طرفَ، شَما را بیبی.
پولسه اشتیاق رومه شییَنِ را
8پیش از هر چه، چِمن خدا، عیسی مسیح واسطه ییم، شَماهون خونین شکر کرم چون شَما ایمانه خَوَر همهی دِنیا دَ پیچِسِه. 9خدایی که اَجو، چِمن تموم دل و جانییم، چو زا انجیله کارَ دَ خِدمَت کَرِم، چِمن شاهده که چه طره همیشَه چِمن دِعاهونَ دَ همیشَه شَماهون ویر آیرم 10و دِعا کرم که اگم خدا بِگَوِه آخِر سر شَما وَر بام. 11چون ذوق دارِم شَماهون بِوینِم تا روحانیه برکتون شَما ایمانه تقویته را آدیم؛ 12ینی اَم که اَما همدیگَرِ ایمانَ دَ دلگرم ببوم هم شَما هم اَز. 13ای براران، نِگَوِم بیخَوَر ببا که چندِ را گَوِسَیم بام شاما وَر، امّا هر سَفَر ای چی پیش بومه. گوم شَما میونَ نی محصولی دِرِنِم، همنه که عَلایده غیریهودیان دلَ دِرِفِمِه.
14از اِشتنِم هم یونانیان هم غیر یهودیان، هم حَکیمه آدمان و هم نادانه آدمان مدیون زونم. 15چمه خونین، پِر ذوق دارِم که شَما را نی که رومَ دَ زندگی کرا، اعلام بکرم.
16چون انجیلِ عار نزونم، چمه خونین که انجیل خدا قدرت اِسه هرکسی نجاتِ را که ایمان بایره، اوّل یهود و اُخُری غیریهود. 17چون اِنجیلَ دَ، اَ صالحی که خدا دَ اسه ظهور کره، که اَول تا آخر، ایمانییم پابرجا اِسه. همنه که حبقوقه پیغمبره کتابَ نویشتشونه: «صالحه آدم ایمانییم زندگی کَره.»
خدا غضب، گناهکارَ آدمون را
18چون خدا غضب آسمونَ دَ نازل بی هر جوره بی خدایی و نادِرِستَه آدمون سر آ که اِشتن نادِرِستییَم حقیقته از بین برنده. 19چون اَ چی که خدا دَ بی آزونِسَن چون را آشکار اِسه، چون خدا اَوِش چون را آشکار کرده. 20چون دِنیا خلق بییَنِه اولَ، خدا صفاتی که نیبی وینتَن، ینی ابدییه قدرت و چو ذات الهی، اَ چییانی دلَ که اَو خلقش کرده، بی واضح وینتَن. پس اوه دِ هیچ بهونه ای نِدارِنده.
21چون هر چند خداشون آزونس، امّا اَوشون خدا شارین احترا اوننا و شکرشون نکه، بَلکم اِشتن فکرونَ دَ هیچَ چییون گرفتار بِبِنده و چون بی فهمه دلِ تایریکی بِگَتِشه. 22دِرِسته که اِدعاشون کردَی حکیمنده، امّا احمق بِبِنده 23و اوُن ابدییه خدا جلالشون، بُتونییم که فانیه آدم و پرندهان و حیوانان و خزندهان آشینده، عوضشون آکه.
24پس خدا نی اجون، چون دلون شهواتان دَ ناپاکیییم باشتشه، تا اِشتن میون اِشتن بدنه بی حرمت بکرنده. 25چون اَون اَ حقیقتی که دربارَه خدا اسه، دروغییم عوضشون بکه و مخلوقشون خالقه عوض پرستش و خِدمَت بکه، خالقی که گَوَن تا ابد اَجو پرستش کردن. آمین.
26چمه خونین خدا نی اَجونش شرمآوره شهوتونییم اِشتن حالَ دَ باشتشه. چون چون زَنَکِ، طبیعیه رابطشون غیرطبیعیه رابطییم عوضشون بکه. 27همَ نی مردکه طبیعیه رابطه زنکونییم دستشان اوگَت، هندیگره شهوته آتشه دلَ بِسوتنده. مردک مردک ییم شرمآور کارش بکه، و اشتن بده کارون مکافاتشون بیوینت.
28و همنه که خدا آزونسن چون را ارزشیش نِدَ، خدا نی اَجون چون فاسدَ فکرونَ دَ باشتشه تا اَ کاری که گَوَن انجام مدینده انجام بدینده. 29اَون هر جوره نادِرستی، شرارت، طمع و بدخواهییم مَشتِنده. پخیلی، آدم کشی، دعوا مرافَه، وازی و بدخواهی ییم مَشتِنده. و پِشت سر لاوه کرنده، 30تُیمت زننده، خدا دِشمنِنده، بی حیا، مغرورنده و منم منم کرنده. شرورانه کارون انجام داینه را، تازه راهونی رچ کرنده. اِشتن په ماعه دَ فرمان نِبَرنده، 31نفهم، بیوفا، بیعاطفه و بیرحمِنده. 32با اَم که درباره خدا عادلانه حکمه زوننده که هر که همنه کاران بکره چون مکافات مرگ اِسه، نه فقط اَوُن اِشتن انجام دینده، بلکم کسانیَ نی که اَ کارون انجام دینده، تأیید کرنده.
Currently Selected:
نامَه رومِ کلیسا را 1: KTT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company