نامَه رومِ کلیسا را 12
12
زنده قربونیون
1پس ای برارون، خدا رحمتون خونین، شَماکودَ خواهش کَرم که شَما بدنون زنده قربانی شارین، مقدسَ و خدا بابِ دل تقدیم بِکَراه که اَم شَما روحانیه عبادت اِسه. 2و دِ اَم دِنیا شارین مبا، بلکم شَما فکره تازه آبیینییم، عوض آبا. وختی تونا خدا اراده بفهما؛ خدا باب دل و کامله ارادَه.
3چون اَ فیضی واسطه ییم که اَمِن بخشسه شونه، شَما هر کومینِ وام که اِشتن اَز اَ چیونی که گَوَن ببا، پرتر مَزونا، بلکم هر کومین اَ ایمانی قَدَر که خدا شَماش بَخشِسشه، دِرِست اِشتن درباره قضاوت بِکَرا. 4چون همنه که اَما هر کومینه ای بدن داروم که پر اعضا ییم رچ آبیه و همه‌ی اَم اعضاهان کار ای جور نییه، 5اَما نی که پِرییوم، مسیحَ دَ ای بدنه تشکیل دیام و هر کومین، هندیگره اعضا اِسیوم. 6اَ فیضی خونین که اَجَماشون بَخشِسه، جور وا جوره عطایا داروم. بایا اَجون به کار بگیروم. اگم نبوّت کردنه، اَجو اِشتن ایمانه قَدَر به کار ببره. 7اگم خِدمَت کردنه، خِدمَت بِکَره. اگم کسی تعلیم دی، تعلیم بِدییه. 8اَ کسی که تشویق کره، تشویق بِکَره. اگم کسی که کمک کره، دس و دل فرایی ییم کمک بِکَره. اَ کسی که رهبری کره، اَم کاره غیرتییم بکره. و اگم کسی به علایده نفرون رحم کره و مهربونی کره، شادییم اَم کاره بکره.
واقعیه مسحییون نشونه
9محبت گَوَن خالص بیبی. بدیَ دَ دور ببا و به اَ چه که چاکه محکم آچکا. 10برا شارین محبت ییم هندیگرییم خُش ببا. هندیگره احترام نایَنَ دَ، هندیگرَ دَ پیش دِگنا. 11هیچ وقت شَما غیرت خدا را سست مَبی؛ روحَ دَ شعله‌ور ببا و خداونده را خِدمَت بِکَراه. 12امیدییم شاد ببا، مصیبتونَ دَ صبور ببا و همیشه دعا بکرا. 13مقدّسان نیازون برطرف کردنَ دَ شریک ببا و میهمان‌نواز ببا.
14کسانی را که شَما اذیت کرنده، برکت بِگَوا؛ برکت بِگَوا و لعنت مَکَرا! 15کسانی ییم که شاد اِسنده، شادی بِکَرا و کسانی ییم که بِرَمِنده، بِورَما. 16هندیگرییم مدارا بکرا! مغرور مَبا، بلکم کسانی ییم که ساده و ضعیفنده، شیین اومیین بِکَرا. اِشتن علایده نفرونَ دَ دانا تر مَزونا.
17هیچکس ییم بدی عوض، بدی مَکَرا. بلکم کاری بِکَراه که همَّن نظرَ دَ چاک اِسه. 18اگم ممکنه، تا بِر که شَما مربوط بی، همُّنییم صلح و صفا دَ زندگی بِکَراه. 19ای عزیزان، شَما اشتن انتقام مگیرا، بلکم اَجو خدا غضبه واگزار بکرا. چون توراتَ دَ نویشته شونه که «خداوند وا: ”انتقام چِمناعه؛ ازیم که سزا دیم.“» 20برعکس، «اگم اِشته دِشمن وشیر بیبی، اَجو غذا آده، و اگم تشیر بیبی، اَجو آو آده آخره. اگم همنه بکری، اشته اَم کار اَجو شرمندَه کره.اگم همنه بکری اجو آشی که چو سرَ دَ داغ ذغالون نایِره» 21مارز بدی اشته حریف بیبی، بلکم چاکی کردنییم، ته بدی حریف ببه.
@ 2024 Korpu Company