روملیلَر 13
13
حکم سؤرَنلَردَن اطاعت ائدمَک
1هَر آدام حکم سؤرَن صاحب مَنصبلَردَن اطاعت ائدسین. چونکی هئچ صاحب مَنصب یوخ دور کی تارئ طَرفیندَن اولمایا و اوللار کی واردیرلار، تارئ طرفیندَن مَعین اولموشلار. 2پس هَر کَس کی صاحب مَنصَبلَر ضدّینه توریر آیاقی، تارئ مَعین ائدیگینینگ ضدّینه توریر آیاقی و بو ایشی گؤرَنلَر محاکمه اولارلار. 3چونکی رووآلی دؤز اولانلار رئیسلَردَن قورخمئیرلار، بلکی رووآلی پیس اولانلار اوللاردان قورخیرلار. سئیرَینگ بیر حکم سؤرَن صاحب مَنصبدَن قورخونگ اولمایا؟ پس او ایشی کی دؤز دیر گؤر کی او سندَن تعریف ائدَر. 4بو سبریه کی او آدام سنینگ خیرینگ ایچی، تارئ نوکری دیر. آما اگر سن پیس ایش گؤرورَینگ، قورخ، بو خاطره کی او، ویل یئره اؤزو اینن قیلیج گؤتورمئیر. چونکی او، تارئنینگ نوکری دیر، بیر تَقّاص آلان دیر کی تارئ غَضّبینی پیس ایش گؤرَن آدام ایچی گتیریر. 5پس آدام حکم سؤرَن صاحب مَنصبلَردَن اطاعت ائدهسی، نه فقط تارئ غَضّبیندَن آمان قالماک ایچی، بلکی ائله بئله ده وجدان سبرسینه.
6چونکی، بونونگ ایچی سیز مالیات دا وئریرَینز، بو خاطره کی حکم سؤرَن صاحب مَنصبلَر تارئ نوکرلری دیرلر و اؤزلَرینی ائله بو ایشه وَقف ائدمیشلَر. 7هَر کَسه کی بیر دئین وارینز وئرینز: اؤنا کی مالیات وئرمَک دئینی وارینز، مالیات وئرینز. اؤنا کی خَراج وئرمَک دئینی وارینز، خَراج وئرینز. اؤنا کی احترام ائدمَک دئینی وارینز، احترام ائدینز. اؤنا کی حُرمَت ائدمَک دئینی وارینز، حُرمَت ائدینز.
مُحبّت دیر کی شَریعتی یئرینه ائتیردیر
8هئچ کَسینگ دئینی آلتیندا اولمانز، به غیری بو کی بیر بیره مُحبّت ائدینز. چونکی آیری کَسه مُحبّت ائدَن آدام، شَریعتی یئرینه ائتیردمیش. 9چونکی، «زِنا ائدمه، آدام اؤلدورمه، اوغورلوق ائدمه، طمع ائدمه،» حکملاری و هَر آیری حکم، بو سؤزده خُلاصه اولیر کی، «قونشونگو اؤزونگ لهیین چوخ سئه.» 10مُحبّت، قونشوسینا پیسلیگ ائدمئير؛ پس مُحبّت، شَریعتینگ یئرینه ائتیشمَکی دیر.
11بوندان بر گذر سیز بیلیرَینز کی نه زامان ایچیندهیَینز. چونکی او ساعات ائتیشمیش کی اوخودان اویانانز. چونکی ایندی او موقعادان کی ایمان گتیردیک، نجات بئلمیزه یاخینتر دیر. 12گئجه تؤکَنیر، گؤندوز یاخین دیر. پس گلینز قَرنگیلیگینگ پیس عَمللَرینی آتاک اویانا و ایشّیق زِرهسینی گئیَک. 13گلینز گؤندوز ایشّیقینده اولانلار لهیین دؤز رووآل ائدَک. وختیمیزی عَیّاشلیگده و مَستلیگده، عِفّتسیزلیگده و هَرزهلیگده، جَر و مُرافادا و بَخیللیگده باش ائدمهیَک. 14بلکی رَب عیسا مَسیحی بیر رَخت لهیین گئیینز. جسم ایچی تدارک گؤرمَینز کی هَوی و هَوسلَرینی یئرینه ائتیردَینز.
Currently Selected:
روملیلَر 13: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
