مَتّی 27
27
عیسا، روملی والی پیلاتُس یانینا یوللانیر
1سَحر اولاندا، واری باش کاهِن‌لَر کی مَعبد عالِم‌لَری ایدیلَر و خَلخینگ شیخ‌لَری، عیسا ضدّینه شوهْر ائدیلَر تا اؤنو اؤلومه وئرَلَّر. 2عیسایی باغلادیلار، آپاردیلار و روملی والی، پیلاتُسا تَحویل وئردیلَر.
یَهودا اؤزونو آسیر
3اوندا کی عیسایی اَله وئرَن یَهودا، گؤردو کی عیسا محکوم اولموش، پئشمان اولدو و او اوتوز نُقره سِکّه‌یی باش کاهِن‌لَره و شیخ‌لَره گئری گتیردی 4و دئدی: «من گُناه ائدمیشَم، چونکی بیر گُناه‌سیز آدامی اَله وئرمیشَم.» اوللار دئدیلَر: «بیزه نه؟ اؤزونگ بیلَرَینگ!» 5یَهودا، نُقره سِکّه‌لَری مَعبدده یئره آتدی و اؤردان چیخدی و گئتدی اؤزونو آسدی. 6آما باش کاهِن‌لَر نُقره سِکّه‌لَرینی یئردَن گؤتوردولَر و دئدیلَر: «جایز ده‌ییل کی اوللاری مَعبدینگ خزئنه‌سینه قؤیاک، چونکی بو، قان بَهاسی دیر.» 7پس شوهْر ائدیلَر و او نُقره سِکّه‌لَر اینَن، کوزه‌گر یئرینی آلدیلار تا غَریب‌لَر مَزارسانلوقی اولا. 8بو سَبریه ده، بوگؤنانچاز او یئره ”قان یئری“ دئییلیر. 9بئله، اِرمیای پیغمبر طَریقیندَن دئییلَن سؤز یئرینه ائتیشدی کی دئییر:
«اوللار اوتوز نُقره سِکّه‌یی گؤتوردولَر،
او قیمت کی تارئ خَلخی اؤنونگ اوستونه قؤیدولار،
10و اؤنو کوزه‌گر یئری عَوضینه وئردیلَر،
ائله او طور کی رَب مَنه اَمر ائدی.»
عیسا پیلاتُس حُضوروندا
11بو موقعده عیسا، روملی والی، پیلاتُس حُضوروندا توردو. والی اوندان خبر آلدی: «آیا سَن یهودی‌لارینگ پادشاهی‌یانگ؟» عیسا دئدی: «سَن اؤزونگ بئله دئدینگ.» 12آما باش کاهِن‌لَر کی مَعبد عالِم‌لَری ایدیلَر و شیخلَر عیسایا بوهتان ووراندا، عیسا هئچ جواب وئرمه‌دی. 13او زامان پیلاتُس عیسایا دئدی: «ائشیدمئیرَینگ کی سَنینگ ضدّینگه ناغاد شهادت وئریرلَر؟» 14آما عیسا اؤنا هئچ جواب وئرمه‌دی، حتّی بیر بوهتانا. ائله کی والی چوخ تَعجّب ائدی.
15پِسَخ عیدینده، والی‌نینگ رَسمی بو ایدی کی خَلخ سئدیگی زندانی‌یی اوللار ایچی آزاد ائده. 16او زاماندا بیر مَعروف زندانی وار ایدی کی آدی باراباس ایدی. 17پس جماعت ییغیلنده، پیلاتُس اوللاردان خبر آلدی: «سئیرَینز کیمی بئلَینز ایچی آزاد ائدَم؟ باراباسی یا مَسیح دئییلَن عیسایی؟» 18چونکی پیلاتُس بیلیردی کی یهود خَلخی‌نینگ باشی بویوک‌لَری بَخیل‌لیگ اوستوندَن عیسایی تَحویل وئرمیشلَر. 19ائله بئله ده اوندا کی پیلاتُس حکم ائدمَک یئرینده اوتورموشدو، آروادی اؤنا بیر پیغام یوللادی و دئدی: «بو صالح آدامدا ایشینگ اولماسین؛ چونکی بوگؤن بو آدام باره‌سینده بیر دیش گؤردوم کی بو دیش منی چوخ عَذاب وئردی.» 20آما باش کاهِن‌لَر و شیخلَر جماعتی قانع ائدیلَر، کی باراباس آزادلیگینی و عیسا اؤلمَکینی سئیلَّر.
21والی گئنه اوللارادان خبر آلدی: «بو ایکّی آدامینگ هانی بیرینی سئیرَینز تا بئلَینز ایچی آزاد ائدَم؟» اوللار دئدیلَر: «باراباسی.» 22پیلاتُس اوللارا دئدی: «پس مَسیح دئییلَن عیسا اینان نیجه ائدَم؟» اوللارینگ واریسی دئدیلَر: «صَلیبه چَکیلسین.» 23پیلاتُس دئدی: «نه ایچی؟ نه پیس ایش گؤرموش؟!» آما اوللار اوجاتر داد چَکدیلَر و دئدیلَر: «صَلیبه چَکیلسین.»
24پس اوندا کی پیلاتُس گؤردو کی نه فقط سؤزونده فایده یوخ، بلکی خَلخ آراسیندا دا شلوغ دؤشیر، سو گؤتوردو و جماعت گؤزو دَمینده اؤز اَل‌لَرینی یوودو و دئدی: «بو کیشی‌نینگ قانی منیم بوینومدا ده‌ییل. اؤزونز بیلَرَینز!» 25و بوتون خَلخ جواب وئردیلَر: «اؤنونگ قانی بیزیم بویونوموزدا و بیزیم اولادلاریمیز بویونوندا اولسون!» 26اوندا پیلاتُس اوللار ایچی باراباسی آزاد ائدی و عیسایی شلّاق ووراندان سورا، تَسلیم ائدی تا صَلیبه چَکیله.
سربازلار عیسایی ریشخند ائدیرلَر
27اوندا، والی‌نینگ سربازلاری، عیسایی والی کاخی‌نینگ حیاطینا آپاردیلار و اؤرانینگ واری سربازلاری عیسا دئییرینه ییغیلدیلَر. 28اوللار عیسایی لیت ائدیلَر و اؤنا بیر قیرمیزی عابا گئیدیردیلَر. 29تیکانلاردان بیر تاج هؤردولَر و عیسا باشینا قؤیدولار، ساغ اَلینه ده بیر قَمیش وئردیلَر؛ و اؤنونگ جلوسیندا دیز وورورلاردی، اؤنو ریشخند ائدیرلَردی و دئییرلَردی: «سلام، ای یهودی‌لارینگ پادشاهی!» 30عیسایا تیفیردیلَر، اَلینده‌کی قَمیشی آلدیلار و باشی ایچینه ووردولار. 31اؤنو ریشخند ائدَندَن سورا، عابا‌یی دالیندان چیخارتدیلار و اؤز رَختینی بئلَسینه گئیدیردیلَر؛ و اؤنو آپاردیلار تا صَلیبه چَکلَّر.
عیسا صَلیبه چَکیلیر
32ائله بئله کی یازّیا چیخیرلَردی، بیر قیرَوانلی کیشی‌یی کی آدی شَمعون ایدی توتدولار و اؤنو مجبور ائدیلَر تا عیسانینگ صَلیبینی دالینا آلا. 33جُلجُتا، یعنی کَلّه یئری دئییلَن یئره ائتیشَنده، 34عیسایا بیر شراب کی زَرداؤ اینَن قَریشیق ایدی، وئردیلَر؛ آما عیسا اؤنو داداندا، سئمه‌دی کی ایچه. 35عیسایی صَلیبه چَکندَن سورا، اؤنونگ رَختلَرینی بَهر ائدمَک ایچی اؤز آرالاریندا پؤشک آتدیلار. 36اوندان سورا دا اوتوردولار اؤرا و اؤنونگ کیشیکینی چَکدیلَر. 37اوللار عیسانینگ تَقصیرنامه‌سینی یازدیلار و باشی ایجینه ووردولار کی: «بو عیسا دیر، یهودی‌لارینگ پادشاهی.» 38و ایکّی گدیگ باغلایانی ده عیسا اینان صَلیبه توخودولار؛ بیرینی عیسانینگ ساغ طَرَفینده و او بیرینی دا چَپ طَرَفینده. 39اؤردان گچَن آداملار، عیسایا ناسزا دئییرلَر ایدی، باش تَرپه‌دیرلَردی، 40دئییرلَردی: «سن کی سئیردینگ مَعبدی یومورانگ و اؤنو اؤچ گؤنه گئنه دؤزه‌تَینگ، اؤزونگو نجات وئر! اگر تارئ اوغلویانگ، صَلیبدَن آشاغی گَل.» 41ائله بئله ده باش کاهِن‌لَر، تورات معلّم‌لَری و شیخلَر اینَن اؤنو ریشخند ائدیرلَردی و دئییرلَردی: 42«باقّی آداملاری نجات وئردی؛ اؤزونو نجات وئره بیلمئیر! او تارئ خَلخی‌نینگ پادشاهی دیر، قؤینز تا ایندی صَلیبدَن آشاغی گله تا بیز اؤنا ایمان گتیرَک. 43بئیه توکّلی تارئ‌دا ده‌ییل؟ اگر تارئ اؤنو سئیر قؤی تا بئلَسینی قورتارا. چونکی او دئدی: ”من تارئ اوغلویام.“» 44ائله بئله ده او گدیگ باغلایانلار ده کی اؤنونگ اینَن صَلیبه چَکیلمیشلَردی، اؤنا سؤیوش وئریرلَر ایدی.
عیسانینگ اؤلمَکی
45ظُهر چاغی ساعت اون ایکّی‌دن، ساعت اؤچ‌نچاز، بوتون او سرزمین قَرَنگی‌لیگه باتدی. 46ظُهر‌دان سورا ساعت اؤچه یاخین، عیسا اوجا سَس اینَن داد چَکدی و دئدی: «ایلی، ایلی، لَمّا سَبَقْتَنی؟» یعنی «تارئ‌م، تارئ‌م، نه ایچی منی ویل ائدمیشَینگ؟» 47تاماشایا توران آداملارینگ بیر پاراسی بونو ائشیدَنده، دئدیلَر: «بو کیشی اِلیاس پیغمبری چاغیریر.» 48اوللارینگ بیری فوری قاچدی و بیر تیکه اَبر گؤتوردو، اَبری تُرش شاراب ایچینه باتیردی و بیر قَمیش باشینا ووردو و عیسا آغیزینا توتدو تا ایچه. 49آما باقّی آداملار دئدیلَر: «صَبر ائدینز، قؤینز تا گؤرَک اِلیاس پیغمبر گَلَر تا بئلَسینی نجات وئره؟» 50عیسا گئنه اوجا سَس اینَن داد چَکدی و روحونو تَسلیم ائدی. 51و ائله او آن، مَعبدینگ پرده‌سی اوخاریدان آشاغیا ایکّر اولدو. یئر تیتره‌دی و داشلار چاتلادیلار. 52مَزارلار دا آچیلدیلار و چوخ گوردا یاتان مُقدّس آداملار دئرّیلدیلَر، 53مَزارلاردان یازّیا چیخدیلَر و عیسا دئرّیلمَکیندَن سورا، مُقدّس شَهر ایچینه کی ائله اورشلیم دیر، گئتدیلَر و چوخ آداملارا ظاهر اولدولار. 54اوندا کی او روملی اَفسر و او آداملار کی اؤنونگ اینَن عیسا کیشیکینی چَکیرلَر ایدی، زلزله و دوشان تَفاقلاری گؤردولَر، بئللرینی قورخو گؤتوردو و دئدیلَر: «گرچَکدن کی بو کیشی تارئ اوغلو ایدی.»
55اؤردا چوخ آروادلار دا وار ایدیلار کی ایراقدان باخیرلار ایدی. اوللار جَلیل ولایتیندَن عیسانینگ قولونجوندان گلمیشلَردی و اؤنا خدمت ائدیرلَردی. 56مَجدللی مریم، یَعقوب و یوسفونگ آناسی مریم و زِبِدی اوغوللاری‌نینگ آناسی، اوللار آراسیندا ایدیلَر.
عیسایی تاپشیرماک
57آغشام چاغی، بیر یوسف آدلی، وارلی کیشی کی رامَه‌لی ایدی، گلدی. بو کیشی دا عیسا شاگردلَری‌نینگ بیرسی ایدی. 58او، روملی والی، پیلاتُس یانینا گئتدی و عیسانینگ جنازه‌سینی سئدی. پیلاتُس اَمر ائدی تا جنازه اؤنا وئریله. 59یوسف جنازه‌یی گؤتوردو و اؤنو بیر تَمیز کتان پارچایا کَفنلَدی 60و بیر تازّا مَقبره ایچینه کی اؤزو ایچی، تووآ ایچینده قازمیش ایدی، قؤیدو. یوسف، مَقبره‌نینگ آغیزی دَمینه بیر بویوک داش ایتیله‌دی و گئتدی. 61مَجدللی مریم و او بیر مریم اؤردا، مَقبره‌نینگ قَرشیسینده اوتورموشلاردی.
62یهودی‌لارینگ مُقدّس شنبه گؤنو ایچی آماده اولماگدان بیر گؤن سورا، باش کاهِن‌لَر و فَریسی فِرقه‌سی‌نینگ عالِم‌لَری، پیلاتُس حُضوروندا ییغیلدیلَر 63و دئدیلَر: «قُربان! بیز یادیمیزدا کی او حُقّه باز دئرّی‌لیگینده دئدی کی، من اؤچ گؤندَن سورا، دئرّیله‌رَم. 64بو خاطره ده، اَمر ائد کی اؤچونجو گؤنَنچاز مَقبره‌یی گؤزله‌یَلَّر، تا ائدمئیه کی اؤنونگ شاگردلَری گئدَلَّر و اؤنو اوغورلایالار و خَلخه دئیَلَّر کی، ”او اؤلومدَن دئرّیلمیش“، و بئله آخیرکی حُقّه، اَوّلکیندَن دا بدتَر اولور.» 65پیلاتُس اوللارا دئدی: «بو دور، بیر بئیله سرباز سیزینگ اختیارینزدا. گئدینز و اؤرانچاز کی اَلینزدَن گلیر مَقبره‌یی گؤزله‌یینز.» 66پس اوللار گئتدیلَر و مَقبره‌نینگ داشینی مُهر و موم ائدیلَر و مَقبره یانینا ناتّور قؤیدولار و بئله، مَقبره‌یی گؤزله‌دیلَر.
Currently Selected:
مَتّی 27: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
