مَتّی 26
26
عیسا اؤلدورمَکی‌نینگ توطئه‌سی
1عیسا واری بو سؤزلَری تؤکدنده، اؤز شاگردلَرینه دئدی: 2«سیز بیلیرَینز کی ایکّی گؤندَن سورا پِسَخ عیدی دیر. انسان اوغلو تَسلیم اولونار تا صَلیبه چَکیله.» 3او زامان باش کاهِن‌لَر کی مَعبد عالِم‌لَری ایدیلَر و خَلخینگ شیخ‌لَری، ائنگ بویوک کاهِن، قیافا کاخیندا ییغیلدیلَر 4و شوهْر ائدیلَر کی نه‌یین عیسایی بی سَس توتالّار و اؤلدورَلَّر. 5آما دئدیلَر: «بو ایشی عید گؤنلَرینده گؤرمه‌یه‌سیک، تا ائدمئیه کی خَلخ آراسیندا شلوغ دؤشه.»
عیسا تَدهینی بِیت‌عَنیا کَندینده
6اوندا کی عیسا بِیت‌عَنیا کَندینده، جُذاملی شَمعونینگ ائوینده ایدی، 7بیر آرواد اؤنونگ یانینا گلدی. آرواد بیر مَرمَر دَرفده بیر گران عَطرلی یاغ گتیرمیشدی. ائله اوندا کی عیسا سُفره قیراقیندا اوتورموشدو، آرواد عَطری عیسا باشینا تؤکدی. 8شاگردلَر بونو گؤرَنده، غُصّالاندیلار و بیر بیره دئدیلَر: «بو اِسراف نه ایچی دیر؟ 9اولوردو کی بو یاغ بیر خوب قیمته ساتیلا و پیلی یوخسول‌لارا وئریله.» 10آما عیسا بونو آنگلادی و اوللارا دئدی: «نه ایچی بو آروادی اینجیدیرینز؟ او بیر قَشنگ ایش منیم ایچی گؤرموش. 11چونکی یوخسول‌لاری همیشه اؤزونز اینَن وارینز، آما منی همیشه ایچی یوخینز اولور. 12بو آرواد بو یاغی منیم بَدنیم اوستونه تؤکمَک اینَن، منی تاپشیریلماک ایچی آماده ائدمیش. 13گرچَکینی سیزه دئییرم، تارئ پادشاه‌لیگی‌نینگ خوش خَبری، دنیانینگ هر یئرینده اعلام اولسا، بو آرواد گؤردوگو ایش ده دئییلَر و یادا سالینار.»
یَهودا عیسایی اَله وئریر
14او زامان یَهودا اَسخَریوط کی او اون ایکّی شاگردینگ بیرسی ایدی، باش کاهِن‌لَر یانینا گئتدی، 15و دئدی: «اگر عیسایی سیزینگ اَلینزه وئرَم، منه نه وئره‌رَینز؟» اوللار اؤنا اوتوز نُقره سِکّه‌سی وئردیلَر. 16او زاماندان سورا، یَهودا بیر فُرصت قولونجوندایدی کی عیسایی اَله وئره.
پِسَخ شامی شاگردلَر اینَن
17خَمیر مایاسیز چؤره‌ک عیدی، ائتیشدی. بو عیدینگ بیرینجی گؤنونده، شاگردلَر عیسا یانینا گلدیلَر و دئدیلَر: «گؤینونگ سئیر هارایی سَنینگ ایچی آماده ائدَک تا پِسَخ شامینی یئیَنگ؟» 18عیسا دئدی: «شَهره، فلان کَس یانینا گئدینز و اؤنا دئیینز: ”اُستاد دئییر، منیم وختیم یاخین دیر. شاگردلَریم اینَن، پِسَخ شامینی سَنینگ ائوینگده یئرینه ائتیرده‌رَم.“» 19شاگردلَر ائله او طور کی عیسا اوللارا اَمر ائدمیشدی، ائدیلَر و پِسَخ شامینی آماده ائدیلَر.
20آغشام چاغی، عیسا اون ایکّی شاگردی اینَن سُفره قیراقینا اوتوردو. 21شام یئیَنده، عیسا دئدی: «گرچَکینی سیزه دئییرم، سیزینگ بیرینز منی اَله وئره‌ر.» 22اوللار چوخ پریشان اولدولار و بیر بیر، عیسا‌دان خبر آلدیلار: «من کی ده‌ییلم، آقا؟» 23عیسا جواب وئردی: «او آدام کی اَلینی منیم اینَن دَرف ایچینه سالمیش، منی اَله وئره‌ر. 24انسان اوغلو او زادا ساری گئدیر کی مُقدّس یازیلی‌لاردا باره‌سینده ایلَری ایلَری دئییلمیش، آما وای او آدام حالینا کی انسان اوغلونو اَله وئریر. اؤنونگ ایچی یئی‌تَر دیر کی هئچ دوغولمایایدی.» 25یَهودا، ائله او آدام کی سئیردی عیسایی اَله وئره، دئدی: «من کی ده‌ییلم، اُستاد؟» عیسا اؤنا دئدی: «سَن اؤزونگ بئله دئدینگ.»
26اوللار خورَکی یئیَنده، عیسا چؤره‌کی گؤتوردو و شُکر ائدمَکدَن سورا اؤنو تیکه‌له‌دی، شاگردلَره وئردی و دئدی: «توتینز، یئیینز، بو منیم بَدنیم دیر.» 27و پایلا‌یی گؤتوردو و شُکر ائدَندَن سورا، اوللارا وئردی و دئدی: «وارینز بوندان ایچینز. 28چونکی بو منیم قانیم دیر، کی اؤنونگ اینن بو تازّا عَهدی تَصدیق ائدیرم. منیم قانیم تؤکولیر تا چوخ آداملارینگ گُناه‌لاری باغیشلانا. 29سیزه دئییرم: من اوزوم سویوندان داها ایچمَم، او گؤنَنچاز کی گؤیده‌کی بووآمینگ پادشاه‌لیگیندا، اوزوم سویونونگ تازّاسینی سیزینگ اینَن ایچم.» 30اوللار حمد و ثنا ییری ییرله‌یندَن سورا، زیتون داغینا ساری گئتدیلَر.
عیسا پِطرُس حاشا ائدمَکینی پیشگولیگ ائدیر
31او زامان عیسا اوللارا دئدی: «بو گئجه سیزینگ وارینز منی تَک قؤیاراینز، چونکی مُقدّس یازیلی‌لاردا یازیلمیش:
”چوبانی وورارام،
و سؤرونونگ قویون‌لاری، داغیلارلار.“
32آما من، دئرّیلَندَن سورا، سیزدَن ایلَری جَلیل ولایتینه گئده‌رَم.» 33پِطرُس جواب وئردی: «اگر واری‌کَس سنی تَک قؤیسا دا، من هئچ‌وخت سنی تَک قؤیمام.» 34عیسا اؤنا دئدی: «گرچَکینی سنه دئییرم، ائله بوگئجه، خوروس بونگ وئرَندن ایلَری، سَن منی اؤچ دفعه حاشا ائده‌رَینگ.» 35پِطرُس عیسایا دئدی: «حتّی اگر لازم اولسا کی سَنینگ اینَن اؤلَم ده، سَنی حاشا ائدمَم!» شاگردلَرینگ واریسی ده ائله بونو دئدیلَر.
عیسا جِتْسیمانی باغیندا دُعا ائدیر
36او زامان عیسا، شاگردلَری اینَن بیر یئره کی جِتْسیمانی دئییلیردی گئتدی و اوللارا دئدی: «تا من گئدیرَم اؤرا و دُعا ائدیرَم، سیز ائله بورا اوتورینز.» 37عیسا، پِطرُس و زِبِدی‌نینگ ایکّی اوغلونو یعنی یَعقوب و یوحَنّایی دا اؤزو اینَن آپاردی. عیسا غَملی و پریشان اولدو. 38اوندا اوللارا دئدی: «جانیم اؤلوم حَدّینَنچاز غَملی دیر. بوردا قالینز و منیم اینَن اویاق تورینز.» 39عیسا بیر آز ایلَرتره گئتدی، ایزی اوستونه یئره دؤشدو و دُعا ائدی و دئدی: «ای بووآم، اگر ممکن دیر، قؤی بو عَذاب پایلا‌سی مندَن گچه، آما گئنه ده، مَنیم سئدیگیم اولماسین، سَنینگ سئدیگینگ اولسون.» 40اوندان سورا شاگردلَری یانینا گئری گلدی و اوللاری یاتیلی گؤردو. پِطرُسا دئدی: «سیز بیر ساعت منیم اینَن اویاق قالا بیلمئیردینز؟ 41اویاق قالینز و دُعا ائدینز تا امتحانا چَکیلمه‌ینز. گرچَکدَن کی روح مُشتاق دیر، آما جسمده قوّت یوخ.» 42عیسا ایکّینجی دفعه ایچی گئتدی و بئله دُعا ائدی: «بووآم، اگر تا بو عَذاب پایلاسینی ایچمه‌یم، بو پایلا مندن گچمَز؛ پس سَنینگ سئدیگینگ اولسون.» 43و گئنه گئری گلدی و اوللاری یاتیلی گؤردو، بو سَبریه کی اوللارینگ گؤزلَرینی اوخو باسمیشدی. 44پس گئنه اوللاری ویل ائدی و گئتدی و اؤچونجو دفعه ایچی، ائله او دُعایی ائدی. 45او زامان شاگردلَر یانینا گئری گلدی و اوللارا دئدی: «سیز حَلی اوخودایاینز و استراحت ائدیرَینز؟ باخینز، قرار وئریلَن ساعات یاخین دیر و انسان اوغلو، گُناهکارلار اَلینه تَسلیم اولونیر. 46تورینز آیاقی گئدَک! باخینز، منی اَله وئرَن، گلیر!»
عیسانینگ توتولماگی
47ائله اوندا کی عیسا حَلی دانیشیردی، یَهودا کی اون ایکّی شاگردینگ بیرسی ایدی، بیر بویوک جمعیت اینَن کی یانلاریندا قیلیج و چُماق وار ایدی و باش کاهِن‌لَر کی مَعبدینگ عالِم‌لَری ایدیلَر و خَلخینگ شیخ‌لَری طَرفیندَن ایدیلَر، گلدی. 48عیسایی اَله وئرَن یَهودا، اوللارا بیر نیشانا وئرمیشدی و دئمیشدی کی: «هَر کَسی کی ماچ ائدیم، ائله او آدام دور، اؤنو توتینز.» 49یَهودا مُستقیم عیسا یانینا گلدی و دئدی: «سلام اُستاد!» و اؤنو ماچ ائدی. 50عیسا یَهودایا دئدی: «یولداش، او ایشی کی گؤرمَکی ایچی گلمیشَینگ، ائد.» او زامان او آداملار ایلَری گلدیلَر، تؤکولدولَر عیسا باشینا و اؤنو توتدولار. 51ائله بو موقع، عیسا اینان اولان آداملارینگ بیری، اَل ائدی قیلیجینه و قیلیجینی، ائنگ بویوک کاهِنینگ نوکرینه ساری چَکدی. قیلیج او نوکرینگ قولاقینا ده‌ییدی و قولاقی کَسیلدی. 52اوندا عیسا اؤنا دئدی: «قیلیجینگی قؤی یئرینه. چونکی واری قیلیج چَکنلَر، قیلیج اینَن ده هلاک اولارلار. 53گمان ائدیرَینگ کی گؤیده‌کی بووآمدان سئیه بیلمَم تا ائله ایندی اون ایکّی قوشوندان آرتیق فرشته یوللایا؟ 54آما اوندا نه‌یین مُقدّس یازیلی‌لار یئرینه ائتیشه‌سی کی دئییر بو ایشلَر اولوناسی؟» 55او زامان عیسا او جماعته دئدی: «بئیه مَن گدیگ باغلایانام کی قیلیج و چُماق اینان گلمیشَینز تا مَنی توتاینز؟ من هر گؤن مَعبدده اوتوریردیم و تَعلیم وئریردیم و منی توتمادینز. 56آما بوللارینگ واریسی اولونموش تا پیغمبرلَرینگ مُقدّس یازیلی‌لاری یئرینه ائتیشه.» او زامان شاگردلَرینگ واریسی عیسایی ویل ائدیلَر و قاچدیلار.
عیسا، قیافا و یهود شوراسی‌نینگ حُضوروندا
57اوندا او آداملار کی عیسایی توتموشلار ایدی، اؤنو، ائنگ بویوک کاهِن قیافا یانینا آپاردیلار. اؤرایا کی تورات معلّم‌لَری و شیخ‌لَر ییغیلمیشلَردی. 58پِطرُس ایراقدان، اوللارینگ آردی سورا گلیردی. ائنگ بویوک کاهِنینگ کاخینا ائتیشنده، کاخینگ حیاطی ایچینه گئتدی و ناتّورلار یانینا اوتوردو تا گؤره بو ایشینگ آخیری نیجه اولیر.
59ایندی باش کاهِن‌لَر و بوتون شورا، عیسا ضدّینه، یالان شهادت قولونجونا گزیرلَردی تا عیسایی اؤلومه وئرَلَّر. 60هَرچند چوخ یالان شاهدلَر ایلَری گلدیلَر آما گئنه ده اوللارینگ شهادت‌لَری، بیر ماهان ده‌ییلدی کی اولا اونونگ اوستونه، عیسایی اؤلومه محکوم ائدلَّر. آخیردان ایکّی آدام گلدیلَر و دئدیلَر: 61«بو کیشی دئدی: ”من باشاریرام تارئ‌نینگ مَعبدینی یومورام و اؤچ گؤنه اؤنو گئنه دؤزَتَم.“» 62ائنگ بویوک کاهِن توردو آیاقی و عیسایا دئدی: «هئچ جواب یوخونگ کی وئرَینگ؟ بو نه‌دیر کی بو آداملار سَنینگ ضدّینه شهادت وئریرلَر؟» 63آما عیسا هئچ‌نه دئمه‌دی. ائنگ بویوک کاهِن عیسایا دئدی: «سنی دئرّی تارئ‌یا آند وئریرَم، اگر سَن وَعده وئریلَن مَسیح، تارئ اوغلویانگ، بیزه دئ.» 64عیسا اؤنا دئدی: «سَن اؤزونگ بئله دئدینگ. آما سیزه دئییرم، بوندان سورا انسان اوغلونو گؤرَرَینز کی قُدرتلی تارئ‌نینگ ساغ اَلینده اوتورموش و گؤیونگ بولوت‌لاری اوستونده گلیر.» 65اوندا ائنگ بویوک کاهِن اؤز قاباسی‌نینگ یَقه‌سینی ایرتدی و دئدی: «کُفر دئدی! داها آیری شاهدلَره نه احتیاج واریمیز؟ ائله ایندی اؤنونگ کُفرینی ائشیتدینز. 66حکمینز نه‌دیر؟» اوللار جواب وئردیلَر: «اؤنونگ سزاسی، اؤلوم دور!» 67او زامان عیسانینگ ایزینه تیفردیلَر و اؤنو ووردولار. بیر پارا آدام دا اؤنا شاپالاق ووردولار، 68اوللار دئییرلَردی: «ای مَسیح، بیزیم ایچی نَبوّت ائد! سنی ووران کیم دیر؟»
پِطرُس عیسایی حاشا ائدیر
69ائله بو موقعده پِطرُس، یازّیدا، حیاطدا اوتورموشدو. بیر جاهال کنیز اؤنونگ یانینا گلدی و دئدی: «سن ده جَلیللی عیسا اینان ایدینگ!» 70آما او، واری‌کَس جلوسیندا، بونو حاشا ائدی و دئدی: «بیلمئیرَم نه دئییرَینگ!» 71دروازه‌یه ساری گئدَنده، بیر آیری جاهال کنیز اؤنو گؤردو و تاماشایا تورانلارا دئدی: «بو کیشی ناصِره‌لی عیسا اینان ایدی.» 72پِطرُس گئنه حاشا ائدی، آند ایچدی کی: «من او کیشی‌یی تانیمئیرام!» 73بیر آز وَختدَن سورا، تاماشایا توران آداملار پِطرُس یانینا گلدیلَر و اؤنا دئدیلَر: «یقین کی سن ده اوللاردانانگ! دانیشیق‌ینگدَن آله‌یین دیر!» 74اوندا پِطرُس اؤزونه لَعنت وئردی و آند ایچدی کی: «من او کیشی‌یی تانیمئیرام!» کی بیردَن خوروس بونگ وئردی. 75پِطرُس عیسانینگ سؤزونو یادا گتیردی کی بئلَسینه دئمیشدی: «خوروس بونگ وئرَندن ایلَری، سَن منی اؤچ دفعه حاشا ائده‌رَینگ.» پِطرُس اؤردان یازّیا چیخدی و چوخ دَردلی آغلادی.
Currently Selected:
مَتّی 26: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
