مَتّی 13
13
بَرزگر مَثَلی
1ائله او گؤن، عیسا او ائودَن کی اؤردا قالیردی چیخدی و دریاچه قیراقیندا اوتوردو. 2بیر بویوک جمعیت اؤنونگ دئییرینه ییغیلدیلَر، ائله کی بیر قایقا میندی و اوتوردو و جمعیت ده ساحِلده توردولار. 3عیسا مَثَل اینَن چوخ زادلار اوللارا اؤرگدیردی. او گؤن بو مَثَلی اوللارا چَکدی: «بیر بَرزگر دان سَپمَک ایچی یازّیا چیخدی. 4دان‌لاری سَپَنده، بیر پاراسی یول اوستونه تؤکولدو و قوش‌لار گلدیلَر و اوللاری یئدیلَر. 5بیر پارا داهاسی کوتورلو یئره کی تورپاقی آز ایدی، تؤکولدو، و تئز گئیَردیلَر بو سَبریه کی تورپاقدا عُمق یوخ ایدی. 6آما گؤن چالاندا پوسّورادیلار و ریشه‌سیز اولدوگلاری ایچی، قورّودولار. 7دانلارینگ بیر پارا داهاسی تیکان‌لار ایچینه تؤکولدو، و تیکان‌لار گئیَردیلَر و اوللاری خَفه‌له‌دیلَر. 8آما دانلارینگ باقّیسی خوب تورپاقا دؤشدولار و ثَمر ائدیلَر؛ بیر پاراسی یوز برابر، بیر پاراسی آلتمیش برابر، بیر پارا دا اوتوز برابر. 9هَر کَسینگ کی ائشیدَن قولاق واری، ائشیدسین.»
مَثَلینگ مَقصودی
10اوندان سورا شاگردلَر عیسا یانینا گلدیلَر و اؤنا دئدیلَر: «نه ایچی خَلخ اینان مَثَل‌لَر اینَن دانیشیرانگ؟» 11عیسا جواب وئردی: «گؤی پادشاه‌لیگی‌نینگ سِرّلَرینی آنگلاماگ، سیزه وئریلمیش، آما اوللارا وئریلمه‌میش. 12چونکی او آداما کی واری، آرتیق وئریلَر، تا فراوان واری اولا، آما او آدام کی یوخو، ائله او ده کی واری، اَلیندن آلینار. 13بو سَبریه دیر کی من اوللار اینان مَثَل‌لَر اینَن دانیشیرام. اوللار، باخیرلار آما گؤرمئیرلَر؛ کلام قولاق‌لارینا ده‌ییر، آما نه ائشیدیرلَر، نه ده آنگلاییرلار. 14گرچَکدَن کی اِشعَیای پیغمبرینگ نَبوّت ائتدیگی سؤز اوللار باره‌سینده یئرینه ائتیشیر کی دئییر:
”گرچَکدَن کلام قولاقینزا ده‌یَر، آما هئچ زامان اؤنو آنگلاماینز،
و گرچَکدَن باخاراینز، آما هئچ زامان اؤنو گؤرمَینز؛
15چونکی بو خَلخینگ اؤره‌کی داش اولموش،
قولاق‌لاری آغیر اولموش،
و گؤزلَرینی باغلامیشلار،
تا ائدمئیه کی گؤزلَری اینن گؤرَلَّر،
قولاق‌لاری اینان ائشیدَلَّر
و اؤره‌ک‌لَری اینن آنگلایالّار و گئری دؤنَلَّر
و من اوللاری شفا وئرَم.“
16«آما خوش سیزینگ گؤزلَرینز حالینا چونکی گؤرورلَر و خوش قولاق‌لارینز حالینا چونکی ائشیدیرلَر. 17گرچَکینی سیزه دئییرم، چوخ پیغمبرلَر و صالح آداملار سیز گؤردوگو زادلارینگ گؤرمَکی آرزیسینی چَکیرلَر ایدی، آما گؤرمه‌دیلَر و سیز ائشیتدیگی زادلارینگ ائشیدمَکی آرزیسینی چَکیرلَر ایدی، آما ائشیدمه‌دیلَر.
بَرزگر مَثَلی‌نینگ معنیسی
18«ایندی بَرزگر مَثَلی‌نینگ معنیسینی ائشیدینز: 19اوندا کی آداملار گؤی پادشاه‌لیگی‌نینگ کلامینی ائشیدیرلَر و اؤنو آنگلامئیرلار، او شَریر گلیر و اوللارینگ اؤره‌کینده اَکیلَنی قاپیر. بوللار او دانلار دیرلَر کی یول ایچینه تؤکولورلَر. 20کوتورلو یئره تؤکولن دانلار، او آداملار دیرلَر کی او کلامی ائشیدیرلَر و فوری شادلیگ اینَن اؤنو قبول ائدیرلَر، 21آما چون ریشه یوخلاری فقط بیر مُدّت قالیرلار و او کلام سَبرسینه مُصیبت یا دا جور و جَفا گلدیگی اینن، ایماندان دؤشیرلَر. 22تیکان‌لار آراسینا تؤکولن دانلار، او آداملار دیرلَر کی کلامی ائشیدیرلَر آما دنیا نگرانلیگ‌لاری و دنیا مالینا آلّانماک، کلامی خَفه‌له‌ییر و ثَمرسیز ائدیر. 23آما خوب تورپاقا تؤکولن دانلار، او آداملار دیرلَر کی کلامی ائشیدیرلَر و اؤنو آنگلاییرلار. بیر پاراسی یوز برابر، بیر پاراسی آلتمیش برابر، بیر پارا دا اوتوز برابر ثَمر ائدیرلَر.»
غَریب اوت مَثَلی
24عیسا اوللارا بیر آیری مَثَل چَکدی و دئدی: «گؤی پادشاه‌لیگی کی ائله تارئ پادشاه‌لیگی دیر، بیر کیشی له‌یین دیر کی اؤز اَکینینده خوب دان اَکدی. 25آما اوندا کی اؤنونگ نوکرلَری اوخودا ایدیلار، اؤنونگ دشمنی گلدی و بوغدالار آراسینا غَریب اوت اَکدی و گئتدی. 26اوندا کی بوغدالار گئیَردی و خوشا ائدی، غَریب اوتلار دا آله‌یینه چیخدیلَر. 27اَربابینگ نوکرلَری گلدیلَر و اَربابا دئدیلَر: ”اَرباب، بئیه اَکینینگده خوب دان اَکمه‌دینگ؟ پس بو غَریب اوتلار هاردان گلمیش؟“ 28اَرباب اوللارا دئدی: ”بو دشمن ایشی دیر.“ نوکرلَر اؤنا دئدیلَر: ”سئیرَینگ تا گئدَک و اوللاری قازاک؟“ 29اَرباب دئدی: ”یو، غَریب اوتلاری قازاندا، ممکن دیر کی بوغدالاری ده اوللار اینان ریشه‌دَن قوپاردانز. 30قؤیونز تا بیچمَک زامانی‌نانچاز، ایکّی‌سی بئلینه گئیَرلَّر و بیچمَک زامانیندا بیچَنلَره دئیه‌رَم کی، ’اَوّل غَریب اوتلاری قازینز و دسته-دسته ائدینز تا یاندیراک، آما بوغدالاری منیم آمباریمدا ییغینز.‘“»
خَردَل داناسی‌نینگ مَثَلی
31عیسا اوللارا بیر آیری مَثَل چَکدی و دئدی: «گؤی پادشاه‌لیگی بیر خَردَل داناسی له‌یین دیر کی بیر کیشی اؤنو اؤز اَکینینده اَکدی. 32خَردَل داناسی دانلارینگ ائنگ کوچوکی دیر، آما اوندا کی گئیَریر، باغدا اَکیلن‌لَرینگ واریسیندان بویوکتر اولیر و بیر آغاج اولیر، ائله کی گؤیونگ قوش‌لاری گلیرلَر و شاخالاری‌نینگ آراسیندا یووآ ائدیرلَر.»
خَمیر مایاسی‌نینگ مَثَلی
33عیسا بیر آیری مَثَل اوللارا چَکدی و دئدی: «گؤی پادشاه‌لیگی خَمیر مایاسی له‌یین دیر کی بیر آرواد اؤنو اؤچ کِسّه اون‌ینگ خَمیری اینن یوقوردو تا خَمیرینگ واریسی قوپا.»
نه ایچی عیسا مَثَل‌لَر اینن دانیشیردی
34عیسا واری بو زادلاری مَثَل اینن خَلخه دئییردی و مَثَل‌سیز اوللارا هئچ‌نه دئمه‌دی. 35بو اولوندو تا پیغمبر طَریقیندن دئییلَن سؤز یئرینه ائتیشه کی:
«من آغیزیمی مَثَل‌لَر اینن آچارام،
هَرنه‌یی کی، دنیا بَناسی قؤیولاندان بَری، پنهان قالمیش، دیلَه گتیرَرَم.»
غَریب اوت مَثَلی‌نینگ معنیسی
36او زامان عیسا جماعتدَن آیریلدی و ائوه دؤندو. شاگردلَری اؤنونگ یانینا گلدیلَر و دئدیلَر: «غَریب اوتلار مَثَلی‌نینگ معنیسینی بیزه دئ.» 37عیسا جواب وئردی: «او کی خوب دان اَکیر، انسان اوغلو دیر. 38اَکین یئری، دنیا دیر و خوب دانلار، گؤی پادشاه‌لیگی‌نینگ اولادلاری دیرلَر. غَریب اوتلار او شَریرینگ اولادلاری دیرلَر. 39و او دشمن کی غَریب اوت اَکیر، اِبلیس دیر. بیچمَک زامانی، دنیانینگ آخیری دیر و اَکینی بیچَنلَر دا فرشته‌لَر دیرلار. 40ائله اوله‌یین کی، غَریب اوتلار ییغیلیرلَر و اوتدا یاندیریلیرلار، بو دنیانینگ آخیریندا دا ائله بئله اولور. 41انسان اوغلو اؤز فرشته‌لَرینی یوللایار و اوللار هَر کَسی کی گُناها باعث اولیر و واری او آداملاری کی تارئ قانون‌لارینی آیاق آلتینا قؤیورلار، اؤنونگ پادشاه‌لیگیندان ییغَرلَر 42و اوللاری او اوت تَنوری ایچینه آتارلار. اؤرایا کی آغلاماگ و دیش قیرچمَک اولور. 43او زامان صالح‌لَر، اؤز گؤیده‌کی بووآلاری پادشاه‌لیگیندا، گؤن له‌یین ایشّیلیَرلَر. هَر کَسینگ کی ائشیدَن قولاق واری، ائشیدسین.
پنهان اولونمیش گنج مَثَلی
44«گؤی پادشاه‌لیگی بیر گنج له‌یین دیر کی بیر اَکین یئری ایچینده پنهان اولونمیش و بیر کیشی اؤنو بولدو. بولاندان سورا گئنه اؤنو پناه ائدی و خوشحال‌لیگدان گئتدی و هَرنه‌یی کی واریدی ساتدی و او اَکین یئرینی آلدی.
مُروارید مَثَلی
45«ائله بئله ده، گؤی پادشاه‌لیگی بیر تاجر له‌یین دیر کی اَصیل مُرواریدلار قولونجوندا دیر. 46اوندا کی بیر چوخ اَرزشلی مُروارید بولدو، گئتدی، بوتون مالینی ساتدی و اؤنو آلدی.
بالیق توتماک توری‌نینگ مَثَلی
47«گؤی پادشاه‌لیگی بیر بالیق توتماک تورینا ده بنزه‌ییر کی دریایا آتیلدی و واری رَقم بالیق ییغدی. 48تور دولاندا، کیشی‌لَر اؤنو ساحِله چَکدیلَر، اوتوردولار و خوب بالیق‌لاری زَنبیله ییغدیلَر آما پیس‌لَری یازّیا آتدیلار. 49دنیا آخیریندا دا ائله بئله اولور. فرشته‌لَر گلَرلَر و شَریرلَری صالح‌لَردن آییرارلار. 50و شَریرلَری او اوت تَنوری ایچینه آتارلار. اؤرایا کی آغلاماگ و دیش قیرچمَک اولور.
51«واری بو زادلاری آنگلادینز؟» اوللار جواب وئردیلَر: «بَله» 52عیسا اوللارا دئدی: «پس هر تورات معلّمی کی گؤی پادشاه‌لیگی‌نینگ درسینی آلمیش، بیر اوبا اَیه‌سی له‌یین دیر کی خزئنه‌سیندن تازّا و کُهنه زادلار چاخارتیر.»
ناصِره شَهری، عیسایی یوئودمئیر
53عیسا بو مَثَل‌لَری دئیَندن سورا، اؤردان گئتدی. 54و اؤز شَهرینه گلدی و اؤرانینگ عبادتگاهیندا اوللارا تَعلیم وئردی، ائله کی خَلخ مات قالمیشلاردی و دئییرلَردی: «بو کیشی بیر بئله حِکمَتی هاردان اَله گتیرمیش؟ بو قُدرتلی ایشلَری نه‌یین گؤرور؟ 55بئیه او نجّار اوغلو ده‌ییل؟ بئیه آناسی‌نینگ آدی مریم ده‌ییل؟ بئیه اؤنونگ کاکالاری یَعقوب و یوسف و شَمعون و یَهودا ده‌ییللَر؟ 56بئیه اؤنونگ واری باجی‌لاری بوردا، بیزیم اینَن ده‌ییللَر؟ پس بو کیشی بوتون بو زادلاری هاردان اَله گتیرمیش؟» 57پس اوندان ایز بؤکدولَر. آما عیسا اوللارا دئدی: «بیر پیغمبر هئچ یئرده حُرمَت‌سیز اولماز، به‌غیری اؤز شَهرینده و اؤز اوباسی ایچینده.» 58عیسا اوللارینگ ایمان‌سیزلیگ‌لاری سَبرسینه اؤردا چوخ مُعجزه ائدمه‌دی.
Currently Selected:
مَتّی 13: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
