یوحنا 7
7
عیسا چادرلار عیدینده
1بوندان سورا عیسا بیر مُدّت جَلیل ولایتینده گَزیردی. او سئمئیردی کی یهودیه ولایتینده اولا، بو سَبریه کی یهودیلار سئیرلَردی اؤنو اؤلدورَلّر. 2سایبانلار عیدی کی یهودیلارینگ بیر عیدی ایدی، یاخین ایدی. 3پس عیسانینگ کاکالاری بئلَسینه دئدیلَر: «بوردان چیخ و یهودیه ولایتینه گئد تا واری شاگردلَرینگ ده، ائدیگینگ ایشلَری گؤرَلَّر. 4چونکی هَر کَس کی سئیه واریکَس اؤنو تانیا، پناه دا هئچ ایش گؤرمَز. سن کی بو ایشلَری گؤرورَینگ، اؤزونگو دنیایا گؤرسَد.» 5عیسانینگ کاکالاری بونو دئدیلَر، بو سَبریه کی حتّی اوللار دا اؤنا ایمان گتیرمهمیشلَردی. 6عیسا اوللارا دئدی: «منیم وختیم حَلی ائتیشمهمیش، آما سیز هر موقع کی سئیَینز گئده بیلَرَینز. 7دنیا هئچ علّت یوخو کی سیزدن نفرت واری اولا، آما مندن نفرت واری، بو سَبریه کی من شهادت وئریرَم کی اؤنونگ ایشلَری پیس دیر. 8سیز عید ایچی اورشلیم شَهرینه گئدینز، من بو عید ایچی گئدمئیرَم، چونکی منیم وختیم حلی ائتیشمهمیش.» 9عیسا بو سؤزلَری اوللارا دئدی و جَلیل ولایتینده قالدی.
10آما عیسانینگ کاکالاری، عید ایچی اورشلیمه گئدَندَن سورا، اؤنونگ اؤزو ده گئتدی، آما نه آلهیینده، بلکی بیسَس. 11عیدده، یهودیلار عیسا قولونجونا گَزیرلَردی و دئییرلَردی: «بو کیشی هاردا دیر؟» 12و خَلخ آراسیندا اؤنونگ بارهسینده چوخ گپلَر وار ایدی. بیر پارا دئییرلَردی: «او بیر خوب آدام دیر.» آما بیر پارا داها دئییرلَردی: «یو! خَلخی یولدان چیخارتیر.» 13آما یهودیلارینگ باشی بویوکلَری قورخوسوندان، هئچکَس آلهیینده عیسا بارهسینده دانیشمئیردی.
14بیر هفته عیدینگ یاریسی گچمیشدی کی عیسا مَعبده گئتدی و تَعلیم وئرمَکه باشلادی. 15یهودیلار مات قالمیشلاردی و دئییرلَردی: «بو کیشی کی هئچوخت دین درسی اوخومامیش، نهیین بیر بئلهیین عِلم واری؟» 16عیسا اوللارا جواب وئردی و دئدی: «من وئرَن تَعلیملَر، اؤزومدَن دهییل، بلکی منی یوللایان تارئدان دیر. 17اگر بیر کَس سئیه تارئ سئدیگینه عَمل ائده، بیلَر کی بو تَعلیملَر تارئدان دیر، یا من اؤز یانیمدان دئییرم. 18او کی اؤز یانیندان دانیشیر، اؤز عِزّتی قولونجوندا دیر؛ آما او کی اؤز یوللایانینینگ عِزّتی قولونجوندا دیر، دؤز آدام دیر و اوندا هئچ یالان یوخ.
19«بئیه شَریعتی، موسای پیغمبر سیزه وئرمهمیش؟ پس نه ایچی سیزینگ هئچ بیرینز اونا عَمل ائدمئیرَینز؟ نه ایچی منیم اؤلدورمَکیم قولونجوندایاینز؟» 20جمعیت جواب وئردیلَر: «سَنده شیطانلی روح وار! کیم سئیر سنی اؤلدوره؟» 21عیسا اوللارا جواب وئردی: «من مُقدّس شنبه گؤنونده بیر مَریض آدامی شفا وئردیم و سیزینگ وارینز بو ایشدن مات قالمیشاینز. 22موسای پیغمبر سُنّت ائدمَک حکمینی سیزه وئردی، هَر چند کی بو، موسادان دهییلدی بلکی خَلخینگ جَدلَریندن ایدی. سیز ده بو حکمه گؤره، اوغوللارینزی حتّی شنبه گؤنونده ده سُنّت ائدیرَینز. 23اگر بیر اوغول حتّی مُقدّس شنبه گؤنونده سُنّت اولا بیلیر تا موسا شَریعتی قیریلمیه، پس ایندی نه ایچی بو خاطره کی من، شنبه گؤنونده بیر آدامینگ بوتون بَدنینه شفا وئرمیشَم، منه غُصّالانیرانز؟ 24ظاهر اوستوندن حکم ائدمَینز، بلکی حَق حکم ائدینز.»
آیا عیسا ائله او وَعده وئریلَن مَسیح دیر؟
25اورشلیم شَهرینینگ بیر پارا خَلخی بیر بیردن خبر آلیرلاردی کی: «بئیه بو آدام، ائله او دهییل کی باشی بویوکلَر، اؤنونگ اؤلدورمکی قولونجوندا دیرلار؟ 26او بوردا دیر، آلهیینده ده دانیشیر، و اوللار اؤنا هئچنه دئمهییرلَر! گؤرهینگ اولور کی باشی بویوکلَر، گرچَکدَن بیلمیش اولالّار کی بو، ائله او وَعده وئریلَن مَسیح دیر؟ 27آما بیز بیلیرَک کی بو کیشی هاردان گلیر. وَعده وئریلَن مَسیح ظهور ائدَنده، هئچ کَس بیلمَز کی او هاردان گلیر.» 28پس عیسا مَعبدده تَعلیم وئرَنده، اوجا سَس اینن بئله دئدی: «سیز منی تانیراینز و بیلیرَینز کی هاردان گلیرَم. آما من اؤز باشیما گلمهمیشَم. تارئ کی منی یوللامیش حَق دیر و سیز اؤنو تانیمئیراینز. 29آما من اؤنو تانیرام چونکی من، اؤنونگ طَرفیندن گلیرَم و او، منی یوللامیش.» 30پس اوللار بونونگ قولونجوندایدیلار کی عیسایی توتالّار، آما هئچکَس اؤنا اَل دا اوزاتمادی چونکی اؤنونگ وختی حَلی ائتیشمهمیش ایدی. 31با بو حال خَلخینگ چوخو اؤنا ایمان گتیردیلَر. اوللار دئییرلَردی: «بئیه اوندا کی وَعده وئریلَن مَسیح ظهور ائده، بو کیشیدن آرتیق مُعجزه ائدهر؟»
32فَریسی فِرقهسینینگ عالِملَری ائشیتدیلَر کی جمعیت عیسا بارهسینده بو گپلَری چالیرلار. پس فَریسیلَر و باش کاهِنلَر کی مَعبد عالِملَری ایدیلَر، مَعبدینگ مأمورلارینی یوللادیلار تا عیسایی توتالّار. 33ائله او موقعده عیسا خلخه دئدی: «بیر آز مُدّت داها سیزینگ اینَنَم و اوندان سورا گئدیرَم اؤنونگ یانینا کی منی یوللامیش. 34منیم قولونجوما گَزَرَینز آما منی بولماینز. من گئتدیگی یئره، سیز گله بیلمَینز.» 35یهودیلار بیر بیره دئدیلَر: «بو کیشی سئیر هارا گئده کی بیز اؤنو بولماک؟ گؤرَینگ سئیر او یهودیلار یانینا گئده کی آیری مملکتلرده داغیلمیشلار و غیرییهودیلارا تَعلیم وئره؟ 36مَقصودی نه ایدی کی دئدی: ”منیم قولونجوما گَزَرَینز آما منی بولماینز“ و ”من گئتدیگی یئره، سیز گله بیلمَینز“؟»
37عیدینگ آخیرکی گؤنو، کی عیدینگ ائنگ مهم گؤنو ایدی، عیسا آیاقدا توردو و اوجا سَس اینَن دئدی: «اگر بیر کَس سویوز دیر، منیم یانیما گلسین و ایچسین. 38هَر کَس منه ایمان گتیره، ائله اولهیین کی مُقدّس یازیلیلاردا دئییلمیش، ”اؤرهکیندَن، زندلیگ وئرَن سویونگ آخارلاری روآن اولور.“» 39عیسا بو سؤزو تارئ روحو بارهسینده دئدی کی، عیسایا ایمان گتیرَنلَره وئریلَر؛ بو سَبریه کی تارئ روحو حلی وئریلمهمیشدی، چونکی عیسا حلی شوکته ائتیشمهمیشدی.
40اوندا کی خَلخ بو سؤزلَری ائشیتدیلَر، بیر پاراسی دئدیلَر: «گرچَکدَن کی بو کیشی ائله او پیغمبر دیر کی موسای پیغمبر، اؤنونگ گلمَکی وَعدهسینی وئرمیش.» 41باقّی آداملار دئدیلَر: «بو کیشی ائله او وَعده وئریلَن مَسیح دیر.» آما بیر پارا آداملار دئدیلَر: «بئیه وَعده وئریلَن مَسیح جَلیل ولایتیندن گلیر؟ 42بئیه مُقدّس یازیلیلاردا دئییلمهمیش کی وَعده وئریلَن مَسیح داوود پادشاه سؤیوندان دیر و بِیتلَحِمدن گلیر، ائله او کَنددَن کی داوود پادشاه اؤرانینگ آدامی ایدی؟» 43پس عیسا سَبرسینه خَلخ آراسیندا اختلاف دؤشدو. 44اوللارینگ بیر پاراسی سئدیلَر عیسایی توتالّار، آما هئچ کَس اؤنا اَل دا اوزاتمادی.
45پس مَعبدینگ مأمورلاری، باش کاهِنلَر و فَریسیلَر یانینا دؤندولَر. اوللار مأمورلاردان خبر آلدیلار: «نه ایچی عیسایی گتیرمهدینز؟» 46مأمورلار جواب وئردیلَر: «ایندییانچاز هئچ کَسینگ سؤزو بو کیشی سؤزو لهیین دهییلمیش!» 47فَریسیلَر اوللارا دئدیلَر: «بئیه سیز ده آلّانمیشاینز؟ 48بئیه خَلخینگ باشی بویوکلریندن، یا دا فَریسیلَردن بیری وار کی اؤنا ایمان گتیرمیش اولا؟ اَلبَت کی یو! 49آما بو جمعیت کی اؤنا قولاق آسمیشلار، شَریعتدن بیر زاد بیلمهییرلَر. اوللار لَعنت اولونموش دیرلار.» 50نیقودیموس کی ایلَرتر عیسا یانینا گئدمیش ایدی و باشی بویوکلَردن ایدی، اوللارا دئدی: 51«آیا بیزیم شَریعتیمیز بیزه اجازه وئریر بیر آدامی محکوم ائدَک بوندان ایلَری کی اَوّل او آدامینگ گپلَرینه قولاق آساک و بیلَک کی نیجه ائدمیش؟» 52اوللار جواب وئردیلر: «بئیه سَنده جَلیللییانگ؟ گئد مُقدّس یازیلیلاری اوخو و گؤر، کی جَلیل ولایتیندن هئچ پیغمبر گلمهمیش.»
53اوندان سورا اوللار اؤز ائولَرینه گئتدیلَر،
Currently Selected:
یوحنا 7: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
