یوحنا 16
16
1«واری بو سؤزلَری سیزه دئمیشم تا ایماندان دؤشمَیَینز. 2سیزی عبادتگاهلاردان یازّیا آتارلار و حتّی بیر زامان گلَر کی آداملار گمان ائدهرلَر کی سیزی اؤلدورمک اینن تارئیا خدمت ائدیرلَر. 3اوللار بو ایشلَری گؤرَرلَر، چونکی نه گؤیدهکی بووآیی تانیمیشلار، نه ده منی. 4آما من بوللاری سیزه دئمیشم تا اوندا کی بو ایشلَرینگ اولونماگی وختی ائتیشدی، یادا گتیرَینز کی سیزی هوشکار ائدمیش ایدیم.
تارئنینگ قُدّوس روحونونگ ایشی
«بو سؤزلَری اَوّلدَن سیزه دئمهدیم، بو سَبریه کی اؤزوم حلی یانینزدا ایدیم. 5آما ایندی اؤنونگ یانینا گئدیرَم کی منی یوللادی. بونونگ یئرینه کی مندن خبر آلاینز، ”هارا گئدیرَینگ؟“ 6اؤرهکینزی غَم باسمیش، بو سَبریه کی بئلَینزه دئدیم من گئدیرَم. 7با بو حال، حَقیقتی سیزه دئییرم، کی گئدمَکیم سیزینگ نفعینزه دیر. بو خاطره کی اگر گئدمهیَم، او کؤمَکچی کی تارئنینگ قُدّوس روحو دیر گلمَز یانینزا؛ آما اگر گئدَم اؤنو سیزینگ یانینزا یوللایارام. 8او کؤمَکچی گلَنده، بو دنیانینگ آداملارینی مُجاب ائدهر کی تَقصیرکار دیرلار، بو سَبریه کی گُناه ائدمیشلَر. تَقصیرکار دیرلار بو سَبریه کی اوللارینگ صالحلیگی یالان دیر و تَقصیرکار دیرلار بو خاطره کی حکملاری دؤز دهییل. 9او بئللرینی مُجاب ائدهر کی گُناهکار دیرلار بو سَبریه کی منه ایمان گتیرمئیرلَر. 10اوللاری مُجاب ائدهر کی صالحلیگلَری یالان دیر بو سَبریه کی من گئدیرَم گؤیدهکی بووآ یانینا و بو دنیانینگ آداملاری داها منیم صالحلیگیمی گؤره بیلمَزلَر. 11و بئللرینی مُجاب ائدهر کی منه ائدیگی حکملری دؤز دهییل بو سَبریه کی بو دنیانینگ رئیسی کی شیطان دیر، محکوم اولموش.
12«حلی چوخ گپلَر واریم کی سیزه دئیهم، آما سیز ایندی بو زادلاری آنگلایا بیلمئیرَینز. 13اوندا کی تارئ روحو کی حَقیقت روحو دور گله، سیزه کؤمَک ائدهر تا حَقیقتینگ واریسینی آنگلایانز؛ او اؤز یانیندان دانیشماز، بلکی هَرنهیی کی ائشیدیر سیزه دئیهر و سیزی، ایندیدَن بئله گلَن زادلاردان خبر ائدهر. 14حَقیقت روحو، منیم سؤزلَریمی سیزه اعلام ائدهر و بئله منیم شوکتیمی آشکار ائدهر. 15منیم سؤزلَریم، گؤیدهکی بووآ سؤزلَری دیر. بو خاطره دیر کی دئدیم، حَقیقت روحو منیم سؤزلَریمی سیزه اعلام ائدهر.
شاگردلَرینگ غَمی، شادلیگه دؤنَر
16«بیر آز مُدّتدن سورا، داها منی گؤرمَینز، آما بیر آز مُدّتدن سورا گئنه منی گؤرَرَینز.» 17اوندا عیسا شاگردلَرینینگ بیر پاراسی بیر بیره دئدیلَر: «اؤنونگ مَنظورو نهدیر کی دئییر، ”بیر آز مُدّتدن سورا، منی گؤرمَینز، آما بیر آز مُدّتدن سورا گئنه منی گؤرَرَینز“؟ مَنظورو نه دیر کی دئییر، ”بو سَبریه کی گئدیرَم گؤیدهکی بووآ یانینا“؟» 18اوللار ائله بئله بیر بیردن خبر آلیرلاردی: «بو ”بیر آز مُدّت“ کی دئییر، یعنی نه؟ آنگلامئیراک نَمنهدَن دانیشیر.» 19عیسا بیلیردی کی اوللار سئیرلَر بئلَسیندَن خبر آلالّار کی مَنظورو بو سؤزلَردن نه ایدی؛ پس اوللارا دئدی: «بئیه بیر بیردن خبر آلدیگینز گپ بو دهییل کی منیم مَنظوروم نه ایدی کی دئدیم، ”بیر آز مُدّتدن سورا، منی گؤرمَینز آما بیر آز مُدّتدن سورا گئنه منی گؤرَرَینز“؟ 20گرچَکینی سیزه دئییرم، آغلایاراینز و یاس توتاراینز، آما دنیا شادلیگ ائدهر. بَله، سیز عذاب چَکرَینز، آما عذابینز شادلیگا دؤنَر. 21بیر آرواد دوغماگ وختینده عَذاب چَکیر، بو سَبریه کی دوغماگی وختی ائتیشمیش؛ آما اوشاقینی دوغاندان سورا، بو شادلیگدان کی بیر آدام دنیا ایچینه گلمیش داها او آغیریق یادینا دؤشمئیر. 22ائله بئله ده، سیز ایندی عذاب چَکیرَینز؛ آما من گئنه سیزی گؤرَرَم و اؤرهکینز شاد اولور و هئچکَس سیزینگ شادلیگینزی بئلَینزدن آلماز. 23او موقعده، داها مندن هئچنه سئمَینز. گرچَکینی سیزه دئییرم کی او موقعده هَرنه کی منیم آدیمدا گؤیدهکی بووآدان سئینز، بووآ اؤنو سیزه وئرهر. 24ایندییانچاز گؤیدهکی بووآدان منیم آدیمدا بیر زاد سئمهمیشَینز؛ سئیَینز کی بئلَینزه وئریلَر تا شادلیگینز کامل اولا.
25«بو سؤزلَری مَثَللَر اینن سیزه دئمیشَم؛ بیر زامان گلیر کی داها مَثَللَر اینن سیزینگ اینن دانیشمام، بلکی گؤیدهکی بووآ بارهسینده آچیق سیزینگ اینن دانیشارام. 26او زاماندا، گؤیدهکی بووآدان منیم آدیمدا سئیَرَینز. دئمئیرَم کی من سیزینگ طَرَفینزدَن گؤیدهکی بووآدان سئیَرم. 27بو سَبریه کی سیز منی چوخ سئمیشَینز و اینانمیشاینز کی من تارئ طَرفیندَن گلمیشَم، گؤیدهکی بووآنینگ اؤزو سیزی چوخ سئیر. 28من گؤیدهکی بووآ یانیندان گلدیم و گلمیشَم بو دنیا ایچینه؛ ایندی ده بو دنیایی تَرک ائدیرم و گئدیرَم گؤیدهکی بووآ یانینا.»
29اوندا شاگردلَر دئدیلر: «ها، ایندی آچیق دانیشیرانگ، نه مَثَل اینن! 30ایندی داها بیلیرَک کی سن واری زاددان خبر وارینگ و هئچ لازم دهییل کی بیری بئلینگدَن بیر زاد خبر آلماک اینان، سنی امتحان ائده. بو سَبریه دیر کی اینانیراک کی سن تارئ یانیندان گلمیشَینگ.» 31عیسا اوللارا دئدی: «ایندی گرچَکدن ایمان وارینز؟ 32باخینز، او موقع ائتیشیر کی داغیلارانز. گرچَکدن کی ائله ایندیسی ده ائتیشمیش. سیزینگ هر بیرینز اؤز ائوینه گئدهر و منی تَک قؤیارانز. آما من تَک دهییلم، بو خاطره کی گؤیدهکی بووآ منیم اینن دیر. 33بوللاری سیزه دئمیشم تا منده صُلح و سلامتلیگ وارینز اولا. بو دنیادا مُصیبت چَکرَینز. آما اؤرهکینز قایم اولسون، بو سَبریه کی من بو دنیایا گؤج اولموشام.»
Currently Selected:
یوحنا 16: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
