اعمال 8
8
سولُس کلیسایا جَفا ائدیر
1سولُس، اِستیفان اؤلدورمکینه راضی ایدی.
او گؤنده اورشلیمده، بیر سَخت جور و جَفا کلیسا ضدّینه باشلاندی. ائله اولدو کی حَواریلاردان آیری، واری ایماندارلار یهودیه و سامِره منطقهلَرینده داغیلدیلار. 2تارئ یولونو گئدَن کیشیلَر، اِستیفانی تورپاقا تاپشیردیلار و اؤنونگ ایچی بیر بویوک عزا توتدولار. 3آما سولُس کلیسایا چوخ جور و جَفا ائدیردی و ائودن ائوه گئدیردی و کیشیلَری و آروادلاری چَکیردی یازّیا و اوللاری آتیردی زندانا.
فیلیپُس سامِرهده عیسادان دانیشیر
4او ایماندارلار کی جور و جَفا سَبرسینه داغیلمیشلاردی، هر یئره کی گئدیرلَردی تارئ کلامینی تَعلیم وئریرلَردی. 5فیلیپُس سامِرهنینگ بیر شَهرینه گئتدی و مَسیحی اؤرانینگ خلخینه اعلام ائدی. 6اوندا کی جماعت فیلیپُس سؤزلرینی ائشیتدیلَر و او گؤرسَدَن نیشانالاری گؤردولَر، واری یانلی اؤنونگ دئدیگیلَرینه دقّت اینن قولاق آسدیلار؛ 7بو سَبریه کی شَریر روحلار کَلّهدَن بَغیره-بَغیره چوخ آداملاردان کی او شَریر روحلارا گرفتار ایدیلَر یازّیا چیخدیلَر و چوخ فَلج و آخساق آدام دا شفا توتدو. 8پس او شَهرده بیر بویوک شادلیگ اولدو.
جادوگر شَمعون ایمان گتیریر
9آما او شَهرده بیر شَمعون آدلی کیشی وار ایدی کی ایلَرتر اؤردا جادوگرلیگ ائدیردی و سامِره خَلخینی حیران ائدمیشدی. او اِدّعا ائدیردی کی بیر بویوک آدام دیر. 10بوتون خلخ، کوچوکدان بویوکه، اؤنونگ سؤزلَرینه قولاق آسیرلاردی و دئییرلردی کی: «تارئنینگ او بویوک قُدرتی کی دئییلیر، بو کیشی دیر.» 11خلخ شَمعونا قولاق آسیرلاردی، بو سَبریه کی چوخ وخت ایدی کی خلخی اؤز جادوگرلیگیاینن حیران ائدمیشدی. 12آما اوندا کی خلخ، فیلیپُسینگ خوش خَبرینه کی تارئ پادشاهلیگی و عیسا مَسیحینگ بارهسینده ایدی ایمان گتیردیلَر، هم کیشیلَر، همده آروادلار تَعمید غُسلی توتدولار. 13حتّی شَمعونونگ اؤزو ده ایمان گتیردی و تَعمید توتاندان سورا فیلیپُسینگ یانی سورا گئدیردی. شَمعون، نیشانالاری و بویوک مُعجزهلَری کی ائدیلیردی، گؤرَنده حیران اولموشدو.
14او موقع کی حَواریلار اورشلیمده ائشیتدیلَر کی سامِرهلیلَر تارئ کلامینی قبول ائدمیشلَر، پِطرُس و یوحَنّایی یوللادیلار اوللار یانینا. 15او ایکّی سامِرهیه گلدیلر و سامِره خلخی ایچی دُعا ائدیلَر تا تارئنینگ قُدّوس روحونو آلالّار، 16بو سَبریه کی قُدّوس روح حلی اوللارینگ هئچ بیرینه نازل اولماموشدو، بلکی اوللار فقط رَب عیسانینگ آدیندا تَعمید توتمیشلاردی. 17اوندا پِطرُس و یوحَنّا اؤز اَللَرینی اوللار اوستونه قؤیدولار و اوللار تارئنینگ قُدّوس روحونو آلدیلار.
18او زامان کی شَمعون گؤردو وختی حَواریلَر اؤز اَللَرینی آداملار اوستونه قؤیورلار، تارئ روحو او آداملارا وئریلیر، بیر مَبلغ پیل گتیردی حَواریلار یانینا 19و بئللَرینه دئدی: «منه ده بو قُدرتی وئرینز تا هر کَس اوستونه کی اَللَریمی قؤیرام، تارئنینگ قُدّوس روحونو آلا.»
20آما پِطرُس اؤنا دئدی: «نُقرهینگ، اؤزونگ اینن نابود اولسون! چونکی گمان ائدینگ تارئ عَطاسینی پیل اینن اَله گتیره بیلَرَینگ! 21سن بو خدمتینگ نه بیر قسمتیینگ، نه ده بو خدمتده سَهم وارینگ، بو سَبریه کی اؤرهکینگ تارئ حُضوروندا دؤز دهییل. 22پس بو شَریرلیگینگدَن توبه ائد و رَب حُضوروندا دُعا ائد تا بلکم اؤرهکینگ نیّتی باغیشلانا؛ 23بو سَبریه کی گؤرورَم کی وجودینگ آچّی زَهر دیر و شَریرلیگه اَسیرَینگ.» 24شَمعون دئدی: «سیز منیم ایچی رَب حُضوروندا دُعا ائدینز تا دئدیگیلَرینزدَن هئچبیری باشیما گلمهیه.»
25اوندا کی پِطرُس و یوحَنّا گواهلیگ وئردیلَر و رَبّ کلامینی اعلام ائدیلَر، اورشلیمه بؤکولدولَر. اوللار یولدا سامِرهنینگ چوخ کَندلَرینده نجاتینگ خوش خَبرینی اعلام ائدیرلَردی.
فیلیپُس و حَبشهلی خواجه
26رَبّینگ بیر فرشتهسی فیلیپُسا دئدی: «تور آیاقی و گئد جنوبا ساری، او یولا کی اورشلیمدَن غَزهیه گئدیر.» اؤرا بیر بیابان دیر. 27فیلیپُس دا توردو آیاقی و یولا دؤشدو. یولدا حَبشهلی خواجهیه ائتیشدی. او، حَبشه مَلَکهسی، ’کَنداکِه‘ بارگاهسینینگ بیر بویوک آداملاریندان ایدی و مَلَکهنینگ واری خزئنهسی اؤنونگ اَلینده ایدی. او خواجه تارئیی پَرست ائدمَک ایچی گلمیشدی اورشلیمه. 28اوندا کی خواجه اؤز دیارینا بؤکولیردی اَرّآبهسی ایچینه اوتورموشدو و اِشعیای پیغمبر یازدیگی کتابی اوخیردی. 29تارئ روحو فیلیپُسا دئدی: «گئد یاخینه و او اَرّآبهیه قوشول.» 30پس فیلیپُس اَرّآبهیه ساری قَچدی و ائشیتدی کی خواجه اِشعَیا یازدیگی کتابی اوخیر. فیلیپُس اوندان خبر آلدی: «بو اوخودوگینگی آنگلاییرانگ؟»
31خواجه دئدی: «اگر بیری منی راهنمالیگ ائدمهیه، نهیین آنگلایا بیلَرَم؟» او، فیلیپُسدان خواهش ائدی تا اَرّآبهیه مینه و اوتورا اؤنونگ یانینا. 32مُقدّس یازیلینینگ او قسمتی کی خواجه اوخیردی، بو ایدی:
«بیر قویون لهیین کی بئلَسینی آپاریرلار تا باشینی کَسلَّر،
و بیر قوزّو لهیین کی اینگینی قیرخَن یانیندا بیسَس دیر،
ائله اولهیین دا او آغیزینی آچمئیر.
33حَقیر اولدوگو موقع، عِدالت بئلَسیندَن دریغ اولدو؛
کیم اؤنونگ سؤیوندان دانیشا بیلَر؟
بو سَبریه کی اؤنونگ زندلیگی یئر اوستوندَن کَسیلدی.»
34خواجه فیلیپُسا دئدی: «منه دئ گؤرَم اشعیای پیغمبر، کیمینگ بارهسینده بونو دئییر، اؤز بارهسینده یا آیری کَسینگ بارهسینده؟» 35اوندا فیلیپُس، دانیشماکا باشلادی و مُقدّس یازیلینینگ ائله بو قسمتیندَن دئدی و عیسا بارهسیندهکی خوش خَبری خواجهیه وئردی. 36ائله بئله کی یولدا گئدیرلَردی بیر سویا ائتیشدیلَر. خواجه دئدی: «باخ، بوردا سو وار! نَمنه منی تَعمید توتماکدان مَنع ائده بیلَر؟» 37فیلیپُس دئدی: «اگر بوتون اؤرهکاینَن ایمان گتیرمیشَینگ، هئچنه سنی تَعمید توتماکدان مَنع ائده بیلَمز.» خواجه دا دئدی: «ایمان واریم کی عیسا مَسیح تارئ اوغلو دیر.»
38خواجه اَمر ائدی تا اَرّآبهیی ساخلایالّار. اوندا ایکّیسی دا گئدیلَر سو ایچینه و فیلیپُس، خواجهیی تَعمید وئردی. 39اوندا کی اوللار سودان چیخدیلَر، رَبّینگ روحو فیلیپُسی گؤتوردو آپاردی و خواجه داها فیلیپُسی گؤرمهدی. خواجه دا شادلیگ اینان اؤز یولونو گئتدی. 40آما فیلیپُس اؤزونو اَشدود دا بولدو. او ائله بئله کی شَهرینگ ایچیندَن گئدیردی نجاتینگ خوش خَبرینی واری شَهرلَرده اعلام ائدیردی تا قیصریه شَهرینه ائتیشدی.
Currently Selected:
اعمال 8: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
