اعمال 7
7
اِستیفان گپلَری یهود شوراسینینگ حُضوروندا
1ائنگ بویوک کاهِن اِستیفاندان خَبر آلدی: «بو گپلَر گرچَک دیر؟» 2اِستیفان دئدی: «کاکالار، بووآلار، مَنیم گپلَریمی ائشیتینز! اوندا کی بیزیم جَدّیمیز ابراهیم پیغمبر بینالنَهرین منطقهسینده زندلیگ ائدیردی شوکتلی تارئ بئلَسینه ظاهر اولدو، بوندان ایلَری کی ابراهیم حَران شَهرینه کؤچه. 3تارئ ابراهیما دئدی: ”اؤز تورپاقینگدان و اؤز قوحومو خویشلَرینگ آراسیندان یازّیا چیخ و او یئره کی سَنه گؤرسَدهرَم گئد.“ 4پس ابراهیم کَلدانلیلَر تورپاقیندان چیخدی و حَراندا مَنزل ائدی. بووآسینینگ اؤلمَکیندَن سورا، تارئ ابراهیمی اؤردان بو سرزمینه کی ایندی سیز زندلیگ ائدیرَینز یوللادی. 5با بو حال، تارئ بوردا ابراهیما هئچ میراث وئرمهدی، حتّی بیر قَریش یئر؛ آما وَعده وئردی کی ابراهیمی و ابراهیمدان سورا گلَن نَسلینی ائده بو مِلکینگ اَیهسی. هَرچند کی اوندا حلی ابراهیمدا اولاد یوخ ایدی. 6تارئ ابراهیما دئدی کی اؤنونگ نَسلی اؤزگهلَر تورپاقیندا، غُربتده زندلیگ ائدهرلَر و اوللار دؤرد یوز ایل ابراهیم نَسلینی اؤزلَرینه غُلام ائدهرلَر و بئللَرینه ظُلم ائدهرلَر. 7و تارئ بونو دا دئدی: ”آما من او ملّتی کی سَنینگ نَسلینگ بئللَرینه خدمت ائدیرلَر مجازات ائدهرَم و اوندان سورا، سنینگ نَسلینگ اؤردان چیخرلَر و منی بو یئرده پَرست ائدهرلَر.“ 8تارئ ابراهیما سُنّت ائدمک عَهدینی وئردی. پس ابراهیمینگ بیر اوغول گیرینه گلدی کی آدی اِسحاق ایدی و ابراهیم سَکّیزینجی گؤنده اِسحاقی سُنّت ائدی. اِسحاقینگ دا بیر اوغول گیرینه گلدی کی آدی یَعقوب ایدی و یَعقوب دا بیزیم اون ایکّی جَدّیمیز اَیهسی اولدو.
9«و جَدلَریمیز، بَخیللیگدَن یوسفو مِصره ساتدیلار؛ آما تارئ یوسف اینان ایدی 10و اؤنو واری مُصیبتلَریندن قورتاردی. تارئ یوسفه حِکمَت وئردی و مِصر پادشاهی فرعون گؤزونده، بئلَسینی عزیز ائدی، ائله کی فرعون یوسفو مِصرینگ و بوتون اؤز اوباسینینگ حاکمی ائدی. 11اوندا بوتون مِصر سرزمینینده و کَنعان تورپاقیندا قَحطلوق و بیر بویوک مُصیبت دؤشدو و بیزیم جَدلَریمیز خورَکی بولا بیلمئیرلَردی. 12آما یَعقوب اوندا کی ائشیتدی کی مِصرده غَلّه بولونیر جَدلَریمیزی اَوّلکی سَفرلَرینده یوللادی اؤرا. 13ایکّینجی سَفرده، یوسف اؤزونو کاکالارینا تانیتدیردی و فرعون یوسف اوباسی اینان آشنا اولدو. 14یوسف اؤز بووآسی یَعقوب و بوتون اوباسی آدامینا خبر یوللادی و سئدی تا گلَلَّر. اوللارینگ واریسی بئلینه یئدمیش بئش نفر ایدیلر. 15یَعقوب ده کؤچدو مِصره و ائله اؤردا اؤلدو. هم یَعقوب هم دا جَدلَریمیز؛ 16آما اوللارینگ جنازهلَرینی گتیردیلَر گئری شِکیم شَهرینه و قؤیدولار او مَقبریه کی ابراهیم شِکیمده حَمور اوغوللارینا بیر مقدار نُقره وئرمیشدی و او یئری آلمیشدی.
17«آما ائله بئله کی تارئ ابراهیمه وئردیگی وَعدهنینگ وختی یاخین اولیردی، بیزیم خلخیمیزینگ سایقوشی ده مِصرده چوخ چوخالیردی، 18اوندایانچاز کی مِصرده بیر آیری پادشاه گلدی ایش اوستونه کی یوسفو تانیمئیردی. 19او پادشاه بیزیم خلخیمیز اینن حیله اینن رووآل ائدی و بیزیم جَدلَریمیزه چوخ ظُلم ائدی و اوللاری مجبور ائدی تا اؤز تازّا آنادان اولان اوشاقلارینی یازّیدا ویل ائدلَّر تا دئرّی قالمیالّار. 20ائله بو موقع ایدی کی موسا آنادان اولدو. او، تارئ گؤزونده قَشنگ ایدی. موسا اؤچ آی بووآسی ائوینده بویوک اولدو. 21موسایی یازّیدا ویل ائدَندَن سورا فرعونونگ قیزی او اوشاقی اؤز اولادلیگینا قبول ائدی و بئلَسینی اؤز اوغلو لهیین بویوک ائدی. 22بئله موسا، مِصرلیلَرینگ واری حِکمَتلَرینی اؤرگندی. او، دانیشماکیندا و عَمللَرینده بیر قُدرتلی آدام اولدو.
23«اوندا کی موسا قیرخ یاشیندا ایدی، اؤرهکینه دؤشدو کی اؤز کاکالاری، یعنی یَعقوب نَسلینینگ گؤرمَکینه گئده گؤره کی وَضعلَری نهیین دیر. 24اؤردا گؤردو کی بیر مِصرلی اوللارینگ بیرسینه ظُلم ائدیر. موسا او مظلوما پُشت چیخدی و او مِصرلینینگ اؤلدورمَکی اینن او مظلومینگ تَقّاصینی آلدی. 25موسا گمان ائدیردی کی کاکالاری آنگلایالّار کی تارئ سئیر اؤنونگ اَلی اینن بئللَرینی نجات وئره، آما اوللار آنگلامادیلار. 26او گؤنونگ صاباسی، موسا ایکّی نفری گؤردو کی بیر بیر اینن جَر و مُرافا ائدیرلَردی و سئدی کی اوللاری صُلح وئره، بئللَرینه دئدی: ”کیشیلَر، سیز کاکایاینز. نه ایچی بیر بیره ظُلم ائدیرَینز؟“ 27آما او آدام کی اؤز قونشوسینا ظُلم ائدیردی موسایی ایتیلهدی و بئلَسینه دئدی: ”کیم سنی بیزه رئیس و حَکم ائدی؟ 28سئیرَینگ ائله اولهیین کی دؤنَن او مِصرلییی اؤلدوردونگ، منی دا اؤلدورَینگ؟“ 29موسا بو گپی ائشیدَنده قَچدی و مِدیان دیاریندا غُربتده یئر توتدو. اؤردا موسانینگ ایکّی اوغول گیرینه گلدی.
30«قیرخ ایل گچدی. بیر گؤن بیاباندا سینا داغینینگ یاخینینده، بیر فرشته آلیشیق بوتّانینگ اَلووسیندا موسایا ظاهر اولدو. 31اوندا کی موسا بونو گؤردو، بو گؤردوگوندن تَعجّب ائدی و ائله بئله کی یاخین اولدو تا باخا، رَبّینگ سَسی گلدی کی دئدی: 32”من سنینگ جَدلَرینگ تارئسییام. ابراهیم و اِسحاق و یَعقوب تارئسی.“ موسا تیترَمَگه دؤشدو و جرأت ائدمهدی باخا.
33اوندا رَب بئلَسینه دئدی: ”کَلَشلَرینگ قیچینگدن چیخارت، بو سَبریه کی بو توردوگینگ یئر، بیر مُقدّس یئر دیر. 34اَلبَت کی من خلخیمینگ مُصیبتینی کی مِصرده دیرلَر گؤرموشَم و اوللارینگ نالیخلاماکینی ائشیتمیشَم و گلمیشَم آشاغی تا اوللاری قورتارام. ایندی سَن گَل تا بئلَینگی یوللایام مِصره.“
35«بو موسایی کی بیزیم خَلخیمیز اؤنو رَد ائدیلَر و بئلَسینه دئدیلر: ”کیم سنی بیزه رَئیس و حَکم ائدی؟“ تارئ، بو کیشییی او فرشته اَلی طَریقیندَن کی آلیشیق بوتّا دا اؤنا ظاهر اولدو، هم رئیس، هم ده قورتاران ائدی و یوللادی. 36بو کیشی اوللاری مِصردَن گتیردی یازّیا و قیرخ ایل مِصردَه و قیرمیزی دریادا و بیاباندا مُعجزهلَر و نیشانالار ائدی. 37ائله بو موسا ایدی کی یَعقوب نَسلینه دئدی: ”کاکالارینز آراسیندان، تارئ بیر منیم لهیین پیغمبر بئلَینز ایچی یوللایار.“ 38بو ائله او موسا ایدی کی بیاباندا خَلخ آراسیندا ایدی، او فرشته اینن ایدی کی سینا داغیندا اؤنونگ اینن دانیشدی و ائله بئله دا بیزیم جَدلَریمیز اینن ایدی؛ موسا زندلیگ وئرَن کلامی آلدی تا اؤنو وئره بیزه. 39بیزیم جَدلَریمیز سئمهدیلَر کی اوندان اطاعت ائدلَّر، بلکی اؤنو رَد ائدیلَر و اؤرهکلَرینده دؤندولر مِصره. 40اوللار هارونا دئدیلر: ”بیزیم ایچی بُتلار دؤزهت تا بیزیم تارئلاریمیز اولالّار و بیزدَن ایلَری گئدَلَّر. بو سَبریه کی بیلمئیرَک نه گلمیش بو موسا باشینا کی بیزی مِصر سَرزمینیندَن گتیردی یازّیا! 41ائله او گؤنلَرده ایدی کی بیر بُت، کوسالا شکلینه دؤزَتدیلَر و او بُتا قُربانلوق تقدیم ائدیلَر و اؤز اَللَری اینن دؤزهتدیگی بُت ایچی خوشحاللیگ ائدیرلَردی. 42آما تارئ اوللاردان اؤز بؤکدو و بئللَرینی ویل ائدی تا گؤی اولدوزلارینی پَرست ائدلَّر؛ ائله اولهیین کی پیغمبرلَر کتابیندا یازیلمیش کی:
«”ای یَعقوب نَسلی، او قیرخ ایلده کی بیاباندا ایدینز،
او حیوانلاری کی اؤلدوردونز و قُربانلوق ائدینز، مَنه تقدیم ائدینز؟
43سیز مُلوک بُتینینگ چادرینی و اؤز تارئینز رِفان اولدوزینی اؤزونز اینن ایکلهدینز آپاردینز،
او مُجسمهلَر کی دؤزهتدینز تا بئللَرینی پَرست ائدَینز.
من ده سیزی بابِلینگ او تئیینه اَسیرلیگه یوللایارام.“
44«بیزیم جَدلَریمیز گواهلیگ چادرینی بیاباندا وارلاری ایدی، او چادر کی موسا اؤنو تارئ فرمانینا، گؤردوگو نمونه اوستوندن دؤزَتدی. 45اوندا کی جَدلَریمیز یوشَع اینن، کَنعان تورپاقینی او مِلّتلَردن کی تارئ بیزیم جَدلَریمیز گؤزو دَمینده بئللَرینی چیخارتدی یازّیا، گئری آلدیلار، گواهلیگ چادرینی اؤزلَری اینن گتیردیلَر. او چادر داوود پادشاه زامانینانچاز اؤردا ایدی. 46داوود تارئ گؤزونده لُطف بولدو و خواهش ائدی تا یَعقوب تارئسی ایچی بیر مَنزل آماده ائده. 47آما سُلیمان پادشاه ایدی کی تارئ ایچی بیر ائو دؤزهتدی. 48هَرچند کی او مُتعال تارئ او ائولَرده کی بَشر اَلی اینن دؤزلمیش مَنزل ائدمئیر، ائله اولهیین کی اِشعیای پیغمبر دئییر کی:
49«گؤی، منیم پادشاهلیگیم تختی دیر و یئر، آیاقیم آلتینینگ کُرسیسی دیر!
نه رَقم ائو منه دؤزهتَرَینز؟ رَب دئییر.
و هارا دیر او یئر کی من اؤردا استراحت ائدهسیم؟
50بئیه بوللارینگ واریسینی مَنیم اَلیم دؤزَتمهدی؟“
51«ای بوینو یوغون خلخ، ای سیز کی اؤرهکلَرینز و قولاقلارینز سُنّت اولماموش! سیز همیشه تارئنینگ قُدّوس روحو ضدّینه توریراینز. سیز دا ائله جَدلَرینز گؤردوگو ایشی گؤرورَینز. 52پیغمبرلَرینگ هانی بیری سیزینگ جَدلَرینز اَلیندن جور و جَفا چَکمهمیش؟ اوللار حتّی او پیغمبرلَری کی ایلَرتردن او صالحنینگ گلمَکینی اعلام ائدمیشلَردی، اؤلدوردولَر؛ ائله او کی ایندی سیز بئلَسینی اَله وئرمیشَینز و اؤلدورموشاینز. 53ائله سیزلَر کی فرشتهلَر طَریقیندَن وئریلَن شَریعتی، آلدینز و اؤندان اطاعت ائدمهدینز.»
اِستیفانی سَنگسار ائدیرلَر
54شورا آداملاری بو سؤزلری ائشیدَنده، چوخ عصبانی اولدولار و خشمدَن دیشلَرینی سیخیرلَردی بیر بیره. 55آما اِستیفان کی تارئنینگ قُدّوس روحوندان دؤلو ایدی گؤیه گؤز تیکدی و تارئ شوکتینی گؤردو و عیسایی دا گؤردو کی تارئنینگ ساغ اَلینده تورموش. 56اِستیفان دئدی: «باخینز! گؤرورَم کی گؤیلَر آچیلمیشلار و انسان اوغلو تارئنینگ ساغ اَلینده تورموش.»
57آما اوللار اوجادان بَغیردیلَر و اؤز قولاقلارینی توتدولار و واری بئلینه تؤکولدولَر اِستیفان باشینا. 58اوندا اؤنو سئریده سئریده شَهردن آپاردیلار یازّیا و بئلَسینی سَنگسار ائدیلَر. شاهدلَر اؤز قابالارینی بیر سولُس آدلی جاهال کیشینینگ قیچلَری دَمینه قؤیدولار.
59ائله بئله کی اوللار اِستیفانی سَنگسار ائدیرلَردی، اِستیفان فریاد ائدی و دئدی: «یا رَب عیسا، روحومو آل!» 60و دیزلَری اوستونه دؤشدو و اوجا سَس اینن دئدی: «یا رَب، بو گُناهی اوللار آیاقینا یازما.» بونو دئدی و اؤلوم اوخوسینا گئتدی.
Currently Selected:
اعمال 7: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
