اعمال 28
28
مالتادا
1ساغ و سلامت قورّولوقا ائتیشدیگیمیزدَن سورا، بیلدیک کی او جَزیرهنینگ آدی مالت دیر. 2او جَزیرهنینگ خلخی بیزه چوخ مهربانلیگ ائدیلَر. اوللار بیزیم ایچی اوت ائدیلَر چونکی یاغیش یاغیردی و سویوق ایدی و بیزیم واریمیزی خوش ایز اینن قبول ائدیلَر. 3اوندا کی پولُس کی بیر قوجاق اودون ییغمیشدی، اودونو آتدی اوت اوستونه؛ اوتونگ حورّوندان، بیر ایلان اوت ایچیندن چیخدی و یاپیشدی پولُسینگ اَلیندن. 4اوندا کی او جَزیرهنینگ خلخی گؤردولَر کی ایلان آسیلمیش پولُس اَلیندن، بیر بیره دئدیلر: «هئچ شَک یوخ کی بو آدام قاتل دیر. هرچند دریادان نجات توتموش، آما عِدالت قؤیمئیر دئرّی قالا.» 5آما پولُس ایلانی سیلکهلهدی و آتدی اوت ایچینه و پولُسا هئچنه اولمادی. 6خلخ گؤزلهییردی کی پولُسینگ بَدنی شیشه یا دا بیردن دؤشه اؤله. آما اوندا کی چوخ وخت گؤزلهدیلَر و گؤردولَر کی پولُس باشینا هئچ قَضّا گلمئیر، فکرلَرینی دهییشدیلر و دئدیلر کی پولُس بیر تارئ دیر.
7اؤرانینگ یاخینلَرینده بیر پارا یئر وار ایدی کی بیر پوبلیوس آدلی کیشیکی ایدی. پوبلیوس جَزیرهنینگ بویوکی ایدی. او بیزی اؤز ائوینه قوناقلادی و اؤچ گؤن بئلَمیزه اَیه چیخدی. 8قَضّادان، پوبلیوسونگ بووآسی مَریض دؤشموشدو و ایسیتمه و اسهال واری ایدی. پولُس اؤنونگ یانینا گئتدی و دُعا ائدی، اَلینی اؤنونگ اوستونه قؤیدو و بئلَسینی شفا وئردی. 9بو ایشدَن سورا، جَزیرهنینگ باقّی آداملاری دا کی مَریض ایدیلار گلدیلر و شفا توتدولار. 10اوللار بیزه چوخ احترام و عِزّت ائدیلَر و اوندا کی اَلیاقیمیزی ییغیردیک تا مینک کشتییه گئدَک، هر نه کی لازم واریمیز ایدی بئلَمیز ایچی آماده ائدیلَر.
پولُس روما ائتیشیر
11اؤچ آیدان سورا، او کشتیاینن کی قیش جَزیرهده قالمیشدی، ووردوک سویا. او کشتی اسکندریه شَهریندن گلیردی و جُمّولو تارئلارینگ نشاناسینی جلوسیندا واری ایدی. 12سیراکوز شَهرینه ائتیشنده، لَنگر آتدیک و اؤچ گؤن اؤردا قالدیک. 13اؤردان دا دریا یولونو ایلَری توتدوک و ریگیون شَهرینه ائتیشدیک. بیر گؤندَن سورا، جنوب طَرفیندن گلَن یئل اَسمگه باشلادی و ایکّینجی گؤنده، پوتیولی شَهرینه ائتیشدیک. 14بیز اؤردا کاکالاری بولدوک. اوللار بیزی دعوت ائدیلَر کی یئتدی گؤن بئللری اینن قالاک. و بئله روم شَهرینه ائتیشدیک. 15اوندا کی اؤرداکی کاکالار ائشیدمیشلردی کی بیز یولدایاک، آپیوس بازارینَنچاز و اؤچ میخانه دئییلن یئرَنچاز پیشوازیمیزا گلمیشلَردی. پولُس اوللاری گؤرَنده تارئیی شُکر ائدی و اؤرهکی قایم اولدو. 16اوندا کی ائتیشدیک روما، پولُسا اجازه وئریلدی تا اؤزو تَک زندلیگ ائده. بیر سربازدا اؤنو گؤزلهییردی.
پولُس رومدا
17اؤچ گؤندَن سورا، پولُس اؤرانینگ یهودیلارینینگ باشی بویوکلَرینی بیر یئره ییغدی. اوللار کُپ اولاندا، بئللرینه دئدی: «کاکالار، هر چند کی من خلخیمیز ضدّینه یا دا جَدلَریمیز رَسملَری ضدّینه هئچ ایش گؤرمَمیشم، با بو حال منیم اَلآیاقیمی باغلادیلار و اورشلیمدن منی وئردیلر روملیلار اَلینه. 18اوندا کی روملیلار مندن بازجولیگ ائدیلَر، سئیرلَردی بئلَمی آزاد ائدَلَّر، بو سَبریه کی منده هئچ جُرم بولمادیلار کی سزاسی اؤلوم اولا. 19آما بو خاطره کی یهودیلار اعتراض ائدیلَر، مجبور اولدوم کی سئیَم روم پادشاهینینگ مَحکمهسینده محاکمه اولام، اَلبَت بئلهیین دهییل کی اؤز ملّتیمدن شکایت واریم اولا. 20ائله بونونگ ایچی ده سئدیم کی سیزی گؤرَم و سیزینگ اینن دانیشام، چونکی یهود خلخینینگ او امیدی سَبرسینه دیر کی منی بو زَنجیر اینن باغلامیشلار.»
21اوللار پولُسا دئدیلر: «بیز سنینگ بارهینگده هئچ نامه یهودیهدَن آلمامیشاگ و اؤردان گلَن کاکالارینگ هئچ بیری، سنینگ بارهینگده بیر پیس گزارش و خبر گتیرمهمیشلر. 22آما بیز گؤینوموز سئیر بئلینگدن ائشیدک کی نظرینگ نه دیر، بو سَبریه کی بیلیرَک خلخ واری یئرده بو فِرقه ضدّینه دانیشیرلار.»
23اوللار پولُس ایچی بیر گؤن معین ائدیلَر و چوخ آداملار گلدیلَر او ائوه کی پولُس اؤردا قالیردی تا بئلَسینی گؤرَلَّر. پولُس سَحردن شامانچاز، تارئ پادشاهلیگی بارهسینده مُفَصّل اوللار ایچی دانیشدی. پولُس تلاش ائدیردی تا موسا شَریعتیندن و پیغمبرلَر یازیلیلاریندان اوللاری عیسا بارهسینده مُجاب ائده. 24بیر پارا آدام اؤنونگ گپلَریندَن مُجاب اولدولار، آما باقّیسی اینانمادیلار. 25پس بیر بیر اینن جَر و بحث ائده ائده، اؤردان چیخدیلَر. آما بوندان ایلَری کی اؤردان گئدَلَّر، پولُس آخیرکی سؤزینی چالدی و دئدی: «تارئنینگ قُدّوس روحو اِشعیای پیغمبر طَریقیندن سیزینگ جَدلَرینز اینن نه خوب دانیشدی، اوندا کی دئدی:
26«”گئد بو خلخ یانینا و دئ:
’گرچَکدَن کلام قولاقینزا دهیَر، آما هئچ زامان اؤنو آنگلاماینز،
و گرچَکدَن باخاراینز، آما هئچ زامان اؤنو گؤرمَینز.‘
27چونکی بو خَلخینگ اؤرهکی داش اولموش،
قولاقلاری آغیر اولموش،
و گؤزلَرینی باغلامیشلار،
تا ائدمئیه کی گؤزلَری اینن گؤرَلَّر،
قولاقلاری اینان ائشیدَلَّر
و اؤرهکلَری اینن آنگلایالّار و گئری دؤنَلَّر
و من اوللاری شفا وئرَم.“
28«پس بیلینز کی تارئنینگ بو نجاتی غیرییهودیلارا یوللانمیش؛ اوللار قولاق آسارلار!» 29پولُس بو سؤزلری دئیَندن سورا، یهودیلار ائله بئله کی بیر بیر اینن سَخت جَر و بحث ائدیرلَردی، اؤردان گئتدیلَر.
30پولُس ایکّی ایل تامام، اؤردا اجاره ائدیگی ائوینده زندلیگ ائدی و هَر کَسی کی گلیردی یانینا، قبول ائدیردی. 31پولُس تارئ پادشاهلیگینی اعلام ائدیردی و چوخ جسارت اینن و هئچ مانع اینن، رَب عیسا مَسیح بارهسینده تَعلیم وئریردی.
Currently Selected:
اعمال 28: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
