اعمال 27
27
پولُس گئدیر روما
1اوندا کی تَصمیم توتولدو کی دریا یولوندان ایتالیایا گئدَک، اوللار پولُسی و بیر پارا آیری زندانییی ده تَحویل وئردیلر بیر اَفسره کی آدی یولیوس ایدی. یولیوس روم پادشاهینینگ گُردانیندان ایدی. 2بیز بیر کشتییه کی اَدرامیتینوس شَهریندَن گلمیشدی و گئدیردی آسیا منطقهسینینگ بندرلَرینه میندیک و یولا دؤشدوک. مَقدونیهلی آریستارخوس دا کی تَسالونیکی شَهرینینگ آداملاریندان ایدی بیزیم اینن ایدی. 3او گؤنونگ صاباسی صِیدون شَهرینده لَنگر آتدیک. یولیوس، پولُس اینان مهربانلیگاینان رووآل ائدی و قؤیدو تا گئده یولداشلاری یانینا تا اوللار پولُس احتیاجلارینی برطَرف ائدلَّر. 4اؤردان گئنه دریا یولونو ایلَری توتدوک آما بو خاطره کی یئل بیزیم مُخالیفیمیز اَسیردی، قِپرسینگ او قیراقیندان کی یئل و طیفان اؤرایی توتمئیردی گئتدیک. 5کیلیکیه و پامفیلیه بندرلَرینینگ قیراقینداکی سولاردان گچندَن سورا، گلدیک میرا ساحلینا کی لیکیه ولایتینده ایدی. 6اؤردا او اَفسر بیر کشتی بولدو کی اسکندریه شَهریندَن گلیردی و گئدیردی ایتالیایا و بیزی اؤنا میندیردی. 7بیر نئچهگؤن یوآش یوآش گئتدیک و سَختلیگ اینن کْنیدوس ساحلینا ائتیشدیک و بو سَبریه کی یئل قؤیمادی کی ایلَرتر گئدَک کْرتینگ او قیراقیندان کی یئل و طیفان اؤرایی توتمئیردی، سالمون شَهرینینگ قَرشیسینانچاز گئتدیک. 8ساحل قیراقیندان سَختلیگ اینن گچدیک و بیر یئره ائتیشدیک کی آدی ’قَشنگ بندرلَر‘ ایدی. اؤرا، لاسائیه شَهرینینگ یاخینیندا ایدی.
9بو سَبریه کی وختیمیزینگ چوخونو اَلدَن وئرمیشدیک و داها ایلینگ بو موقعسینده دریا یولوندان سَفره گئدمَک خطر واری ایدی و حتّی اوروج گؤنلَری دا گچمیشدی، پولُس اوللارا نَصیحت ائدی و 10دئدی: «آقالار، بئله کی گؤرورَم بیزیم سَفریمیز دریا یولوندان خطرلی اولور و چوخ دا ضرر نه فقط یوکه و کشتییه بلکی بیزیم جانیمیزا دا دهییر.» 11آما او اَفسر، ناخدا و کشتی اَیهسینینگ سؤزلَرینه آرتیق اهمیت وئریردی تا پولُس دئدیگی سؤزلَره. 12بو سبریه کی او بندر بیر یئر دهییلدی کی اولا قیشی اؤردا گچیردَینگ آداملارینگ چوخو تَصمیم توتدولار کی اؤردان سَفرلَرینه دریا یولوندان ادامه وئرَلَّر بو امیده کی باشارالّار فینیکس بندرینه ائتیشلَّر و قیشی اؤردا گچیردلَّر. بو بندر، کْرت جَزیرهسینده ایدی و جنوب غربی و شمال غربییه ساری ایدی.
دریانینگ تیفانی
13اوندا کی جنوب طَرفیندن گلَن یئل یوآش یوآش اَسمگه باشلادی، اوللار گمان ائدیلَر کی مقصدلَرینه ائتیشمیشلَر. پس لَنگری چکدیلَر و کْرت ساحلینینگ یاخینیندان کشتییی سؤردیلَر. 14آما چوخ گچمهمیشدی کی بیر گؤجلی یئل جَزیرهدَن گلدی. او یئله شمال شرقی یئلی دئییلیردی. 15کشتی بیر چوخ گؤجلی یئله گرفتار اولدو و یئلینگ جلوسیندا تورا بیلمئیردی. بیز داها اؤزومیزی وئردیک یئل اَلینه و یئل بیزی آپاریردی. 16بیر کُودا آدلی کوچوک جَزیرهنینگ پناهی آلتیندان گئتدیک و کشتینینگ نجات قایقینی گؤجکی ساخلایا بیلدیک. 17کشتیده ایش گؤرَنلَر نجات قایقینی اوخاری چَکندن سورا، اِرکَن اینن کشتینینگ دئییرینی تیرینگ باغلادیلار تا کشتی قیریلمئیه. اوندان سورا دا بونونگ قورخوسوندان کی ائدمئیه کشتی سیرتیس خلیجینینگ عمقی آز یئرلَرینده چامورا باتا، کشتینینگ بادبانینی ائندیردیلار و یئل، کشتییی آپاریردی. 18بیز بیر سخت یئل و طیفان ایچینه دؤشدوگوموز ایچی، او گؤنونگ صاباسی اوللار، کشتینینگ یوکونو دریا ایچینه تؤکمگه باشلادیلار. 19اؤچونجو گؤنده، کشتینینگ اَثاثینی اؤز اَللَری اینن تؤکدولَر دریایا. 20اوندا کی چوخ گؤنلَر نه گؤن چیخدی، نه ده اولدوزلار و یئل و طیفان ده یاتمئیردی، بیزیم واریمیز او امیدی کی نجات توتماکا واریمیز ایدی اَلدَن وئردیک.
21بو خاطره کی اوللار چوخ وخت ایدی کی خورَکی یئمهمیشلاردی، پولُس توردو اوللار آراسینا و دئدی: «کیشیلَر، سیز منه قولاق آساسیدینز و کْرتدن چیخمیهسیدینز تا بوغاد ضرر و زیان گؤرمهینز. 22با بو حال سیزی تشویق ائدیرَم کی اؤرهکینز قایم اولسون، سیزینگ آراینزدان هئچکَس جانینی اَلدَن وئرمَز، فقط کشتی آرادان گئدهر. 23بو خاطره کی ائله دؤنَن گئجه تارئنینگ بیر فرشتهسی بوردا منیم قَرشیمده توردو. ائله او تارئ کی من بئلَسینه تَعلّق واریم و اؤنو پَرست ائدیرَم. 24او فرشته منه دئدی: ”پولُس، قورخما. سن روم پادشاهینینگ حُضوروندا توراسینگ و باخ، تارئ سنینگ واری هَمسفرلَرینگ جانینی باغیشلامیش بئلینگه.“ 25پس کیشیلَر، اؤرهکینز قایم اولسون، بو سَبریه کی من تارئیا ایمان واریم کی دقیق ائله اولهیین اولور کی منه دئییلمیش. 26آما بیزیم کشتیمیز بیر جَزیرهده چامورا باتاسی.»
27اون دؤردونجو گئجهده، ائله بئله کی یئل بیزی آدریاتیک دریاسیندا اوتایدان بوتایا سؤروردی، تقریبا گئجه یاری ایدی کی کشتیده ایش گؤرَنلَر گمان ائدیلَر کی قورّولوقا یاخینلَشیرلَر. 28پس اوللار سویونگ عُمقینی اندازه توتدولار گؤردولَر کی قیرخ متر دیر. بیر آز ایلَرتر گئنه اندازه توتدولار گؤرولَر کی اوتوز متر دیر. 29بونونگ قورخوسیندان کی دریاداکی تووآلارا دهیَک، کشتینینگ گئریسیندَن دؤرد لَنگر آتدیلار و دُعا ائدیلَر تا هَرنه تئزتر سَحر اولا. 30کشتیده ایش گؤرَنلَر کی بیر یول گَزیرلَردی تا کشتیدَن قَچلَّر، بو ماهانا کی سئیرلَر کشتینینگ جلوسینداکی لَنگرلَری آتالّار سویا، کشتینینگ نجات قایقینی آتدیلار دریا ایچینه. 31پولُس او اَفسره و سربازلارا دئدی: «اگر بو کیشیلَر کشتی ایچینده قالمایالّار، سیز نجات توتا بیلمَینز.» 32اوندا سربازلار او ایپلَری کی کشتینینگ نجات قایقینی ساخلایردی کَسدیلَر و قایقی ویل ائدیلَر تا گئده.
33تقریبا یاخین ایدی سَحر اولا کی پولُس اوللارینگ واریسینی تشویق ائدی تا بیر زاد یئیَلَّر. بئللَرینه دئدی: «بوگؤن اون دؤردونجو گؤن دیر کی بدون بو کی بیر زاد یئیینز ائله بئله انتظار چَکیرَینز و هئچنه یئمهمیشینز. 34پس بئلَینزی تشویق ائدیرَم کی قیلَنجه خورَکی یئیَینز. چونکی سیزه قوّت وئرَر، بو خاطره کی هئچ بیرینزینگ باشینزدان بیر تالا توک دا آزالماز.» 35پولُس بو گپلَری چالاندان سورا چؤرهک گؤتوردو و واری کَسینگ حُضوروندا تارئیی شُکر ائدی، چؤرهکی تیکهلدی و یئمَکه باشلادی. 36اوندا اوللارینگ واریسی اؤرهک توتدولار و قیلَنجه خورَکی یئدیلَر. 37بیزلَر کی کشتیده ایدیک واری بئلینه ایکّی یوز یئدمیش آلتی نفر ایدیک. 38اوللار خورَکی یئیَندَن سورا، بوغدانینگ قالیقینی دریایا تؤکدولَر و کشتییی اؤنگوللَشدیردیلر.
39سَحر اولاندا، تانیمادیلار کی او یئر هارا دیر، آما بیر رِزلی کوچوک خلیج گؤردولَر و قرار قؤیدولار کی اگر اولا کشتییی اؤردا ساخلایالّار. 40پس لَنگرلَرینگ ایپینی کَسدیلَر و لَنگرلَر دؤشدولار سویا. ائله بئله دا سُکّانی ساخلایان ایپلَری آچدیلار. اوندا کشتینینگ جلوسینداکی بادبانی یئلینگ موافقی اوخاری چَکدیلر و ساحله ساری ایلَری گئدیلَر. 41آما کشتی سو آلتینداکی کورّا یئرلَرینگ بیرینه دهییدی و چامورا باتدی. کشتینینگ جلوسی گیر ائدی و تکان یئمهدی، آما کشتینینگ گئری طَرفی موجلار ضَربیندَن قیریلدی.
42سربازلار سئدیلَر زندانیلاری اؤلدورَلَّر تا ائدمئیه کی بیری شنا ائده و قَچه. 43آما او اَفسر کی سئیردی پولُسی نجات وئره، قؤیمادی اوللار بو ایشی گؤرَلَّر. او اَمر ائدی کی اَوّل اوللار کی شنا ائده بیلیرلَر، آتّیلایالّار دریا ایچینه و اؤزلَرینی قورّولوقا ائتیردَلَّر 44و اوللارینگ قالیقی دا تختهلَر اوستونده یا دا کشتینینگ تیکهلَری اوستونده اؤزلَرینی ائتیردَلَّر قورّولوقا. و بئله واری کَس ساغ و سلامت ائتیشدیلر قورّولوقا.
Currently Selected:
اعمال 27: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
