ایکّینجی نامه تَسالونیکیلی‌لَره 1
1
1پولُسدان، سیلاسدان و تیموتائوسدان،
تَسالونیکیلی‌لَرینگ کلیساسینا کی بووآمیز تارئ‌دا و رَبّ عیسا مَسیحده دیرلَر:
2فِیض و صُلح و سلامتلیگ بووآمیز تارئ طرفیندن و رَب عیسا مَسیح طرفیندن سیزه اولسون.
شُکر ائدمَک
3کاکالار، بیز همیشه سیزینگ ایچی تارئ‌یا شُکر ائدَسیک، ائله اوله‌یین کی دوز دیر، چونکی ایمانینز فراوانلیگ اینن رُشد ائدیر و سیزینگ هَر بیرینزینگ مُحبّتی او بیرسینا آرتیق اولیر. 4بو خاطره ده، بیزیم اؤزوموز تارئ‌نینگ کلیسالاریندا، اِستقامتینز و ایمانینز ایچی کی واری جور و جفالارینزدا و تَحمّل ائدیگینز مُصیبت‌لَرده وارینز، بئلَینزه فَخر ائدیرَک.
حکم ائدمَک مَسیح گلمَکینده
5بو تارئ‌نینگ عدالتلی حکم ائدمَکی‌نینگ گواهلیگی دیر تا سیز تارئ پادشاهلیگی ایچی لایق ساییلانز کی بئلَسی ایچی ده زَجر چکیرَینز. 6چونکی گرچکدَن تارئ بونو عدالت گؤرور کی سیزه زَجر وئرَن‌لَرینگ عَوضینی زَجر اینن وئره، 7و بو کی سیزلَره کی زَجر چکیرَینز، راحتلیگ وئره و ائله بئله ده بیزه. بو ایش اوندا اولونار کی رَب عیسا اؤز قُدرتلی فرشته‌لَری اینن گؤیدَن اوت اَلووسی ایچینده ظاهر اولا. 8او، تارئ‌یی تانیمایان‌لاردان و رَبّیمیز عیسا اینجیلدن اطاعت ائدمئیَن‌لَردَن تَقّاص آلار. 9اوللار رَبّینگ حُضوریندان و اؤنونگ قُدرتی‌نینگ شوکتیندَن مَحروم قالارلار و اَبدی هَلاکتدَن زَجر چَکرلَر. 10او گؤنده کی او گلیر تا بئلَسینه ایمانی اولان‌لار آراسیندا شوکت توتا و ایمان گتیرَن‌لَرینگ واریسی اوندان مات قالالّار. سیزلَر ده کی بیزیم گواهلیگیمزه ایمان گتیردینز ده اوللار آراسیندا اولارانز.
11بو سبریه ده، همیشه سیزینگ ایچی دُعا ائدیرَک کی تارئ‌میز سیزی اؤز دَعوتینه لایق ائده و اؤز قُدرتی اینن، هر خوب قَصدی و هر عَملی کی ایماندان سَرچشمه توتیر یئرینه ائتیشتیره، 12تا بئله، تارئ‌میز و رَب عیسا مَسیح‌نینگ فِیضینه گؤره، رَبّیمیز عیسا آدی، سیزده شوکت توتا و سیز ده رَب عیسادا.
@ 2024 Korpu Company