بیرینجی نامه، قُرِنتلیلَره 2
2
بیزیم پیغامیمیز، صَلیبه چَکیلَن مَسیح دیر
1کاکالار، من اوندا کی گلدیم سیزینگ یانینزا، گلمهدیم کی تارئ سِرّینی، قشنگ سؤزلَر اینن یا ده حِکمت اینن بئلَینزه اعلام ائدم. 2بو سَبریه کی تصمیم توتدوم کی سیزینگ آراینزدا عیسا مَسیحدَن آیری، هئچنه بیلمئیَم. او ده صَلیبه چکیلمیش عیسا مَسیح. 3من اوندا کی سیزینگ یانینزدا ایدیم، ضعیفلیگ و قورخو ایچینده ایدیم و قورخودان چوخ تیتریردیم. 4منیم گپیم و منیم پیغامیم حِکمتینگ مُجاب ائدَن سؤزلَری اینن دهییلدی، بلکی تارئ روحونونگ و قُدرتینگ آشکار اولماکی اینان ایدی، 5تا ایمانینز نه بَشر حِکمتینه، بلکی تارئ قُدرتینه دایانا.
حِکمت، تارئ روحوندان
6با بو حال، بیز اوللار آراسیندا کی بالغ دیرلار، حِکمت سؤزلَرینی دئییرَک، هَر چند کی بو، بیر حِکمت دهییل کی بو زامانایا تعلّق واری اولا یا دا بو زامانانینگ حکمسؤرَنلَرینه کی یوخ اولیرلار گئدیرلَر. 7بلکی بیز، تارئنینگ حِکمتیندَن کی بیر سِرّ دیر و گؤزلَردَن پناه دیر دانیشیراک، ائله او حِکمت کی تارئ اونو زامانالاردان ایلَری بیزیم عِزّتیمیز ایچی مَعین ائدی. 8بو زامانانینگ حکمسؤرَنلَرینینگ هئچ بیری بو حِکمتی آنگلامادیلار، چونکی اگر آنگلامیشلاردی شوکت رَبّینی صَلیبه چَکمزلَردی. 9آما ائله اولهیین کی اِشعیای پیغمبر کتابیندا یازیلمیش:
«او زاد کی هئچ گؤز گؤرمهمیش،
هئچ قولاق ائشیدمهمیش،
و هئچ آدامینگ فکرینه ائتیشمهمیش،
تارئ، اوللار ایچی کی بئلَسینی چوخ سئیرلَر آماده ائدمیش.»
10تارئ، بو زادلاری اؤز روحو واسطهسینه بیزه آشکار ائدمیش. بو خاطره کی تارئ روحو واری زادی تَفتیش ائدیر، حتّی تارئنینگ عَمیق سِرّلَرینی. 11چون کیم دیر کی بیر آدامینگ فکرلَریندن آگاه اولا بهغیری او آدامینگ اؤز روحو کی اؤنونگ وجودی ایچینده دیر؟ ائله بئله دا تارئ روحوندان آیری، هئچکَس تارئ فکرلَریندَن آگاه دهییل. 12ایندی نه بو دنیانینگ روحو بلکی تارئدان گلن روح بیزه وئریلمیش. تا تارئ بیزه وئردیگی هدیهلَری آنگلایاک. 13و بیز ائله بوللاردان دانیشیراک، آما نه بشر حِکمتینینگ اؤرگتدیگی سؤزلَر اینن، بلکی تارئ روحو اؤرگدَن سؤزلَر اینن؛ و بئله روحانی حَقیقتلَری، روحانی آداملارا دئییرَک.
14نَفْسانی آدام، او زادلاری کی تارئ روحوندان دیر، قبول ائدمئیر. چونکی او آدامینگ نَظرینه نادانلیگ گلیر و اوللاری آنگلایا بیلمئیر، بو خاطره کی اوللاری تانیماک و آرالاماک تارئ روحو طریقیندَن دیر. 15روحانی آدام، واری زادا حُکم ائدیر، آما اؤنونگ اؤزونه هئچکَس حُکم ائده بیلمَز.
16«چونکی کیم دیر کی رَب فکرینی آنگلامیش اولا
تا اؤنا یول و یاچاق اؤرگده؟»
آما بیز مَسیح فکرینی واریمیز.
Currently Selected:
بیرینجی نامه، قُرِنتلیلَره 2: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
