اِنجیل مَرقُس 7

دِلِ پاکی

1عُلَمایِ فِرقِه فَریسی بعضی از توراتِ مُعَلِّمینِ هَمرَه که اورشلیمِ شَهرِ جی بوما بان، عیسی یِه وَر جَمع هَبان. 2اوشان بَدییَن که عیسی یِه بعضی از شاگِردان نَجِسِ دَسِ هَمرَه، یَعنی نَشوردِه دَسِ هَمرَه، غذا خارنَن. 3فَریسیِان و تمام یَهودیِان، طِبقِ مشایخِ رَسم و رسوم، تا خودِشانِ دَسِ خوُب نَشورن غذا نُخارنن. 4وَختی بازارِ جی هَنِن، تا بوشوردوشور نَکُنن هیچی نُخارنِن. هَمینجور هم خیلی رسم و رسومای دیگه هَم انجام دَنِن. مثلِ پیالِه و تییَن و مِرسی کاسه بُشقاب و میزِ بَشوردَن. 5فَریسیِان و توراتِ مُعَلِمین عیسی یِه جی بَپُرسیَن: «چِرا تی شاگِردان طبق مَشایخِ رَسم و رسوم رَفتار نُکانَن و نَجِسِ دَسِ هَمرَه غذا خارنَن؟» 6عیسی اوشانه باَگوته: «اِشعَیایِ پِیغَمبر شُما دُرویانِ باره چقدر خوُب پیشگویی هَکُردِه! هَمونجور که بَنویشتِ هَبا:

«‌این قوم خودِشانِ زبانِ هَمرَه مَرِه حُرمَت نَنِن،

وَلی اوشانه دِل می جی دورِ.

7اوشان بیخُدی مَرِه پَرَسِش کانَن،

وَ اوشانه تَعلیم فقط اِنسانِ حُکمِ.“

8شُما خُدایِ حُکمِ وِل هَکوردین و آدَمی یه رَسم و رسومِ بَچِسبِسّین.»

9وَ اوشانه باَگوته: «شُما زِرَنگی یه هَمرَه خُدایِ حُکمِ رَد کانید تا شیمی رسم و رسومِ بِدارین! 10چون موسی یِه پیغمبر باگوته: ”تی پیَر و مارِ اِحترام بَنی،“ وَ ”هر‌ کی خودشه پیَر یا مارِ ناسِزا باگو، حتماً بایسّی اونِه بَکوشَن.“ 11وَلی شُما گونین: ”اَگِه یِنَفر خودشه پیَر یا مارِ باگو: ”هر کُمَکی که بایسّی شِمِرِه هَکُنَم، خُدایِ کارِ وَسین وَقف هَکُردَم“ 12اینجوری شُما دِ نُزارنین اون هیچ کاری خودشه پیَر یا مآره وَسین هَکونه. 13اینجوری شُما شیمی رَسم و رسومِ هَمرَه، که اوشانِه بَقیِه رِه هَم گونید، خُدایِ کَلامِ نَدید گیرنید و زیاد اینجور کاران کانید.»

14عیسی یِدَفِه دیگه مَردُمِ خودشه وَر دُخوانِسِّه و اوشانه باَگوته: «شُما همه می گَبِ گوش هَدین و اینه بِفَهمین: 15هیچ چیزی دَنیِه که دِرگایِ جی آدَمی یه وجودِ دِلِه بوشو و بِتَّنهِ اونه نَجِس هَکُنِه. بلکه اون چیزایی که آدَمی یه وجودِ جی دِرگا هَنه اونه نَجِس کانه. 16هر‌ کی گوش شِنَوا داره، بِشنوئهِ!»

17عیسی بعد اَز اونکه جَماعَتِ ترک هَکُردِه و سِرِه بوما، اونه شاگِردان اون مَثَلِ معنی رِه اونه جی بَپرسییَن. 18عیسی اوشانه باَگوته: «شُما هَم نِفَهمِنین؟ مَگِه نِدانین اونچه که دِرگایِ جی آدَمی یه وجودِ دِلِه هَنه نَتَّنِه اونه نَجِس هَکونه؟ 19چون اونه دِلِ میَن نَشونِه، بلکه اونه شِکَمِ میَن شونِه و ایما دَفع بونه.» عیسی خودشه این گَبِ هَمرَه، باَگوته که تمام غذائِشان پاکِن. 20عیسی باَگوته: «اونچه که آدَمی یه وجودِ جی دِرگا هَنه، اونِه که آدَمی ره نَجِس کانه. 21چون آدَمی یه وجود و دِلِ جییه که پلیدِ خیال، فاسِقی، دُزّی، قتل، زَنا، 22طَمع، شِرارَت، حیلِه، هَرزِگی، حَسودی، تُهمَت، غُرور و نَفَهمی دِرگا هَنه. 23تمام این بَدِ چیزانِ که آدَمی یه وجودِ جی دِرگا هَنه و اونه نَجِس کانه.»

فینیقیه ایی زِنایِ ایمان

24عیسی اوجِه رِه تَرک هَکُردِه و به صور و صیدونِ مَنطقه بَشَه. ایتا سِرِه یه دِلِه بَشَه و نَخَسِّه هیچکس خَبَردار هَبو. وَلی باز هَم نَتَّنِسِّه خودِشِ قایم هَکونِه. 25ایتا زِنا که اونه کوچِ کیجا پَلیدِ روح داشتِه، وَختی عیسی یِه بارِه بِشنَوِسِّه، دَرجا بوما و عیسی یِه لِنگ دَکِته. 26اون زِنا غیر یَهودی و سوریه فینیقیۀ جی با. اون عیسی رِه التماس هَکُردِه که آلِ اونه کیجایِ جی دِرگا هَکونه. 27عیسی اون زِنا رِه باَگوته: «بَنی اَوَّل وَچِه هان سیر هَبون، چونکه وَچِه هانِ نان هَگیتَن و سَگِشانِ پِیش توُوادَن دُرُس نیه.» 28وَلی اون زِنا عیسی رِه باَگوته: «آرِه آقا، وَلی حتّی سَگِشان هم خُردِه چیزائی که وَچِه هانِ سُفرِه یه جی کَلنِه رِه خارنَن.» 29عیسی اون زِنا رِه باَگوته: «تی این گَبِ خاطِری، بوشو که آل تی کیجای جی دِرگا بوما!» 30اون زِنا خودشه سِرِه بَشَه، وَ بَدییَه اونه وَچِه لایِ دِلِه دِراز بَکشییَه و آل اونه جی دِرگا بَشَه.

عیسی ایتا کَرِ مَردَای رِه شَفا دَنه

31ایما عیسی صورِ مَنطَقِه یه جی وَگرِسِّه، وَ صِیدونِ راهِ جی جَلیلِ دَریایِ سَمت بَشَه. اون دِکاپولیسِ منطقه یه جی رَد بونه با. 32اوجِه ایتا مَردَای رِه عیسی یِه وَرجه بیاردِن که هَم کر با و هَم اونه زبان گیرنه با. اوشان عیسی رِه اِلتِماس هَکُردَن خودشه دَسِ اون مَردَای یه سَر بَنِه. 33عیسی اون مَردَای رِه جَماعَتِ جی دِرگا بَکِشییَه، ایتا گوشِه بَبِرده و خودشه اَنگوشتِ اونه دُتا گوش دِلِه بَنَه. ایما فیلی تُووادَه و اون مَردَای یه زِبانِ کَشِ بَزَه. 34عیسی آسِمانِ بِیشییِه، ایتا آه بَکِشییَه و اون مَردَای رِه باَگوته: «‌اِفَّتَح!» یَعنی «واز هَبو!» 35دَرجا اون مَردَای یه گوش واز هَبا و اونه زِبان رادَکِته و راحت گَب بَزَه. 36عیسی اوشانه قَدِغَن هَکُردِه که این جَریانِ هیچکَسِ وَرجه نَگوُن. وَلی هر چی بیشتر اوشانه قَدِغَن کانِبا، بیشتر این جریانِ جی گَب زَنه بان. 37مَردُم خیلی بُهت هَمرَه گونهِ بان: «هَر کاری هَکُردِه خُجیرِه؛ اون حتّی کَرِشانِ گوش و لالِشانِ زبانِ واز کانه!»

Currently Selected:

اِنجیل مَرقُس 7: GMB

Highlight

Copy