اِنجیلِ لوقا 2
2
عیسیِ زاد روز
1اون روزان دِلِه، آگوستوس که رومِ اِمپراطور با دَستور هَدَه تا تمام اوشانیکه رومِ اِمپراطوری یِه دِلِه زندگی کانَن، سَرشُماری هَبون. 2این اوَّلین سَرشُماری با و موقعه ایی انجام هَبا که كورینیوس سوریِه یِه فَرماندار با. 3پَس هَر کی خودشه شَهرِ سمت بَشَه تا خودِشه اِسمِ بَنویسه. 4یوسِف هَم چون داوودِ پادشاهِ تَلکُ و طایفه جی با ناصِره شَهر جی که جَلیلِ مَنطَقِه دِلِه دَبا به بیت لِحِم شَهر، یَعنی داوود زادگاه که یَهودیِه مَنطَقِه دِلِه با بَشَه. 5او اوجه بَشَه تا خودشه نامزد مریمِ هَمرَه که اونه بِزاسَّنِ وقت نزدیک با، خودِشانِه اِسمِ بَنویسِن. 6موقه ایی که اوجِه دَبان، مریمِ بِزاسَّن وقت بَرِسییَه. 7مریم خودشه اوَّلین وَچِه كه ریکا با رِه دُنیا بیاردِه. اونه قُنداقِ میَن دَپیته و پالوکا یه دِلِه بخواباندِه، چون مُسافِر خانه یه دِلِه اوشانه وَسین جا دَنِبا.
گالِشان و فِرشتِه گان
8اون دور و وَر، گالِشانی دَبان که صَحرایِ دِلِه زندگی کانه بان و شُویه دِلِه خودِشانِه گَلِّه یه جی مُواظِبَت کانه بان. 9یِدَفه خُداوَندِ ایتا از فرشتگان اوشانه ظاهِر هَبا و خُداوندِ جَلالِ نور اوشانه دور بِتابِسِّه وگالِشان بَدجور بَترسییَن، 10وَلی فِرشتِه اوشانه باگوته: «نَتِرسین، مَن شِمِرِه ایتا خُجیرِ خَبِر دارَم، ایتا خُجیرِ خبرکه تمام قومِ خوشحال کانِه: 11اِمروز داوود زادگاهِ دِلِه، ایتا نِجات دَهَندِه شِمِرِه دُنیا بوما. اون خداوند، مَسیحِ موعودِ. 12اونه نِشانِه هَم شِمِرِه اینه که ایتا تَره وَچِه قُنداقه دِلِه دَپیته پالوکا یه دِلِه بَخُته پیدا کانید.» 13یِدَفهِ اون فِرِشتِه هَمرَه ایتا گَتِ لَشکَرِ آسِمانی ظاهِر هَبان که خُدا رِه پَرَسِّش کانه بان و گونه بان:
14«جَلال خُدا رِه آسِمانِ عَرشِ دِلِه،
وَ صُلح و سَلامتی اوشانه وَسین که خُدا زَمینِ سَر اوشانه جی راضیِه!»
15وَختی فِرشتِه گان ایشانِ چِشمِ ور آسِمان سَمت بَشَن، گالِشان هَمدیگَرِ باگوتَن: «بیئِین بیشیم بیتلِحِم و اونچه که اتّفاق دَکِته و خداوند اَمَرِه اون جی باخَبَر هَکُردِه رِه، بِینیم.» 16پس بِتیش بَشَن و مریم و یوسِف و تَرِه وَچِه رِه پالوکا یه دِلِه بَخُتِه پیداهَکُردَن. 17وَختی تَرِه وَچِه رِه بَدییَن، گَبی كه دَربارِه اون بِشنَوِسِّه بان رِه، پَخش هَکُردَن. 18هر کی گالِشانِ گَبِ اِشنَوِنِه با، اونچه جی که اوشان گونه بان تَعجِب کانه بان. 19وَلی مریم، همه این اِتِّفاقان رِهِ خودشه خاطِر اِسپاردِنِه با و خودشه دِلِ میَن به اوشان فِکر کانِبا. 20گالِشان وَگَرِسَّن و اونچه یه خاطِری که بِشنَوِسِّه بان و بَدیه بان خُدارِه شُکر و پَرَسِش گونِه بان، چون اونچه که اوشانِ باگوتِه بان اوشانه رِه اتّفاق دَکِتِ با.
21هَشتمین روز، وَختی خَسِّن وَچِه رِه خَتنِه هَکُنَن، اونه اِسمِ عیسی بَنَن. این همون اِسمی با كه فِرشتِه، پیش از مریمِ شِکَمدار هَبوسَّن اونه رو بَنَ با.
عیسی پیشکَش هَکُردَن مَعبَدِ دِلِه
22بعدِ اینکه یوسِف و مریم تَطهیرِ رَسمِ طِبقِ موسایهِ شَریعَت بِجا بیاردِن، عیسی رِه به اورشلیم بَبِردَن تا خُداوَندِ پیشکَش هَکُنَن، 23طِبقِ خُداوندِ شَریعَتِ حُکم که گونهِ: «اوَّلین ریکائی که خودشه مآره شِکمِ جی به دُنیا بیه، بایسّی خداوند وَقفِ هَبو.» 24وَ طِبقِ اونچه که خُداوندِ شَریعَتِ دِلِه بوما، «یِه جُفت قُمری وَ یا دتا چورِه کَفتَر» بِعنوانِ قُربانی پیشکَش هَکُنَن.
25اون وَختان، اورشلیمِ دِلِه ایتا مَردای که اونه اِسمِ شَمعون با زندگی کانِبا كه صالِح و خُدا تَرس با. وَ اِنتِظار کَشَنه با تا مَسیحِ موعود ظهور هَکونه. شَمعون روح القُدُسِ داشتِه. 26روح القُدُس اونه رَه آشکار هَکُردهِ با که تا مَسیحِ خُداوندِ نَینه، نَمیرنِه. 27پس شمعون روح القُدُسِ هِدایتِ هَمرَه یَهودیِانِ مَعبَدِ دِلِه بَشَه. وَختی که عیسیِ یه پیَر و مآر وَچِه رِه بیاردِن تا اونچه كه طِبقِ شَریعَت رَسم با رِه اَنجام هَدَن، 28شَمعون وَچِه رِه خودشه بَقَلِ میَن بِیته و خُدا رِه شُکر هَکُردِه و باگوته:
29«اَسِه اِی خداوند، طِبقِ تیِ وَعدِه،
تیِ خادِمِ به سَلامَت مُرخَص هَکُن.
30چونکه می چِش تی نِجاتِ بَدییَه،
31نِجاتی که مَردُمانِ چِشِ وَر فَراهَم هَکُردی،
32نوری که حَقیقَت رِه دیگر قومانِ وَسین آشکار کانه
و تی قوم اِسرائیل سَر بُلَندیِه باعث بونه.»
33عیسی یِه پیَر و مآر اون گَبانِ جی که عیسی یه باره باگوتِه هَبا بُهت هَکُردَن. 34ایما شَمعون اوشانه بَرکَت هَدَه و مریم، عیسیِ مارِ با گوته: «قَرارِ که این وَچِه باعِثِ بَکِتَن و بلَند هَبوسَّنِ خِیلیان اِسرائیل قوم جی هَبو و نِشانه ایی که اونه هَمرَه مُخالِفَت کانَن 35تا خِیلیانِ جا هَدَه خیال آشکار هَبو و ایشان شَمشیرِ مِثان تی جان چاک دَنه.»
36اوجِه ایتا زِنا که اونه اِسم حَنّا با زندگی کانِبا. حَنّا فَنوئیل کیجا اَشیر طایفِه جی با، خُداوند طَرفِ جی نَبوَّت کانِبا. او پیرِ زِنا با. حَنّا بعد اینکه هفت سال خودِشِه شویه هَمرَه زندگی هَکوردِه، خودِشِه شو رِه از دَس هَدَه با 37و تا هشتاد و چهار سالِگی بیوِه بُمانِسِّه با اون هیچ وَخت مَعبَدِ جی دِرگا نَشَونه با، بلکه شُو و روز دُعا و روزِه یه هَمرَه خُدا ره پَرَسِّش کانِبا. 38اون همون موقه جلو بوما، خُدا رِه شُکر هَکُردِه و تمام اوشانه هَمرَه که اورشلیم آزادی یه چِشم بِراه بان عیسی یه باره گَب بَزَه.
39وَختی یوسِف و مریم همه اون چیزایی که خُداوندِ شَریعَتِ دِلِه بوما با رِه بِجا بیاردِن، به خودِشانِه شهر ناصِره که جَلیل مَنطَقِه یه میَن با وَگَرِسَّن. 40اون وَچِه گَته و رَسدار بونِه با. او حِکمَت جی پُر با و خُدای فیض اونه هَمرَه دَبا.
عیسی یِه دِوازدَه سالِه مَعبَدِ دِلِه
41عیسی یه پیَر و مآر هَر سال پسَخِ عیدِ وَسین اورشلیم شونِه بان. 42وَختی عیسی دَوازدَه سالِه هَبا، طِبقِ عیدِ رَسم و رُسوم به اورشلیم بَشَن. 43بعدِ اینکه عید تَمام هَبا، و اوشان خَسِّن به خودِشانِه شَهر وَگِردِن عیسی اورشلیمِ دِلِه بُمانسِّه. وَلی اونه پیَر و مآر نِدانِسَّن، 44به گَمانِ اینکه اون کاروانِ دِلِه دَرِه ایتا روز تَمام سَفرِ اِدامِه هَدَئن. سَرآخَر خودِشانه فامیلِان و رَفیقِانِ میَن عیسی یِه دُمّال گَردَنِه بان. 45وَختی اونه پیدا نَکُردَن، وَگَرِسَّن اورشلیم تا اونه دُمّال بَگِردَن. 46بَعدِ سه روز، اونه مَعبَدِ دِلِه پیداهَکُردَن. عیسی مُعَلِّمینِ میَن نیشته با و اوشانه گَبِ گوش دَنهِ با و اوشانه جی سوال کانِبا. 47هر کی اونه گَبِ اِشنَوِنِبا، اونه فَهم جی و جَوابانی که دَنهِ با بُهت کانِبا. 48وَختی اونه پیَر و مآر اونه اوجِه بَدییَن بُهت هَکُردَن. اونه مآر اونه باگوته: «می ریکا، چِرا اَمیِ هَمرَه اینجور هَکُردی؟ من و تی پیَر خِیلی دِلواپَسی یه هَمرَه همه جا رِه تی دُمّال بَگَرسِّیم.» 49وَلی عیسی اوشانه باگوته: «چرا می دُمّال بَگَرسّین؟ مَگِه نِدانِسّین مَن بایِسّی می پیَره سِرِه یِه دِلِه دَبوُم؟» 50وَلی اوشان اونچه که عیسی اوشانه باگوته رِه نَفَهمِسَّن. 51پس اوشانه هَمرَه به ناصِرِه وَگِرِسِّه و اوشانه مُطیع با. وَلی اونه مآر تمام این اِتِّفاقان رِه خودِشه خاطِر داشتِه. 52عیسی حِکمَت و قامَت دِلِه گَته بونِه با. وَ هَم خُدایِ وَرجه و هَم مَردُمانِ وَرجه مَحبوب با.
Currently Selected:
اِنجیلِ لوقا 2: GMB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
