اِنجیلِ لوقا 1
1
1عالیجناب تِئوفیلوس: اوجِه جی که خِیلیان اقدام به بَنویشتَن کارایی که اَمی وَرجِه اتِّفاق دَکِتِه هَکُردَن، 2دُرس هَمونجور اوشانیکه از اوَّل خودِشانِه چِشمِ هَمرَه بَدییَن و کلام خادمین بان اَمَره بِسپارِسَّن، 3مَن هم که همه چیزه از اوَّل دِقَّت هَمرَه بَررِسی هَکُردَم، اینجور صَلاح بَدییَم که اوشانِ به طور مُنَظَم شِمِره بَنویسَم. 4تا اونچه یه دُرُسّی جی که یاد بِیتین، مطمعن هَبین.
یحیی یه تَعمید دَهندِه دُنیا بَموئَنِ پیشگویی
5هیرودیس دورِه دِلِه، یَهودیِه یه پادشاه، ایتا كاهِن که اونِه اسم زَکَریا و اَبیّا یه کاهنانِ دَسّه جی با زندگی کانِه با. اونه زنا اِلیزابِت هَم هارونِ کاهِنِ تَلک و طایفه جی با. 6هَر دُتاشان خُدایِ نَظر صالِح بان و خُداوند تمام اَحکام و دستوراتِ بی عیب بِجا هارنِبان. 7وَلی اوشان بی زاک و زِکال بان، چون اِلیزابِت نازا و هر دُتاشان پیر بان.
8یِدَفِه که زکریای دَسِّه خدمت هَکوردَنِ نوبت با، وَ او خُدایِ حضورکاهِنی کانِبا، 9بَنا به رَسمِ کاهِنان، قُرعه اونه اسم دَکِته که خُداوند مَعبَدِ دِلِه بوشو و بُخور بوسوجانه. 10بوخور بوسوجانیَنِ موقِه، تمام جَماعت دِرگا ایسَبان و مشغول دعا هَکوردَن بان. 11یِدَفه خُداوند ایتا ازفِرِشتِگان که بُخور تَشکَلِه یه راسِ وَر ایسَبا زَکَریا رِه ظاهِر هَبا. 12زَكَریا اونه بَدینِ جی پَریشان هَبا و اونه تَرس بِیتِه 13وَلی فِرشتِه اونه باَگوته: «اِی زَكَریا، نَتِرس! تی دُعا مُستَجاب هَبا. تی زِنا اِلیزابِت تِرِه ایتا ریکا دُنیا هارنه و تو اونه اِسمِ یحیی نَنی. 14تو شادی و خُشحالی یه جی پُر بونی و خِیلیان اونه دُنیا بَموئَنِ جی خوشحال بونَن، 15چون او خُداوَندِ نَظرگَتِ مَردی بونه. یحیی هیچ وَخت نباید شراب و عَرَقِ تُک بَزِنِه. اون خودشه مآره شیکَمِ دِلِه روح القُدُسی جی پُر بونه، 16و خِیلیان رِه اسراییل قومِ جی خُداوَند سمت، اوشانِه خُدا وَگِرداندِنِه. 17اون ایلیایِ قُوَّت و روحِ هَمرَه، خُداوند پیشاپیش هَنه تا پیَرانِه دِل رِه به وَچِه هان نَزدیک هَکونه، وَ سَرکِشِ آدَمانِ یاد هَدِه خودِشانه پیَرانِ مِثان خُداوَندِ دوس بِدارَن تا قومی آمادِه خُداوند وَسین فَراهم هَکونه.» 18زَكَریا فِرشتِه جی بَپُرسیِه: «اینه کوجه یه جی بِدانَم؟ مَن پیرِمَردَم و می زِنا هَم پیرِ.» 19فِرشتِه جِواب هَدَه: «مَن جِبرائیلِم كه خُدایِ حَضور ایسَنَم. اَلان روانه هَبام تا تی هَمرَه گَب بَزَنَم و این خَبَرِ خُشِ تِرِه هَدَم. 20اِسِه لال بونی و تا اون روزی که این اِتِّفاق دَکِنه، نَتَّنی گَب بَزِنی، چون می گَبِ که اون وَختِ موقِه اِتفاق دَکِنِه رِه، باوَر نَکُردی.» 21جِماعتی که زکریایِ انتظارِ کَشِنِه بان، اینه وَسین که اون اَندی مَعبَدِ دِلِه بُمانِسِّه تَعجِب هَکُردَن. 22وَختی زَکَریا دِرگا بوما نَتَّنِسِّه مَردُمِ هَمرَه گَب بَزِنِه، پس بَفَهمِسَّن مَعبَدِ دِلِه رویایی بَدییَه، چون فقط ایما و اِشارِه کانِبا و نَتَّنِسِّه گَب بَزِنِه. 23زَكَریا بعد از اینکه خودشه خِدمَتِ تَمام هَکُردِه، خودِشه سِرِه وَگَرِسِّه.
24چَن وَخت دیگه، اونه زِنا اِلیزابِت شِکَمدار هَبا و پنج ماه خودِش رِه سِرِه دِلِه قایِم هَکوردِه. 25اِلیزابِت گونه با: «خُداوند می وَسین اینجور هَکُردِه. او این روزان، مَرِه لُطف هَکُردِه و اونچه که مَردُمِ وَر می وَسین مایِه نَنگ با رِه بِیته.»
عیسی یه زاد روز پیشگویی
26شِشمین ماهِ دِلِه، خُدا خودشه فِرِشتِه جبرائیلِ ایتا شَهر که اونه اسم ناصِرِه با وجَلیل منطقه دِلِه دَبا رَوانه هَکوردِه، 27تا ایتا اَذَب کیجا یِه ورجه که اونه اِسم مریم با بوشو. مریم ایتا مَردَای نامزد با که اونه اِسمِ یوسِف با، داوودِ پادشاهِ تَلک و طایفه یه جی. 28فِرشتِه مریمِ ورجه بَشَه و باگوته: «سَلام بر تو، اِی کسی که مورد لُطف قرار بِیتی، خداوند تی هَمرَه دَرِه.» 29وَلی وَختی مریم اونه گَبِ بشنَوِسِّه خِیلی پریشان هَبا و خودشه هَمرَه کَلَنجار شونِه با تا بِفَهمِه این چِجور سَلامیِه. 30وَلی فِرشتِه اونه باگوته: «اِی مریم، نَتِرس! چون خُدا تِرِه لُطف هَکُردِه. 31اَسه شِکَمدار بونی و ایتا ریکا دُنیا هارنی و اونه اِسمِ عیسی نَنی. 32اون گَتِ مَردی بونه و خُدای مُتِعالِ ریکا دُخوانده بونه. خُداوند، خُدا، اونِ جَد داوودِ پادشاهی یه تَختِ اونه دَنِه. 33اون تا اَبَد یَعقوبِ تَلکُ طایِفه رِه پادشاهِی کانه و اونه پادشاهِی هیچ وَخت تَمام نَبونه.» 34مریم فِرشتِه یه جی بَپُرسییَه: «چِطور اینجور بونه؟ چون مَن هیچ مَردِ هَمرَه دَنِیه بام؟» 35فِرشتِه جِواب هَدَه: «روح القُدُس بر تو نازِل بونه و خُدای مُتِعالِ قُوَّت تی سَر سایِه تُووادِنِه. اینِه وَسّین، اون وَچِه مُقَدَّس و خُدایِ ریکا دُخوانده بونه. 36بِدان تی فامیل اِلیزابِت پیری یه دِلِه ایتا ریکا خودشه شِکَمِ دِلِه داره. آرِه، اونکه گونَن نازایِه، شِش ماه بونه که شِکَمدارِه. 37چون هیچ کاری خُدای وَسین مَحال نیِه!» 38مریم باگوته: «مَن خُداوند کَنیزَم؛ اونچه که می باره باگوتی، هَبو.» آنگاه فِرشتِه اونه وَرِ جی بَشَه.
مَریَم، اِلیزابِت دیِنه
39همون روزان، مریم ورِسَه و بِتیش به ایتا شهر، که یَهودیِه یِه کوهِ دِلِه دَبا بَشَه. 40اون به زَكَریایِ سِرِه بَشَه و اِلیزابِتِ سَلام هَکُردِه. 41وَختی اِلیزابِت مریمِ سَلامِ بِشنَوِسِّه، وَچِه اونه شِکَمِ دِلِه تِکان بُخاردِه وَ اِلیزابِت، روح القُدُسِ جی پُر هَبا. 42اِلیزابِت بُلَندِ صِدایِ هَمرَه باگوته: «تو زِناکانِ دِلِه مُوارَکی و تی شِکَمِ ثَمَرِه مُوارک! 43مَن کییَم كه می سَرورِ مآر می بَدییَن وَسین بیِه؟ 44چون وَختی تی سَلام می گوش بَرِسییَه، وَچِه خُشحالی جی می شِکَمِ دِلِه تِکان بُخاردِه. 45خوش بِحالِ اونیکه باوَر هَکونِه اونچه که خداوند طَرَفِ جی اونه بَاگوتن، به اَنجام رَسِنه.»
مَریَم خُداوندِ پَرَسِّش کانه
46مریم اونِه جواب، باگوته:
«می جان خُداوَندِ پَرسِّش کانه
47می روح در می نِجات دَهَندِه خُدا، خُشحالی کانه،
48چون او خودشه کَنیزِ کوچِکی رِه نَظرِ لُطف هَکُرده.
مین بَعد، تمام نَسلان مَرِه مُوارَک خواندِنَن،
49چون اون تَوانا که اونه اِسم قُدوسِ،
می وَسین گَتِه کاران هَکُردِه.
50اونه رَحمت، نسل اَندَر نسل
اوشانِ شیِه كه اونه جی تَرسِنِن.
51خُداوندِ دَس، قُوَّتِ هَمرَه کار هَکُردِه؛
وَ اوشانیکه خودِشانِه فِکر و دِل میَن مَغرورهیسَن رِه، تارومار هَکُردِه.
52رَسداران رِه تخت جی زمین سَر تُووادِنِه
وَ فروتَنان رِه سربُلند کانه؛
53وَشنا شان رِه خُجیرِ چیزانهِ هَمرَه سیر کانه
وَلی پولدارانِ دَسِ خالی روانه کانه.
54او خودشه رَحمَتِ یاد بیاردِه،
خودشه خادِم، اِسرائیلِ کُمَک هَکُردِه،
55هَمونجور كه اَمیی پیَر ابراهیم و اونه نَسلِ
وَعدِه هَدَه با که تا اَبَد اینجور هَکونه.»
56مریم سِه ماه قَدَر اِلیزابِتِ ور بُمانسِّه و ایما خودِشِه سِرِه وَگِرِسِّه.
یَحیی ِزاد روز
57وقتی اِلیزابِتِ بِزاسَّنِ وقت بَرِسییَه، ایتا ریکا دُنیا بیاردِه. 58هَمسادِشان و اونه فامیلِان وَختی بِشنَوِسَّن كه خداوند چه گَتِ رَحمَتی اونه وَسین هَکُردِه، اونه خُشحالی یه دِلِه شَریک هَبان. 59هَشتمین روز، تَرِه وَچِه یه خَتنِه هَکُردَن وَسین بومَن و خَسِّن اونه پیَره اِسم، زَکَریا رِه او سَر بَنَن. 60وَلی وَچِه مآر باگوته: «نه، اونه اِسم بایسّی یحیی هَبو.» 61اوشان باگوتَن: «تی فامیلانِ دِلِه کسی اینجور اِسمی نِداره.» 62پس اِشارِه هَمرَه، تَرِه وَچِه پیَره جی بَپُرسیَن خَنِه وَچِه یِه اِسم چی هَبو. 63زَکَریا تَختِه ایی که بَنویشتَن وَسین با رِه بِخَسِّه و بَنویشته: «اینه اِسم یحیائِه!» هَمه تَعجِب هَکُردَن. 64همون دَم، اونه زَبان واز هَبا و خُدا رِه پَرَسِش هَکُردِه. 65تمام هَمسادِشان بَتِرسیَن و مَردُم، تمام یَهودیِه کوهِ دِلِه اینه باره گَب زَنِه بان. 66هر کی این گَبِ اِشنَوِسِّه، خودشه دِلِ میَن گونه با: «این وَچِه چیجور آدَمی بونه؟» چون خُداوَندِ دَس اونه هَمرَه دَبا.
زکریایِ نَبُوَّت
67اونوَخت اونه پیر زَكَریا، روح القُدُس جی پُر هَبا و اینجور نَبُوَّت هَکُردِه:
68«مُوارَک هَبو خداوند، خُدای اِسرائیل،
چونکه خودشه قومِ کُمَک بوما و اوشانه آزاد هَکُردِه.
69او اَمی وَسین ایتا رَسدارِنجات دهنده
داوود تَلکُ و طایفه جی روانه کانه.
70دُرُس همونجور که قَدیم جی
خودِشه مُقَدَّسِ پِیغَمبَرانِ زِبانِ جی وَعدِه هَدَه که
71اَمَرِه دُشمَنانِ دَسِّ جی
و همه اوشانیکه اَمی جی بیزارِن، نِجات هَدِه،
72تا اون رَحمَتی که اَمی پیرانِ قول هَدَه با رِه نِشان هَدِه
و خودشه مُقَدَّس عَهدِ به یاد بیَارِه.
73همون قَسمی رِه که
اَمیی جَد ابراهیمی وَسین بُخاردِه
74كه اَمَرِه دُشمَنانِ دَسِّ جی نِجات هَدِه
تا اَما اونه بی تَرس خِدمَت هَکُنیم،
75وَ تمام اَمی عُمر رِه،
قُدّوسیَت و عِدالتِ دِلِه اونه حُضور سَر هَکُنیم.
76وَ تو، اِی وَچِه، خُدای مُتِعالِ پِیغَمبَر دُخوانده بونی؛
چونکه خداوند پیشاپیش شونی تا اونه راهانِ اونه وَسین آمادِه هَکُنی،
77وَ اونه قومِ آگاه هَکُنی
که نِجات اینِه دِلِه دَرِه که اوشانِ، گُناهان آمُرزیدِه هَبو.
78چون اَمیی خُدایِ رحم ودِلسوزی جی هیسه،
كه آفتو آسِمانِ جی اَمی وَسین دَر هَنِه
79تا اوشانیکه ظُلَمات و سایِه مَرگِ دِلِه نیشتَن رِه روشَنایی هَده،
وَ اَمیی قَدَمِ، صُلح و سَلامتی یه راه دِلِه هِدایَت هَکونه.»
80اون وَچِه گَتِ بونِه با و در روح رَسدار بونِه با، وَ تا روزی كه خَسِّه اِسرائیل ظاهِر هَبو، صَحرایِ دِلِه به سَر بَرنِه با.
Currently Selected:
اِنجیلِ لوقا 1: GMB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
