انجیلِ لوقا 6

عیسی صاحاب روزِ شَبات

1مِنِه یِکی وَ روزَلِ شَبات، عیسی وَ مابینِ زمینَلِ گندم رَی ایابی وِ شاگردَلِش خوشَلِ گندِمَه ایچییِن وِ بِی دَس ایساوَنان، ایخَردِن. 2امّا چَنتا وَ عالِمَلِ فرقۀ فَریسی گُتِن: «سیچِه کاری ایکِنیت که اَنجومِش مِنِه روزِ شَبات جایز نی؟» 3عیسی وَشون جواب دا: «مَه مِنِه کتابَلِ مقدس نَخُوندیتِه که، داوود چه کِه اوسِه که خُوش وِ یارَلِش گُسنَه بییِن؟ 4وِّ رَت وَ حونِی خدا وِ نونِ تقدیم وابی‌یَه وَ خدا نَه وَگِرُت وِ خَه وُ وَ یارَلِش هَم دا، در صورتی که تِنا کاهِنَل اجازَه داشتِن وَ او نون بِخَرِن.» 5اوسِه عیسی وَشون گُت: «کِرِ انسان صاحابِ روز شَباتِه.»

شَفِی مِردی که دَسِش خُشک بی

6عیسی مِنِه یِه شَباتی دَ، رَت وَ کَنیسَه وِ تعلیم ایدا، مِردی وُچه بی که دَسِ راسِش خُشک وابی‌یَه بی. 7معلملِ تورات وِ عالِمَلِ فَریسی، عیسی نَه زِرِ نَظر داشتِن تا بینِن مَه مِنِه روزِ شَبات کسی نَه شفا اییِه وا نَه؛ سی‌یِکِه وَ دینِ بُونه‌ای بییِن تا وَش اتهام بِزَنِن. 8امّا عیسی که وَ فِکرَلِشون خَوَر داشت، وَ مِردی که دَسِش خشک وابی‌یَه بی گُت: «بیو ویچِه وِیس.» وِّ هم وَریسا وُچه ویسا. 9عیسی وَشون گُت: «وَ ایشا ایپُرسُم، کویَکی مِنِه روز شَبات رَوایَه: خوبی کِردَن یا بَدی کِردَن، نجات جونِ آیَم یا نابود کِردنِ وُّ؟» 10پَ سیلِ یکی یکیشون کِه وِ اوسِه وَ او مِرد گُت: «دَسِتَه دراز کُ!» وِّ دَسِشَه دراز کِه وِ دَسِش خوب وابی. 11امّا اونگَل تَش گِرُتِن وِ بِی یَک نِشَسن وَ شُور که بی عیسی چه کِنِن.

دُوازَه رسول

12یکی وَ او روزَل، عیسی سی دعا رَت وَ کُو وِ شُو نَه وَ دعا کِردن وَ دَرگاهِ خدا صُب کِه. 13گَکون شاگردَلِشَه خواس، وُ وَ مابین اونگَل دُوازَه نفرَ جیا کِه وِ اونگَلَه رسول خُوند: 14شمعون که وِّ نَه پطرس نوم نها وِ آندریاس کَکِی پطرس، یعقوب وِ یوحنا، فیلیپُس وِ بَرتولما، 15مَتّی وِ توما، یعقوب کِرِ حَلفای و شمعونِ معروف وَ غیور، 16یَهودا کِرِ یعقوب، وِ یهودای اَسخَریوطی که وَ عیسی خیانت کِه.

خَش وَ حالِ ایشا

17عیسی بی شاگِردَلِش وَ کُو اومَه دومِن وِ مِنِه جِی صافی ویسا. مَهلی وَ شاگردلش وِ عدۀ زیادی وَ مردم وَ سرتاسرِ یهودیَه وِ اورشلیم، وُ وَ شهرِلِ ساحلی صور وِ صیدون، وُچِه بییِن. 18اونگَل اومَیَه بییِن تا گَپَلِ وِّ نَه بِشنِفِن وُ وَ مریضی‌یَلِشون شفا بِگِرن؛ کَسَلی که اسیرِ روحَلِ ناپاک بییِن، شفا ایگِرُتِن. 19مردم همَه تلاش ایکِردِن دَسَش بِزَنِن، سی‌یِکِه نیرویی وَش ایزَه وَدَر که هَمَه نَه شفا ایدا.

20اوسِه عیسی سیل کِه وَ شاگردلِش وِ گُت:

«خَش وَ حالِ ایشا که فقیریت،

سی‌یِکِه پادشاییِ خدا این ایشانِه.

21خَش وَ حالِ ایشا که ایسِه گُسنَه یِیت

سی‌یِکِه سیر ایابِیت.

خَش وَ حالِ ایشا که ایسِه ایگِریویت،

سی‌یِکِه خندَه وَ لویَلتون ایایِه.

22خَش وَ حالِ ایشا اوسِه که مردم وَ خاطرِ کِرِ انسان، وَ ایشا نفرت بِگِرِن وِ ایشا نَه وَ مابینِ خِشون کِنِن وَدَر وِ دِشمون بییِن وِ بَدنوم کِنِن. 23مِنِه او روز، شایی کِنیت وِ وَربازیت، سی‌یِکِه پاداشِتون مِنِه آسمون مهلی گَپویَه. سی‌یِکِه اجدادِشون هم بی پیغمبَرَل هَمی کارَ کِردِن.

24امّا وای وَ حالِ ایشا که دارایِیت

سی‌یِکِه راحَتی خِتونَه جُسیتِه.

25وای وَ حالِ ایشا که ایسِه سیریت،

سی‌یِکِه گُسنَه ایابِیت.

وای وَ حالِ ایشا که ایسِه ایخَندیت،

سی‌یِکِه عَزا ایگِریت وِ زاری ایکِنیت.

26وای وَ حالِ ایشا اوسِه که همَه وَتون تَعریف کِنِن، سی‌یِکِه اجدادِشون هم بِی پیغَمبَرَلِ وَدِرو هَمی کارَ کِردِن.»

دشمَنَلِ خِتونَه محبت کِنیت

27«امّا وَ ایشا که گَپَلِ مِنَه ایشنِفیت ایگُم: که دشمَنَلِ خِتونَه محبت کِنیت وُ وَ اونگَلی که وَ ایشا نفرت دارِن، خوبی کِنیت. 28سی هَرکه نُرفینِتون کِنِه برکت واطَلَبیت، وِ سی هرکه آزارِتون بییِه دِعِی خیر کنیت. 29اَر کسی تَلَنگوش وَت زَه، اولَتِ ریتَه هم ریاش کُ. اَر کسی قَباتَه وَت اِسَه، جومَتَه هم وَش بییِه. 30اَر کَسی چیئی وَت بِخوا وَش بییِه، وِ اَر مالِ تِنَه غَصب کِنِه، وَش نَخواه بییِش واپَس. 31بِی مردم هَموطو رفتار کِنیت که ایخِیت بِی ایشا رفتار کِنِن.

32اَر تِنا اونگَلی نَه محبت کِنیت که وَتون محبت ایکِنِن، چه سودی سیتون دارِه؟ حتی گِناکارَل هم دوسدارَلِ خِشونَه محبت ایکِنِن. 33وِ اَر تِنا وَ کسَلی خوبی کِنیت که وَتون خوبی ایکِنِن، چه سودی سیتون دارِه؟ حتی گِناکارَل هم هَمی کارَ ایکِنِن. 34وِ اَر تِنا وَ کسَلی قرض بِئیت که اِمید عَوَضِشَه داریت، چه سودی سیتون دارِه؟ حتی گِناکارَل هم وَ گِناکارَل قرض اییِن تا یِه رو وَشون بِسونِن واپَس. 35امّا ایشا، دشمَنَلِتونَه محبت کِنیت وُ وَشون خوبی کِنیت، وِ بی‌یِکِه اِمید عَوَض داشتَه بِیت، وَشون قرض بِئیت، سی‌یِکِه اجرتون مَهلی گَپویَه، وِ اولادَلِ خِدِی متعال ایابِیت، سی‌یِکِه وِّ هَم بِی ناشُکرَل وِ بَدکارَل مِرَبونِه. 36پَ رحیم بِیت، هَموطو که بو ایشا رحیمِه.

بَقیَّه نَه قضاوت نَکِنیت

37قضاوت نکِنیت تا وَ ایشا قضاوت نَوابو. محکوم نَکِنیت تا محکوم نَوابِیت. بُویَخشیت تا بَخشییَه وابِیت. 38بِئیت وَ ایشا دایَه ایابو. پیمونه‌ای پُرتاپُر، تَپَنایَه، تَکون دایَه وِ لُوریز مِنِه دامَنتون رِتَه ایابو! سی‌یِکِه بِی هر پیمونه‌ای که بِئیت، بِی همو پیمونَه عَوَض ایگِریت.»

39عیسی ای مَثَلَه هم سیشون آوُرد: «مَه یِه کور ایتَرِه گِلاکِ کورِ دَ نَه بِکَشِه؟ مَه هر دِتاشون نیوفتِن مِنِه چَه؟ 40شاگرد وَ استادِش نَه سَرتَرِه، امّا هرکه تعلیم وِ تربییَتِش کامل وابو، مِی استادِش ایابو.»

41«چِطو پَرِ کَهی نَه مِنِه تییِی کَکات ایبینی، امّا داری نَه که مِنِه تییِۀ خِتِه نیبینی؟ 42چِطو ایتَری وَ کَکات بِگی: "کَکا، بِل پَرِ کَه نَه وَ تییَت دَرارُم"، امّا دارِ درختَه مِنِه تییِۀ خُوت نیبینی؟ ای ریاکار، اَوَل دارِ درختَه وَ تییِۀ خُوت دَرار، اوسِه بِختَر ایبینی تا پَرِ کَه نَه وَ تییِۀ کَکات دَراری.»

دار وِ میوَش

43«هیچ دارِ خوب، میوۀ بَد نییِه وِ هیچ دارِ بَد، میوۀ خوب نییِه. 44هر داری نَه وَ میوَش ایابو بِشناسی. نَه وَ بِتِۀ خار ایابو انجیر چی، وِ نَه وَ بِتِۀ دِرَه، انگور! 45آیَمِ خوب وَ خَزینۀ خوبِ دلِ خُوش، خوبی ایکِنِه، وِ آیَمِ بَد وَ خَزینۀ بَدِ دلِ خُوش، بَدی. سی‌یِکِه زُوون وَ اوچیئی گَپ ایزَنِه که دل وَش لُوریزِه.»

حونۀ ری تَختَه‎بَرد

46«سیچِه مِنَه "آقا، آقا" صیا ایکِنیت، امّا وَ اوچیئی که ایگُم عمل نیکِنیت؟ 47وِه که ایا طِیم وِ گَپَلِمَه ایشنِفِه وِ وَش عمل ایکِنِه، وَ ایشا نِشون اییُم مِی کی یَه. 48وِّ مِی کَسی یَه که سی ساختنِ حونَش، زمینَه چَل کِه وِ پی‌یِۀ حونَه نَه نَها وَ ری تَختَه‎بَرد. وختی سیل اومَه وِ سِیلُو وَ او حونَه زور آوُرد، نَتَرِس وِه نَه بِجُمبَنِه، سی‌یِکِه سِفت ساختَه وابی‌یَه بی. 49امّا وِه که گَپَلِمَه ایشنِفِه امّا وَش عمل نیکِنه، مِی کَسی یَه که حونَشَه بی پی‌یَه، ری خَک بَنا کِه. وختی سِیلُو وَ او حونه زور آوُرد، دَرجا رُمبِس وِ خرابی گَپویی وَجا نَها.»

Currently Selected:

انجیلِ لوقا 6: SLB

Highlight

Copy