انجیلِ لوقا 7

شَفیِ غلامِ افسرِ رومی

1بَعدَ یِکِه عیسی همۀ گَپَلِشَه بِی مردم تموم کِه، وَرگَشت وَ شهرِ کفرناحوم. 2یِه افسرِ رومی، غلامی داشت که سیش مهلی عزیز بی. غلام مریض وِ دَر حالِ مرگ بی. 3وختی افسر دَرموردِ عیسی اِشنُفت، چَنتا وَ شیخَلِ یهودَ بِسی کِه طِیش تا وَش بِخوان بیا وِ غلامِشَه شَفا بییِه. 4اونگَل اومَن طی عیسی وِ مَهلی وَش التماس کِردِن وِ گُتِن: «ای مِرد لیاقَتِ یِنَه دارِه که ای لطفَه وَش کِنی، 5سی‌یِکِه ملتِ ایما نَه دوس داره وُ وِّ بی که کَنیسَه نَه سیمون ساخت.» 6عیسی باشون رَت. وَ نِزِنگِ حونَه که رَسی، او افسر چَنتا وَ دوسَلِشَه بِی ای پِیوم بِسی کِه طی عیسی: «ای آقا، خِتَه زحمَت مَیِه، سی‌یِکِه لیاقَت نیارُم بییِی وَ حونَم. 7سی هَمیو، حتی خِمَه لایق نُونِسُم بیام وَ خِذمتِت. فقط کلامی بِگُ که غلامُم شفا ایگِرِه. 8سی‌یِکِه مِ خُوم کسییَم زِرِ اقتدارِ کسی دَ. سربازَلی هم زِرِ اقتدارِ خُوم دارُم. وَ یکی ایگُم، "بِرَه"، ایرَه؛ وَ یکیدَه ایگُم، "بیو"، ایا. وَ غلامِ خِم ایگُم، "یِنَه وَجا بیار"، وَجا ایارِه.» 9عیسی وختی یِنَه اِشنُفت، وَش حیرت‌زَیَه وابی وِ ری کِه وَ جمعیتی که وَ دینِش اییومَن وِ گُت: «وَ ایشا ایگُم، ایطو ایمونی حتی مِنِه قومِ اسرائیل هم نَدییِمِه.» 10وختی قاصِدَل وَرگَشتِن وَ حونه، غلامَه سالم جُسِن.

زنده کِردن کِرِ یِه بیوه‌زن

11بعدَ یِچِی، عیسی رایی شهری وابی وَ نوم نائین. شاگردَل وِ جمعیتِ مَهلی زیادی هم باش بییِن. 12وَختی که عیسی رَسی وَ نِزِنگِ دروازۀ شهر، دی جنازه‌ای نَه ایبَرِن که تِنا کِرِ یِه بیوَه‌زن بی. عِدۀ زیادی وَ مردم شهر هم بِی او زن بییِن. 13وختی عیسیِ خداوند او دِی نَه دی، دلش سیش سُت وِ گُت: «مَگریو.» 14اوسِه عیسی رَت نِزِنگ وِ دَس نَها وَ تابوت. کَسَلی که تابوتَه ایبُردِن، وِیسان. عیسی گُت: «ای جَوون، وَ تِ ایگُم، وَری!» 15او مُردَه راس نِشَس وِ شروع کِه وَ گَپ زَیَن! وِ عیسی وِّ نَه دا وَ دَسِ دِیش. 16همه زَلَه‌تَرَک وابی‌یِن وِ خدا نَه سِتایِش ایکِردِن وِ ایگُتِن: «پیغمبری گَپو مابین ایما ظهور کِردِه.» وِ هَمیطو ایگُتِن: «خدا وَ دییَنِ قوم خِش اومَیِه.» 17خَوَر ای کارِ عیسی مِنِه سرتاسرِ یهودیَه وِ تمومِ دُوروبال او مَنطَقَه پیچِس.

سئوالِ یحیی

18شاگردَلِ یحیی وِّ نَه وَ تَمومِ ای اتّفاقَل باخَوَر کِردِن. پَ یحیی دِتا وَ شاگِردَلِشَه خواس 19وِ بِی ای پِیوم بِسی کِه طی عیسِی خداوند: «مَه تِ هَم وِّنی که ایبایِس بیایِه، یا بَندیرِ یِکیدَه بِیم؟» 20وختی او دِ نَفَر اومَن طی عیسی وَش گُتِن: «یحیِی تعمیددَهندَه ایما نَه بسی کِردِه تا وَت بِپُرسیم مَه تِ هَم وِّنی که ایبایِس بیایِه، یا بَندیرِ یِکیدَه بِیم؟» 21مِنِه همو ساعت، عیسی عِدۀ زیادی نَه وَ مریضی‌یَل وِ دَردَل وِ روحَلِ ناپاک شفا دا وِ تییِی کورَلِ زیادی نَه، بُر کِه. 22عیسی مِنِه جوابِ او قاصِدَل فرمایش کِه: «بِرِیت وِ اوچیئی که دییتِه وِ اِشنُفتیتِه سی یحیی تعریف کِنیت، که تییِۀ کورَل بِر ایابو، شَلَل رَه ایرَن، جذامی‌یَل شفا ایگِرِن، کَرَل ایشنِفِن، مُردِه‌یَل زندَه ایابون، وُ وَ فقیرَل خَوَرِ خَشِ پادشاییِ خدا اعلام ایابو. 23خَش وَ حالِ کسی که وَم شک نَکِنِه.»

24وختی قاصِدَلِ یحیی رَتِن، عیسی درموردِ یحیی شروع کِه وَ صُبت کِردَن وُ وَ جماعت گُت: «سی دییَنِ چه وَ بیابون رَتَه بیئیت؟ سی دییَنِ نِی‌ای که وَ باد ایجُمبِه؟ 25پَ سی دییَنِ چه رَتیت؟ مِردی که جومه‌ای مَلمَل وَ وَرِشِه؟ سِی کِنیت، اونگَلی که جومِه‌یَلِ شاهانَه ایکِنِن وَرِشون وِ مِنِه زرق و برق زِندِیی ایکِنِن، مِنِه قَصرَلِ پادشایَلِن. 26پَ سی دییَنِ چه رَتَه بیئیت؟ سی دییَنِ یِه پیغمبر؟ بَلِه، وَ ایشا ایگُم کسی که وَ پیغمبر هم بالاتَرِه. 27وِّ هَمو مِردی یَه که درموردِش مِنِه نوشته‌یَلِ مقدس اومَیِه که:

«"ایسِه قاصدِ خِمَه نِهِی تِ بِسی ایکِنُم

که رَتَه سیت آمایَه ایکِنِه."

28وَ ایشا ایگُم که کسی گَوترَ یحیی وَ دِیش زادَه نَوابی‌یِه؛ امّا کِچِلوترین مِنِه پادشاییِ خدا، وَش گَوتَرِه.»

29تَمومِ مردِمونی که ای گَپَلَه اِشنُفتِن، حتی خَراجگیرَل هم، تصدیق کِردِن که رَه خدا حَقِه، سی‌یِکِه وَ دَسِ یحیی غُسلِ تعمید گِرُتَه بییِن. 30امّا عالِمَلِ فرقۀ فَریسی وِ فَقی‌یَلِ شریعت بِی تعمید نَگِرُتَن وَ دَسِ یحیی، خواس خِدا نَه سی خِشون رَد کِردِن.

31اوسِه عیسی گُت: «پَ، بِگُم مَردِمونِ ای نَسل شَبی چِنِن؟ اونگَل مِی چِنِن؟ 32مِی بَچه‌یَلی یَن که مِنِه بازار ایشینِن وِ یَکَه صیا ایکِنِن، ایگُن:

«"سیتون نی زِیم، نَوَربازیئیت،

شَربَه خُوندیم، نَگِریوِسیت."

33سی‌یِکِه یحیِی تعمیددَهندَه اومَه که نَه نون ایخَه وِ نه شراب اینوشی؛ ایشا گُتیت، "دیو دارِه." 34کِرِ انسان اومَه کِه ایخَرِه وِ اینوشِه؛ ایشا ایگیت، "سِیلِش کِنیت، مِردی یَه کِمو وِ عرق‌خَر، رفیقِ خَراجگیرَل وِ گِناکارَل." 35امّا دِرِسی هَر حِکمتی نَه، نتیجه‌ای که وَ بار ایارِه نِشون اییِه.»

بَخشییَه وابی‌یَنِ زَنی بَدکارَه

36یِه رو یکی وَ عالِمَلِ فَریسی، عیسی نَه دعوت کِه سی خَردَنِ غذا. پَ عیسی رَت وَ حونِی او فَریسی وِ نِشَس سرِ سفرَه. 37مِنِه او شهر، زنی بَدکارَه زندِیی ایکِه که وختی اِشنُفت عیسی مِنِه حونِی او فَریسی مِمونِه، ظرفِ مَرمَری، پُر وَ روغَنِ خوشبو، بِی خِش آوُرد 38وِ درحالی که ایگِریوِس وِیسا پَسِ سر عیسی، طی پایَلِش. اوسِه بِی خَرسَلِش پایَلِ عیسی نَه شُس وِ بِی پَلَلِش اونگَلَه خشک کِه. اوسِه پایَل عیسی نَه بوسی وِ روغَن مالی کِه. 39وختی فَریسیِ صاحاب حونَه یِنَه دی، بِی خُوش گُت: «اَر ای مِرد وَراسی پیغمبر بی، دونِس ای زن که دَسَش ایزَنِه کیَه وِ چِطو زنی یَه، دونِس که یِه زنِ بَدکارَیَه.» 40عیسی وَ فَریسی گُت: «ای شمعون، ایخوام یِه چی وَت بِگُم.» شمعون گُت: «بفرما، استاد!» 41عیسی گُت: «کسی وَ دِ نَفر طلب داشت: وَ یکی پونصد دینار، وَ یِکیدَه پنجاه دینار. 42امّا سی‌یِکِه چیئی نَیاشتِن وَش بِییِن، قرضِ هر دِتاشونَه بَخشی. ایسِه وَ گَمون تو کویَکی وِّ نَه بیشتر دوس دارِه؟» 43شمعون جواب دا: «وَ گَمونُم وِه که قرضِ بیشتری داشت وِ بَخشییَه وابی.» عیسی گُت: «قضاوَتِت دِرِسِه.» 44اوسِه ری کِه وَ طَرف او زن وُ وَ شمعون گُت: «ای زَنَه ایبینی؟ مِ اومَم وَ حونِی تو، تِ سی شُسَنِه پایَلُم اُو ناوُردی، امّا ای زَن بِی خَرسَلِش پایَلِمَه شُس وِ بی پَلَلِش خشک کِه! 45تِ ری مِنَه بوس نَکِردی، امّا ای زن وَ موقِی اومَیَنُم یِه‌دَقَه وَ بوسییَنِ پایَلُم دَس نییَگِرِه. 46تِ وَ سرُم روغن نَزِی، امّا وِّ پایَلِمَه روغَن مالی کِه. 47پَ وَت ایگُم، محبت زیاد وِّ سی یِنِه که گِنایَلِ زیادش آمرزییَه وابی‌یِه. امّا وِه که کمتر آمرزییَه وابو، کمتر هَم محبت ایکِنِه.» 48پَ عیسی ری کِه وَ او زَن وِ گُت: «گِنایَلِت آمرزییَه وابی!» 49اوسِه اونگَلی که بِی عیسی نِشَسَه بییِن سَرِ سُفرَه وَ یَک گُتِن: «یِه کیَه که حتی گِنایَلَه هم اِییامُرزِه؟» 50عیسی وَ او زن گُت: «ایمونِت تِنَه نجات دایِه، بِرَه وَ سلامت!»

Currently Selected:

انجیلِ لوقا 7: SLB

Highlight

Copy