کارَلِ رسولَل 3

شَفِی گِدِی شَل

1یِه رو پطرس وِ یوحنا مِنِه ساعتِ سه بعدَظهر که وختِ دعا بی، ایرَتِن وَ طرفِ معبدِ خداوند. 2مِنِه او موقَع، چَن نفر، مِردی نَه که شَلِ مادرزا بی ایاوُردِن. اونگَل هر رو وِّ نَه اینَهان طِی دَروازۀ معبد که نومِش «دروازۀ قشنگ» بی تا وَ مردمی که ایومَن مِنِه معبد، صَدَقَه بِسونِه. 3وختی او مِرد، پطرس وِ یوحنا نَه دی که ایخواسِن بِرَن مِنِه معبد، وَشون صَدَقَه خواس. 4پطرس وَش تییَه دُت وِ یوحنا هَم هَمیطو؛ پطرس گُت: «سِیلَمون کُ!» 5پَ او مِرد سِیلَشون کِه وِ بَندیرِ یِه بی چیئی وَش بییِن.

6امّا پطرس وَش گُت: «مِ طلا وِ نُقرَه نَیارُم، امّا اوچیئی که دارُم وَت اییُم! وَ نومِ عیسی مسیحِ ناصری وَری وِ رَه بِرَه!» 7اوسِه دَسِ راسِ مِردَ گِرُت وُ وِّ نَه وَریسَنا. هَمو دَقَه پایَل وِ بینی‌یَلِش جون گِرُت 8وَ جاش بُل کِه وِ وِیسا وَ ری پایَلِش وِ قَیَم وَگِرُت. اوسِه بِی چَنگِ پُل وِ مِنِه حالی که خدا نَه شکر ایکِه، بِی اونگَل رَت مِنِه معبد. 9تَمومِ مردم وِّ نَه دییِن که رَه ایرَه وِ خدا نَه شکر ایکِنِه، 10وِ اِشناختِنِش هَموِّنِه که نِهاتَر سی اِسَیَنِ صَدَقَه اینِشَس طِی «دروازۀ قشنگ» معبد؛ پَ، وَ اوچیئی که وَ سَرِش رَتَه بی، حیرت‌زَیَه وابی‌یِن وِ ماتِشون بُرد.

تعلیمِ پِطرُس مِنِه اِیوونِ سِلِیمون

11مِنِه هَمو حال که او مِرد بِی پطرس وِ یوحنا ایرَت وُ وَشون جیا نیابی، تمومِ جماعت حیرت‌زَیَه مِنِه «اِیوون سِلِیمون» دُویِسِن وَ طرفِشون. 12وختی پطرس یِنَه دی، ری کِه وَ جماعت وِ گُت: «ای مِردَلِ اسرائیلی، سیچِه وَ ای کار مِنِه حیرَتیت؟ سیچِه وَ ایما زُل زِیتِه، طوری که انگار بِی زور وُ دینداریِ خِمون، کاری کِردیمِه تا ای مِرد بِتَرِه رَه بِرَه؟ 13خِدِی ابراهیم، خِدِی اِسحاق، خِدِی یعقوب، خِدِی بُویَلِ ایما، خادمِ خُوش عیسی نَه جلال دا، هَموِه که ایشا تسلیمِش کِردیت وِ مِنِه حضورِ پیلاتُس حاشاش کِردیت، هَرچَن نظرِ پیلاتُس یِه بی که آزادِش کِنِه. 14ایشا بیئیت که دَسِ رَد وَ سینۀ او قدّوس وِ صالح زِیت وِ خواسیت قاتلی وَ جاش وَتون بَخشییَه وابو. 15ایشا سرچشمۀ حیاتَه کُشتیت، امّا خدا وِّ نَه وَ مِلِی مُردِه‌یَل زِندَه کِه وِ ایما شاهدِ یِنیم. 16وُ وَ خاطرِ ایمون وَ نومِ عیسی، نومِ عیسی وَ ای مِردی که ایبینیت وِ ایشناسیت، جون بَخشییِه، وَراسی، او ایمونی که وَ واسطۀ عیسِی خداوندِه، ای مِردَ وَرِ تییَتون ساق‌وُسلامت کِردِه.

17«وِ ایسو ای کَکایَل، دونُم کارِ ایشا وَ ری نایونی بی دِرُس هَموطو که گَپویَلِتون هَم کِردِن. 18امّا خدا وَ هَمی رَه اوچیئی نَه که وَ زُوونِ تَمومِ پیغمبرَل گُتَه بی، اَنجوم دا: یِنَه که مسیحِ وِّ عذاب ایکَشِه. 19پَ توبه کِنیت وُ وَ طرفِ خدا وَرگَردیت تا گِنایَلِتون پاک وابو وِ روزَلِ آسودِه‌ای وُ شایی وَ حضورِ خداوند سیتون بِرَسِه. 20تا خدا، مسیحِ موعودَ که وَ نَهاتَر سیتون قرار دایَه بی، بِسی کِنِه، یعنی هَمو عیسی 21که بایِس آسمون پذیراش ایابی تا موقِی که هَمَه چی، بنا وَ اوچیئی که خدا وَ یِکِلی نَهاتَر وَ زُوونِ تَمومِ پیغمبرَلِ مقدّسِ خُوش گُتِه، زِندَه وابو. 22موسی فرمایش کِردِه: "خداوند خِدا، وَ مِلِی کَکایَلِتون پیغمبری سیتون بِسی ایکِنِه مِی خُوم، وِ ایشا هر چیئی که وَتون ایگُ خوب گوش کِنیت. 23هرکه وَ او پیغمبر گوش نَیِه، وَ مِلِی قومِ نابود ایابو."

24«سَموئیلِ پیغمبر وِ تَمومِ پیغمبَرَلِ بعدَ سَموئیل هَم، هَمَشون یِه صیا درموردِ ای روزَل گُتِنِه. 25ایشا اولادَلِ پیغمبرَلیت وِ وارِثَلِ او عهدی که خدا بِی بُویَلِتون بَس. وَ خاطرِ او زَمونی که وَ ابراهیم گُت: "وَ نسلِ تو تَمومِ قومَلِ ری زمین برکت ایگِرِن." 26موقِی که خدا خادمِ خُوش عیسی نَه انتخاب کِه، اَوَل وِّ نَه بِسی کِه طِی ایشا تا ایشا نَه برکت بییِه، تا هر کویَکی وَ ایشا نَه وَ رَیَلِ شَر وِ گَندِ خِتون وَرگَردَنِه.»

Currently Selected:

کارَلِ رسولَل 3: SLB

Highlight

Copy